Nte Baba Balsam Iduhe ke Gilead?
Odudu edikɔk eke Andinyanga idige ukeme Esie ke ndikɔk ikpɔkidem nnyin kpɔt, edi ndusuk kpa ata akpan-nkpɔ, edi ukeme Esie ke edikɔk esit nnyin.
Esisit ini ke ami nkeyɔŋde mission mi ndi, kini nkedide eyen-ufoknwed ke Brigham Young University, ami mma mbɔ ikoot phone nto ete mi. Enye odoho mi ete ke ekut udongo cancer ke idibi esie ndien ke ndaha enye edibɔhɔ edi ekpri, imɔ imebiere ndibo ukɔk nnyung mfiak nkenyene inem uwem mbubehe esie. Ikoot phone oro ekedi ini ekikere ono mi. Ete mi ekedi bishop, ufan, ye onoitem mi. Nte eka mi, ndito-eka mi, ye ami ikekere-ibanga ini-iso, oro ekebiet ke ufɔn iduhe. Ekpri eyeneka-eren mi, Dave, okodu ke mission ke New York onyung abuana oto anyan-ebiet ke mme mkposong nkpo-ntibe eke ufokemana emi.
Mme ɔnɔ-usɔbɔ eyo oro ema ekere usiak-idem man edomo enyung etre udongo cancer oro nditara. Ufokemana nnyin enehede enam utre-udia enyung ebong-akam eyom utibe-nkpo. Ami nkere ke nnyin ima inyene mbuotidem ekekem ke ete mi ekeme ndibɔ edikɔk. Esisit ini mbeiso enam usiak-idem, mkpon-nkan eyeneka mi eren, Norm, ye ami ima inɔ ete mi akam edidiong. Ye ofuri mbuotidem emi nnyin ikenyenede, nnyin ibong-akam ite ke enye eyebɔhɔ.
Usiak-idem oro akana nte ebighe ke ediwak ini, edi ke ekpri ebede, docta oro ama oworo edi ubet-ufok emi esibetde man edisobo ye ufokemana nnyin. Enye odoho nnyin ete ke nte mmimo itongoke usiak-idem oro, mmimo idikut ke udongooro ama atara oyoho ofuri idem ete mi. Kabanga se mmo ekekutde, ke ete mmi enyene esisit ofiong ifang edidu uwem. Nnyin ikodu ke oyomo-nsia.
Nte ete mi edemede edi ke usiak-idem oro, enye enehde oyom ndidiongo mme usiak-idem oro ma okut unen. Nnyin ima ibuana idiok etop oro ye enye.
Ufokemana nnyin esuk ekaka-iso enam utre-udia enyung ebong-akam eyom utibe-nkpo. Nte nsong-idem ete mi ɔsɔpde ndisuhore, nnyin itongo ndibong-akam yak enye okukop ubiak ubiak aba. Ke akpatre, ke nte idem esie akade-iso odiok, nnyin ibenge Abasi ite anam enye ebe-efep usɔp-usɔp. Ata esisit ini ke usiak-idem oro ebede, nte asiak-idem oro eketingde, ete mi ama ebe efep.
Ediwak ima ye ukpeme ama oduk edi ufokemana nnyin oto mbon ward ye mme ufan eke ufokemana nnyin. Nnyin ima inyene ediye ubukowo emi ekekponode uwem eke ete mi. Nte ini ebede, nte ededi, ndien nnyin ikop ubiak edinana ete mi, ami ntongo ndikere ntak eke ete mi mikebɔhɔke. Ami nkere mme mbuotidem mi ikɔsɔŋɔke ikem. Nsidi ntak eke ubak ufokemana esibɔde utibe-nkpo, edi ufokemana nnyin inyeneke. Ami mma mkpeb ke mission ndikot nwed Abasi nyom iboro, ntre ami ntongo edidungo nwed Abasi.
Akani Testament ekpeb abanga ufiop-ufiop ufik mme aran emi edade ekɔk mme unan emi ekenamde ke ikot emi ekekoride ke Gilead. Ke eyo Akani Testament, ekesidiongo aran oro nte “balsam eke Gilead.” 1 Prophet Jeremiah ama eseme abanga afanikong emi enye okokutde kotu ikot esie ndien oyom ubɔhɔ. Jeremiah obup ete,“Nte baba balsam iduhe ke Gilead; nte baba abia-ibok iduhe do?” 2 Ke nwed, ikwo ye nkpɔ-usɔ, esiwak ndida Andinyanga Jesus Christ nte Balsam eke Gilead otode ke nworo-nda odudu edikɔk-udongo Esie. Ukem nte Jeremiah, ami mma nkere, “Nte baba balsam iduhe ke Gilead ino ufokemana Nielson?
