Iten ewe Mwichefen Ese Tongeni Ekesiwin
Nupwen sia mochen tapweno mwirin an ewe Samon kapasen aurour ussun a pwano seni Noun kewe soufos mi manau, akaewin ika a u ngeni ach ekiek, a murinno epwe wor tipetekison me asoren fangeno, ewe Samon a efeiochu kich ren pwan manaman non pekin ngun.
Non ew mwichen interfiu non August 16, 2018, Preseten Russell M. Nelson a apasa: “Ewe Samon a einga ngeni ai ekiek ewe auchean it I a fen pwarano ren an Mwichefen, ussun Ewe Mwichefenin Jises Kraist ren Aramas Mi Pin non Fansoun Saponon.1 Mi wor ach angang mwach an epwe uweikichenong non kinamwein An mochen.”2
Ruu ran mwirin, non August 18, ua nom ren Preseten Nelson non Montreal, Canada. Mwirin am mwichen chon Mwichefen non ewe amwararen Palais de Congré, Preseten Nelson a ponueni kewe kapas eis seni ekkewe chon fori repot. A esinna pwe “epwe ew osukosuk ne [ekesiwin iten ewe Mwichefen me]oukano[ew] oruni ren nap seni pukun ier.” Nge, a apachata, “Iten ewe Mwichefen ese tongeni ekesiwin.”3
Fisu wik mwirin, Preseten Nelson a afanafan non mwichenap: “Ewe Samon a einga ai ekiek ren auchean ewe it I a finata ren An ewe Mwichefen, ren Ewe Mwichefenin Jises Kraist ren Aramas mi Pin Non Fansoun Soponon. … Pusin ewe Chon Amanau a apasa, ‘Pun ai ewe Mwichefen epwe iteni.’” Mwirin Preseten Nelson a pwan eniwini, “Iten ewe Mwichefen ese tongeni ekesiwin.”4
Ew Kapas Eis mi Murinno
Ew murinon kapaseis a pita: Pwata iei, nupwen chommong ier sia etiwa ewe itemochen it “Mormon”? “Ewe Mormon Tabernacle Choir,” met kewe sia kuna won video “Ngang emon Mormon,” kewe Konun Primary “I Am a Mormon Boy”?
Ewe nongonongun Kraist ese siwin me ese wor nemuchun. Iwe nge, fateochun me auchean ipweipwan an ewe Chon Amanau angang ra pwano ren pusin ar fansoun mi affat. Ei soran Preseten Nelson a apasa, “Ewe Niwinsefanito ew angang a fis, an epwe wor murinon nesoponon, esap ew mettoch aramas ra chok efisi.”5 Me ewe Samon a apasa, “Mettoch meinisin epwe fis non ar pwisin fansoun.”6 Iei ach fansoun, ne eniwinsefani osen iten ewe Mwichefen ewe mi fatono.
Ewe iten me nonomun Ewe Mwichefenin Jises Kraist ren Aramas mi Pin non Fansoun Soponon a fat pwe sipwe eiteit seni Itan. Ua keran chok nom Kirtland, Ohio, ikewe ewe Soufos Joseph Smith, me ekkoch chok chon ewe Mwichefen, a osini, “Ewe Mwichefen epwe amasowa Ennefenin me Eorun Amerika—epwe amasowa fonufan.”7 Ewe Samon a anapanapa ewe angangen ei fansoun pwe “ew angang mi amwarar me eingeing.”8 A kapas usun ew “pwon mi pin [epwe] taweno non ewe fansoun soponon,” epwe mut ngeni “unusen … ewe fonufan [epwe] feioch.”9
Ekkewe kapasen ei mwichenap ra chiaku iei non 55 kapasen fonu. Nesoponon, ekkei kapas repwe rongorong me anneani non 98 kapasen fonu non nap seni 220 fonu me kinikinin neni.
Nupwen ewe Chon Amanau epwe niwin non an manaman me ning, chon ewe Mwichefenin Jises Kraist ren Aramas mi Pin Non Fansoun Sopoonon repwe nom non fonu meinisin, meinisin aramas, meinisin sokkun aramas, me meinisin oruni won fonufan.
Marinon Murinon ewe Mwichefen
Ewe murinon ewe niwinsefaniton ewe Mwicchefenin Jises Kraist esap chok nom won ekkewe chon ewe Mwichefen. Pokiten ekkewe pwaratan nang non ach kei ran, pokiten ewe pukepin a niwinsefan ngeni fonufan me ewe manamanen niffangen ewe Ngunn mi Fel, sipwe ew saram won ewe chukuchukuta ren ewe chuno mi kiroch ren an ese wor nuku non Jises Kraist a ekirochano ewe fonufan. Inamo meni chommong repwe mut ngeni ewe fonufan an epwe awosukosuka ar nuku non ewe Chon Angasano, sisapw “mokutou seni [ach] neni.”10 Kewe souneng rese nom nein iten chon Mwichefen repwe etiwa wisach me ach ennetin pwarata ussun Kraist. Pwan mo kana Souneng io kewe ra fen kuna kich fiti tipemwaramwar repwe etiwa kich ussun chiechiach . Non ekkei ran epwe feitto, sipwe eiteit seni iten Jises Kraist.
