Awora Fansoun ngeni ewe Samon
Ua sio ngeni kemi ikenai pwe oupwe ungeni sossotun fonufan ren ami awora fansoun ngeni ewe Samon non manauemi—iteiten ran.
Pwii me Fefinei achengicheng, ren ru ran sia fen kaeo och me ren chon angangen ewe Samon ekkewe ra fen achocho ne kutta ar repwe sinei met I a mochen repwe apasa.
Sia fen angei met sipwe siwini non ekkewe wonu maram mwirin. Iwe iei ewe kapaseis, ifa usun sipwe sokkono pokiten met sia fen rongorong me mefi?
Ewe pandemic a fen pwari ifa usum mwitirin manau mi tongeni siwin, non fansoun nonnomuch sise tongeni nemeni. Nge inamo, mi wor chommong mettoch sia tongeni nemeni. Sia forata met mi auchea ngeni kich me apungano ifa usun sia tongeni aea ach pochokun, fansoun, me pisek. Sia apungano ifa usun sipwe foffor ngeni ekkoch. Sia finata ekkewe ir sipwe kun ngeni ren ennet me emwen.
Ekkewe mongungun me echimwen fonufan ir mi emeseik me chommong. Nge chommong mongungu ir mi orukoruk, etipis me ra tongeni uwei kicheno seni ewe aanen pwon. Ach sipwe epinengaw seni netipengaw epwe fis, ua sio ngeni kemi ikenai pwe oupwe ungeni sossotun fonufan ren ami awora fansoun ngeni ewe Samon non manauemi—iteiten ran.
Ika napengeni ekkewe porous oua angei seni won pekin aporousen won media, ami tufichin rongorong mongungun ewe Ngun epwe kisino. Ika ouse pwan kutta ewe Samon non iotekin iteiten ran me kaeo ewe kapas allim, oua mut ngeni inisimi repwe mecheres ngeni ekiek mi emeseik nge rese ennet. Pwan mwo ekkewe Souneng mi nikitu ir mi tongeni rikino ren tinisukun sossotun fonufan.
Pwii me fefinei achengicheng, Ua sio ngeni kemi pwe oupwe awora fansoun ren ewe Samon! Pwisin fori ami nongonongen ngun epwe nukuchar me pochokun non fansoun nangatam ren ami fori ekkena mettoch mi mut ngeni ewe Ngun mi Fel epwe nonnom remi fansoun meinisin.
Ousap tunano ewe ennet minne “ewe Ngun a kapas … usun mettoch usun wesewesen nonnomur, me usun mettoch usun repwe wesewesen fis.”1 “Epwe pwar ngenikemi mettoch meinisin met oupwe fori.”2
Ese wor mettoch a etiwa ewe Ngun nap seni an siwini om ononga ngeni Jises Kraist. Kapas usun Kraist, pwapwa non Kraist, kametip won ewe kapasen Kraist, me nikitu fiti tipepos non Kraist.3 Fori ami Sabbath epwe amwarar nupwen ami fen ngeni I, angei ewe sakrament, me epini Ranin we.4
Usun ua affataochu nesosor ewe, ouse mochen awora fansoun ren ewe Samon me non Imwan we mi pin. Ese wor mettoch epwe apochokuna ami nongonongen ngun usun angangen tempel me fenin tempel.
Sia kinisou ngeni ir meinisin ekkewe ra angang won ach kewe minafo tempel. Ir ra kouta won unusen ewe fonufan. Ikenai ua men unusen kinisou ai upwe aporousa met aua ekiekin kouta me ekkoch temple ikeweie ika ikewe mi kaneto ian non ekkewe ekkoch neni : Kaohsiung, Taiwan; Tacloban, Philippines; Monrovia, Liberia; Kananga, Democratic Republic of the Congo; Antananarivo, Madagascar; Culiacán, Mexico; Vitória, Brazil; La Paz, Bolivia; Santiago West, Chile; Fort Worth, Texas; Cody, Wyoming; Rexburg North, Idaho; Heber Valley, Utah; me enan tempel non Provo Utah me mwirin efeiochun ewe tempel Orem Utah.
Ua tongei kemi, achengicheng pwi me fefinei. Ewe Samon mi sine kemi me tongei kemi. I ami we Chon Amanau me ami Chon Angasono. I a emweni me ouroura An Mwichefen. I epwe emweni me ouroura en non pwisin manauom ika kopwe awora fansoun ngeni I I non manauom—iteiten ran.
Amo Kot epwe nom remi tori ach chu sefan, ua iotek non ewe it mi pin iten Jises Kraist, amen.