Ewe Nuku ne Tungor me Mwirin Anganga
Nuku non Jises Kraist ina ewe ki ach sipwe angei ekkewe pwaratan ennet.
Pwii me fefinei achengicheng, uwa unusen kinisou ren ai upwe kapas ngeni kemi non ei mwichen nekunionun Ammon ren ei mwichenap. Non an pwopwutani ei mwich iei nesosor, Preseten Russell M. Nelson a apasa pwe “unusechun pwaratan ewe kapas eis non netipemi epwe fori ei mwichenap epwe namwotech me esapw menukuno. Ika kose mwo kutta ewe aninisin ewe Ngun mi Fel an epwe anisuk om kopwe rong met ewe Samon a mochen kopwe rong non ekkei ru ran, upwe tingoreok kopwe fori iei.1 Ngang uwa sotuni ne kutta ena feioch ai upwe amonata pwe upwe angei pwarata fan iten ai ei chuto remi. Ai iotek pwe oupwe angei ena pwarata seni Kot.
Ewe anen ach sipwe angei pwarata seni Kot ese mwo fen siwin seni ekewe fansoun an Adam me Eve. A chok nonno ren meinisin mi iteni chon angang ngeni ewe Samol seni nepwopwutan non ekei raan. Mi chok nonno ren en me ngang. Mi fis iteitan ren ach anganga pekin nuku.2
Ewe enuwon Joseph Smith a wor an nuku mi nafen an epwe kapas eis usun Kot, a nuku pwe Kot epwe penueni mwochenin netipan. Ponuwan ewe a siwini fonufan. A mwochen epwe sinei meni mwichefen epwe fiti an epwe nimeti tipisin. Penuwan ewe a angei a epechekuna an epwe sopweno an kapas eis me anganga ewe kinikinin pwarata a fen keran pwopwuta.3
Omw sine a tongeni epwe ina usun non ei mwichenap. A wor omw kapas eis ekkewe ka kutta penuwan. A wor omw nuku a naf omw kopwe anean pwe kopwe angei penuwan seni ewe Samol meren Neun kewe chon angang.4 Ese wor omw tufichin neuwomong ne tungor penuwan seni ekkewe chon afanafan, nge ka tongeni tungorei Somom mi tong non iotek.
Ngang uwa sinei pwe penuwan repwe feito ar repwe wene ngeni omw mwochen me om moneta non pekin ngun. Ika ka mwochen penuwan ew mi euchea ngeni nonomwum ika ekoch, ewe penuwan epwe chok feito. Iwe, ina mwo, kopwe tongeni angei—usun chok Joseph Smith—ewe penuwan pwe epwe nikitu.5
Ika omw nuku non Jises Kraist a fori an netipomw epwe tipetekison ren foforun An Achasefan, epwe wateno omw kopwe mefi ekkewe mongunungunun ewe Ngun non penuwen omw kewe iotek. Ai sinei won winikapei pwe ewe mosonoson, kukkun mongungu mi fat me pwano non ai ekiek nupwen ngang uwa mefi ew mosonoson ese muuch me kun ngeni netipen ewe Samol. Ena memefin aramas epwe awewei usun “Esapw netipei, nge netipan, epwe fis.”6
Ei angangen pwarata ina pwopun kopwe rongorong chon afanafan non ei mwich met a iteni ewe kapasen Kraist.7 Pwarata a feito ngeni kich non kinikinin usun met kich sia achocho ne kutta ach sipwe angei kapasen Kraist non netipach me fori non manawach.
Ka chechemeni seni ewe Puken Mormon usun Nifai a aitikich pwe nuku non Jises Kraist ina ewe kien pwaratan ewe ennet me kien an epwe wor ach apinukunuk pwe kich sia tapweno mwirin an ewe Chon Amanau aurour. Nifai a makei kei kapas chommong ier me mwen uputiwen Jises Kraist non manauan inis:
“Chon nang ra kapas me ren ewe manamanen ewe Ngun mi Fel; ina minne, ra apasa ekkewe kapasen Kraist. Ina minne, ua apasa ngenikemi, kametip won ekkewe kapasen Kraist; pun nengeni, ekkewe kapasen Kraist repwe erenikemi mettoch meinisin met oupwe fori.
