Esede Ebanga Nsongidem ke Mfre
Yak mbuana ye mbufo ediwak ifiok nkonode ke ini ekpuk nnyin ekekutde idomo.
Okposuk edi ufok nnyin ebode nti edidiong ke ini isangade ye idara, ke usung ediomi, nnyin imosobo nko ye ata nkong-nkong obot. Yak mbuana ye mbufo ata sanga-sanga mkpo-ntibe abangade udongo mfre. Mmo esine nduok-idem, okposong nyek-idem, mbe-ibuot, ADHD—ye ndusuk ini mbuaha kpukpru mmo. Ami mbuana ifiok koro mmobo unyime nto mbon emi ediongode ebanga.
Ke ini utom mi, mma nkut ediwak owo ye mme ufokemana emi ekutde ukem mkpo-ntibe emi. Ndusuk ini mesikere mme udongo nsobo ofukde isong, nte edohode ke nwed-Abasi esine udongo mfre. 1 . Akara isong, ofuk kpukpru idut ye edu-uwem, onyung afina kpukpru owo —mkpri, ikpo, imo, ye ubuene. Mbon Ufok Abasi iworoke ke otu.
Ke ukem ini emi, iko-Abasi ekpep nnyin yak idomo nditie nte Jesus Christ inyung ifon-ima ke Enye. Ndito-nwong nnyin ekwo, “Ami nyom nditie nte Jesus.” 2 Nnyin imoyom ndifon-ma nte Ete Heaven nnyin ye Jesus Christ efonde-ema. 3 Koro udongo mfre ekeme nditimere idaha mfon-ma nnyin, enye ikpinaha osop odu. Ke ntre, okposong unana ifiok odu, okposong ndop-uyo , ye okposong nduok-idem. Ediwak owo, ekopde ekaha koro mmo ikemeke isimke ndaha mmo ekerede, enam ndudue enim ke mmo inyeneke itie ke ufok-Abasi.
Man etre uto abianga oro, ofon nditi ete “ke Andinyanga ama kpukpru ndito Ete Esie. Enye otim odiongo ubiak ye afanikong emi ediwak owo enyenede nte mmo edude uwem ye akwa ibat mfina nsongidem ke mfre. Enye ama oyo ‘ubiak ye ukut ye idomoekededi; … [ada] odori idemesie ubiak ye mmem-idem ikot esie.’(Alma 7:11; esongo uyo; se nko Hebrews 4:15–16; 2 Nephi 9:21). Koro Enye odiongode kpukpru afanikong , Enye odiongo nte ‘ edikokde mbon eke esit obungode.’(Luke 4:18; se nko Isaiah 49:13–16).” 4 Afanikong esiwut ke owo oyom mkpo utom efen ye unwam, ndien mmo idihe ndibiat edu-uwem.
Yak mbuana ye mbufo ediwak ifiok nkonode ke ini ekpuk nnyin ekekutde idomo.
Akpa, ediwak owo eyeseme ye nnyin; mmo idibiomke nnyin ikpe. Oto ke oyomo-nsia, nnyek-idem, mbe-ibuot, eyen ama onyong ke mission ke urua inang kpot ama ekebe. Nte ete esie, ama osong ndikut edikpu ye mfuho koro ima ibong akam eti-eti iyom ntim-nnam esie. Nte kpukpru mme ete ye eka, nnyin imoyom ndito nnyin eforo enyung enemesit. Ndika mission ekpekedi nworonda inyene ono eyen nnyin. Nnyin ima ikere ibanga se mme owo edikerede.
Nnyin ikodiongoke, unyong eyen nnyin ama enehede etimede enye. Ediongo ete ke enye ama-ama Obong onyung oyom ndinam uton esie, edi enye ikekemeke ke ntak emi enye midiongoke. Enye ama osop okut idemesie ke itie ata unana idorenyin, akanwana ntotungo nnam-ndue. Editie nte owo iyomke enye aba, spirit esie akpa. Ekikere mkpa ama oyoho esit esie kpukpru ini.
Ke itie unana iwuk emi, enye ekekere ette ke nkukure edinam osuhore edi ndida uwem esie. Akada Edisana Spirit ye udim angel ke edem ikpehe mbiba ndinyanga enye.
Ke ini enye akanwanade oyom uwem esie, ye ke okposong ini emi, mme adaha ke ward, ndito Abasi, ye ufan ema eda ke ikpat ndikpeme nyung nno nnyin iberedem.
Akanam ami nkwe uto akwa ima ntem. Akananam ami ndiongoke ke odudu mme ke ifiok idem mi se oworode ndidong mmo emi efuhode esit. Ufokemana nnyin eyesuk enemesit ke oyoho ima oro.
Ami ndikemeke nditing ekese utibe mkpo emi eketienede edinam oro. Ke inemesit, eyen nnyin ama odu uwem, edi akada anyan ini ye okposong ibok,usobo ye ufon spirit ndikok enye onyung enyime ke ema enye, ebat, enyung eyom.
Ami mmodiongo ke idihe kpukpru uto unomo emi esikure nte eke nnyin. Ami mmofuho ye mmo oro enanade ndima owo ke uyen ndien edu ye ekikere mfuho ye mbume owo minoho iboro.
