Ami Mbenge Yak Enye Ekpeda Nnyin Anam Utom
Mkpri nsin-idem etangde ebok otokiet anam akwa ufon, emi anamde ediwak nkpo emi nnyin inamde nte mbet Jesus Christ akabare okpon.
Uyio emi edade ndom-ibokpot phlyllo ye isib pistachio enam enem eti-eti. Mbon ufokemana Kadado ekenam emi, ke ediwak isua, emi ekenyenede ebiet utem uyio ita ke obio Damascus, Syria. Ke ini ekong okotongode, ukpanisang ama etre udia ye mme nkpo efen emi edade edu uwem ndisim obio mmo. Mbon ufokemana Kadado ema etongo ndikpa biong. Ke ini mbrenyin emi okponde eti-eti, mbon utom Latter-day Saints Charities ye ubak ata mbon uko emi ekenamde utom eno Rahma Worldwide ema etongo ndino ufiop-ufiop udia kusen-kusen, diana ye mmong-eba emi enode nditowong. Ke okposong ini ama eke-be, ufokemana emi ema efiak etongo uwem mmo—ukem ntre ye ebiet utem uyio mmo—ini kiet efen ke obufa idut.
“Ke mmi-mmi emi, ekebe uyo kiet ama adisim ke ubet unam utom eke Ufok Abasi onyung asanga ye etop ete: “Ke ebede ofiong iba, nnyin ima ikeme ndibo udia nto ubet utem udia eke Rahma ye eke Latter-day Saints [Charities]. Mmeikpidighe ntre biong ekpe[ke] owot nnyin. Mbok ebo emi … uwutnkpo emi otode ufokurua mmi nte ekpri idiongo ekom. Ami mmebenge Akwa Abasi ndidiong mbufo … ke kpukpru nkpo emi mbufo enamde.” 1
Uyio eke esit-ikom ye editi. Enye edi okwo. Ono kpukpru mbon emi ekebongde akam ke ini mmo esede mbuk nkpontibe ema, ono kpukpru mbon emi ekenamde utom mfon ke ini mikifonke mmo ke idem mme mbon emi eketipde okuk esin ke ekpat okuk ndida nnam ufon ke uwem owo; emi enimde ete ke eyeda enam eti nkpo—esosongo.
Edisana Ubiong-utom ke Ndise mme Ubuene
Ufok Abasi Jesus Christ enyene edisana utom ndise mbon ubuene. 2 Enye edi kiet kotu mme adaha ke utom eriyanga-ukpong ye edimenede. 3 Se ikidide akpaniko ke mme usen eke Alma edi ata akpnaiko ono nnyin “Mmodo, ke itie uforo mmo, mmo ikibinke baba owo kiet emi ekesangade iferi, mme emi okokopde biong, mme emi okokopde nsat-itong, mme mbon udongo, mme mbon emi mibɔkke, ndien mmo ikisinke esit ke inyene, ke ntre mmo ema etat-ubok ye kpukpru owo, mkpri ye ikpɔ, ifin ye eyen-isong, eren ye nnwan, mbon eke midige mbon ufok Abasi ye mbon edide mbon ufok Abasi, mmo ikitengeke owo enyin kabanga mbon emi ekedude ke unana.” 4
Ufok Abasi enam ubiong utom ke ediwak nsio-nsio usung, emi esinide:
-
utom-unwam emi nnyin inamde ito Relief Society, eboho itie oku ye mme nka ukpep;
-
utre-udia ye ndida mme eno utre-udia nnam utom;
-
inwang unwam ye mme ebiet edongde-udia ke tian;
-
mme itie ekɔmde mbon eworode ke obio efen eduk edi;
-
Nndinwam mbon ufok nkpokobi;
-
Utom-unwam eke Ufok Abasi emi otukde ufon ke uwem owo;
-
ye JustServe app, emi anamde mme anam-utom-ke-mfon ekeme ndisobo ye nti ifet ndinam utom.
