Ke Ndidi Anditiene Christ
Ke ndikpebe Christ edi ndinwana ndikpuhɔ edinam, edu, ye uwem nnyin nte eke Andinyanga.
Ke nkotde nwed Abasi eke idem mi, ami mmekop inemesit otode ke nkabare esit Saul eke Tarsus, emi ekedifiokde nte Paul, nte Bible etingde.
Paul ekedi okop-idem erenowo ke edikɔbɔ Ufok Abasi ye mbon Christ. Edi otode ke odudu heaven ye Erisio-isop Jesus Christ, enye ama okpuhode ofuri ofuri, onyung akabade kiet kotu akwa isung-utom Abasi. Ndanwut uwem esie ekedi Andinyanga Jesus Christ.
Ke kiet ke otu ukpepnkpo Paul onode Mbon Corinth, enye okot mmo ete ekpebe enye nte enye ke idem esie ekpebede Christ (se 1 Corinthians 11:1). Emi edi nnen-nnen ye eti ikoot tongodee kini Paul tutu osim mfin emi: ndikpebe Christ.
Ami ntongo ndikere mbanga se oro oworode ndikabade ndi andikpebe Christ. Ndien ata akpan-nkpo, ami ntongo ndibup mbume, Ke ewe usung ke ami nkeme ndinam nte Enye?
Ke ndikpebe Christ edi ndinwana ndikpuhɔ edinam, edu, ye uwem nnyin nte eke Andinyanga. Edi ndinyene mme nti ido. Edi ndidi eti anditiene Jesus Christ.
Ami mmekpep ubak edu uwem Andinyanga, nko ami mmenim, nte kiet ke etop mi mfin emi, inang kotu nti uduot Esie emi ami ndomode ndinam ndien oro ke ami mbuana ye mbufo.
Akpa uduot Andinyanga edi nsuhore-idem . Jesus Christ ama enehede osuhore-idem toto ke uwem premortal. Ke Esop eke Heaven, Enye ama ofiok onyung ayak uduak Abasi akara ke uduak erinyanga-ukpong ubon owo. Enye okodoho ete, “Ete, yak enam uduak fo, ndien ubong enyene fi ke nsinsi” (Moses 4:2).
Nnyin imefiok ite ke Jesus Christ ekekpep nsuhore-idem ndien osuhore-idem Esie ke ndino Ete Esie ubong.
Yak nnyin idu ye nsuhode-idem sia oro ada emem edi (se Doctrine and Covenants 19:23). Nsuhode-idem ebem ubong iso, nko enye ada mfon Abasi osok nnyin: “Ihn, kpukpru mbufo edu ke idak kiet eken, enyung esine ofong nsuhode-idem: Abasi asasua nkohode-idem, ndien ono mfon abanga nsuhode-idem” (1 Peter 5:5). Nsuhode idem emen sung sung iboro edi. Enye edi ntongo edinen ido.
Elder Dale G. Renlund ekekpep:
“Mbon emi esangade ke nsuhode-idem ye Abasi esiti se Ete eke Heaven ye Jesus Christ akanamde ɔnɔ mmɔ.”
“Nnyin inam ukpono ye Abasi ke ndisanga ke nsuhode-idem ye Enye” (“Nam Sifonde, Ma Mbɔm, nnyung Sanga ke Nsuhode-idem ye Abasi,” Liahona, Nov. 2020, 111, 109).
Oyoho iba uduot Andinyanga edi uko. Kini nkerede mbanga Jesus Christ ke isua duopeba esie, etiede ke temple Abasi kotu mme ikpɔ mbon mbet ndien ekpepde mmo ndisana nkpɔ, ami nkut nte ke Enye ama-enyenyene, ke ata ntongo ke uwem Esie, eti mbufiok eke uko, asanga asanga uko kiet. Kini ediwak edikerede ndikut ekpri eyeneren ɔbɔde ukpep oto mme ikpɔ mbon mbet, Enye ekekpep mmo nte “mmo ekekopde eto enye, enyung ebupde enye mme mbume” (Joseph Smith Translation, Luke 2:46 [ke Luke 2:46ekpri nwed c]).
Nnyin ikenam utom mission ke Democratic Republic eke Congo Mbuji-Mayi Mission otongode ke 2016 kesim 2019. Usung ndika isang ke mission otongode ke zone kiet ka efen ekedi ke usung isong. Nkpo ama etibe ke ebiet oro ye mme ndioi owo ekamade ediban ikwa ekong ebede eduk usung enyung efinade isang mme aka-isang.
Mme missionary ition ekade isang otode ke zone kiet ekesim efen nte kiet kotu edika itie ekedi kiet ekebuanade ke mfina emi. Sia mma nkedi andinyene utɔ mfina emi ke idem nnyin kini mbemiso, nnyin itongo ndikop ndik kabanga uwem nnyin ye ukpeme eke kpukpru nnyin, kpa nte ndifanga ndika isang ke mme usung emi ke ndikise mme missionary ye ndinyene mbono eke zone. Nnyin ikifioke adanga uniong emi edidide. Ami ndiwet ikɔ-ntɔt, emi nkenode eka Area Presidency, nko ami nting mme ekikere mi ndik kabanga ndika iso nsanga kini usung oro ekedide nkukure usung ndikisim mme missionary nnyin.
Ke iboro esie, Elder Kevin Hamilton, emi ekedide President eke Africa South Area, ewet ono mi: “Item mi edi afo ndinam se afo ekemede. Yene ndiongo-idem nyung bong-akam. Ku-ufofiok usin idem fo mme mme missionary fo ke idiok usung, edi ke ukem ini ka iso ye mbuotidem. ‘Koro Abasi ikɔnɔhɔ nnyin spirit ndik; edi spirit odudu, ye ima ye eti ekikere’ (2 Timothy 1:7).”
