Mecheresin Ningoch—Ningochun Mecheres
Ose mochen sipwe manaueni ei kapas allim epwe mecheres nupwen sia mwarenongei wisach seni nang.
Nepoputan
Uwa etiwa emon me emon ami meinisin oua fiti ei mwich.
Ikenai upwe achocho ne awewei usun ruu kinikinin ewe kapas allimen Jises Kraist mi niwinsefanito, fiti mwirin ruanu porausen apochokun minne chon ekkewe Aramas mi Pin non Fansoun Soponon non kinikinin fonufan minne repwe pisekin awewei ren ekkei nongonong. Ewe aewin kinikinin ewe kapas allim mi niwinsefanito—An Kot angangen amanaua me manau esemuch—a nongonong won wis mi kefinita seni nang. Ewe aruwen kinikin a achema ngenikich pwe ewe kapas allim mi fat, auchea, me mecheres.
Wis seni Nang mi kefinita
Pwe sipwe tongeni angei manau esemuch, mi namwot sipwe “feito ren Kraist, me unusoch non ii.”1 Ren ach feito ren Kraist me anisi ekkoch pwe repwe pwan fori iei usun, sia fiti an Kot angangen amanaua me manau esemuch, minne a anongonong won wis seni nang mi kefinita.2 Ekkei wis seni nang mi afat pwe seni ewe kien pristut mine a niwinsefan seni Moses, Elias, me Elijah, mi maketiw 110th kinikin non ewe Doctrine and Covenants3me ewe oruwen watten annuk a ngeni kich seni Jises Kraist sipwe tongei chon oruch usun pusin kich.4 Ir mi nom non ekkewe ruu akkawein peich non ewe minafo General Handbookminne a kawor ngeni memper meinisin.
Ika nupwen ka rongorong ekkewe kapas “General Handbook” ika “wis seni nang mi kefinita” ka chechech ren nuokus ren weiresin me osukosukan, ouse kan mochen ousap nuokus. Ekkei wis mi mecheres, mi asaramano, mi apochokuna, me atufichi. Ikkei ekkewe wis:
-
Manaueni ewe Kapas Allimen Jises Kraist
-
Tumunu Ekkewe mi Osupwang
-
Etiwa Meinisin pwe repwe Angei ewe Kapas Allim
-
Achufengeni Famini ren Fenfeino
Meni oupwe pwan ekieki usur usun ai ekiekir: usun ew mappen aanen ach sipwe niwinsefan ngeni Semach won Nang mi tong.
Ewe Kapas Allim mi Fatafatoch, Auchea, me Mecheres
Ekkoch ra kan apasa pwe ewe kapas allimen Jises Kraist a “mecheresin ningoch me ningochun mecheres.”5 Ewe fonufan ese iei usun. A fatafatangaw, fitikoko, me ur ren riaffou me weires. Sia feioch nupwen sia tumunoch pwe sisap muut ngeni fitikoko, minne a kan napanap non fonufan, epwe tonong non napanapen ach etiwa me manaueni ewe kapas alllim.
Preseten Oaks a katon pwe: “Sia kaeo chommong mettoch mi kukkun me mecheres me non ewe kapas allimen Jises Kraist. Mi fen och sipwe chechemeni pwe non unusen me ren fansoun nangatam, ekkei mettoch mi kukkun repwe efisi mettoch mi watte.”5 Jises Kraist A Pwisin apasa pwe Osan a mecheres, me An uwouchou mi pan.6 Kich meinisin sipwe achocho pwe ewe kapas allim epwe mecheres—non manauach, non ach kewe famini, non ekkewe mwich me quorum, me non ach kewe wart me steik.
Ren ami ausening ngeni ai aporausa ekkei ruanu poraus, chechemeni pwe ir mi kefin owe repwe asarama won eu kinikin me pwan akaitikemi won ewe eu kinikin. Ekkewe fofor an emon me emon ekkei Aramas mi Pin non Fansoun Soponon epwe eu nenien appiru ngenikich meinisin apwonueta ewe kapas allim non napanap mi fatoch, auchea , me mecheres me pwan fori eu ekkewe wiis seni nang mi mecheres sia karan kaeo usun.
Manaueni ewe Kapas Allimen Jises Kraist
Aewin, manaueni ewe Kapas Allimen Jises Kraist Jens seni Denmark a iotek iteitan ran pwe epwe manaueni ewe kapas allim me epwe esinna memeffin ewe Ngun mi Fel. A kaeo pwe epwe mwitir ne mwokut nupwen a mefi emwen seni ewe Ngun.
Jens a aea ngeni kich ekkei mettoch:
Jens a aporausa ei: “Am aua nom non eu kukkunun imw mi ningoch ren ira me oosun mi for seni pwuun me ira non eu sopw mi kinamwe, me mi kan ngeni ewe nenien konik.
“Non ei pwinin ren ningochun asepwanin Denmark atun mi kan pwichikar, ekkewe asam me asammwacho mi kan suk, me meinisin a kinamwe me mesonoson. Pokiten ekkewe ningochun me nangatamen pwin atun ewe ier mi pwichikar uwa ekkis mang ne ekkesiwini ewe tengki non am ewe rumwen sopw pisek.