Sia kinisou ren ami auchean achocho ne achowano iten ewe Mwichefen ewe mi ennet. Non ewe mwich unungat ier a no, Preseten Nelson a pwonei ngeni kich “pwe ach tichikin tumunoch ne aea iten an ewe Chon Amanau ewe Mwichefen mi pung … [epwe ngeni kich] napenon nuku me akoko ngeni napenon pochokunen ngun.”11
Ei pwon a fen siin meren kewe chon kuno non unusen fonufan.12
Brother Lauri Ahola seni ewe notoun United States a apasa pwe fan ekkoch a kuna pwe mi aweires ne aporousa unusen iten ewe Mwichefen. Pokiten an ewe soufos ourour, i a pochokun ne sopweno. Non ew fansoun, a churi emon chiechian ren ew fenin pwan ew namanam. Ikkei an kapas:
Emon ngang mi sisinei a eis, “En emon Mormon?”
“‘Ngang emon chon ewe Mwichefenin Jises Kraist ren Aramas mi Pin non Fansoun Soponon, ewer,’ ua apasa. A poputa ne eisiniei chommong kapas eis a poputa ren: ‘Chon ewe Mwichefen Mormon ir mi nuku … ?’ Me ew me ew fansoun, ua poputani ai ponueni ren ekkewe kapas: ‘Non ewe Mwichefenin [Jises] Kraist, mi niwinsefanito, ouwa nuku …’
“…Nupwen a kuna pwe use etiwa ewe taiton ‘Mormon,’ a eisiniei ne awenewena ngeni met e mochen, ‘Esap en Mormon?’
“Nge uwa eisini ika i mi sinei ion we Mormon—ese sinei. Ua ureni pwe Mormon emon soufos … [me uwa] awora sufonun ai uwa chiechi ngeni [atewe].
“‘Nge,’ ua sopweno, ‘Mormon ese mano fan iten ai tipis. Mormon ese … riaffou non Gethsemane ika mano won ewe irapenges [fan itei]. … Jises Kraist I ai Kot me ai Chon Amanau. … Me ina ren Itan ua mochen epwe fateno. …’
“… Mwirin fitu seken ese or mongungu, [ewe mi sisineei a apasa], ‘Iwe en emon Souneng!’”13
Am mi chemeni an Preseten Nelson kewe kapas? “Ua pwon pwe ika sipwe achocho ne eniwini iten an ewe Samon ewe Mwichefen mi pung, I epwe ninatiw An manaman me feioch won mokuren ekkewe Aramas mi Pin, ekkewe sokkun sise mwo kukkuner.”14
Ewe Samon a Suki ewe An Fansoun Meinisin
Ewe Samon a aponueta an kewe pwon fansoun meinisin. Ewe Samon a suki ewe an ngeni kich nupwen sia fori An angang.
Ren chommong ier sia fen apinukunuk ach sipwe moni ewe internet an Mwichefen ren ChurchofJesusChrist.org me ChurchofJesusChrist.com. Ir me ru resap minen amomo. Ussun ewe fansoun an Preseten Nelson we esinesin, murin chok a fen wor ir me ruu. Ina ew manaman.15
Ewe Samon a fen pwan anapano ach sotuni ne ekesiwini kewe it ra fen kapach ngeni ewe Mwichefen non fansoun nakatam.
IFeinno mwach non nuku, iten ewe Mormon Tabernacle Choir a siwin ngeni Ewe Tabernacle Choir at Temple Square. Ewe website LDS.org, ewe a angei nap seni 21 minion chon no ngeni ew me ew maram, a siwin ngeni ChurchofJesusChrist.org.16 Ewe iten LDS Business College a siwin ngeni Ensign College. Ewe website Mormon.org a kaweninong non ChurchofJesusChrist.org. Nap seni ew ngorou mettoch ra iteni “Mormon” ika “LDS” mi pacheta wor a fen ekesiwin non iter. Souneng wenechar ra for sefani ar kewe websites, podcasts, me Twitter accounts.
Sia etiwa ew minafon esissin mi nom nukanappen Jises Kraist.
“Nukanapan ewe esissin a pwarata an Thorvaldsen we niosfau rume ren ewe Kristus. A niosuni ewe Samon mi manausefan, mi manau an eitau poun epwe foropachei ekkewe ir mi feito Ren.
