Ewe Umoumochun ewe Chon Amanau
Ewe angangen kirekiroch ngeni ekkoch amen unusen auchea non ewe kapas allimen Jises Kraist.
Ew me nein an ewe Chon Amanau kewe annuk a aitikich non An ewe fansoun afanafan won fonufan ina ewe auchean ach sipwe umoumoch ngeni ekkoch. Sipwe nengeni ei annuk me nonomwun ren ach ekieki usun an Jises tori imwen Simon, ewe farisi.
Ewe Kapas allimen Luke a makkei pwe emon fefin, mi tipis, a tonong non imwen Simon ewe nupwen Jises mi nomw non. Non nonomwechun, ewe fefin a fein ngeni Jises, tenu pechen kewe fiti surun mesan, a tenu pechen ngeni mekuran, me a kisi pwan epitir ngeni oin.1 Ewe souketiw, ewe a ekieki pwe mi tekia seni ewe fefin, a ekieki won winikapan fiti an sikesik, “Ei mwan, ika pwe emon soufos, epwe fen sinei ion me met sokkun fefin ei a atapa: pwe ii emon chon tipis.”2
Nikinikin ewe Farisi - a kon - nuno a emweni an epwe etipisi Jises me ewe fefin. Nge non an sinei watte, ewe Chon Amanau a sinei an Simon ekiek me, non watten tipachem, a okuf ngeni an Simon nipwakingaw, me pwan anini ngeni an ese wor ketiwech ngeni chon tori non imwan usun ewe Chon Amanau. Ennetin, Jises ese tipew ngeni ewe Farisi a pwarata pwe a wor ren Jises ewe nifangen sinenap me ei fefin, fiti netip mi tipetekison, a aier me an tipis ra mwusono.3
Usun pwan ekkoch fofor mi fis fansoun an Jises afanafan won fonufan, ei pworous a pwarano pwe ewe Chon Amanau a umoumoch ngeni meinisin ekkewe ra feito ren II—ese work sokofesenin—me akkaewin ngeni ekkewe ra mwochen an aninis. Ewe niaman me tong mi mosonoson a pwa ngeni Jises seni ewe fefin a pwarata an ennetin aier me mwochen epwe angei komwusen an kewe tipis. Nge inamwo, an Simon nemenem mi fitikoko, chufengen me netipan mi aweires,4 a epeti seni an epwe pwarano an weweiti ewe ngun mi aier, me apwan iteni ewe Chon Amanauen fonufan fiti sokopat netip me ungeni. Fofforun a pwarano nonomwun manawan pwe ese watte seni aweires me apwangapwang an fori kewe annuk me an pwarata fan iten an nukunuk non pechekunen manawan me manaman mi mwan.5
Ewe kirekirochun me iamwiri emon me emon an Jises non ei pworous a pwarano ew nikinik ren ifa usun ach sipwe chiechi ngeni chon aruch kewe. Ekkewe pukefel mi chommong ar awewe ren ifa usun an ewe Chon Amanau, mwokut ren An memefin anononun me nomwechun kirekiroch, nomw nein aramas non Ranin ewe me anisi ekkewe ra riaffou me ekkewe ra fen “turutiw, me ra paras ekis meinisin, usun siip ese wor chon maser.”6 A eitau peun mi umeumech ngeni ekkewe ra mwochen ngasono seni oser mi chou, ren non aion me ngun.7
Ewe fofforun umoumoch an Jises a nomw non aninis,8 itan, non An ennetin me tong mi unusech, ina nongonongun an fangono manawan. Fofforun kirekiroch ina ew auchean napanap ren ekkewe ra achocho ngeni nimenimoch, me ei tufich ren ekkoch souneng usun netipechow fiti ekkewe mi netipechow me epwe wor weweiti, kirekiroch, me umoumoch.9 Ewe nikinikin kirekiroch ngeni ekkoch, ennetin, kinikinin ewe kapas allimen Jises Kraist me ew asisinen akarapen manauch me ngunuch ngeni ewe Chon Amanau. Naponon, a pwarano kinikinin pechekun non nonomwun manawach me apwari echunon ngunuch.
Mi auchea ach sipwe nenengeni pwe an Jises fofforun kirekiroch esapw chok fan ekkoch ika fori non napanapan mi nongonong won ekkoch kinikinin angang epwe wesino nge an nikinik iteiten ran sipwe fori usun An ewe ennetin tong fan iten Kot me Noun kewe me An mochen epwe anisi ir.
Jises mi tongeni sinei an aramas mwochen ika mwo mi towaw. Nge, ese amairu, ren awewe, mwirin chok an echikara emon chon angang,10 Jises a sai seni Capernaum ngeni ewe neni itan Nain. Ikena ikewe Jises a fori ew me nein kewe feiechun an ewe mwichefen nupwen a ereni ewe enuwon mi mano, ewe chok emon neun ewe inenanp ese pwupwunu, epwe uta me manau. Jises ese chok mefi usun an ewe inenap mi osupwang riaffou nge pwan weiresin nonomwun manawan ewe inenap, me A mokut netipwan ren ennetin tong ren i. 11
Usun chok ewe fefin mi tipis me ewe ese wor pwunuwan seni Nain, chommong aramas non ach mwicheich ra kutta kinamwe, ach sipwe kuner, ar repwe nonomw, me met sokun aninis sipwe ngenir. Kich meinisin sipwe tongeni kinikinin non peun ewe Samon me angangen kirekiroch ngeni ekewe ra mwochen, usun chok Jises mi fori.
