Ndidot Idighe Unana-ndo
Ke ini afo ekerede ete ke afo emetip ke ata ediwak ini ndien afo ukemeke ndika iso nnwana ukeme, ti Erisio-Isop eke Christ ye mfon emi enye onode odu ke akpaniko.
Ini kiet ami mma nkama nkpo uting-iko mi nno etop esuk eyenanwan ye ebe-eyen mi. Ami mma ndoho nte, “Sese, mbufo mbiba. Ke akpaniko mmema mbufo.” Mmo ekebɔ , “Mmesua mbufo mbiba. Mkpema fi.” Nte idighe nkpo mkpaidem ndikut nte eti ye etop eti-esit ekemede ndidi se mme inwangake ofon? Emi edi se isitibede ndusuk ini ye etop Abasi abangade edikabare esit ye ndidot.
Ndusuk owo ke ndudue ebɔ etop ete ke ndikabare esit nyung mkpuho inamke baba ufon kiet. Etop Abasi edi ke mmo edi akpan nkpo. 1 Nte Abasi imaha nnyin okposuk edi nnyin inyenede mme ndudue? Edi ntre! Enye ama nnyin eti-eti. Ami mmema ndito-ndito mi, unana-mfon mma ye kpukpru, edi oro iworoke ite ke ami nyomke mmo enehede efon enyung ekabade edi kpukpru se mmo ekemede ndidi. Abasi ama nnyin nte nnyin itiede, edi Enye ama nnyin eti-eti ndiyak. nnyin itie ntem 2 Ndikori ntiene Obong edi ofuri se uwem-isong edide abanga. 3 Ndikpuhore edi kpukpru se ibangade Erisio-Isop Christ. Christ ikemeke kpot ndinam nnyin iset ke mkpa, ndinam nnyin isana, ndidong nnyin esit, nyung nkok udongo nnyin, edi ke ofuri emi, Enye ekeme ndikpuhore nnyin ikabade inehede itie nte Enye. 4
Ndusuk owo ke ndudue ebɔ etop ete ke ndikabare esit edi nkpo emi editibede ini kiet. Etop Abasi edi, nte President Russell M. Nelson ekekpepde, “Edikabare esit … edi nkpo emi osuk akade iso.” 5 Ndikabare esit ekeme ndida ini ye ndiwana ukeme ediwak ini,” 6 ke ntre ndisana idiok nkpo nyak 7 nnyung nnana “udong ndinam idiok aba, nnyung nnam eti kpukpru ini” 8 edi se iyomde ke ofuri eyo uwem. 9
Uwem etie nte owo ndika anyan usung isang. Nnyin ikemeke ndisim ebiet emi nnyin ikade ke ndikama nkpo-ukama mmong-uwat kiet. Ana nte nnyin itongo-ntak isin aran-uwat ke nkpo-ukama mmong-uwat ediwak ini. Ndidia udia-Ɔbɔŋ etie nte owo ndiwat nduk ebiet unyam mmong-uwat. Nte nnyin ikabare esit inyung inam ediomi nnyin akabade edi obufa, nnyin inwongo unyime nnyin ndinim mbet, ndien Abasi ye Christ ediong nnyin ye Edisana Spirit. 10 Ke ibio-ibio, nnyin inwongo ndika iso ke isang nnyin, ndien Abasi ye Christ enwongo ndifiak nsin nkpo-ukama mmong-uwat nnyin oyoho.
