Kinamwen Emon me Emon non Fansoun Sosot
A fokkun auchea ach sipwe kutta kinamwe won winikapach.
Ua keran chok kefinita ngeni ai upwe angang won och porousen ewe uruwon Nauvoo. Eu kinikinin ewe angang, Ua tufichin no ngeni ewe kanupus Liberty non Missouri. Nupwen ua nengeni ewe nenien kanupus, ua ekieki ekkewe mettoch a fis ra fokkun auchea ngeni uruon Mwichefen. Manau riafoun ekkewe Souneng a feito seni met ewe kafonor seni Missouri a makkei ren mochenin ar repwe ninino. Naponon, ewe Soufos Joseph me ekkoch chiechian ekkewe ra kefinita ra kanupus non ewe nenien kanupus Liberty. Eu me nein ekkewe popun osukosuk ne uungeni ekkewe souneng ren nap ngenir rese sani ar repwe nounir chon angang.1 Ei watten nini ren Joseph Smith me chiechian kewe a anapanapa eu waten napanap mi ngaw ren ewe pungun finata a tongeni angawano ekkewe aramas mi wenechar. An Joseph nonom non ewe nenien kanupus Liberty a enetata pwe riafou esapw ew pisekin pwarata ren an ewe Samon memefin ese tipeeu ngeni ika ren an epwe angei sefani An kewe Feioch.
Netipei amen mokut nupwen ua aneani met ewe Soufos Joseph Smith a pwarata nupwen an we nom non ewe nenien kanupus Liberty: “O Kot, ifa i en? Me ifan ewe nenien imw mi ponueno om nenien opono?”2 Joseph a kapas eis ika epwe ifa tamen an noun ewe Samon kewe aramas repwe “riafou ren ekkei mettoch mi mwan me ekkewe sokkun aosukosuk mi attai annuk.”3
Nupwen ua uta non ewe nenien kanupusen Liberty, Netipei amen mokut nupwen ua aneani met ewe Samon a ponueni: “Nei at, kinamwe epwe nonom ren ngunum; om weires me riafou epwe chok non ekis mochomochen fansoun; me ika, ka nikitu ngeni, Kot epwe etekioketa asan.”4 Mi fat pwe weires a tongeni enimenimakicheno ngeni non fansoun esemuch, kokotun celestial.5
An ewe Chon Amanau kapas mi auchea “Nei at, kinamwe epwe nonom ren ngunum”6 a nonom non netipwei me a fen aora watten auchean ngeni kich non fansoun ranich. Ra achemato An asukun ngeni Noun kewe chon kaeo atun An we afanafan fetan.
Mwan an Kraist we riafou non ewe manaman Ketsemeni me won ewe irapenges, A annuku ngeni Noun kewe Aposel pwe repwe “Tong fengen; usun an tonger”7 me a fokkun oururur ren ekkei kapas; “Ua nikiti ngeni kemi kinamwe, ai kinamwe ua ngeni kemi: esapw ewe fonufan epwe ngeni kemi, pwe ua ngeni kemi. Ousap noninen are osukosuk, ousap pwan nuokus.”8
Eu itenap akon urren tong non ren an ach we Samon me Chon Amanau, Jises Kraist, ewe “Kingen Kinamwe.”9 Ennetin An muu epwe foruta fiti kinamwe me tong.10 Sia asuku ewe ranin mwach ngeni ewe minenium fansoun nemenem an ewe Mesaia.
Me nukun ei nemwasepwi ren ewe nemenemen minenium, sia sinei pwe kinamwen fonufan me atawen osukosuk rese mwo choufetan ikenai.11 Non unusen manauei, use mwo kukuna eu watten nipwangaw ren asamonoch. Sia chok fokkun attak ren manauen song, nounoungaw kapas, me enetipengaw, fofor mi ngaw mine a tongeni ataieno kinamwe me tipepos.
Kinamwe non fonufan ese or pwonan ika tumun non tori otun ewe Oruwen Niwin sefan an Jises Kraist. Ewe Chon Amanau a aiti Noun kewe Aposel me An afanafan fetan won fonufan esap awora kinamwe unusoch. A apasa, “Ekieki pwe use feito ai upwe wato kinamwe won fonufan.”12 Kinamwen unusen fonufan esap eu kinikinin an ewe Chon Amanau we afanafan fetan. Kinamwen unusen fonufan ese wor ikenai.
Nge, an emon me emon kinamwe a tongeni fis ikamo mi or ewe song, anini, me kaimufesen ekkena mi angawa me rikisonai non fonufan ikenai. A fokkun auchea ach sipwe kutta kinamwe won pwisin inisich. Echo minefon kon amen murino me ua men sani a mak faniten sarafon ikenai seni Brother Nik Day, itenapwan “Kinamwe non Kraist” a pwarata, “Nupwen ese wor kinamwe non fonufan, mi wor kinamwe non Kraist.”13 Sia feioch a wor rech ei kon me mwen ewe semwenin fonufan unus ren COVID-19.