“Ina minne, iei mwirin ua fen apasa ekkei kapas, ika ousap tongeni weweitir iwe epwe pokiten ouse tingor, ouse pwan fichifich; ina minne, rese katonong non ewe saram, nge oupwe mano non ewe rochopwak.
“Pun nengeni, upwe apasa sefan ngenikemi pwe ika oupwe tonong non me ren ewe aan, me angei ewe Ngun mi Fel, epwe pwar ngenikemi mettoch meinisin met oupwe fori.
“Nengeni, iei ewe nongonong mi ennet an Kraist, iwe esap pwan chiwen wor nongonong mi ennet epwe kawor tori mwirin i epwe pwarano inisin ngenikemi non pekin aion. Iwe nupwen i epwe pwarano inisin ngenikemi non ewe pekin aion, ekkewe mettoch minne i epwe apasa ngenikemi oupwe pii pwe oupwe fori.”8
Ewe Samol epwe apasa mettoch ngeni kich me ren neun kewe Chon Angang ikanai me non kan ran mwach. I epwe urenikich met mettoch sipwe fori.9 Ewe Chon Amanau esapw pwucherasini an annuk ngeni en me ngang. Usun An aiti Elijah:
“Me a apasa, Feino, o uta wochikin ewe chuk me mwen ewe Samol. Me, nengeni, ewe Samol a fetanno, on ew watten me pechekunen asapwan a omoku ekewe chuuk, me atatakisietiw kewe faw memwen ewe Samol; nge ewe Samol ese nomw non ewe asapwan: me mwirin ewe asapwan ew chechchin fonu; nge ewe Samol ese nomw non ewe chechchin fonu:
“Mwirin ewe chechchin fonu ew ekei; nge ewe Samol ese nomw non ewe ekei: me mwirin ewe ekei ew mosonosonun kukkun mongungu.”10
Rongorong ena mongungu epwe feitto seni ach nuku non I. Fiti nafochun nuku, sipwe tungor emwen fiti enetin ach sipwe feino me fori met I a tungor.11 Sipwe fen amarata ewe nuku ach sipwe sinei pwe metuchok I a tungor epwe efeiechu ekoch, me sipwe tongeni unusoch non ewe angang pwokiten An tong fan itach.
Ren ach nuku non Jises Kraist epwe emweni kich ach sipwe tungorei ewe Sam ren penuwan, pwe nuku epwe pwan nukeato an ewe Chon Amanau komoch mi pwetete mi naf ngeni kich ach sipwe rongorong An eureur me mwochen me pwapwan rongosich. Mwirin sipwe kenu ekewe kapasen ewe kon fiti pwapwa , ika mwo ewe angang mi weires: “Echipwer ei angang, ai Kot, ai King.”12
Anapano ach aani ewe kapasen Kraist non manawach me netipach, ina napenon ach mefi tong me weweiti ekewe rese mwo angei feiechun nuku non Jises Kraist ika ra weires ne aponueta. Mi weires ach sipwe aponueta an ewe Samol annuk nge ese wor nuku me epinukunuk non I. Nupwen a pout seni ekkoch ar nuku non ewe Chon Amanau, meni repwe fen pwan awosukosuka An ewe emwen, eita ngeni eech ngaw me ngaw eech.13 Ach sipwe suseni ei mwaan, mi euchea ach angei pwarata epwe nongonong won kewe afanafan an ewe Samol me Neun kewe soufos.
Pwii me fefinei, epwe wor nuku ach sipwe anneasosichi an ewe Samol kewe annuk. Epwe wor nuku non Jises Kraist ach sipwe angang ngeni ekoch fan itan. Epwe wor nuku ach sipwe feino afanafana An ewe kapas anim me fang ngeni aramas ekkewe rese mefi ewe mengungu ren ewe Ngunupin me ekkoch repwe amam ennetin ewe kapas. Nge ren ach sia fori ach nuku non Krais—me tapweno mwirin Neun soufos mi manau—nuku epwe napeno unusen fonufan. Pokiten technology, meni chommong neun Kot aramas repwe rongorong me sinei ussun ewe kapasen Kot non ei wikent nap seni ruu ran non uruon.