Ndusuk owo ke ndudue ebo etop ete ke mmimo ikemeke ndibuana oyoho-oyoho ke iko Abasi koro mmo iyakke idiok edu-uwem ofuri-ofuri iyak. Etop Abasi edi ke ndidot idighe unana-ndo. 11 Ndidot edi nditing akpaniko nyung nka iso nwana ukeme. Ana nte nnyin inam akpaniko ye Abasi, mme adausung eke itie oku, ye mbon eken emi emade nnyin, 12 ndien nnyin ana inwana ndinim mbet Abasi inyung ikpaha-mba koro nnyin imidue. 13 Elder Bruce C. Hafen odoho ete ke ndikori edu-uwem eke Christ “oyom ime ye nsin-ifik akan nte enye oyomde unana-ndo.” 14 Obong ama odoho ete ke “ekeno mme eno eke Spirit ke ufon mbon oro emade mi enyung enimde kpukpru mbet mi, ye owo emi oyomde ndinam ntre.” 15
Akparawa kiet emi ami nkotde Damon ama ewet ete: “Nte nkoride ami mma nnwana ye ndioi-ndise. Ediwak ini ami mmakop obut tutu ami nkemeke ndinam nkpo ofon.” Ini ekededi emi Damon oduode, ubiak mkpofiok esie okpon eti-eti, enye ososop ebiere ono idem esie ete ke imo idotke ndibo uto mfon, erifen-nno, mme ufang efen ekededi nto Abasi. Enye odoho ete: “Ami mbiere ke ami mmodot ndibo ukut kpukpru ini. Ami mma nkere ke ekeme ndidi Abasi asua mi koro ami nnyeneke udong ndisin ifik nnam utom nnyung nkan nkpo emi ofuri-ofuri. Ami mmekeme ndika iso ke urua kiet ye ndusuk ini ke ofiong kiet, edi ndien ami nyetre nnyung nkere nte , ‘Ami nkemeke ndinehede mfon aba, ndien ufon unwana ukeme edi ewe?’”
Ini kiet ke uto usuhure idaha oro Damon ama odoho adaibuot itie oku esie ete: “Ekeme ndidi ami nyetre ndidi Ufok Abasi. Ami mmekpa-mba ndidi owo mbubik.
Adausung esie oboro ete: “Afo udighe owo mbubik koro afo enyenede idiok edu uwem emi afo osuk anwanade ukeme ndibiat. Afo edi owo mbubik edieke afo edipde enye, mme afo anwanade nditing nno idem fo ete ke Ufok Abasi enyene mfina ke ndinim uto nkong-nkong ndaha oro. Nditing akpaniko mbanga edinam fo nnyung ndomo ukeme ndika iso iwutke ke afo edi owo mbubik. Oro edi ndidi mbet.” 16 Adausung emi ama eting se Elder Richard G. Scott: ekekpepde ete , “Obong okut unana-ukeme isio-isio akan nte enye okutde nsong-ibuot. … Ke ini Obong etingde iko abanga unana-ukeme, enye esiwak ndisanga ye mbom.” 17
Ndikut nkpo ke uto usung oro ama ono Damon idorenyin. Enye ama edikut ete ke Abasi iduhe ke enyong idoho ete, “ Damon ama afiak oduo.” Edi, Enye ndidoho ete, “ Sese anyan usung emi Damon asangade edisim.” Ke akptre eyen-eren emi ke utit ama etre ndisuk enyin nse ke obut mme ndise nyom ntak ye eneni. Enye ama ese enyong oyom edisana unwam, ndien enye ama okut. 18
Damon eting ete, “Nkokure ini emi ami nkewongode mbine Abasi ke usen edem ekedi ndibenge erifen-nno, edi idahaemi ami nko mmebenge mfon—‘odudu ukeme Esie.’[Bible Dictionary, “Grace”]. Akananam ami nnamke oro akpa. Idahaemi ami mbiat esisit ini ke ndisua idem mi mbanga se ami nkenamde nyung nnyene ediwak ini ndima Jesus ke se Enye akanamde.”
