Ewe Tong Napanap
Emon me emon kich sipwe feitto ren Kraist fiti ach sise mochen manaueni An we kapas allim.
Ekkewe pukefel ra kapas usun emon onuwon chon nemenem mi pisekisek ewe, a sa ngeni Jises, fotopukutiw ren pechen fiti menin, a eisini ewe Master, “Met upwe fori pwe upwe aani ewe manau ese much?” Mwirin an a nenengeni ew tamen tetenin annuk ei aramas a nikitu ne aponueta, Jises a ureni ei mwan pwe epwe amomono piseskin meinisin, epwe ngeni ekkewe mi osupwang mwonian , mwarei an irapenges, me tapweno mwirin. Ewe pochokunen mochen fori ei kapas a fori an ewe onuon mei nap—inamo ika ipwan kewe mi momong—a nuokus, a feinno towaw non an netipengaw pokiten, ewe pukepin a apasa, “A fokkun pisekisek.”1
Mi fat, pwe ei ew auchean porous ussun aean tufichin me aninisin ekkewe mi osupwang. Nge nengeni ei porous usun unusen netip, ese ponueta an epwe fori ekkewe mettoch mi murino. Pisekisek ika esap pisekisek, emon me emon kich sipwe feitto ren Kraist fiti pwan ewe chok sise mochen aponueta An we kapas allim ewe onuon a osukusuku. Non ewe kapasen sarafo ikenai, sipwe afata kich meinisin “fiti unusan.”2
Non ew sokkun napanapen an chemeni kapasan, C. S. Lewis a ekieki ewe Samon a apasa ngeni kich fan ekkoch usun ei: “Use mochen … om fansoun … [ika] noum mwoni … [ika] om angang, [ussun nonnon] Ua [chok] mochen en. [Ei ira ka opokopoku.] Use mochen upwe pokuono efoch panan ikei me efoch panan ikana, u mochen … unusen [ewe mettoch] epwe koturutiw. [Me ena ni.] Use mochen upwe kupenes [i], ika anapanapa, ika [amasowa]. [U mochen] utau. [Ennetin, u mochen [kopwe ngeniei inisum] meinisin. … [Me] upwe ngonuk ew minefon inis. Non ennetin, upwe ngonuk Inisi; ai … mochen epwe winiti [om mochen].”3
Ekkana repwe afanafan ngeni kich non ei mwichenap repwe apasa, pwan non ew an, met Kraist a apasa ngeni ewe mwan mi pisekisek: “Feitto ren om Chon Amanau. Feito ren unusan me unusen netip. Mwarei om irapenges, ina mwo ika mi chou, me tapweno Mwirin.”4 Repwe apasa ei ren ar sinei pwe non ewe mun Kot, ese wor nesopun koukun, ese wor poputan me kounon, ese wor niwin sefan. Ngeni ekkewe ra tingor ar repwe peiaseni iner me semer ra mano ika apasa ar kapong ngeni ekkoch chon ar famini, an Jises ponueni a pochokun me wenechar. Nikiti ngeni ekkoch,” A apasa. “Ese wor emon aramas, epwe wata poun won ewe watten wa, me kunusefan, mi murinno ngeni ewe muun Kot.”5 Nupwen och mettoch mi weires a tori kich, usun chok och mettoch mi aweires ngeni netipach, chemeni pwe ewe nukuchar sia pwonei faniten Kraist ina ewe akauchean wenecharen manauach. Me, ika mo Isaiah a afata sefani kich pwe mi wor “ese fiti mwoni me ese fiti niwin.”6—sipwe moneta, aea an T. S. Eliot kapas, an epwe wor momon “esap kisiseni meinisin.”7
Ewer, kich meinisin a wor ekkoch ach oruni ika mwan me pusin porousach a tongeni epeti kich ach sipwe ounusano ne mwono non pekin ngun non ei angang. Nge Kot i Samach me a murinno ne omusano me nemenono ekkewe tipis sia nikitano, meni pokiten sia ngeni I watten mokutukut non ach fori. Iwe nge, mi wor aninis mi fokkun auchea ren kich meinisin ese nifinifin inet chok sia mefi ach sipwe ekesiwini napanapen manauach. Kot a ngeni Saul “ew netip mi fo”8 Ezekiel a kori meinisin aramasen Israel repwe oturano nonomur me nomw me “fori … ew minefon netip me ew minefon ngun.”9 Alma a kokko ren ew “wachemuken ekesiwin”10 minne epwe efisata ewe ngun an epwe chouno, me pusin Jises a afanafana pwe “ese wor emon epwe tongeni kuna ewe muun Kot ika ese upusefan.”11 Mi fat pwe ewe tufichin siwin me manaueni ew kinikin mi fefeitan me nein ekkewe niffang seni Kot ngeni ekkana ra kukkuta.
