Ndisongo Mbuotidem Nnyin nno Jesus Christ
Nwed Abasi ye ifiok nnyin edi mme eno Abasi—mme eno emi nnyin isiwakde ndida ke mbuburu. Yak nnyin ima mme eno emi.
Sosongo eti-eti, Elder Nielson, ke inem etop fo. Nnyin ima iyom etop oro.
Ndima ndito-eka mi iren ye iban, President Russell M. Nelson ekekpep nnyin ke mmi-mmi emi ete: “Ke ndinam nkpo ekededi oyom ukeme. Ndidi eti mbet Jesus Christ esine do. Ndikori mbuotidem ye idorenyin mbufo ke Enye oyom utom.” Kotu mme ekikere se enye okono nnyin man mbuotidem nnyin ke Jesus Christ okori edi yak nnyin ikabare idi mme andibo ukpep, yak nnyin ifuk idem nnyin ke nwed Abasi man inehede ifiok utom ye ukworo-iko Christ. (Se “Christ Is Risen; Faith in Him Will Move Mountains,” Liahona, May 2021, 103.)
Nnyin imikpep ke Nwed Mormon ete ke nwed Abasi ekedi akpan-nkpo ono ufokemana Lehi—emi akanamde Nephi ye ndito-eka iren esie efiak eka Jerusalem man ekebo mme usan-itiat brass (se 1 Nephi 3–4).
Nwed Abasi ayarare uduak Abasi ono nnyin, nte Liahona akanamde ono Nephi ye ete esie. Ke utigha esie ama ekebungo, Nephi okoyom ndidiongo ebiet emi enye akpakade man ekpenyene udia. Ete esie, Lehi, ama ese Liahona oro onyung okut mme nkpo emi ekewetde do. Nephi okut ete ke mme nkukim emi odude ke Liahona oro anam-utom etiene mbuotidem, nsin-ifik, ye nting-enyin emi enode mmo. Enye nko okut uboknwed emi ekememde ndikot onyung onode mmo ifiok kabanga usung Abasi. Enye akabare ofiok ete ke Abasi esida mkpri nkpo anam ikpo nkpo. Enye ama okop item kabanga ndausung emi Liahona oro onode. Enye ama odok aka obot onyung okobo udia ono ufokemana esie, emi ekenehede ebo ufen oto ke unana udia. (Se 1 Nephi 16:23–31.)
Etie mi nte ke Nephi ekedi eyen ufoknwed emi ekeyakde-idem ono nwed Abasi. Nnyin ikoot ete ke Nephi ama enem esit ke nwed Abasi, ekere mmo ke esit esie, onyung ewet mmo ke ntak ukpep ye ufon ndito esie (se 2 Nephi 4:15–16).
President Russell M. Nelson odoho ete:
“Edieke nnyin ‘idikade-iso, ndi-dia iko Christ, inyung iyo tutu osim utit, … nnyin iyenyene nsinsi uwem’ [2 Nephi 31:20].
“Ndi-dia okpon akan nditabi. Ndi-dia oworo ndikop inem. Nnyin ikop inem nwed Abasi ke ndikot mmo ke spirit oyoho inemesit edifiok ye eti nkpoitem. Kini nnyin idiade iko Christ, mmo eyoho ‘ke mme obuk idem ikpan-esit nnyin’ [2 Corinthians 3:3]. Mmo ekabare edi ata nkpo eke uduot-obot nnyin” (“Living by Scriptural Guidance,” Liahona, Jan. 2001, 21).
Nso Idi Ubak nkpo eke Nnyin Ikpinamde Edieke Ukpong Nnyin Enemde-esit ke nwed Abasi?
Udong nnyin ke ndibuana ntang Israel mbok ke ikpehe nkang mbiba eyekpon. Ekpefon onyung odot ye nnyin ke ndikot ufokemana ye ufan nnyin ete ekop se mme okworo-iko Abasi editingde. Nnyin iyedot, ndien nnyin iyenyene eti temple recommend man otodo isiwak ndika temple ndien-ndien nte ikemede. Nnyin iyenam utom ndiyom, mbenge, nnyung nno enying mbon ntongo-ubon nnyin eka temple. Nnyin iyekpeme ke edinim usen Sabbath, ika ufok Abasi kpukpru usen Ederi man ikafiak inam mbufa ediomi nnyin ye Abasi ke nte nnyin idotde ibuana ke ndidia udia-Obong. Nnyin iyebiere ndidu ke usung ediomi, inam ofuri iko emi oworode oto inua Abasi (se Doctrine and Covenants 84:44).
Nso ke Oworo ono Mbufo ke Ndinem-esit mbanga Nkpo Abasi?
Ndikop inemesit ke nwed Abasi okpon akan ndikop biong ye nsat-itong kabanga ifiok. Nephi ama okop akwa idara kini uwem esie. Nte ededi, enye nkoama okut mkposong nkpo ye mfuho (se 2 Nephi 4:12–13). “Ke ntre,” enye odoho ete, “Ami mmofiok enye emi ami nnyenede idorenyin ke idem” (2 Nephi 4:19). Nte nnyin ikotde nwed Abasi, nnyin iyenehede ifiok uduak erinyanga-ukpong ye edimenede eke Abasi, ndien nnyin iyenim ke mme enwongo Esie emi Enye akanamde ono nnyin ke nwed Abasi, ukem nko ye mme enwongo ye edidiong eke mme prophet eyo emi.