“Iwe atun chok, uwa kan fokkun mefi pwe mi namwot upwe ekkesiwini ewe tengki iwe chok! Fiti chok na fansoun pwan uwa rongorong pwe punuwei we, Mariann, a kokkoriei me nei kewe pwe aupwene tenu peum pwe mwongo a moneta.
“Uwa fen pupunu non fansoun nakatam uwa sinei pwe usap tongeni fori och mettoch me nukkun tenu pei, nge uwa ponuweni ngeni Mariann pwe upwe mwitir ngeni ewe sitowa upwe moni taman tengki. Uwa mefi eu memmef mi pochokun pwe upwe mwitir feino.
“Ewe sitowa mi chok nom won epek ewe nenien konik. Napengeni aua chok fetan, nge ikenai uwa wawa wai we pasiken. Atun ai uwa saa seni ewe konik, seni nepekin mesei, uwa kuna emon kukkun at, chipu ruu ierin, a fetan ii chok, mi kan ngeni nepekin ewe nenien konik, fokun arap ngeni ewe konik—iwe chok a turunong non ewe konik! Eu chok minich uwa kuna—mwirin chok use chiwen kuna!
“Ese wor pwan emon a kuna met a fis tiwenon chok ngang. Uwa sasatiw wai we pasiken won ewe pwuun, me saa, me mwetenong non ewe konik mi anonon non ngeni esop inisi. Asan ewe konik a mwitir fatengaweno me a weires ai upwe kuna non ewe konik. Iwe uwa mefi och mwokut nepeki. Uwa kuta ren pei non ewe konik, me uwa kamochuno ufan ewe sipiringu, me efieta ewe kukunun at. A poputa ne fafa, mwor, me kechiw. Mwirin chok ewe at a chursefani seman me inan kewe.”
Nupwen Brother Jens a iotek iteitan nesosor fan iten aninis pwe epwe esinna ekkewe ememmefin ewe Ngun mi Fel, usun chok ewe kukkunun memmef nren ekesiwinin efou tengki, a pwan iotek pwe epwe tongeni emon chon aninis ne efeiochu noun Kot kewe semerit. Jens a manaueni ewe kapas allim ren an kutta emwen seni nang iteitan ran, me achocho pwe epwe nimenimoch, me mwirin fori unusen mi tufich ne tapweno mwirin ena emwen atun a wareiti.
Tumunu Ekkewe mi Osupwang
Iei eu awewe ren tumunun ekkewe ir mi osupwang. Eu ran emon chon emwen non eu wart non ewe Cucuta Steik non Colombia a fiti ekkewe Presetenin Fopun seni ewe steik ne churi ruemon noun kewe fopun—me monger we emon anuon—minne ir ra kan kuna watte riaffou me osukosuk. Semer ewe ekkeran chok mano, me iner we a fen pwan mano non chok ewe ier a no. Ekkewe unumon semirit ra chok nom nge ir ichok non imwer ewe kukkun imw mi kan osupwang. Etipan imwer ewe a chok for ren fitefoch ira me fiti potou mi plastic, me ewe oos mi kunumfengen a chok ponuweno awenewenen ar we nenien annut.
Mwirin ar churir, ekkei souemwen ir mi sinei pwe a namot ngenir aninis. Me ren ewe mwichen chon emwenin wart, eu kokkot ne anisir a poputa. Chon emwenin wart me steik—Fin Anisi, mwichen elter, anuon, fopun, me chommong famini—ir meinisin ra finata repwe anganga ne mochen efeiochu ei famini.
Ekkewe mwich seni ewe wart ra kokkori won fitemon chon ewe wart minne ra angang ren forun imw. Ekkoch ra aninnis ren ewe kokkot, ekkoch ra asora ar fansoun me tufichin angang, ekkoch ra for mwongo, me pwan ekkoch ra wato met sokkun pisek mi chok namwot.
Nupwen ewe kukkun imw a wes, a eu ran mi pwapwa ngeni ekkewe chon aninnis me ekkewe unumon sarafo ir chon ewe wart. Ekkei semirit esor semer me iner ra mefi kinamwe me kirekireochun ar we famini non ewe wart pwe ra sinei rese anaemon chok me Kot a nom fansoun meinisin ne anisir. Ekkewe ra anisir ir mi mefi ewe tongen ewe Chon Amanau fan iten ei famini me ar angang ra pouni Poun ne anisi ir.
Etiwa Ngeni Meinisin pwe Repwe Etiwa ewe Kapas Allim
Ua ekieki pwe kopwe pwapwaiti ei awewe ne etiwa meinisin ar repwe angei ewe kapas allim. Engon-me-fisu ierin Cleiton seni Cape Verde ese sinei met epwe fiis ngeni atun a fetanenong non an ewe sukkunen seminary eu ran me non an we wart. Nge manauan me manauen ekkoch epwe fokun ekesiwin fefeino poikiten an fori.
Cleiton, fiti inan we me pwiin watte, ra fen papatais non ewe Mwichefen fitu fansoun me mwan, me iwe ewe famini rese chiwen fifiti fan. An ei chok fofforun fiti seminary epwe winiti eu fansoun siwin ngeni an famini.