Iko item emi ama enehede osongo nnyin idem onyung ayak nnyin ika isang inyung inam utom ye uko tutu utit mission nnyin, ke ntak emi nnyin ikikopde ndausung otode Ete eke Heaven ke itie nwed Abasi oro.
Ke nwed Abasi mfin emi, nnyin imekot mme enyene udong iko eke Prophet Joseph Smith anamde owut uko emi Obong onode nnyin: “Ndito ete iren, nte nnyin idikaha iso ke akwa usung oro? eka iso ndien kufiak edem. Uko, ndito ete; nka-iso, akade ndikan!” (Doctrine and Covenants 128:22).
Yak nnyin inyene uko ndinam sifonde okposuk edi nte enye midige oworo etop—uko ke ndikpeme mbuotidem nnyin ye ke ndinam ke mbuotidem. Yak nnyin inyene uko ndinam ke ndikabare esit kusen kusen, uko ke ndinyime uduak Abasi ye ndinam mme mbet Esie. Yak nnyin inyene uko ndidu ke nenen usung ye ke ndinam nkpo emi eyomde eto nnyin ke mme nsio nsio ubiong utom nnyin ye mme ndaha.
Oyoho ita uduot Andinyanga edi Erifen-nno. Kini utom unwam esie mi ke isong, Andinyanga ama ekpeme nnwan emi ekemumde ke use mbak edi-tɔ enye ke itiat. Enye odoho nnwan emi ete “yong okuo, kunam aba idiɔk-nkpɔ” (John 8:11). Emi ama ada enye ekpere nkabare-esit ye erifen-nnɔ ke akpatre, kpa nte nwed Abasi ewetde, “nnwan oro ono Abasi ubong otongode ke ini oro onyung enim ke enying esie ke akpanikɔ” (Joseph Smith Translation, John 8:11 [ke John 8:11ekpri nwed c]).
Kini mbono Ukabade-isua ke December 2018, edima President Russel M. Nelson ama eting iko abanga mme eno inang emi nnyin ikɔbɔde ito Andinyanga. Enye odoho ete enɔ kiet emi Andinyanga onode edi ukeme ke ndifen-nnɔ:
“Otode ke anana-adanga Erisio-isop Esie, mbufo emekeme ndifen-nnɔ mbon emi ekeduede mbufo nko emi midinyimeke ndudue mmo ke idiok ido mmɔ kabanga mbufo.
“Enehede emem ndifen-nnɔ owo emi ekenehede ye nsuhode-idem oyom erifen-nnɔ oto mbufo. Edi Andinyanga eyeno mbufo ukeme ke ndifen-nnɔ owo ekededi emi ekefinade mbufo ke usung ekededi” (“Mme Eno Inang Emi Jesus Christ Onode Mbufo” [First Presidency Christmas devotional, Dec. 2, 2018], broadcasts.ChurchofJesusChrist.org).
Yak nnyin ke inehede ifen-inɔ kiet eken man ibɔ erifen-nnɔ eke Ete. Erifen-nnɔ atat nnyin ayak onyung anam nnyin idot ke ndibuana ke udia-Obong kpukpru Sunday. Erifen-nnɔ ke eyom eto nnyin ke ndidi nti mbet Jesus Christ.
Oyoho inang uduot Andinyanga edi nwaidem. Emi edi kiet ke iko Abasi Jesus Christ. Andinyanga ama ono mkponkan uwa eke uwem Esie ono nnyin man ekpenyanga nnyin. Ndikop ubiak uwa, Enye ɔdɔɔh Ete Esie emen cup oro efep, edi Enye aka ekesim utit eke nsinsi nwaidem. Emi edi Erisio-isop eke Jesus Christ.
President M. Russell Ballard ama ekpep emi: “Uwa edi ndinam nwut ata edisana ima. Ndaha ima nnyin inode Obong, ke iko Abasi, ye inode mme owo efen ekeme ndidomo nto ke se iduakde ndinam ke ndiwa-idem nno mmo” (“Mme Edidiong eke Uwa,” (“Mme Edidiong Eke Nwaidem,” Ensign, May 1992, 76).
Nnyin imikeme ndino ini nnyin ke ndinam utom unwam, ndinam nkpo nno mbon efen, ndinam eti nkpɔ, ndinam utom family history, ye ke ndinam ubiong ikoot nnyin ke Ufɔk Abasi.
Nnyin imikeme ndino nkpo eke okuk nnyin ke ndikpe tithe, ye enɔ utre-udia, ye mme eno efen ke ndibop obio ubong Abasi ke isong. Nnyin iyom nwaidem ndinim ediomi emi ikanamde ye Andinyanga.
Ebenge mi edi ke ndikpebe Jesus Christ ye ndibo edidiong eke Erisio isop Esie, nnyin ikabade inehede isuhode idem, nnyin inehede ikop uko, inehede ifen inɔ ye ediwak, nko nnyin iwa-idem awak inɔ obio ubong Esie.
Ami metie ntie nse nte ke Ete nnyin eke Heaven odu uwem ye ke Enye ofiok nnyin kiet kiet ke owo ke owo, nte ke Jesus edi Christ, ke President Russell M. Nelson edi prophet Abasi mfin emi. Ami nting ikɔ ntiense ke Ufok Abasi Jesus Christ eke mme Latter-day Saints edi obio ubong Abasi ke isong ndien Nwed Mormon edi akpaniko. Ke enying Jesus Chrst, Andifak nnyin, amen.