Ndibenge-idem nno Edifiak-ndi Christ Oyoho Ikaba
Akan nte ikanamde ke usen edem, ana nte nnyin isobo iso ye iso ye akpaniko emi ite ke nnyin imekpere Edifiak-Ndi Jesus Christ Oyoho Ikaba.
Nte ewetde ke Nwed Mormom, isua itiokiet mbemiso emana Jesus Christ, Samuel, edinen-owo Lamanite , ama eting nkukut ono mbon Nephi emi ke ini oro ediwak mmo ema ekekabade edi mbon emi eworode ekpong usung Abasi, 1 abanga mme idiongo emi edisangade ye emana Andinyanga nnyin. Ke ndiokiso, ediwak mbon Nephi ema esin mme idiongo oro koro enye “ikesineke ifiok ite ke oruk owo oro nte Christ [eye] di.” 2
Ke mbom, nte ewetde ke nwed Abasi, ediwak mme Jew, ke ukem usung emi, ikekemeke ndinyime nte ke owo oro ekerede Jesus, otode usuhore obio Galilee, ekedi Messiah emi eketiede ebet ke anyan ini. 3 Jesus, emi ekedide ke akpan man edinam ediwak prophecy oworo osu emi mme prophet Hebrew ekentingde,mmo ema esin enye enyung ekong enye ke cross koro, nte prophet Jacob eke Nwed Mormon ekekpebde, mbon Jew, ema “ese ebe idiongo.” Mmodo, Jacob ama ono iko ntiense ete ke Abasi ama osio se inwangade efep ke otu mmo, ndien ono mmo ediwak nkpo emi mmo mikemeke ndifiok, koro mmo ekeyom oro. Ndien koro mmo ekeyomde oro Abasi ama anam ntre, man mmo ekpetuak ukot eduo. 4
Kpa nte emi etiede ntre, iduhe ukpep, utibe-nkpo, inyung iduhe edibiongode eke angel enyong, nte Lamam ye Lemuel ekekutde, 5 etie nte ekeme ndinyene odudu ndinam ndusuk owo ekabade ekpong usung mmo, usung mmo ekutde nkpo, mme ndinim ke nkpo edi akpaniko. Oro enehede edi ntre ke ini mme ukpebnkpo mme utibe-nkpo minyimeke ye ekikere, uduak mme ifiok eke owo.
Mbok domo se ke esisit ini mme itie nwed iko Abasi iba emi, akpa oto Apostle Paul emi eketingde iko abanga mme ukperedem usen ndien oyoho iba oto prophet Alma emi eke emende owut nte Abasi esinamde utom ke ufot ubon owo. Akpa otode Paul:
“Edi efiok emi nko ete, ke ndiok eyo eyedu ke ukperedem usen.
“Koro mme owo eyedi mme ama idem, ye mme ama inyene, enyung ebure idiok mbure, eseri iseri, esungi isungi, esong ibuot ye ete ye eka, enana esit ekom, enana utenge Abasi,
“Enana ima uduot owo, enyung ebiat enwongo, ema ebiari, eyak idiok itong akan mmo ubok, etie obom-obom, enyung esua se ifonde,
“Mmo edi mme ada owo nno mme asua, ye mbon idiok iwuk, ye mbon nkohore-idem, mmo ema mbre ekan Abasi; …
“Mmo enyung etak ndikpekpep kpukpru ini, edi ikemeke ndisim ifiok akpaniko.” 6
Ndien idahaemi otode Alma, emi eke etingde iko abanga akwa ibuot iko eke gospel Jesus Christ “Idahaemi mbufo emekeme ndikere ete ke emi edi ndisime idem mi; edi sese ami ndoho mbufo nte, ke oto ke mkpri ye mmem-mmem nkpo ke edi inam mme ikpo nkpo; ndien ke ediwak ndaha esida mkpri nkpo etimede mme ofiok nkpo owo.” 7
Nnyin idung ke ererimbot emi oyohode ye akwa ifiok ye odudu. Nte ededi, mme nkpo emi esiwak ndidip unana-nsongonda itiat idakisong emi ebopde mmo edori. Mmodo, mmo idaha owo ika ata akpaniko ye nditiene Abasi ye odudu ndibo eriyarare, ndibo ifiok spirit, nnyung nnyene mbuotidem ke Jesus Christ emi adade owo aka eriyanga 8
Enehede eti nnyin ebanga iko emi Obong nnyin eketingde ono Thomas ye mme Apostle eken ke ekperede ini uwa usio-isop Esie: “ Ami ndi usung ye akpaniko ye uwem: owo baba kiet itieneke Ete, Ibohoke ebe ke ami.” 9
Eke mbon emi enyenede enyin ndikut usung, enyenede utong ndikop iko, enyung enyenede esit ndikop, akan nte ekenamde ke ini edem, ana nte nnyin isobo iso ye iso ye akpaniko emi ite ke nnyin imineghede ikpere Edifiak-Ndi Jesus Christ Oyoho Ikaba. Ke akpan, akwa afanikong ke ebet mbon emi edude ke isong ke ini Enye edifiakde idi, edi kabanga emi, inaha nte mbon mbuotidem ekop ndik.