Fiti wattenon nuku pwe iei an ewe Samol Mwichefen me mwuu won fonufan, chommong memper ra moni ew ne engon me fang ren aninisin ekewe mi osupwang, me fen pwan mo nupwen kewe memper ra churi sosot won winikaper. Fiti nuku pwe ra keke meren Jises Kraist, misineri won unusen fonufan ra kuna anen ar repwe pwata asan kewe osukosuk ra kuna seni ewe pandemik, ra fori fiti ar porachou me mwareiti. Me non ar fofor mi watteno, ar nuku a pechekuneno.
Ungeni me sosot ra fen epeti maritan nuku. Ena mi fen chok pung iteitan, napenon seni nepwopwutan ewe Niwinsefaniton me ewe pwanon an ewe Samon Mwichefen.14
Met Preseten George Q. Cannon a apasa non fansoun me nom a enet ikanai me epwe tori an ewe Chon Amanau feito epwe pusin emweni an ewe Mwichefen me Neun aramas: “Anneasosichi ewe Kapas anim a wanong [aramas] non chiechi mi fokkun kane fengen me ewe Samol. A efisata ew riri fengen nefinen mwan won fonufan me Ach Chon Fori mi Unusech non nang. A wato ngeni ekiekin aramas ewe memef ren euchean nukunuk non ewe mi Tekia me non An mwochen rongorong ngeni me penuweni ekewe mi nuku non I. Non fansoun sosot me weires ei nukunuk a nununo seni niwinin. Oukosuk epwe tori emon me emon ika won ekkewe aramas, watten osukosuk epwe eniwokusu meinisin aramas epinukunuk repwe usun nge ra peutuno, iwe nge, ikewe aramas ra anomwu inisir ren ewe tufich minne ewe anneasosich ngeni ewe Kapas Annim a uweato, ar nenien uta; pecher a nomw won efou fau ese tongeni mwekut.”15
Ai pwarata pwe ewe achaw sia uta won ina ach pwarata pwe Jises I ewe Kraist, pwe iei An Mwichefen ewe A emweni won winikapan, me pwan Preseten Russell M. Nelson Neun soufos mi manau ikanai.
Preseten Nelson a kutta me angei emwen meren ewe Samol. I ew nenien apiru ngeniei chon kutta emwen fiti an mwochen epwe fori. Ewe pwan chok mwochen anneasosich ngeni an ewe Samol emwen mi nomw non netipen meinisin ekewe rafen afanafan ika repwe afanafan, iotek, ika kon non ei mwichenapen An Mwichefen.
Ngang uwa iotek pwe ekkewe non unusen fonufan ra katon ika eusening ngeni ei mwichenap repwe mefi an ewe Samol tong fan iter. Samach won nang a fen penueni ai iotek pwe ngang upwe mefi ekis an ewe Chon Amanau tong fan itom me An tong fan iten Saman won nang, i ewe Samach won nang.
Ua pwarata pwe Jises kraist mi manau. I ach Chon Amanau me Chon Angasono. Iei An Mwichefen. I meinapan. I, fiti Saman won nang, ra pwa ngeni Joseph Smith non feufeun aramas nein ekkewe ira non New York. Ewe kapas animen Jises Kraist me An ewe pristut ra niwin safan meren ewe chon uwei kapas non nang.16 Ren pechekunen ewe Ngun mi Fen, ngang uwa sinei pwe ei mi enet.
Ngang uwa iotek kopwe pwan kuna ena. Ngang uwa iotek pwe kopwe tungorei Samach won nang ren ewe nuku non Jises Kraist kopwe fori me aponueta omw pwon mi pin pwe epwe mwut ngeni ewe Ngun mi fen epwe nonomw remw. Ngang uwa nikiti ngenikemi ai tong me ai pwarata non ewe it mi pin Jises Kraist, amen.