Ewe Tongen Kot
Samach me ach we Chon Angasano ra efeiochu kich ren ekkewe annuk, me ach aneasosichi Ar kewe annuk, sia kon mefi Ar we tong mi unusoch me nukuchar.
Samach won Nang amen wesewesen tongei kich ren ennetin me unusochun.1 Non An tong, A forata eu kokkot, eu kokkotun ngaseno me pwapwa mi suk ngeni kich meinisin ewe tufich me pwapwa sia mochen sipwe aani, tori ukukun mi pachenong meinisin met a fen wor ren me met mi or.2 An epwe ponueta ei, I afen pwan fangono Noun we mi Achengicheng, Jises Kraist, epwe ach Chon Amanau. “Pun Kot a fakkun tongei chon fonufan, ina minne a fangeno Noun we Anamon, pun iteiten aramas mi nuku i resap mano, nge repwe kuna manau esemuch.”3 An we tong ew an emon Semenap tong ennet—anonou fengeni meinisin nge a ngeni emon me emon kich.
Jises Kraist a aea ngeni ewe Sam pwan ei sakun tong mi unusoch. Nupwen ewe Sam a akkaewin onukunuku An ei auchean kokkotun pwapwa, A kokori emon epwe emon Chon Amanau epwe angasakicheno—ina ewe akauchean kinikin non ena kokkot. Jises a pwusin finieta, “Ngang iei, tinieino.”4 Ewe chon Amanau “ese fori och mettoch tiwenon chok ika pwe epwe efeiochu fonufan; pun i a tongei ewe fonufan, pwan mwo i a pwisin watiw manauan pwe i epwe emerato aramas meinisin ngeni i. Ina minne, i ese annuku emon pwe resap angei an ewe manau esemuch.”5
Ei umoumochun tong a ngeni kich kinamwe me tipepochokun nupwen sia iotek ngeni ewe Sam non iten Kraist. Ese wor me neich rese sisinei Ir A auchea ach sisapw tipemwaramwar ne kokori Kot, ina mwo ika sia mefi pwe sise unusoch. Sia tongeni anonga ach epinukunuk won ewe umoumoch me tufich an Jises Kraist ren an epwe rong.6 Me ika sia nom non ewe tong an Kot, epwe kisikisino ach mut ngeni ekkoch ar repwe emweni kich.
Ewe Tong An Kot Ese Etiwa Tipis; Nge a Fang Ngaseno
Pun an Kot tong a pinuku-meinisin, ekkoch ra apasa pwe ewe,“esekouk,” me non ekiekir, repwe fori ena ekiek pwe wewen pwe an Kot kewe feioch mine “esekouk” me manau esemuch “esekouk.” Resapw ina. Ekkoch ra mochen apasa, “Ewe Chon Amanau a tongei ei usun chok ngang,” me ena mi ennet. Nge Ese tongeni uwei emon me emon neich ngeni An we muu ren usuch iei, “pwe ese wor och mettoch mi nimengaw epwe tonong non, ika nonom ren i.”7 Ach tipis epwe akom musono.
Professor Hugh Nibley a apasa pwe ewe muun Kot ese tongeni epwe engino ngeni ika mo mi wor chok ewe ekkis kukun tipis: “Ewe ekis mwo ngaw wewen ewe pwan ew fonufan ese ngaw ika esap feinfeino. Ewe kukunun engaw me non ew imw, mwicheich, nampa, ika napanap epwe chok fisino ngawen fetanin non ewe fansoun esemuch.”8 Ekkewe annuk an Kot ramen “tichik”9 pun An muu me chon nenian ra tongeni chok uta ika pwe re achocho ne nikitano mi ngaw me finata met mi pung, esap or tipemwaramwaran.10
Elter Jeffrey R. Holland a nengen fichi pwe, “Jises a fokkun weweochuti chommong sokkun ach oreni non manauach sia monukano: pwe mi wor eu watten sokofesenin annukun epichano tipis (ewe mi wor An tufich an epwe fori) me ewe esinesin ren etiwa tipis (minne I esap fokkun mo fan ew epwe fori).”11
Me nukun ach nipwakingaw non manauach, ewer, sia tongeni epinukunuk pwe sipwe angei,“eu it me uta,”12 eu neni, non An Mwichefen me non ewe muun celestial. Mwirin an a afata pwe I ese tongeni epwe omusano me echiki masan ngeni tipis, ewe Samon a pwon ngeni kich:
“Nge nengeni, ion a aier me fori ekkewe annuk an ewe Samon iwe ii epwe musono.”13
“Me fan chommong an nei kewe aramas repwe aier upwe omusano ar atai annuk ngeniei.”14
Aier me chen ra angasano weires:
“Chechemeni ekkewe kapas minne Amulek a apasa ngeni Siesrom, non ewe teninimwen Ammonia; pun a apasa ngeni i pwe ennetin ewe Samon epwe wareto pwe epwe angasa noun kewe aramas, nge esap wareto pwe epwe angaser non ar tipis, nge epwe angaser seni ar tipis.