Ke Nwed Mark ibuot Iba eke Obufa Testamenet, nnyin Andinyanga ke Capernaum. Ikɔ abangade odudu edikɔk eke Andinyanga ama atara oyoho ofuri obio, ndien ediwak owo enam-isang eka Capernaum man ekebɔ ukɔk eto Andinyanga. Ata ediwak owo ema edu emi ekebohoke ekpere ufok emi ekekutde Andinyanga tutu iduhe ubet-ufok inɔ efen Enye ndibɔ ofuri mmɔ. Irenowo inang ekemen owo udongo akpa-ubeng ete edibɔ ukɔk oto Andinyanga. Mmɔ ikekemeke ndikut usung ke otu owo, ndien ke ntre mmo ema efuhɔde enyong ɔkɔm ufok oro enyung esuhɔre erenowo enim man oso-bo ye Andinyanga.
Nte ami nkotde mbuk emi, ami mma ndighe ke se Andinyanga eketing ke nte Enye okutde owo emi ete: “Eyen Mi, emefen mme idiok-nkpo fo.” 3 Ami ndikere nte edieke mi mkpekedide kiet kotu irenowo inang oro emi ekemende owo udongo emi, ami mkpekedoho Andinyanga nte, “Nnyin iketim ida enye idi mi man edikɔk udɔŋɔ.” Ami nkere ke Andinyanga ekpekeboro ete, “Ami mmekɔk enye udongo.” Nte amam emem ete ke ami nketimke mfiok—e odudu edikɔk eke Andinyanga idige ukeme Esie ke ndikɔk ikpɔkidem nnyin kpɔt edi, ndusuk kpa ata akpan-nkpɔ, edi ukeme Esie ke edikɔk esit nnyin ye mbungo esit eke ufokemana mi?
Andinyanga ama ekpeb akpan ukpebnkpɔ kiet oto ke ifiok-ukpeb emi ke nte Enye ɔkɔkɔkde erenowo oro ke akpatre. Oro akabare anwanga mi ete ke etop Esie ekedi ke Enye ekeme ndituk enyin mbon emi ekedide nnan, ndien mmɔ ekeme ndikut-usung. Enye ekeme ndituk utɔŋ mbon emi ekedide inan, ndien mmɔ ekeme ndikop-ikɔ. Enye ekeme ndituk ukot mbon emi mikemeke ndisaŋa, ndien mmɔ ekeme ndisaŋa. Enye ekeme ndikɔk enyin ye utɔŋ ye ukot nnyin, edi ata akpan nkpɔ ke ofuri oro edi ke, Enye ekeme ndikɔk esit nnyin ke nte Enye eyetde nnyin osio ke idiɔknkpɔ onyung emenede nnyin osio ke mkpɔsɔŋ idomo.
Ini emi Andinyanga ekebiɔŋɔre ɔnɔ mme owo ke Nwed Mormon ke Enye ama Ekeset-ke-mkpa, Enye ama afiak etiŋ abaŋa odudu edikɔk Esie. Mbon Nephi ema ekop uyo otode heaven etiŋde ete, “Nte mbufo idifiakke edem idahaemi itiene mi, ndien etua-mkpɔfiɔk ke mme idioknkpo mbufo, enyuŋ ekabare-esit, man ami mkpekɔk mbufo?” 4 Ibighike, Andinyanga ekekpep ete, “Koro mbufo ifiɔkke nkpɔ eke edinamde mmɔ efiak edem ekabare esit, enyuŋ etiene mi ye ofuri uduak esit mmɔ, ndien Ami nyekɔk mmɔ udɔŋɔ.” 5 Andinyanga iketiŋke ibaŋa edikɔk eke ikpɔkidem edi edikɔk eke spirit eke ukpɔŋ mmɔ.
Moroni ada edidian ifiɔk edi ke nte enye abuanade mme ikɔ eke ete esie, Mormon. Ke ama eketiŋ abanga utibe-nkpɔ, Mormon anam anwanga ete ke, “Christ ɔkɔdɔhɔ ete: Edieke mbufo enyenede mbuɔtidem ke ami mbufo eyenyene odudu ndinam ŋkpɔ ekededi eke ɔfɔnde ye ami.” 6 Ami ndikpeb nte ke nkpo mbuotidem mi ana edi Jesus Christ ndien ana ami nnyime se ifonde ye Enye ke nte ami nnyenede mbuotidem ke Enye. Ami mfiok idahaemi nte ke edibe-mfep eke ete mi ekedi ke ufon uduak Abasi. Idahaemi, nte ami ndoride ubok mi ke ibuot owo efen man ndiong owo oro, mbuotidem mi odu ke Jesus Christ, ndien ami ndifiok ete ke owo oro ekeme ndien ke eyebo ata edikok edieke oro ofonde ye Christ.
