“Nte Afo Emema Mi Akan Emi?”
Mme nso nkpo ke afo akeme ndinam ke uwem fo ke ndiwut nte ke afo emebem-iso ama Obong?
Ke November 2019, ami ye ufan mi ima-ika ke Edisana Isong. Kini idude do, nnyin ima ibo inyung idungode nwed Abasi kabanga uwem Jesus Christ. Usenubok kiet nnyin ikeda ke edere-usiakutin mben mmong eke Galilee ke itie ekedide itie emi Jesus okokutde mme mbet Esie ke etienede Eriset ke mkpa Esie.
Ke Eriset ke mkpa Jesus ama ekebe, nte nnyin ikotde ke John chapter 21, Peter ye mme mbet efen eko iyak ofuri ke okoneyo inyeneke unen. 1 Ke usenubok, mmo ekut owo nte adade ke mben mmong emi okodohode mmo ete etop iyire ke edem ubom nkang eken. Ke mkpaidem mmo, iyire ama oyoho ke utibe usung. 2
Mmo esosop efiok ke owo oro ekedi Obong, ndien mmo esop eka ndikom Enye.
Nte mmo eduride iyire eka ke mben mmong, oyohode ye iyak, Jesus odoho ete, “Edi enyung edia.” 3 John eting ete “kini mmo ekediade, Jesus odoho Simon Peter ete, Simon, eyen Jonas, nte afo umaha mi ukan emi?” 4
Kini ami nkedade ke ukem mben mmong oro, ami mfiok nte ke mbume Andinyanga ekedi kiet ke ata akpan mbume emi Enye ekemede ndibup mi ke usen kiet. Esesit ami nkpeke kop uyo Esie obupde, “Russell, afo umaha mi ukan emi?”
Nte afo amekpa idem abanga se Jesus eketingde abanga kini Enye ekebupde Peter, “nte afo umaha mi ukan emi?”
Ndimen mbume emi no idem nnyin ke usen nnyin, Obong ekeme ndibup nnyin mbanga adanga nte nnyin isinde idem ke ediwak nti ye ndioi udong inwanade ke nting-enyen nnyin ye ini nnyin. Enye ekeme ndibup nnyin kiet kiet mme nnyin iminehede ima Enye ikan mme nkpo ererimbot emi. Emi ekeme ndidi mbume kabanga se nnyin inehede ima ke uwem, emi nnyin itienede, ye adanga nte nnyin isede ebuana nnyin ye mbon ufokemana ye mme mboho-idung. Enye ekeme ndibup se inehede ida inemesit ye idaraesit isok nnyin.
Nte mme nkpo ererimbot emi ada inemesit, idaresit, ye emem emi Andinyanga onode osok mme mbet Esie ye emi Enye onode nnyin? Enye kpot ekeme ndimen ata inemesit, idaresit, ye emem otode ke nnyin ndima ye nditiene mme ukpep nkpo Esie.
Didie ke ami nkeme ndiboro mbume “nte afo umaha mi ukan emi?”
Kini nnyin ifiokde oyoho se mbume emi adade ono, nnyin imikeme ndikabare ndi nti mbon ufokemana, mme mboho-idung, mme eyen isong, mbon Ufok Abasi, ye ndito iren ye ndito iban eke Abasi.
Ke isua emana mi, ami meduk ediwak usoro mkpa. Ami menim ke akpan iko ke ediwak mbufo emesikut se ami nsikutde. Kini idarade uwem owo ufok emana emi amakakpa me ufan, iwake ndikut nte enye emi etingde iko etingde abanga ubom ufok akpa mkpa, ibat moto, mme okuk osuhode ke ebiet unim okuk. Mmo nko isitingke ibanga mme nkpo esinde ke ofim. Ke ediwak usoro mkpa, mmo eting enyen ke ebuana ye mbon ima mmo, utom enamde eno mbon efen, ukpep nkpo eke uwem ye mme mbufiok, ye ima mmo enyenede eno Jesus Christ.
Kunana mbufiok ubanga se ntingde. Ami ndohoke nte ke ndinyene ediye ufok me ediye moto ifonke me ke ndinam nkpo ke ofim odiok. Se ami ntingde edi ke akpatre, ke mme nkpo oro enyene ekpri ndaha ke emende odomo ye ke ndinyene ima nno Andinyanga.
Kini nnyin imade inyung itienede Enye, nnyin inyene mbuotidem ke Enye. Nnyin ikabare-esit. Nnyin itiene uwutnkpo Esie inyung ibo uduok mmong ye ndibo Edisana Spirit. Nnyin iyo tutu utit inyung idu ke usung ediomi. Nnyin ifen ino mme mbon ufok emana ye mme mboho-idung ke ndisana idiok esit nyak ke emi nnyin imumde ikama. Nnyin ke akpaniko idomo ndinim mme mbet Abasi. Nnyin idomo ndisuhode idem. Nnyin inam inyung inim ediomi. Nnyin imikpono mme ete ye mme eka nnyin. Nnyin inim ke mben ndioi utenge eke ererimbot. Nnyin ibenge idem inɔ edifiak ndi Esie Ɔyɔhɔ Ikaba.
Seke “Odu uwem Christ: Iko Ntiense eke Mme Mbet,” nnyin ikot: “[Jesus] ke usen kiet eyefiak edi ke isong. … Enye eye akara nte Edidem eke mme Ndidem onyung ada-ukara nte Obong mme Mbong, nko kpukpru edong eyetongo ndien kpukpru edeme eyeting ke ndikpono ke iso Esie. Nnyin kiet kiet iyeda ke ndibo ubiomo ikpe ke iso Esie kpa nte ubok utom nnyin ye udong esit nnyin edide.” 5
Nte kiet kotu mme Apostle emi ekesinde ubok ke nwed eke “Odu-uwem Christ” mmekeme nditing nte ke ndifiok ke Jesus “edi unwana, uwem, ye idorenyin ererimbot” 6 ono mi akwa udong ke ndima Enye okpon kpukpru usen.