Kpukpru emi edi mme usung, emi edade odudu itie oku etim, emi mkpri nsin-idem etangde ebok otokiet anamde akwa ufon, emi anamde ediwak nkpo emi nnyin inamde nte mbet Jesus Christ.
Mme Prophet Enyene Ubiong-Utom eno Ofuri Ererimbot
Mme Prophet enyene ubiong-utom ndise nkpo mbanga ofuri ererimbot, idighe mbon Ufok Abasi kpot. Ami mmekeme ndinɔ mbuk nto ke se ami nkutde nte First Presidency esinde idem enam ubiong utom emi. Nte unana akade-iso ndikpon, First Presidency eno nnyin ubiong utom ndinam ndutim emi otukde ufon ke uwem owo awak ke usung emi okponde eti-eti. Ebehe mmo kabanga ikpɔ nkpɔ-ntibe ye ke ata mkpri nkpɔ-ntibe.
Mmi-mmi emi, nnyin ima imen ikewut mmo mme ofong ukpeme-idem eke ufokibok emi ufokutom Beehive Clothing ekimde eno mme ufokibok ndida nnam utom ke ini idiok-udongo emi. Nte osobo-udongo kiet, emi ama enehede ebehe President Russel m. Nelson. Enye ikiyomke ndikokut kpot. Enye okoyom ndisine enye nse nte enye etiede, ese mme ubok ye uniong esie ye nte ebopde uruk esie ke edem. Aka ko enye odoho nnyin, ye mbom ke uyo esie ete, “Ke osobode ye mbon owo ke ini anamde udeme utom fo, kom mmo ke utre-udia mmo, ke eno ima-esit mmo, ye ke utom-unwam mmo ke enying Obong.”
Mbuk eke Utom-nwam eke otukde ufon ke uwem owo.
Ke ndausung President Nelson, ami nyefiak nting nno mbufo kabanga nte Ufọk Abasi Jesus Christ eke mme Latter-day Saints enode unwam ke ini oyobio, unyek-isong, mbon uyom uboho ke esen idut—kpa ke ini idiok udongo—ekom enyene mbon Latter-day Saints ye mme ediwak ufan nnyin. Ke ini mme akpan iso-utom COVID-19 emi ewakde ebe 1,500 ekedide mkpon-nkan utom-unwam eke Ufok Abasi ke nkpo nte ofiong Efureeta emi ebede, Ufok Abasi nko ema esin unwam eno mbon emi enyenede unomo-obot ye enwan ediboho ke esen-idut ke idut 108. Edi ibat ikemeke nditing kpukpru mbuk. Yak ami nbuana uwutnkpo inang ndida nwut ata ekpri editabi nkop eke mme nkpo emi enamde.
Unwam enode South Africa ke udongo COVID
Dieke Mphuti emi edide eyen isua Efurekiet, ke South Africa, edi owo emi ete ye eka esie ema ekekpa ke ediwak isua emi ebede, emi anamde enye edi andikama mkpri ndito-eka esie ita ke idemesie. Esidi okposong nkpo ono enye ndikut udia emi ekemde mmo, edi unana udia ye unim owo sanga-sanga otode udongo COVID ama anam oro ekpere ndifina. Mmo ema esiwak ndikop biong, enyung edu uwem eto ntat-ubok otode mbohidung.
Ke usen ndaeyo kiet ke August, 2020, Dieke ama edighe ndikop nte ekongde usung ufok esie. Enye ama eberede usung onyung okut isen owo iba—kiet ekedi isungutom emi otode ufokutom Ufok Abasi eke area ndien eken ekedi owo-utom otode Nkokutom Nkori Otuowo eke South Africa.