Erisio-isop eke Andinyanga, emi anamde odudu ufak Esie ye ukeme Esie mbiba odu, edi akpatre edidiong emi Jesus Christ onode kpukpru owo. Nte nnyin ituade-mkpofiok ke ata ofuri esit, Andinyanga eyeyet nnyin osio ke idioknkpo. Nte nnyin inemde-esit iyak uduak nnyin ino Ete, kpa ke ini ata okposong ndaha, Andinyanga eyemenede mbiomo nnyin onyung anam mmo efere. 7
Edi se akamba ukpepnkpo eke ami nkekpepde mi. Ami mma ndue edinim ke odudu edikok eke Andinyanga ikanamke nkpo ino ufokemana mi. Nte ami mfiakde nse idahaemi ke enyin akwa owo ye ifiok-ukpep, ami nkut ke odudu edikok eke Andinyanga ama odu ke uwem owo ufokemana mi kiet-kiet. Ami nkenehede nyom edikok eke ikpokidem edi ntre edikut mme utibe-nkpo emi akadade itie. Jehovah ama osongo onyung ekpeme eka mi akan ukeme esie ke ini okposong idomo emi, ndien enye ama odu anyan ye eti uwem. Enye ama enyene ata eti odudu ke uwem ndito ye ndito-ndito esie. Jehovah ama odiong mi ye ndito-eka mi ye ima, edidiana-kiet, mbuotidem, ye osongo emi akakabare edi akpan ndaha kiet ke uwem nnyin ndien ke akaka-iso mfin emi.
Oworo nso kabanga ete mi? Ukem nte ofuri mbon se ikabare esit, enye ama obo ukok eke spirit ke nte enye okoyomde onyung obode mme edidiong emi odude oto ke ntak Erisio-isop eke Andinyanga. Enye ama obo erifen ke mme idioknkpo esie ndien idahaemi ke-ebet utibe-nkpo eke Eriset. Apostle Paul ekpeb ete, “Koro nte kpukpru owo ekpade eto ke Adam, kpa ntre ke edi nam kpukpru owo edu uwem eto ke Christ.” 8 Mbufo emekut, ami nkodoho Andinyanga nte, “Nnyin ikada ete mi isok Fi man edikok enye udongo,” ndien idahaemi edinwanga mi ete ke Andinyanga ama-okok enye udongo. Balsam eke Gilead ama anam utom ono ufokemana Nielson—idihe ke usung emi nnyin ikekerede, edi enehede edi ke ata usung emi okodiongde ndien akade iso ndidiong uwem nnyin.
Ke Nwed John ibuot Itiokiet eke Obufa Teatament, Andinyanga ama anam ata inem utibe-nkpo kiet. Ye ata esisit iyak ye esisit nkukuk uyio, Andinyanga ono Tosin owo Ition udia. Ami mmokot mbuk emi ke ediwak ini, edi odu ndaha ke ukpepnkpo oro eke ami nketipde edi idahaemi enyene akamba nkpo ono mi. Ke Andinyanga ama okono Tosin owo Ition udia okure, Enye odoho mbet Esie ete etang mbebehe nsuho oro, mbon eke owo midiaha, emi okoyohode akpasa duopeba. Ami mmekere ntak emi Andinyanga akadade ini man anam oro. Oro ediwanga mike ukpepnkpokiet eminnyin ikemeke ndikpep nto edinam oro ekedi emi: Ke Enye ekeme ndino Tosin owo Ition udia ndien eke owo midiaha osuk odo-du. “Mfon Mi ekem kpukpru owo udeme.” 9 Odudu ufak ye edikok Andinyanga ekeme ndifuk idioknkpo, unan, mme idomo ekededi—isehe nte okponde mme nte osongde—ndien nsuho ke odo-du. Mfon Esie ekem udeme.
Ye ifiok oro, nnyin imikeme ndisanga nka iso ye mbuotidem, idiongo ite kini mkposong idomo edide—ndien ke akpaniko mmo eyedi—mme kini idioknkpo ofukde uwem nnyin, Andinyanga ada-da “ye osongo edikok odude ke mba esie,” 10 ke okot nnyin ete itiene Enye.
Ami nno mbufo iko ntiense mi mbanga Balsam eke Gilead, Andinyanga Jesus Christ, Andifak nnyin, ye kabanga utibe odudu edikok Esie. Ami nno iko ntiense mi mbanga udong Esie ke ndikok mbufo udongo. Ke enying Jesus Christ, amen.