Ke esede ayan ini emi Damon akanwanade, ikenwamke inyung inamke baba ufon ke ete ye eka ye mme adausung emi enwamde enye ndidoho ete “ku unam aba” ata usop-usop mme ndino mme idaha nditre ndinam man ese mme enye odot. Edi, mmo eketongo ye ekpri, utit-uduak emi ekemede ndisim. Mmo ema ekpong idorenyin ndiyom enye okpuhode ofuri-ofuri ini kiet enyung ese ndinwam enye okori sung-sung, emi ama ayak Damon enehede anam okut unen inyung inamke ndudue. 19 Enye, ukem nte mbon Limhi emi ekedude ke ufin, ama ekpep ete ke imo imekeme “ndikori sung-sung.” 20
Elder D. Todd Christofferson ama ono item ete: Ke ndinam nkpo emi okponde eti-eti, ekeme ndiyom nnyin ndinam utom ke mkpri ubak, kpukpru usen. Ndida mbufa ye nti ido nsin ke edu-uwem nnyin mme ndikan ndioi ido mme idiok-nkpo emi emehede owo ke ediwak ini oworo ndisin ifik mfin efen etiene mkpong ndien efen etiene, ekeme ndidi ntre ke ediwak usen, kpa ke mme ofiong ye mme isua. Edi nnyin imikeme ndinam enye koro nnyin imikeme ndiseme nno Abasi … ke unwam emi nnyin iyomde ofuri usen 21
Idahaemi, ndito-eka iren ye iban, udongo COVID-19 idighe mmem-mmem nkpo ino owo ndomokiet, edi ndidu-ikpong emi asangade ye unim owo nsan-nsan anam uwem enehede osong ye mbon emi enwanade ye idiok edu uwem. Ti ete ke ukpuhode ekeme ndidu, edikabare esit edi ndutim emi osuk akade iso, ndien ndidot idighe unana-ndo. Ata akpan-akpan, ti ete ke Abasi ye Christ enyene udong ndinwam nnyin ke ebiet emi idahaemi. 22
Ndusuk owo ke ndudue ebo etop ete ke Abasi ke ebet ndinwam ke ini nnyin ima ikure edikabare esit. Etop Abasi edi ke Enye eyenwam nnyin nte nnyin ikabarede esit. Mfon esie odu ono nnyin, “ifinake ebiet emi nnyin idude ke usung nkopitem.” 23 Elder Dieter F. Uchtdorf has said: “Abasi iyomke mbon emi enanade ndo. Enye oyom mbon emi edinode esit ye udong ekikere mmo’ [Doctrine ye Covenants 64:34], ndien Enye eyenam mmo ‘esana-ema ke Christ’.”[Moroni 10:32–33].” 24
Ediwak owo ekop ubiak otode nsuana ye mbiara ebuana eke ufokemana tutu edi okposong nkpo mmo ndinim mbom ye ayan-ime Abasi ke akpaniko. Mmo ikemeke ndikut Abasi nte Enye edide—Ete ima emi anwamde nnyin ke unana nnyin 25 onyug ofiokde “ndino mbon emi ebengede enye nti nkpo.” 26 Mfon esie idighe utip emi enode mbon emi edotde. Enye edi “edisana unwam” Enye onode emi anwamde nnyin ndikabare ndot. Enye idighe utip edinen ido. Enye edi “odudu edidiong” Enye onode emi anwamde nnyin ndikabare ndi ndinen owo. 27 Nnyin Isangake kpot ibine Abasi ye Christ. Nnyin isanga ye Mmo. 28
Ke ofuri Ufok Abasi, iwaad eting mme Ibuot Iko eke Nkaiferi Iban ye Eboho eke Aaronic Priesthood. Tongo ke New Zealand kesim Spain kesim Ethiopia kesim Japan, nkaiferi iban edoho ete, “Ami mmema eno edikabare esit.” Tongo ke Chile kesim Guatamela kesim Moroni, Utah mkparawa eting ete, “Nte ami nwanade ndinam utom, nsin muotidem ke edinam nnyung nnam ofon akan ku-usen ku-usen, Ami nyedot ndibo edidiong eke temple ye oyoho idara eke iko Abasi.”
Ami mmewongo ke mme edidiong oro ye idara oro odu ono kpukpru mbon emi enimde ofuri mbet ye “owo emi oyomde ndinam ntre.” 29 Ke ini afo ekerede ete ke afo emetip ke ata ediwak ini ndien afo ukemeke ndika iso nnwana ukeme, ti Erisio-Isop eke Christ ye mfon emi enye onode odu ke akpaniko. 30 “[Enye] ayan ubok mbom esie ono fi. ” 31 Enye ama fi—mfin, isua edip ke iso, ye ke nsinsi. Ke enying Jesus Chrst, amen.