“Esisinata, Jises Kraist a uta fan ew mong a [achema] ngenikich ewe Chon Amanau mi manau sefan a tou seni ewe peias.”17
Ewe esissinen Ewe Mwichefenin Jises Kraist Ren Aramas Mi Pin Non Fansoun Soponon a ekesiwini nikinikin non nap seni 50 fosun fonu. Minefon it won internet ra fen angei non chommong fosun fonu.
Kinisoun ewe Aninis an Ekkoch
Sia kinisouasini kewe chommongun aramas mi murinno me umoumoch ra fen osufonu ach mochen repwe korikich ren pungun itach. Ua keran anneani echo toropwe a makkei usun anon emon sou emwenin Catholic mi wewe ngeni “Aramas mi Pin non Fansoun Soponon.”18 Nupwen uwa churi emon sou emwenin ew mwichefenin Christian ew maram a no non ewe otiwen United States, a porous ussun ewe Mwichefen non an ewe aewin aporous fiti unusen itach me iamwiri nap seni fan ew fiti “ewe Mwichefenin Jises Kraist.”
Sia fen esinna pwe kapachatan onu kapas ngeni itach ei esap menemenoch meren ewe media, nge, nupwen Preseten Nelson a fen kuna me mwan, “wisen ewe media epwe kirokiroch an epwe ponueni ach tingor.”19 Kinisou ngenikemi ren ami acheou ngenikich pwan ewe chok tumunochun ekiek mi kawor ngeni oreni, pekin urumot, politics, ika mwichen aramas ren ami aea itach ewe.
Epwe wor ekkoch io repwe, anean ar repwe angawano pochokunen ekiekin ach ewe misin, repwe sopweno ne eita ngenikich “Mormon” ika “ewe Fenin Mormon.” Fiti osokurun, sia pwan tingor ennetin ekiekin ewe media ne osufonu ach mochen ach sipwe eiteit seni itach ren arapakan 200 ier.
Ewe Porachou an ekkewe Aramas mi Pin non Fansoun Soponon
Mei wor ngoroun me ngoroun Aramas Mi Pin Non Fansoun Soponon kewe ra fen porachou ne aporousa iten ewe Mwichefen. Nupwen sia fori ach kinikin, ekkoch repwe apuru ne fori. Ua sani ei porous seni Tahiti.
Engon ier Iriura Jean a finata pwe epwe apuru ewe kapasen aurour an Preseten Nelson.
“Non an neminewe ewe sukun ra aporousa ar weekend … nge Iriura a porous ussun … mwichefen.
“Noun ewe sense, Vaite Pifao, a apasa, ‘O, iwe en emon Mormon?’
“Iriura a apasa fiti poran netipan, ‘Apw … Ngang emon chon ewe Mwichefenin Jises Kraist ren Aramas mi Pin Non Fansoun Soponon!’
“Noun ewe sense a ponueni, ‘Ewer, … en emon Mormon.’
“Iriura a chok pwan ura, ‘Apw sense, Ngang emon chon Ewe Mwichefenin Jises Kraist ren Aramas mi Pin non Fansoun Soponon!’
“Ms. Pifao a mwareiti an Iriura nuku me ekieki pwata e chok mochen aea [ewe] iten an ewe Mwichefen mi tam. [Neminewe a ekieki pwe epwe kaeo pwan ekkoch.]
“[Me mwirin] Vaite Pifao a papatais [neminewe a pwarano an kinisou] pwe Iriura e tumunuoch ngeni ewe kapasen aurour an Preseten Nelson.”20
“Iten ewe Mwichefen ese tongeni ekesiwin.” Sia feinno mwach non nuku. Nupwen sipwe aponueta an ewe Samon kapasen ourour ussun a pwano meren Noun soufos mi manau, akaewin ika e etipemwaramwara ach ekiek, a murinno epwe wor tipetekison me asoren fangono, ewe Samon epwe efeiochu kich ren kapachetan manaman non pekin ngun me tinato Noun kewe chon nang repwe anisi kich ne uta unukuch. 21 Sia angei an ewe Samon kapasen afatano me apungono.
Ngang emon chon kuna ewe manamanen pwarata mi nom ren nouch achengicheng soufos, Preseten Russell M. Nelson. An ennetin mochen pwe epwe apwapwai ewe Samon me efeiochu noun Samach Won Nang kewe semirit. Seni pusin ai sinei mi pin, ua pwarata ussun an ewe Samon tong ngeni i. I ewe soufosun Kot.
Uwa pwarata pwe Jises I ewe Kraist, ewe Noun Kot. Non iten Jises Kraist, amen.