Ngang mi sinei emon kukun nengin a upwutiw fiti ew watten semwen ren tunawan me epwenun awan. Epwe fori aewin me nein chommongun an reirei non oruwen ranin manawan. Mekut meren ew euchean kirekiroch ren ekkewe ra kuna ei sokkun osukosuk, ei nengin fiti inan me saman kewe ra kutta ar repwe aninis, weweiti, me aninisin netip ngeni ekkoch ra pwan weri ei osukosuk. Ra afosa, non pwisin ar kapas: “Fansoun an neum ewe nengin osukosuk, a wor am tongeni me churi euchean aramas ekewe ra mwochen kinamwe, aninis, me epechekun. Ekkoch fansoun me nomw, neum ewe nengin, ewe a 11 ierin iei, a kapas ngeni inen me saman emon semirit mi pwan tori ei osukosuk. Fansoun ei pworous fengen, neum ewe nengin a etatiw ewe maas a masamas pwokiten ewe pandemic pwe kewe iin me saam repwe kuna pwe mi wor epinukunuk, inamwo ika ewe semirit mi chiwen nangatam ngeni non kewe ier an epwe wes seni an osukosuk. Auwa unusen kinisou ren ei fansoun aupwe pwarano am echung ren ekewe ra riafou, usun ewe Chon Amanau a fori fan item. Sia mefi kukununon ach weires iteiten sia anisi ne ekisatiw an emon pwan weires.”
Chiechiei euchea, ren ach sia achocho ngeni ach apachanong umoumoch non fofforun nonomwun manawach, usun a pwano meren ewe Chon Amanau, sipwe kunakaii an ekkoch mwochen. Ren wattenon ach kunakaii an ekkoch mwochen, memefin ennetin mwochen me tong epwe awateno ach foffor meinisin. Ewe Samon epwe kuna ach kewe foffor, iwe kich sipwe unusen feioch fiti epwe ngenikich annen ach sipwe pouni Poun me apwetetei netip me wato kinamwe ngeni ekkewe ir “pour…mi kokotiw.”12
An Jises fon ngeni Simon ewe Farisi apwan awewei pwe kich sisapw fori aweires me kapwung mi ngaw ngeni chiechiach kewe, pwokiten kich meinisin mi mochen sipwe weweiti me angei kirekiroch ren ach nipwakingaw seni Samach won Nang mi tong. Esapw iei ewe mettoch ewe Chon Amanau a aitikich non ew fansoun nupwen A apasa, “Me pwata ka kuna pipin non mesen pwiimw, nge kose kuna pipin non mesomw?”12
Kich sipwe ekieki pwe ese mecheres ach sipwe weweiti meinisin ekkewe osukosuk a efisata fofforun emon ika pwomwer. Nikinik mi tongeni angawa me ekkoch fansoun ese pwarano pwungun keukun fofforun emon. Esapw usun en me ngang, Kraist a tongeni kuna meinisin foffor.13 Usun an sinei ach apwangapwang meinisin, ewe Chon Amanau ese etipisikich nge a sopweno ne angang ngenikich non an kirekiroch non fansoun meinisin, a anisikich ach sipwe emwekutu ekkewe epet seni mesach. Jises a nengeni ewe netip iteitan fansoun, me esapw ren nikinikin nukun.14 Ii won winikapan a apasa, “Ousap apungu emon seni met oua kuna me nukun.”15
Iei, kopwe ekieki usun an ewe Chon Amanau fon ngeni ekkewe engon me ruemon chon kaeo chon Nifai usun ekkei kapas eis:
“Iwe oupwe sinei pwe oupwe sou apungu ekkei aramas, anongonong won ewe kapung minne upwe ngenikemi, minne epwe pung. Iei minne, met sokkun aramas oupwe usun? Ennet ua apasa ngenikemi, usun chok ngang.”16
“Iei minne ua mochen pwe oupwe unusoch usun chok ngang, are Sememi we mi nom non nang mi unusoch.”17
Ren ei wewe, ewe Samon a fori pekin kapung ngeni ekkewe ra pwusin angei won winikaper ar repwe apungu ekkoch nge ese wor pwopwun. Ren ach sipwe tongeni fori mwumwutan etipisi, sipwe achocho ngeni ach sipwe usun ewe Chon Amanau me nengeni fofforun ekkoch ese pwung ren kirekiroch, usun non kunan mesan. Eteneki pwe kich mi chiwen nangatamen ach sipwe tori unusochuch, nge meni epwe fen och ika sia momot unukun pechen Jises me tungor ren komusonon ach nipwakingaw, usun ewe fefin mi aier non imwen ekkewe Farisi, me sisapw onusano fansoun me pochokun ne fori met ekkoch ra ekieki fan itach.
Chiechiei achengicheng, ngang uwa pwarata pwe ach sia achocho ngeni me pachenong non an ewe Samon nikinikin umoumoch non manawach, ach sipwe ingeiti nonomwun chon oruch kewe epwe watteno me ach sipwe pwusin etipisi fofforur ese pwung epwe kukununo. Nefinach ngeni Kot epwe mamarita, me manauach epwe echuno, ach memef epwe pwetete, me sipwe kuna ew pekin-pwapwa ese mwuch. Sipwe itefouno pwe kich chon efisi kinamwe,18ekkewe ar kapas mi pwetete usun ew sosorun spring.
Uwa iotek pwe sipwe winiti chon engino-ngeni me chon weweiti chiechiach me an ewe Samon umoumoch epwe, non unusochun tipetekison, awesi ach nipwakingaw ngeni an ekkoch foffor ese pwung. Iei an ewe Chon Amanau tungor ngeni kich. Ngang uwa pwarata pwe I mi manau. Ii ewe mi unusech ren umoumoch me chon kaeo mi tipetekison. Ua apasata ai kapasen pwarata ren ekkei ennet non iten ewe Chon Amanau mi pin Jises Kraist, amen.