Ye Odudu Abasi ke Akwa Ubong
Ndikpono mme ediomi eyeyɔhɔ nnyin ke edinen-ido ye odudu Abasi ke akwa ubong.
Ami mbenge yak Edisana Spirit anwanga onyung eteme ofuri nnyin ke nte nnyin ikereke otokiet ibanga inem utom erinyanga ukpong ye edimenede ke editara uyoho ini emi.
Akpa-ini Moroni Edikise Joseph Smith
Ke ekperede isua ita ke Akpa Nkukut ama eketibe, ke okoneyo September 21, 1823, ekpri Joseph Smtih okobong akam oyomndibo edifen ke mme idioknkpo esiendien man odiongo itie ye ndaha esie kiso Abasi. 1 Mbiet-owo ama obiongore ke itie nna esie, okot akparawa emi ke enying, onyung odoho ke “imo idi isung-utom emi edongde eto iso Abasi … ndien ke enying esie edi Moroni.” Enye aanam anwanga “ete ke Abasi enyene utom ono [Joseph] ndinam” 2 ndien ekem eteme enye abanga ediworo ndi eke Nwed Mormon. Akpan-akpan, Nwed Mormon ekedi kiet ke otu akpa ibuot-iko emi ekenemede ke etop Moroni.
Nwed Mormon edi testament Jesus Christ efen ye akpan nkpo-utom eke edikabare-esit ke mme ekpere-edem usen emi. Utom nnyin ke ndibuana gospel emi edi ndikot kpukpru owoman etiene Jesus Christ, 3 ebo mme edidiong eke mfiak mmen ndi gospel, enyung eyo esim utit otode mbuotidem ke Andinyanga. 4 Ndinwam owokiet-kiet man enyene akwa ukpuhode ke esit 5 enyung eyak idem mmo eno Abasi oto ke ndisana ediomi ye mme edinam edi mme akpan ntak ke edikworo iko Abasi.
Moroni edimen Nwed Mormon nwut Joseph Smith okotongo utom erinyanga-ukpong nno mme owo kiet-kiet ke ikpehe nkang emi ke editara uyoho ini emi.
Ke ndika iso ke item esie nno Joseph, Moroni eketing oto nwed Malachi ke Akani Testament, ye esisit ukpuhode ke usem emi etingde ke King James version ete:
“Sese, ami nyeyak Itie-oku nno fi, ke ubok prophet Elijah, ke akwa ye ndik-ndik usen Jehovah mika-idige kanga.
“… Ndien enye eyeto ke esit ndito mme enwongo emi ekenamde eno mme ete mmo, ndien esit ndito eyekabare etiene mme ete mmo. Midige ntre, eyebiat ofuri isong efeb ke edidi esie.” 6
Utom nnyin ke ndibop mme temple edi ndinam mme ndisana ebiet odu emi ekemede ndinam mme ndisana ediomi ye edinam emi odotde ekekem ono erinyanga-ukpong ye edimenede ubon ufokemana, eke odu-uwem ye akpa-mkpa. Item emi Moroni okonode Joseph Smith kabanga akpan utom eke Elijah ye unen itie-oku ama atat utom erinyanga-ukpong ye edimenede ke ikpehe nkang emi onyung otongo utom ke eyo nnyin emi ono mme akpa-mkpa ke ikpehe nkang oko.
Ke ibio-ibio, mme ukpebnkpo Moroni ke September eke 1823 kabnaga Nwed Mormon ye utom Elijah ama otongo akpan ukpebnkpo ono utom erinyanga-ukpong ye edimenede ke mme ikpehe mbiba.
Mme Ukpebnkpo eke Prophet Joseph Smith
Mme ukpeb emi Joseph Smith ekpekpebde oto Moroni ama akara ofuri ndaha utom ukworo-iko esie. Nte uwutnkpo, ke ekpri mbono emi ekenamde ke Kirtland Temple ke April 6, 1837, Prophet odoho ete, “Ke etingde kpukpru nkpo ekure, mkpon nkan ye ata akpan utom edi ndikworo Iko Abasi.” 7
Ke ekperede isua itiaba efen, ke April 7, 1844, Joseph Smith ama ono ukworo-iko emi efiokde mfin nte King Foullet Discourse. Enye eketing ke etop oro ete ke, “Ata akamba ubiong utom eke Abasi okonode nnyin ke ererimbot emi edi ndidungo nyom mbon nnyin emi ema ekekpa.” 8
Edi didie ke edikworo iko Abasi ye edidungo nyom mbon nnyin emi ema ekekpa mbiba ekeme ndidi akamba utom ye ubiong kiet emi Abasi okonode nnyin? Ami mmenim ke Prophet Joseph Smith okowut ke etop iba oro ata akpaniko ete ke ediomi, emi edade mme edinam unen itie-oku enam, ekeme ndidian nnyin ye Obong Jesus Christ ndien nko edi akpan nkpo eke utom erinyanga-ukpong ye edimenede ke ikpehe nkang mbiba.