Nka iba emi ediana otokiet ndida udia nsok mme ufokemana emi edude ke ata unana. Unwam ama oyoho Dieke ke idem nte enye esede eboho udia-ibokpot ye mme udia eken, emi edepde eto okuk Ufok Abasi eke ufon eke uwem owo. Oro eyenwam enye ndibok ufokemana esie ke ediwak urua tutu enye ekeme ndibo eku-unwam emi mme ukara edinode.
Mbuk Dieke edi kiet kotu tosin oruk nkpo eke nnyin ikutde oro adade itie ke ofuri ererimbot ke ini udongo COVID, esosongo ke eno-nwaidem mbufo.
Unwam enode Mbon Afghan ke obio Ramstein
Kpukpru nnyin imokut ke mbuk nkpontibe mme ndise ewutde mmi-mmi emi: enwanade ndida ubom-ofim nsiongo mme tosin owo ke idut Afghanistan. Ediwak owo ema edisim anwa ubom ofim mmo ye ebiet eken mmo edidude ke esisit ini ke idut Qatar, United States, Germany, ye Spain mbemiso mmo eka iso ke isang mmo man esim akpatre itie isang mmo. Unana mmo ekedi iwiwa, ndien Ufok Abasi ema esin unwan ke ndino se eyomde ye mbon unam utom ke mfon. Ke Anwa Ubom-ofim eke Ramstein ke Germany, Ufok Abasi ema eno ikpɔ eno eke nkpo ukpagha-efut, udia mkpri-ndito, udia ye mme ikpaukot.
Ndusuk ndito-eka iban Relief Society ema ekut ete ke ediwak iban Afghan ekeda ofong-idem mme ebe mmo efuk ibuot mmo koro ofong ufuk ibuot mmo ama awagha ke ufot ndutime ke anwa ubom-ofim eke Kabul. Ke edinam ufan emi ebede adanga edu ukpono ye usung edu uwem ekededi, ndito-eka iban ke Ramstein First Ward ema eboho otokiet ndikim ofong mbon Moslem nno iban Afghan. Sister Bethani Halls odoho ete, “Nnyin ima-ikop ite ke iban enana ofong ubong akam, ndien nnyin ikikim man [ofon mmo ke idem] ndibong akam. 5
Unwam enode Haiti kini Unyek-isong
Uwutnkpo emi editienede owut ete ke inaha nte afo edi owo inyene mme akamba owo ndidi eti nkpo-utom. Marie “Djadjou” Jacques emi edide eyen isua Efureta oto Caavailon Branch ke Haiti. Kini nsobo unyek-isong eketibede ekpere obio esie ke ofiong August, ufok eke ufokemana esie ekedi kiet ke otu tosin ufok emi okoduode. Ukemeke ndikere mbanga unana-idorenyin emi asangade ye ndinana ufok fo. Edi utu ke ayakidem esin ke unana-idoroenyin oro, Djadjou—ke se owo mikemeke ndinim ke akpaniko—ama akabare ese anwa.
Associated Press
Enye okut akamba mbohidung esie nte etimede ndien enye otongo akanwam enye. Enye ama anwam mbon eken nditang mbio mfep. Okposuk edi enye okokopde mmemidem, enye ama adiana ye mbon efen ke Ufok Abasi ndideme udia ye mme nkpo nsana-idem nno mbon efen. Mbuk Djadjou edi kiet kpot ke otu ediwak akwa uwutnkpo eke utom emi mme iwaad ye mkpri owo ekenamde nte mmo enwanade nditiene uwutnkpo Christ.
Unwam enode Germany kIni Ukwo
Ke esisit udua mbemiso unyek-isong, udim mkpri owo efen ema enam ukem utom oro ke ebede Atlantic aka nkang oko. Ukwo emi ekesimde usoputin Europe ke ofiong July okokpon akan ke ediwak isua.