Ei kon a eniwini non eu ningochun ngingin kon ren kinamwe me akaewin a pwarata pwe kinamwe mi angko ngeni non manawan me an Jises Kraist we misin. PresetenJoseph F. Smith a pwarata, “Ese tongeni epwe tori fonufan ewe ngunun kinamwe me tong … tori an aramas repwe angei ewe ennet an Kot me ewe kapas an Kot … me pwarata An tipachem me manaman mi feito seni nang.”14
Ika pwe sise tongeni kou seni ach angangen nikitu ne fori kinamwe non unusen fonufan, sia sinei pwe sia tongeni angei kinamwe ren emon me emon usun, met Kraist a aiti ngeni kich. Ei nongonong mi tou non ewe Doctrine and Covenants: “Nge kaeo pwe ii ewe ion mi fori ewe angangen nukuchar repwe angei niwinin ar foforoch, usun chok kinamwe non ei fonufan, me manau esemuch non ewe fonufan epwe war.”15
Ikefa ekkoch ekkewe “angangen nukuchar” ekkena epwe tongeni anisi kich ach sipwe nikitu ngeni sosot me ekisano osukosuk me kutta kinamwe non ei fonufan? Meinisin an Kraist kei asukun a itini ngeni ei aan. Upwe apasa ekkoch ua nuku pwe rakon auchea.
Ewin: Tongei Kot, Manaueni An kewe annuk, me Omusano Meinisin
Preseten George Albert Smith a winiti Presetenin ewe Mwichefen non 1945. Ra sinei non ekkei fansoun pwe ii emon Aposel emon souemwen mi ani tong-kinamwe. Non ekkewe 15 ier me mwen epwe emon preseten, ewe sosot me riafou mi osukosuka non unusen fonufan, mwirin chok pwan ewe mano me mamaun ren World War II, a efisi meinisin chinon chok kinamwe.
Nesoponon ewe World War II, nupwen an keran emon Preseten non October 1945, non ewe mwichenap, Preseten Smith a achema ngeni ekkewe Souneng usun an ewe Chon Amanau we tingor repwe tongei chon orur me epichano ekkewe chon oputer me aitir, “Ina ewe Ngun meinisin Aramas mi Pin non Fansoun Soponon repwe kuta me ani ika re epinukunuku pwe fan ew repwe uta fan mesan me Epwe etiwerenong non imwan ren poun.”16
Oruwan: Kuta ekkewe Uwan ewe Ngun mi Fel
Ewe Aposel Paul, non an mak ngeni ekkewe chon Galatia, an aiti ngenir usun nefinen angangen nukuchar ina ena epwe anisi kich ach sipwe tonong non ewe muun Kot me angang minne epwe pwan tongeni, ika eseor aier, ese otufichi kich. Ikkei ekkei repwe otufichi kich ekkewe uwan ewe Ngun: “tong, pwapwa, kinamwe, nikitu, tipetekison, umoumoch, nuku, me tipepos, [me] engino.”17 Paul apwan apachanong repwe aninis fengen nefiner me resapw chipang ar repwe fori met mi murino.18 Ngeni ekkewe angang ese murino a pachenong koput, song, me tipengaw.19
Eu ekkewe watten nesen non ewe Testamenin Nomw ewe fansoun a wenengeni ewe Sam Abraham. Abraham me Lot, tetenin noun we, ir mi wouoch nge ra kuna pwe rese tongeni nonom fengen. An esap or ewe tipengaw, Abraham a mut ngeni Lot epwe fini meni neni a mochen. Lot a fini ewe neni Jordan, ikewe ie a fokkun ningoch me wouoch konikin. Abraham a angei ewe neni Mamre ikewe ie mi kukun peirakin opukupwuk. Ewe pukefel a aiti kich pwe Abraham a ouweta imwan we tento me ouweta “eu antare ngeni ewe Samon.”20 Lot, me ewe epek, “a ouwetai imwan we tento mesengeni Sodom.”21 Pwe nefinach epwe kinamwe, ewe nesen amen fatoch: sipwe fokkun achocho ngeni ach sipwe ekisano ach netipengaw ren ach sipwe menin ngeni met mi fis mine ese pwan kapachenong nukucharan an epwe or kinamwe fengen ren nefin. Usun met King Benjamin a aiti kich, “Sisapw ekieki ach sipwe efeiengawa emon me emon, nge sipwe manauen kinamwe.”22 Nge ach sipwe manaueni nukuchar me pwonen nukuchar, a namot sipwe nikitu me pochokun.
Ika sia mochen ani kinamwe minne iei ewe nifangen ewe angnagen nukuchar, kich sisapw ouweta imwach kewe tento mesengeni ewe fonufan. Sipwe ouweta imwach kewe tento mesengeni ewe tempel.