Utom ukworo-iko ye eke temple ye family history edi ukem onyung enyene ebuana ke akwa utom kiet emi enamde ke ndisana ediomi ye mme edinam emi anwamde nnyin ndibo odudu Abasi ke uwem nnyin ndien, ke akpatre, ifiak inyong ika iso Ete eke Heaven. Ntre, mme etop iba eke Prophet emi ekebietde nte afafanga kiet eken ke ntongo, ke akpaniko, anam anwanga akpan nkpo eke akwa utom ekpere-dem usen emi.
Ndibɔbɔ ye Andinyanga otode ke Ediomi ye mme Edinam
Andinyanga odoho ete:
“Emen okpono mi ekongo ke itong mbufo, enyung ekpebe mi; koro mmenyene ifure-ifure ido nnyung nsuhore idem ke esit; ndien mbufo eyekut nduok-odudu eno ukpong mbufo.
“Koro okpono mi ememem, mbiomo mi onyung efefere.” 9
Nnyin imen okpono Andinyanga ikongo ke nte nnyin ikpebde ibanga, idot ibɔ, inyung ikpono ndisana ediomi ye mme edinam. Nnyin imenehede ibɔbɔ ke ndien ye Andinyanga ke nte nnyin itimde iti inyung inam ofuri ukeme nnyin ndidu-uwem man ekekem ye mme ubiong emi nnyin ikenyimede. Ndien edibɔbɔ oro ye Enye edi ntongo osongo nkpo-Abasi ke ofuri eyo uwem nnyin.
Mbon Ediomi eke Obong
Ami ndɔhɔ mbufo nte ekere-ebanga mme edidiong emi ekenwongke eno mme andinim-ediomi mbet Jesus Christ. Nte uwutnkpo, Nephi “okut ufok Abasi Eyen-erong Abasi[ke mme ekpere-edem usen], ndien mme ibat esie ekedi esisit, … ndisana ikot Abasi, nko ema edu ke ofuri iso isong; ndien ukara mmo … ekedi ekpri.” 10
Enye nko “okut odudu eke Eyen-erong Abasi, nte oro okosuhorede edidori ndisana mbon ufok Abasi eke Eyen-erong ke idem, ye mbon ediomo eke Abasi, … ndien mmo ekeyoho ye edinen-ido ye odudu Abasi ke akwa ubong.” 11
Ibio iko oro “ekeyoho ye edinen-ido ye odudu Abasi ke akwa ubong” inehede idi eti ekikere mme uwutnkpo inem usem nwed Abasi. Edi, mme edidiong emi enehede owut-idem ke mme uwem ediwak ikot Abasi eke ekpere-edem usen.
Ubiong-utom mi nte owo Duopeba ada mi asanga ke ofuri ererimbot. Ndien ami mmebo edidiong ke ndisobo nyung mkpeb nti ukpebnkpo nto ediwak mbufo. Ami mmeno iko ntiense nte ke mbon ediomi Abasi mfin emi enehede eyɔhɔ ke edinen-ido ye odudu Abasi ke akwa ubong. Ami mmokut mbuotidem, uko, idorenyin, ediyiri, ye idara emi okponde akan ndaha uwem isong—ndien Abasi kpot ekeme edino ndaha oro.
Ami mmokut edinen-ido ye odudu Abasi ke akwa ubong, emi ebɔde eto ke ndinam mme ediomi ye edinam-iko Abasi, ke uwem ekpri owo ufok Abasi emi okoduode esisit akpa-ubeng oto ke akamba unomo ubom-isong. Ke owo emi ama ɔkɔbɔhɔ ubiak emi ke ediwak ofiong onyung otongo obufa uwem ye esisit edisanga, ami mma nso-bo nyung nnyene-nneme ye osong-idem owo emi. Kini nneme nnyin,ami mbup nte, “Nso ke unomo emi anwam fi ndikpeb?” Iwiwa iboro ekedi, “Ami mfuhɔke. Ami ndamake. Ndien ofuri nkpɔ eyefɔn.”