Chiechiach, non manauach ikenai sia kuna meinisin sokkun manauen inet me kinikinin inet, pea me kinikinin pea, aea fengen met ach mochen me kich ion me non muun fiti naafochun chiechiengaw an epwe pwen fetan. President Russell M. Nelson’s a apasa, meni sipwe eisini kich ika ew manau mi “tekia me pin”12 sipwe manaueni, ew mettoch sipwe tongeni kuta? Nupwen sia fori, sipwe forochu ach sipwe chemeni pwe ena amwararen fansoun non ewe Puken Mormon non minne ekkana aramas ra eis me ponueni ena kapas eis ra fokkun tipeew ngeni:
“Iwe non ewe fansoun pwe ese wor anini fengen nefinen ekkewe aramas, non unusen ewe fonu; … pokiten ewe tongen Kot minne a nonnom non netipen ekkewe aramas.
“Iwe ese wor nonowo, are anini, are fitikoko, are nisou, are chofona, are nii manau, are och sokkun mocheisou; iwe ennetin ese tongeni wor ew aramas mi kon pwapwa seni ir me nein ekkewe aramas meinisin ekkewe ra fen for me ren poun Kot.
“Iwe ese wor chon sona, are chon nii manau, ese pwan wor chon Leiman, are och sokofesenin kinikinin aramas; nge ra chok ew, ekkewe noun Kraist, me chon muuni ewe muun Kot.
“Iwe ifa me feiochur!”13
Met ewe ki ngeni ei mwitirin fefeita, non ei manau? A fen foruno non ewe kukun fos non ew kapas: “Ewe tongen Kot … a nonnom non netipen ekkewe aramas.”14 Nupwen ewe tongen Kot a fen foruno ngingin non pusin manauach, ren nefinach fengen me nesoponon ach memef ren meinisin aramas, mwirin minenomun sokofesen, oukukun esisin, me ekkewe kinikin forien aramas ra poputa ne morono me kinamwe a napeno. Ina met a fis non nouch ewe awewen Puken Mormon. Ese chiwen wor kewe Laminites, ika Jacobites, ika Josephites, ika Zoramites. Ese mo nge wor “nenien awowra porous”. Kewe aramas ra fen angei ew chok minefon tekian nonnomun ika ir ion. A apasa, epwe pwano pwe ir meinisin, “ekkewe semirit noun Kraist.”15
Ewer, sia porous ikei ussun ewe aewin wachemuken annuk a kawor ngeni ewe faminien aramas—ar repwe tongei Kot, esap wor tipemwaramwar ika pwon, awora ew nukunuk ngeni I ren sokkun nonnomoch ika wis.16 Ei tong an Kot iei ewe watten annuk non unusen fonufan. Nge ewe ewin watten ennet non unusen fonufan pwe Kot a tongei kich ina ewe ennetin—ren unusen netipan, ese wor eimumu me niamam, ren ekkei meinisin An ekiek, ngunun, netipan, me an pochokun. Iwe nupwen ekkana pochokun seni Netipan me netipach ra chufengen ese wor ne kaukun, mi wor ew nouwaten ekesiwin non pekin ngun, manamanen aramas. Mwirin, ussun an Teilhard de Chardin a makkei, “ren [ewe] oruen fansoun non uruon fonufan, aramas repwe kuna ekei.”17
Iwe mwirin, me wesewesen mwirin, sia tongeni aponueta ewe oruen wachimuken annuk non napanapan rese pwano are kisikis. Ika ach tongei Kot a naf ngeni ach sipwe unusen nukunuk non I, I epwe ngeni kich ewe tufich, ewe tongeni, ewe mochen, me ewe an ngeni ach sipwe tongei chon oruch me pusin kich. Mwirin meni sipwe tufichin apasa sefani, “ennetin ese tongeni wor emon aramas mi kon pwapwa seni ir me nein ekkewe aramas meinisin ekkewe ra fen for me ren poun Kot.”18
Pwi me fefinei, Ua iotek sipwe emiwirinono met ewe onuwon mi pisekisek a nipwakingaw non, pwe sipwe mwarei ach irepangesin Kraist, ina mwo ika mi aweires, anongonong won ewe osukosuk me anongonong won met mi fis. Ua pwarata pwe nupwen sia finata ach sipwe tapweno mwirin I, ewe aan epwe, eu aan ika pwan eu, sipwe pasini eu aanen epa mwaramwarin ira fonufon me efoch irapenges minen Rom. Ina mo ika nouch ewe onuon chon nemenem mi pisekisek, i ese naf an pisekisek an epwe moni anen an epwe tou seni ew fansoun chufengen fiti ekana esisin, me kich sise pwan tongeni. Ren ewe feiochun angei ewe a kon napanap me nein pisekich—ewe niffangen manau ese much—a ekis naf ach tingor ach sipwe pochokunen soposopono ne tapweno mwirin ewe Pris mi Nap ren Wisach, nouch Fuen Ran me King Ua pwarata fiti Amaleki mi mwonomwon seni nom pwe emon me emon kich sipwe “asorano unusen [ngunuch] pwe ew asor ngeni i.”19 Ren pwan ach pochokunen ekiek, pochokunen nukunuk sia kon:
Non iten Jises Kraist mi pin, amen.