“Me a wor an manaman a kawor ngeni i seni ewe Sam pwe epwe angaser seni ar kewe tipis pokiten aier; iei minne a tinato noun kewe chon nang pwe repwe afanafana ekkewe porousen apungupungun aier, minne epwe uwei aramas ngeni manamanen ewe Chon Angasano, ngeni amanauen ngunur.”15
Ren ei kokotun aier, ewe Samon a tongeni anapano an umoumoch me nukun an epwe apungur, me “Kot ese kouno an epwe I Kot.”16
Nonnomun ewe fonufan usun ka sinei, mi u ngeni-Kraist, ika “mettoch meinisin tiwenon chok Kraist.” Manauach ikenai a eniwini uruon ewe Puken Mormon usun met sia kaeo pwe ekkewe mi nikatuputup ra fori ngeni ekkoch, apwapwai naisenin nisou, me fori ekkoch sokkun manau mine ese fich ngeni manauach. Sineier “a pwarata non fori ekis tipis”17 ika fen waten tipis, nge ese wor ion epwe awora ngaseno. Ena a chok feito seni chaan ewe Lam. Ewe ochun ewe “ese nifinifin tiwenon Kraist” ika “ese nfinifin tiwenon aier” aramas ra tongeni awora ewe re ekieki pwe ese wor tipis, ika pwe mi wor, esapw wor osukosukan. Use tongeni kuna pwe ena anini epwe wor pochokunan non ewe fansoun kapung.18
Sisap sotuni met ese tufichi non ach sotuni ne pwarata pwe ese wor ach tipis. Me pwan ew, sisap achocho ne sotunu met ese tufich ren ach tonano osukosuken ach kewe tipis won pusin ach. Ach esap ew namanamen pwarata ika ew namanamen ounusochuono nge ew namanamen angasano—angaseno meren Jises Kraist. Ika sia nom nein ekkewe ra mefi niemam, ren An Achasefani ach tipis ra chufonuta won an irapenges, me “fiti an kinasen opup sia chikar.”19
Ewe Ekipwichin Tong an ekkewe Soufos a pwarano ewe Tong an Kot
Ua fen mwar non fansoun nakatam, me pwan mefi ewe ekipwichin tong an ekkewe soufosun Kot non ar kapasen ungeni tipis. Rese pesepes ren ew mochen epwe pwarano osukosuk Ar ennetin mochen a pwano me non ewe tong an Kot; ren ennetin, pwe iei ewe tong an Kot. Ra tongei ekkewe ra titino, ese nifinifin ir io me ese nifinifin ifa usur. Usun chok ewe Samon, Noun kewe chon angang rese mochen emon epwe riaffou ren metekin tipis me ar finata mi mwan.20
Alma a titino an epwe pwarata usun ewe kapasen aier me achasefan ngeni ekkewe aramas mi uren koput ekkewe ra mochen repwe nieno, eriaffou, me nieno ekkewe Chon nuku, pachenong pusin Alma won winikapan. Iwe nge, i a tonger me ekipwichi an epwe amanaua ir. Mwirin an afanafana ewe Achasefan an Kraist ngeni ekkewe aramasen Ammonia, Alma a sio: “Iwe iei, ami pwi, ua anean seni anonnonun kinikinin netipei, ewer, fiti wachimuken aurek pwan mwo fiti metek, pwe oupwe ousening ai kapas, me oturano ami kewe tipis, … pwe oupwe sikita non ewe ranin soponon me tonong non an [Kot] nenien asoso.”21
Non an Preseten Russell M. Nelson kapas, “Amen auchea pokiten sia anononun eteneki meinisin noun Kot semirit iei sia afata An we ennet.”22
Kot A Tongeok; En Mi Tongei I?