Se nkutde efen edi ke osong utom ono mme ete ye eka ndidiongo mfina ndito mmo, ndien ana ikpep idem nnyin. Idikeme didie ndidiongo ukpuhode ke otu mfina otode ikpikpu nkori ye idiongo udongo? Nte ete ye eka, imenyene utom ndinwam ndito nnyin ediongo mme mfina uwem; nte edide, ekpri ibat owo edi nta ke nsongidem mfre. Nnyin nte ededi ana ifon ye ndito nnyin ke ndinam mmo ekpep ndiyuho ke ata ukeme mmo nte mmo enwanade ndinam ata nkpo mmo eyomde. Nnyin kiet-kiet imodiongo ito ndudue nnyin ke nkori spirit edi mkpo akadeka iso-iso.
Nnyin imodiongo ndien ke “iduhe mmem-mmem usobo ino nsongidem ke ekikere ye mfre. Nnyin iyekut ubiak ye ndik koro nnyin idung ke idiok ererimbot ye ikpokidem emi ama okoduo. Ndidian do, ediwak mkpo etopde esin ekeme ndinam ediongo udongo mfre. Ke ikpongde nsongidem mfre ye ekikere nnyin, nditing enyin nse nkori ofon akan ndikere okposong mbanga ndudue nnyin.” 5
Eke nnwan mi ye ami, nkpo kiet emi esinwamde nnyin ekedi ndidu mkpere Jesus Christ nte ikemede. Nditim nse, nnyin imokut idahaemi nte Jesus Christ adade ime akama nnyin ke ini akwa mmem idem. Unwana Esie ekpeme nnyin nde ke nde ke ini ekim. Jesus Christ anam nnyin ikut ke ekom-urua owo kiet okpon eti-eti ke ndutim nsinsi akan utom mme inene ererimbot.
Nko, ndikpep idem nnyin mbanga udongo mfre eyenam nnyin inwam idem nnyin mbon efen emi midiongoke. Nnen-nnen ye nti nneme ye kiet eken eyenwam ibuot iko emi obo mkpang utong emi enye odotde. Ke kpukpru, etop ebem ifiok ye eriyarare iso. Mme ndedibe mfina emi esisopde etibe emi ekeme ndisim owo ekededi, ndien ke ini nnyin isobode mmo, mmo etie nte ekpon ekan nnyin.
Kiet ke otu akpa mkpo anade ifiok edi ke nnyin idihe ikpong. Mmodoho mbufo nte ekpep ibuot-iko eke nsongidem mfre ke ikpehe Life Help ke Gospel Library app. Ukpepnkpo eyeno ediwak ifiok, ediwak unyime, ediwak mbom, ediwak ima. Ekeme ndisuhore afanikong ke ini anwamde nnyin ndibop nyung nkama nti ekikere ye nti ebuana.
Akpatre ifiok mi: ana nnyin ikpeme kiet eken kpupkru ini. Yak ima kiet eken inyung itre odusat—akpan-akpan ke ini se nnyin ikiyomde miworoke isu idaha oro. Ana inwam mkpri-ndito ye iwaad ndikop ima Jesus Christ ke uwem mmo, ke ini mmo etimede ndinyene ima nno idem mmo. Elder Orson F. Whitney, emi okodude ke Eboho mme Apostle Duopeba, ama eteme mme unyene nte ekpenwamde ndito emi enwanade: “Bong akam nno … ndito fo; mum mmo kama ye mbuotidem.” 6
Ami mmansikere se oworode ndimum nkama ye mbuotidem. Ami mmenim ke enye esine mkpri utom ima, ifure-ifure ido, mfon ido, ye ukpono. Oworo ndiyak mmo ekori ke ukeme mmo ye ndino iko ntiense man anwam mmo ndikop ima Andinyanga nnyin. Emi oyom nnyin ndikere okposong mbanga mmo edi isuhore ibanga idem nnyin ye mbon efen Oro oworo nditing iko esisit edi ikpang utong ata eti-eti. Ana nnyin ima mmo, ino mmo odudu, inyung itoro mmo ediwak ini ke ukeme mmo ndinam ofon nyung nnam ibet Abasi. Ke akpatre, ana inam kpukpru se ikemede ndikpere mmo idem—Kpasuk nte nnyin ikperede Abasi idem.
Kpukpru owo emi enyenede mfina eto udongo mfre, emum ediomi mbufo ekama, okposuk nte mbufo mikopke ima Abasi idahaemi. Enam se mbufo ekemede ndien “etuak eda … enyung ekut erinyanga Abasi, ye ubok Esie emi eriyarare.” 7
Ami mmo nno iko ntiense ke JesusChrist edi Andinyanga nnyin. Enye odiongo nnyin. Enye ama nnyin, ndien eyebere ye nnyin. Ke ini idomo nnyin, mma ndiongo ke Enye enehede ekpere. Enwongo Esie edi akpaniko:
“Kudihe, Koro Ami ndude ye Afo; oh, kunyek idem,
Koro Ami ndide Abasi fo ndien nditreke ndinyanga fi.
Nyesongo fi idem, nwam fi, nyung nam fi ada, …
Nkama ke edinen, okposong ubok.
Koro imodiongo nte itiat-isong nnyin osongde, yak nnyin idoho ke idaraesit:
Ukpong emi oyomde emem oto Jesus
Ndiyakke, ndiyakke, ndiyak nno asua;
Ukpong oro, okposuk ofuri hell enyekde, …
Ndikemeke, ndikemeke, ndikemeke ndisin! 8
Ke enying Jesus Chrst, amen.