Ounungatin: Aea ami Pungun Finata ne Fini mi Pung
Kinamwe me pungun finata ir me ruu mi ririfengen me ra fokkun auchea me non ewe kokoten manau esemuch. Usun mi awewetiw non ewe itenapen Kapas Allim ren “Pungun Finata me Pungun Foffor,” “Pungun Finata ewe tufich me tongeni Kot a ngeni kich ach sipwe fini me fori won pusin ach.”23 Pokiten ei, pungun finata a nom non ewe netip ren ewe fefeita an emon me emon me ar weweiti ena a efeiochu kich atun sia tapweno mwirin ewe Chon Amanau.24
Pungun Finata eu nongonong mi katou non ewe Mwich non Nang me ewe osukosuk nefinen ekkewe ra finata repwe tapweno mwirin Kraist me ekkewe ra tapweno mwirin Setan.26 Nikitano tipetekia me tipepochokun me finata ewe Chon Amanau epwe mut ngei kich ach sipwe ani an we saram me An kinamwe. Nge kinamwen emon me emon epwe eu sosot nupwen aramas repwe sotuni ar pungun finata non anen weires me riafou.
Ngang mi nuku pwe ewe memefin kinamwe sia mefi non netipach a pochokununo ren met sia fen sinei ren met an ewe fonufan Chon Amanau epwe fori fan itach. Ei mi afatetiw non Preach My Gospel: “Nupwen sia epinukunuk won ewe Achasefan an Jises Kraist, I a tongeni anisi kich ach sipwe nikitu ngeni ach kewe sosot, semwen, me metek. Sia tongeni ureno ren pwapwa, kinamwe, me ouruur. Meinisin ekkena ese pungupungoch ren manau a tongeni pungoch ren ewe Achasefan an Jises Kraist.”26
Oruanun: Auweta Saion non Netipach me Imwach
Kich noun Kot me kich masowen An famini. Kich pwan chochon ach kewe famini mine sia uputiw non. Kautan ewe famini iei ewe nongonongun ren me ruu pwapwa me kinamwe. President Russell M. Nelson a aiti kich, me non ei fansoun waten semwen non fonufan unus sia kaeo, pwe ewe imwen kaeo—non mwach kewe mwichefen—epwe apochokuna manauen souneng, a tongeni “epichano ewe pochokunen famini … ngeni an epwe ekesiwini [imwach] kewe[s] ngeni eu imwen nuku.”27 Ika pwe a wor ei manauen souneng non imwach kewe, sia pwan tongeni ani ewe kinamwe an ewe Chon Amanau.28 Sia sinei pwe chommong me neiimi ese wor ren ekkewe feiochun ren imw nukuchar me fokkun riafou chok ren ekkewe ra finata ar repwe fofforingaw. Ewe Chon Amanau a tongeni awora tumun me kinamwe ne emwenuk om kopwe tumun me anisuk seni osukosuk.
Upwe apasa ngonuk pwe ewe pwapwa, tong me unusochun tongeni non wenecharen famini a awora me ruu kinamwe me pwapwa. Tong me kirekiroch ikkei ekkewe auchean ach sipwe ani Saion non netipach me imwach.29
Enimuan: Tapweno Mwirin an Nouch kewe Soufos Kapasen Aurour
Epwe wor ach kinamwe nupwen sia tapweno mwirin noun ewe Samon ewe soufos, Preseten Russell M. Nelson. Ekis ngeni chok sipwe tufichin rongorong seni i. I a fen monata seni ewe forutan fonufan ren ei koko. Pusin An amonata amen ennetin auchea.30
A aiti ngeni kich pwe sia tongeni “mefi kinamwe ese much me pwapwa non mwo fansoun riafou” ika sia achocho ach sipwe winiti usun ewe Chon Amanau, Jises Kraist.31 A pesei ngeni kich sipwe “aier iteiten ran”, sipwe angei an ewe Samon we “nimenimoch, echikara, me manamanen pochokun.”32 Ngang upwe chon pusin apasata pwe pwarata a fen ketiw me soposopono ne ketiw seni nang seni nouch we achengicheng soufos.
Nupwen sia sufoniti me finata pwe epwe nouch soufos, sia pini ngei Samach won Nang me ach we Chon Amanau, Jises Kraist. Sia iamwir seni ewe Ngun mi Fel.
Ua pwarata me watiw ai pusin pwarata pwe Jises Kraist, ewe Chon Amanau me Chon Angasano fonufan, a emweni me aurora An Mwichefel mi niwinsefanito. Manauan me an angangen achasefan ikei ekkewe angangen kinamwe mi ennet. I ewe Kingen Kinamwe. Ua pwarata met ngang mi sinei me pusin pwarata pwe I mi manau. Non iten Jises Kraist, amen.