Ewe tong an ewe Sam me ewe Noun ese kamo nge mi pachenong epinukunuk me asukusuk. Pwan ew, eniwinsefani, usun an Preseten Nelson afanafan, “An Kot kewe annuk ra unusen pesepes me ren An we tong ese much fan itach me An mochen pwe kich sipwe winiti met sia tongeni winiti.”23
Pokiten Ra tongeok, Rese mochen repwe nikitukono “usun pusin en” Pokiten Ra tongeok, Ra mochen pwe epwe wor om pwapwa me fetanoch. Pokiten Ra tongeok, Ra mochen kopwe aier pokiten ina ewe anen pwapwa. Nge a pusin om finata—Ra aucheani om pungun finata. Kopwe finata om kopwe tongei Ir, om kopwe angang Ngenir, ne aponueta Ar kewe Annuk. Iwe Repwe tongeni ne anapano ar efeiochuk usun chok ar tong ngonuk.
Ar nongonongun osukusuku ach sipwe pwan tong. “Ion ese ani tong ese sinei Kot; pun Kot mi tong.”24 Usun John a makei, “Achengicheng, ika pwe Kot a fokkun tongei kich, a auchea ach sipwe pwan tongei ekkoch.”25
Ewe minen nom presetenin Kinter Unus Preseten Joy D. Jones a achema atun an emon chok fopun an pupunu, i me punuwan we ra koko ngeni ar repwe churi me iamwiri eu famini ewe rese mwo chiwen fafan non chommong ier. A fen chok mwitir fat me non ewe aewin chuno rer pwe rese mochen etiwer. Mwirin ewe memefin ningeringer ar rese etiwer, iwe murin ar tekisosonun iotek me ekipwich, Brother me Sister Jones ra angei ew ponuwan ika pwata ren ar angang me non ei uwekisin seni Doctrine and Covenants: “Kopwe tongei ewe Samon Kot ren unusen netipom, ren unusen ekiekum, ngunum, me pochokun; me non ewe it Jises Kraist kopwe angang ngeni ii.”26 Sister Jones a apasa:
“Aua sinei pwe aua ennetin mochen am aupwe anisi ei famini me angang ngeni noum we pisop, nge aua eisinikem pwusin ika aua angang ren ennetin am tongei ewe Samon. …
Aua poputa ne atapwana am kewe chufengen ngeni ei achengicheng famini pokiten am tongei ewe Samon [nengeni 1 Nifai 11:22]. Am aua fori fan Itan. A fori ewe tinisuk an esap chiwen ew tinisuk. Mwirin chommong maramen am uta mesen naton aewe sam, ewe famini ra poputa ne mutikeminong non. Iwe, aua ikiotek me kakaeo fengen ewe kapas allim. Ew tamen-ennetin chiechi fengen a poputa fis. Aua pini ngeni me tongei I ren am tongei Noun semirit.”27
Non pwarata pwe Kot mi unusen tongei kich non unusochun, meni emon me emon kich sipwe pusin eis, “Ifa ukukun ai tongei Kot? I mi tongeni anongonong won ai tong usun ai anongonong won An?” Esap fen eu ekiek mi echuper ren ach sipwe manau pwe Kot epwe tongeni tongei kich ina mo ika ach nipwakingaw nge pwan pokiten ren met sia winiti? O, ena, I mi tongeni apasa ngonuk me ngeni ei usun met a apasa ngeni Hyrum Smith, awewe ren, “Ngang, ewe Samon, ua tongei ii pokiten wenecharen netipan.”28 Mut ngeni kich ach sipwe chechemeni usun an John ourour : “Pun iei ewe tong an Kot, pwe sipwe aponueta an kewe annuk: me an kewe annuk rese aweires.”29
Ennetin, An kewe annuk rese aweires—ewe chok osokurun. Ra esisina ewe anen echikara, pwapwa, kinamwe, me meseik. Samach me ach we Chon Angasano ra efeiochu kich ren ekkewe annuk, me ach aneasosichi Ar kewe annuk, sia kon mefi Ar we tong mi unusoch me nukuchar.30
Iei met epwe tongeni oukatiw ach kewe fansoun nipwakingaw—ewe tong an Kot. Non ewe amwararen fansoun ewe uruon Puken Mormon mwirin an ewe Chon Amanau afanafan fetan, mi afatetiw pwe “ese wor anini fengen me non ewe neni, pokiten ewe tong an Kot minne a nom non netipen ekkewe aramas.”31 Nupwen sia achocho nikitu ngeni Saion, sia chemeni ewe pwon non Pwarata: “Feioch ngeni ekkewe ra aponueta an kewe annuk, pwe repwe ani pung won ewe iran manau, me repwe tonong non ewe tit ngeni ewe [neni] mi pin.”32
Ua pwarata ewe ennet ren Samach won Nang me ach Chon Angasano, Jises Kraist, me Ar we nukucharen tong esemuch. Non iten Jises Kraist, amen.