Ami mmokut edinen-ido ye odudu Abasi ke akwa ubong, emi ebɔde eto ke ndinam mme ediomi ye edinam-iko Abasi, ke uwem mbufa mbon ufok Abasi emi ekenade baptism enyung ebɔde ndori-ubɔk. Mme mbufa owo emi eyom ndibɔ ukpeb nyung nnam-utom, enyime edi ifiɔkke nte ekpeyakde mme nkani edu ye mkposong ido-eset eduok, edi ekop idaraesit ke ndikabare ndi “mbio-mbio kiet ye ikɔt Abasi; enyung edi mbon ufɔk Abasi.” 12
Ami mmokut edinen-ido ye odudu Abasi ke akwa ubong, emi ebɔde eto ke ndinam mme ediomi ye edinam-iko Abasi, ke uwem ufɔkemana kiet emi ekenehede ekpeme ebe mme nnwan kiet ye ete mme eka emi ekedongoke ke anyan-ini Mme nti mbet emen ewut mme ini emimme ufokemana mmo ekekopde ndobo-ikpong—ye mme ini emi mmo ekefiokde ubok Abasi emenede onyung osongode mmo. Ufokemana oro ema ewut ata esit ekom ke okposong ifiok-ukpeb eke uwem-isong emi akayakde mmo ekori enyung ekabare etie nte Ete nnyin ke Heaven ye Andifak nnyin, Jesus Christ. Abasi ama anwam onyung odiong ufokemana emi ye nsanga Edisana Spirit onyung anam ufokidung mmo edi edisana ebiet uboho kiet ukem nte temple.
Ami mmokut edinen-ido ye odudu Abasi ke akwa ubong, emi ebɔde eto ke ndinam mme ediomi ye edinam-iko Abasi, ke uwem owo ufɔk Abasi kiet emi okokopde ubiak eke ediwɔrɔ-ndɔ. Mfina nkpɔ-Abasi ye ekikere eyeneka-anwan emi ama okpon oto ke ndifiɔk idiɔk ekesangake ye ebe esie ndibiat mme ediomi ye ndɔ mmɔ ndiwure. Enye okoyom unen ye edinam-ibat.
Nte eti nnwan emi akanwanadeye kpukpru se iketibede inɔ enye, enye ama eting-enyin okot onyung ekere abanga Eriso-isop eke Andinyanga ɔfɔn ye ke ofuri esit akan ini efen ke uwem esie. Sung-sung, ntutungo edifiɔk utom erifak eke Christ edifiɔrɔ ɔyɔhɔ ukpong esie—ndutuhɔ Esie ke ntak idiɔknkpɔ nnyin ndien nko ɔnɔ mme ubiak, mmemidem, edikpu, ye ndutuhɔ nnyin. Ndien enye ama ɔbɔ osongo obup idem esie akpan mbume emi ete: sia ema ekebem iso ekpe ekɔm-urua enɔ mme idiɔknkpɔ oro, nte afo oyom efiak ekpe ekɔm-urua oro ikaba? Enye edifiɔk ete ke oruk uyom oro inenke inyung inyeneke-mbom.
Nnwan emi ama ekpeb ndibɔp idem esie ndian Andinyanga otode ke mme ediomi ye edinam ekeme ndikɔk mme unan emi otode idiɔk unen edimek edinam eke owo efen onyung anwam enye ndinyeneukeme ndifen nnɔ nyung mbɔ emem, mbɔm, ye ima.
Enwongo ye Iko-ntiense
Mme enwongo-ediomi ye edidiong ediwɔrɔ kpɔt isu ke ntak Andinyanga nnyin, Jesus Christ. Enye okot nnyin ete ise Enye, 13 idi itiene Enye, 14 ikpepbe Enye, 15 inyung ibɔp idem nnyin idian Enye 16 ke mme ediomi ye edinam eke mfiak-mmen-ndi ikɔ Abasi Esie. Ami nting ikɔ ntiense nyung nwongo ke edikpono mme ediomi eyeyɔhɔ nnyin ke edinen-ido ye odudu Abasi ke akwa ubong. Ndien ami ndi ntiense nte ke odu-uwem Obong Jesus Christ edi Andinyanga nnyin. Kabanga mme akpaniko emi ke ami ndara nting iko-ntiense mbanga ke edisana enying Jesus Christ, amen.