Ami metie ntiense nte ke Ete ke Heaven ye Jesus Christ edu ke uwem. Ami mmetie ntiense nte ke Mmo ema nnyin . Mme nwed abasi ekpep ete “Koro Abasi akamama ererimbot ntem, tutu Enye osio ikpog-ikpong Eyen emi Enye Obonde ono, man owo ekededi eke obuotde idem ye Enye okutak, edi enyene nsinsi uwem.” 7 Mme nwed abasi nko ekpep nnyin ete ke Jesus “enehede ama ererimbot ntem tutu enye ayak uwem esie ono, man nte ediwak oro edibuotde idem ekeme ndidi ndito iren ye [ndito iban] Abasi.” 8
Ete ke Heaven enehede ama nnyin tutu Enye ebenge uduak erinyanga ukpong Esie ye Andinyanga nte enye emi esinede ke ufot. Nko Jesus enehede ama nnyin ntem ke Akwa Mbono ke Heaven, kini Ete eke Heaven ekebupde, “Anie ke ndidong?” Jesus, emi ekedide Akpa eyen eke kpukpru ndito Ete ke spirit, ama oboro ete, “Se amimi, dong mi.” 9 Enye odoho Ete ete, “Ete, yak inam uduak fo, ndien yak ubong enyene fi ke nsinsi.” 10 Jesus enyime ndidi Andinyanga nnyin ye Andifak man nnyin ikeme ndikabade ntie nte Mmo inyung ifiak nka kiso Mmo.
Mme nwed abasi iba emi nko ekpep ete ke ndifiak nka kiso Mmo ana nnyin inim ke akpaniko. Ana nnyin inim Jesus ke akpaniko ye uduak inemesit Abasi. Ke Ndinim ke akpaniko edi ndima nnyung ntiene Andinyanga nnyin nnyung nim mme mbet, okposuk edi ke ufuot idomo ye ukut.
Ererimbot mfin emi inyeneke iwuk. Odu mme edikpu, mme efanga, ubiak, ye ndiduri.
President Dallin H. Oaks, etingde iko ke 2017, ewet mme nkpo emi enim: “Emi edi ini mfina, oyohode ye mme mfina: mme ekong ye uyom ekong, ke mmemem udongo asuanade, nsada, ukwo, ye ufiop ofuri ererimbot.” 11
Nnyin ikemeke ndinana ima ye idorenyin ke Jesus, okposuk edi nte ikutde mfina akande nnyin. Ete ke Enyong ye Jesus Christ idifreke nnyin ke nsi nsi. Mmo ema nnyin.
Ke October emi ekebede, President Russell M. Nelson ama ekpep nnyin akpan nkpo ke ndisin Ete eke Heaven ye Jesus Christ ke uwem nnyin. President Nelson ekekpep nnyin ete kiet ke se iko Israel adade ono edi ndinam “yak Abasi ada ukara.” 12
Enye ama obup nnyin kiet kiet ete: “Ndi afo omoyom ndiyak Abasi akara ke uwem fo? Ndi afo omoyom ndiyak Abasi okpon akan ke uwem fo? Ndi afo eyeyak iko Esie, mbet Esie, ye ediomi Esie ada fi usung ke se afo anamde ke usen ke usen? Ndi afo eyeyak uyo Esie okpon akan uyo efen? Ndi afo omoyom ndiyak se ededi emi Enye oyomde ete afo anam okpon akan utom efen? Ndi afo omoyom uduak fo odu ke ukara uduak Esie ?” 13
Ana nte nnyin kpukpru ini iti ite ke ata inemesit okongo ke ebuana nnyin ye Abasi, ye ke Jesus Christ, nko ye kiet eken.
Usung kiet ke ndiwut ima edi ke ndidiana ye ufok-emana, mme ufan, ye mme mboho-idung ke ndinam ndusuk mkpri nkpo ke ndinehede nam nkpo nno kiet eken. Nam mme nkpo emi anamde ererimbot emi edi eti ebiet.
Mme nso nkpo ke afo akeme ndinam ke uwem fo ke ndiwut nte ke afo emebem-iso ama Obong?
Nte nnyin iwukde enyen ise ke ndima mme mbohidung nnyin nte Enye amade mmo, nnyin imetongo ndima mmo oro edude ke nkan nkuk nnyin. 14
Ami mfiak mbup inikiet efen, didie ke afo ediboro Andinyanga mbume “nte afo umaha mi ukan emi?”
Nte afo esede mbume emi nte ami nkenamde, ami mbong akam nte yak afo akeme ndiboro nte Peter akenamde ke anyan ini ke edem, “Inh, Obong; afo omofiok ke ami mmema fi,” 15 ndien wut enye ke ndima nnyung nam nkpo nno Abasi ye mbon oro edude ke nkan nkuk fo.
Ami metie ntie nse nte ke ema-ediong nnyin ke ndinyene iko abasi Jesus Christ ke ndida nnyin usung ke usung emi nnyin idude ye nte inamde nkpo ye mbon efen. Ke Enye, nnyin ikut ite ke kpukpru ndito iban ye ndito iren Abasi edi ata nkpo uto eno Enye.
Ami mmeno iko ntiense ke Jesus Christ edi edima Andinyanga nnyin. Enye edi Ikpong-ikpong Eyen emi Abasi Obonde. Ndien ami nsuhore-idem nnɔ ikɔ ntiense emi ke enying Esie, kpa Jesus Christ, amen.