Ekkewe ekkoch sarafo non ewe sukkunen mwichen seminary ra men kirekiroch me etiwa ii. Cleiton a mefi pwe mi ketiw me rer me ra mochen ngeni pwe epwe pwan fitir non pwan och mwichen apwapwa. A fori ei, me a poputa ne fiti an kewe pwan ekkoch mwichen Fan. Emon pishop mi mirit a kuna Cleiton ren an tufichin feifeita won pekin ngun me a etiwa ngeni i pwe epwe wisen noun chon aninis. “Poputa seni ena fansoun,” Pishop Cruz a apasa, “Cleiton a winiti eu nenien appiru me chon emweni ekkewe pwan ekkoch sarafo.”
Ewe akkaewin aramas Cleiton a tingorei epwe niwin ngeni Mwichefen ren inan we, me mwirin pwiin ewe watte. Mwirin a pwan poputa won chienan kewe. Emon me nein chienan kewe emon at nonno chok ierir, Wilson. Akkaewin fansoun a churi ekkewe missionari, Wilson a apasa pwe a mochen epwe papatais. Ekkewe missionari ra fokkun mwareiti me pwapwa ren met chommongun mettoch Cleiton a fen aiti ngeni Wilson.
An Cleiton foffor ese chok kouno me ikkewe. A pwan anisi pwan ekkoch mi patapateno ne niwin sefan, me fiti pwan aporaousa ewe kapas allim ngeni chienan kewe seni pwan ekkoch namanam. Ikenai non ewe wart a wor 35 sarafo mi pochokun, me eu watte mwichen seminary, kinisou a nap pokiten an Cleiton achocho ne tong, aporousa, me etiwa. Cleiton, fiti pwiin watte, Cleber, ir me ruemon ra ammon ngeni ar repwe feinno won ar misin.
Achufengeni Famini ren Fenfeino
Iei, mut ngeni ei upwe aporousa eu ningochun awewe ren ochufengeni famini ese much. Lydia seni Kharkiv, Ukraine, a akkaewin kaeo usun ewe temple seni ekkewe misineri. Iwe chok, Lydia a mefi eu ennetin mochenin tonong non ewe temple, me mwirin an we papatais, a poputa ne amonneta an epwe angei noun taropwen temple.
Lydia a tonong non ewe Freiberg Germany Temple a angei an pwon mi pin me mwirin a fori an papatais fan iten mi mano non fitu ran non ewe tempel. Mwirin ewe epinipinin ewe Kyiv Ukraine Temple, Lydia a tonong non ewe temple fan chommong. I me punuwan we, Anatoly, ir mi riri fengen non me mwirin ra kokko pwe repwe wisen chon misinarin temple. Ir me ruemon fengen ra angang fengen ne kutta 15,000 iten chon urou me angang ne fori ar kewe angangen temple fan iter.
Nupwen emon a eis usun an ekkewe memmef usun ewe temple, Lydia a apasa, “Met uwa kan angei non ewe tempel? Uwa fori minafon pwon mi pin. Ai kapasen pwarata a fen pochokununo. Uwa kaeo ne angei pwisin ai pwarata. Uwa tongeni fori angangen amanaua fan iten chon ai kewe neo ra mano. Me uwa tongeni tongei me angang ngeni pwan ekkoch.” A awesano ren ekkei kapas mi fokkun ennet: “Ewe Samon a mochen epwe kunakich non ewe temple fan chommong.”
Nesoponon
Uwa men mefi ren kirekirochun ekkei Aramas mi Pin non Fansoun Soponon, emon non an sokofesen me esenifinifin nonomur ar nom nukanapan non ekkei ruanu poraus. Chommong met sia tongeni kaeo seni ekkewe mettoch mi amwarar mi fiis a feito seni mecheresin fofor ren ekkei mechersin nongonong ren ewe kapas allim. Meinisin met ra fori mi pwan tufich ngenikich.
Amo sipwe amochufichi ewe kapas allim ren ach fori ekkewe wis seni nang mi kefinita: sipwe manaueni ewe kapas allimen Jises Kraistpwe sipwe esinna ekkewe memmefin ngun usun Jens non Denmark. Sipwe anisi ekkewe mi osupwangusun ekkewe memper non ewe Cucuta Steik non Colombia ne fori ne awora imw fan iten ekkewe sarafo esor semer me iner kewe non ar we wart. Sipwe etiwa ngeni meinisin pwe repwe etiwa ewe kapas allimnon napanapen Cleiton seni ewe fonuen sat non Africa Cape Verde minne a fori ren chienan kewe me an we famini. Saingon, sipwe achufengeni famini ren fenfeinno, usun appirun Sister Lydia seni Ukraine, me ren pwisin an angangen temple, angangen uruo, me aninis non ewe temple.
Fori ekkei epwe awora ennetin pwapwa me kinamwe. Usun ei ua pwon me pwarata—me usun Jises Kraist pwe ach Chon Amanau me ach Chon Angasano—non iten Jises Kraist, amen.