Ke uwemeyo usen kiet, ema ekot ami ye nnwan mi ete idi ufokidung eke ufan nnyin kiet. Akananam eyen-eren isua itiaba mmo, David, ikopke mbuk Bible eke David ye Goliath, ndien enye ama oyom ndikop mbuk oro. Nte ami ntongoke nditing mbuk oro, ama otuk enye ke nte Davi,ye mbuotidem esie ye ke enying Abasi Israel, akadade ikang-okpo ye itiat kiet ono owo Philistine oro unan onyung owot enye, ikamake akang-kang ndomokiet ke ubok esie (se 1 Samuel 17).
Nte enye esede mi ye ndiwen enyin esie, enye osongo obup mi ete, “Anie edi Abasi?” Aminnam anwanga esnye nte ke Abasi edi Ete nnyin ke Heaven ndien ke nnyin ikpebe ibanga Enye ke nwed Abasi.
Ekem enye obup me ete, “Nsi idi nwed Abasi?” Ami ndoho enye ke nwed Abasi edi iko Abasi ndien ke mmo ke nnyin idikut mme inem mbuk emi edinwamde nnyin ke ndinehede ndiongo Enye. Ami ndoho eka esie nte ada Bible emi enye enyenede ke ufok esie ndien enye okuyak David oduk idap ke enye mikotke ofuri mbuk oro ino enye. Enye ama enem esit onyung akpang-utong ono mbuk oro. Nwed Abasi ye ifiok nnyin edi mme eno Abasi—mme eno emi nnyin isiwakde ndida ke mbuburu. Yak nnyin ima mme eno emi.
Kini nkedude ke mission nte akparawa, ami mma nkut ete ke otode edikpeb nnyin ke nwed Abasi, uwem ediwak owo ama okpuho. Ami ndifiok odudu emi esinede ke nwed Abasi ye nte mmo ekemede edikpuho uwem nnyin Owo kiet-kiet emi nnyin ikikpepde mfiak-mmen-ndi iko Abasi ekedi asanga-asanga owo ye nsio-nsio unana. Edisana nwed Abasi—ihn, mme prophecy emi ndisana prophet ekewetde—ada mmo ekesim mbuoti-dem ke Abasi ye editua-mkpofiok onyung okpuho esit mmo.
Nwed Abasi oyoho mmo ye idara ke nte mmo ebode ifiok-spirit, ndausung, ndong-esit, osongo, ye iboro eno mme unana mmo. Ediwak mmo ema ebiere ndinam ukpuhore ke uwem mmo enyung etongo edinim ibet Abasi.
Nephi eteme nnyin ete idara ke iko Christ, koro iko Christ eyeteme nnyin ofuri nkpo emi nnyin inyenede ndinam (se 2 Nephi 32:3).
Ami nkot mbufo nte enam uduak emi ebighide ke ndikot nwed Abasi enim. Di,Tiene Mi edi akpan nkpo-utom emi nnyin inyeneke ke ndikpep nnyung mbo iko Abasi, ndisongo mbuotidem nnyin nno Jesus Christ, ye ndinwam nnyin ikabare itie nte Enye. Kini nnyin ikotde iko Abasi, nnyin itimke iyom obufa etop, edi, nnyin iyom ekabare “ebot nnyin obufa” (2 Corinthians 5:17).
Edisana Spirit ada nnyin usung aka akpaniko onyung eting iko ntiense abanga akpaniko oro (se John 16:13). Enye eyeyama ekikere nnyin onyung anam ifiok nnyin edi obufa onyung otuk esit nnyin oto ke eriyarare eke Abasi, emi edide ntongo ofuri akpaniko. Edisana Spirit esinam esit nnyin asana. Enye esino nnyin udong ndidu uwem edi-nam akpaniko onyung eteme nnyin ndinam ntre. “Edisana Spirit … eyekpep mbufo kpukpru nkpo” (John 14:26).
Nditing mbanga ko emi ekeyarare eno Prophet Joseph Smith, Andinyanga nnyin odoho ete:
“Iko emi idige eke owo mme kabanga owo, edi okim; …
“Koro edi uyo Mi eketing mmo ono mbufo, koro Spirit Mi akada mmo ono esok mbufo … ;
“Ke ntre, mbufo emekeme nditing iko ntiense ete ke mbufo ema ekop uyo Mi” (Doctrine ye Covenants 18:34–36).
Nnyin inyene ediyom nsanga Edisana Spirit. Uduak emi enyene ndikara ubiere nnyin nnyung mkpeme ekikere ye edinam nnyin. Ana nnyin iyom ofuri nkpo emi adade odudu Spirit edi inyung isin nkpo ekededi emi abiatde odudu emi.
Ami nting iko ntiense nte ke Jesus Christ edi edima Eyen eke Ete nnyin ke Heaven. Ami mmema Andinyanga mi. Ami mmenem-esit ke nwed Abasi Esie ye kemme odu-uwem prophet Esie. President Nelson edi prphet Esie Ke enying Jesus Christ, amen.