Ke ini mmong otongode ndisat ke akpatre, andinyene ufokurua kiet ke obio mben-inyang eke Ahrweiler, Germany, ama editim ese se ibiarade ndien enye ama enehede edighe enye. Osuho-idem owo emi, ama obong akam ke ekpri uyo ete Abasi ono owo edinwam imo Ke usenubok emi etienede, President Dan Hammon eke Germany Frankfurt Mission ama edisim efak ye ekpri ibat mbon ukworo iko Abasi emi esinede utouto ofong emi ewetde Ubok Unwam. Mmong ama odok osim ikpat duop (3 m) ke ibibene enyene ufokurua oro, emi ayakde ediwak mbat enim ke edem. Mme anam utom mfon ema eda udok ekim mbat, esio ubrinkpo isongufok ye usat-ibibene, ndien esiongo kpukpru nkpo ekok ke efak man edimen esio. Okop-idara enyene ufokurua ama etiene mmo anam utom ke ediwak ini, idem ama akpa enye ete ke Obong odong isungutom Esie ediboro akam imo—ndien edi ke hour edip ye inang kpot! 6
“Ofon, Ami Mbenge Yak Enye Ekpeda Nnyin Anam Utom”
Ke etingde iko ebanga utom emi otukde ufon uwem owo eke Ufok Abasi, Elder Jeffrey R. Holland inikiet ama eting ete: “Eno iboro akam … ke ediwak ini … oto Abasi ndida mbon efen nnam utom. Ofon, Ami Mbenge Yak Enye Ekpeda nnyin anam utom Ami mbong akam nte yak nnyin idi iboro akam ino mme owo.” 7
Ndito-eka iren ye iban, oto ke utom-unwam fo, eno, ini, ye ima, afo emedi iboro ono ata ediwak akam. Ndien kanga ediwak ke odu ndinam. Nte mbon ufok Abasi emi inade baptism, nnyin idu ke idak ediomo ndise nkpo mbanga mbon unana. Edinwana nnam eke idem nnyin itimke iyom okuk mme ndika anyan ebiet; 8 mmo eyom ndausung Edisana Spirit ye udong esit ndidoho Obong nte, “ Se mi; dong mi utom.” 9
Isua Mfon-ido Jehovah
Luke 4ewet ete ke Jesus ama edi ke Nazareth, kpa ke ebiet emi ekebokde Enye, onyung adaha ke enyong ke synagogue ndikot nwed. Emi ekedi mkpere ntongo utom esie ke ererimbot, ndien enye okot ke nwed Isaiah ete:
Spirit Jehovah odoro mi ke idem, koro Enye emeyet mi aran onim, ete, nkworo eti mbuk nno ndito-ubuene; enye omodong mi ete nkok mbon eke esit obungode, ete nkworo uworo-ufin nno mbuotekong, nnyung nkworo erikut usung nno mme nnan, nnyung nsana mmo emi efikde nyak,
Nnyung nkworo isua mfon-ido Jehovah. …
“… Iko Nwed Abasi emi omosu ke utong mbufo mfin emi.” 10
Ami nno iko ntiense nte ke iko Nwed Abasi emi omosu ke ini nnyin nko. Ami nno iko ntiense nte ke Jesus Christ edi man andikɔk-mbon emi esit obungode. Iko Abasi Esie edi ndinam-nnan okut usung. Ufok Abasi Esie eyekworo uworo-ufin ono mbuotekong, ndien mme mbet esie ke ofuri ererimbot ke enwana nditat mmo emi efikde nyak.
Yak ami ntre etop mi ke nditongo ntak mbup mbume emi Jesus Christ okobupde Apostle Esie Simon Peter ete: “ Ndi afo ama-ma mi?” 11 Akpa ntak iko Abasi esine ke nte nnyin iborode mbume oro ino idem nnyin inyung “ibɔkde erong [Esie].” 12 Ye akwa utenge ye ima nno Jesus Christ Andikpep nnyin, ami mmekoot nnyin owo kiet-kiet edibuana ke ediye utom Esie, ndien “ami mbenge yak Enye Ekpedada nnyin anam utom.” Ke edisana enying Jesus Christ, amen.