Idahaemi ami nyeting nto Ibuot Iko eke Ufok Abasi emi ibuot esie edide “Edifiak-ndi Jesus Christ Oyoho Ikaba”:
“Ke ini Andinyanga edifiakde idi, Enye eyedi ke odudu ye ubong ndida ererimbot nte Obio Ubong Esie. Edidi Oyoho Ikaba Esie edi idi ntongo Isua Tosin.
“Edidi Oyoho Ikaba edi-di ini ndik, ini ntua eyet ono mme anam idiok, edi enye eyedi usen emem ono ndinen owo. Jehovah okofiori ete:
“‘Mmo emi enyenede ibuot enyung ebode akpaniko, enyung ebode Edisana Spirit nte ndausung mmo, inyung ibiangake mmo—ke akpaniko ami ndoho mbufo nte, owo idisibeke mmo ifep iduok ke ikang, edi eyesuho ke usen oro.
“Ndien eyeno mmo ererimbot nte inyene mmo, ndien mmo eyetot enyung enyene odudu, ndien ndito mmo eyekori ke unana idiok-nkpo ekesim erinyanga-ukpong.
“Koro Obong eyedu ke ufot mmo, ndien ubong esie eyedoro mmo ke idem, ndien enye eyedi edidem mmo ye ono-ibet mmo’ (Nwed Ukpebnkpo ye Ediomi 45:57–59).” 10
Ke ndibenge-idem nno Edifiak-ndi Jesus Christ Oyoho Ikaba, ami nyeno mbon mbuotidem ata akpan, iko ndongesit emi otode prophet Amos eke Akani Ediomo ete: “Ke akpaniko Obong Abasi midinamke baba nkpo kiet, ke mibohoke ini enye ayarade uduak Esie ono isungutom esie mme prophet.” 11
Ke spirit emi, prophet Abasi ke ererimbot mfin emi, President Russell M. Nelson, ama ono nnyin eti item ke esisit ini emi ebede ete: “Iko Abasi Jesus Christ edi iko Abasi erikabare esit. Ke ntak Erisio-Isop eke Andiyanga, iko Abasi Esie ono nnyin ikoot ndika iso mkpuho, nkori, nyung nkabade nsana mma. Enye edi iko Abasi idorenyin, eke edikok, ye eke nkori. Ke ntem, iko Abasi edi etop idara! Spirit nnyin adara ye ofuri ekpri ikpatisang nnyin inamde ika iso.” 12
Ami ke ofuri esit nno iko ntiense mbanga nnyung nsongo nte ke Abasi odu ke akpaniko ye mme utibe-nkpo ke uwem ofuri usen eke mme anana-ibat otu owo ke nkong-nkong ye usuhode itie ke uwem. Ke akpaniko, owo isisopke nditing iko mbanga mme ediwak edisana nkpo emi ekutde, ke ubak ntak edide ke mmo enyene edisana ntongo ye ntak emiom emi ekemede ndito ndusuk owo mifioke ikan oro.
Kabanga emi, akpatre prophet ke Nwed Mormon, Moroni, eti nnyin ete:
“Ndien ami ntongo ntak nting iko nno mbufo emi ekangde eriyarare Abasi, enyung edoho ete ke ema eduongo mmo, ete ke eriyayare iduhe, mme ndikut nku-kut, mme eno, mme ukok udongo, mme edisem nsio-nsio usem, ye edikabade mme usem;
“Sese ami ndoho mbufo nte, ke owo ekededi emi akangde mme nkpo emi ifioke iko Abasi eke Christ, ihn, enye ikotke nwed Abasi, edieke edide ntre, enye ifioke se mmo eworode.
“Nte nnyin ikotke ite ke Abasi edi ukem-ukem mkpong, mfin, ye ke nsinsi, ndien ukpuhode iduhe ke enye mme mbiet edikpuho?” 13
Ami nyetre etop mi ye akpaniko nkukut emi okotode Prophet Joseph Smith, emi enye okonode ke ini ekperede utit utom esie nte enye ekesede ini iso ebet Edifiak-ndi Jesus Christ Oyoho Ikaba ete : “Nte nnyin idikaha iso ke akwa utom emi? Eka iso ndien idihe edem. Uko, ndito-ete irenowo,[ndien, yak ami ndian, ndito-eka iban]; eka iso, ekesim edikan oro! Eyak esit mbufo adara. onyung enem eti-eti.” 14 K’emi ami ndian iko ntiense mmi ke enying Jesus Christ, amen.