Mbuɔtidem Ndibup Ndien Ekem Anam
Mbuotidem ke Jesus Christ edi ukpohode ke ndibo mme eriyarare akpaniko.
Ndima ndito-eka mi iren ye iban, mmenem esit ke edidiɔŋ nditiŋ-ikɔ nnɔ mbufo ke ikpehe mbono mbubreyo Saturday emi. Ke ikɔ ndiberede mbono emi usenubɔk emi, President Russell M. Nelson ama ɔdɔhɔ ete ke “ata eriyarare kabaŋa mme mbume ke esit mbufo eyenam mbono emi enyene iwuk ye emi mudufreke. Adieke muyomke kanga utom unwam eke Edisana Spirit ke ndinwam fi okop se Obong oyomde fi okop ke mme usen iba emi, ami mekot fi nte anam idaha emi.” 1 Ami mmoyom edidiɔŋ oro nte ami mbeŋede idem ndibɔ eriyarare mbaŋa ami ndisobo ye mbufo. Akam mi edi yak mbufo ebɔ eriyarare oro eto Abasi.
Usuŋ ndibɔ eriyarare nto Abasi ikpuhɔke tɔŋɔ ke eyo Adam ye Eve. Edi ukem ukuem ɔnɔ kpukpru isuŋ utom Abasi tɔŋɔ ke eritɔŋɔ tutu esim mfin. Edi ukem ukem ɔnɔ ami ye mbufo. Enam enye kpukpru ini ke ndinyene mbuɔtidem. 2
Ekpri Joseph Smith ama enyene mbuɔtidem ekem ndibup Abasi mbume, enim ete ke Abasi eyebɔrɔ mfina esit imɔ. Ibɔrɔ oro ama ɔkpuhɔ ererimbot. Enye okoyom ndifiɔk ufɔk Abasi emi anade nte iduk man eyet idiɔk-ŋkpɔ imɔ efep. Ibɔrɔ emi enye ɔkɔbɔde ama anam enye aka iso obup mme nti mbume efen onyuŋ aka iso ke eriyarare emi ɔtɔŋɔde ɔtɔŋɔ. 3
Ifiok-ukpep mbufo ekeme ndidi ukem ukem ke mbono emi. Mbufo emenyene mme mbume emi eyomde ibɔrɔ. Mbufo emenyene mbuɔtidem ekem ndinyene idorenyin ete ke iyɔbɔ mme ibɔrɔ ito mme isuŋ-utom Abasi. 4 Mbufo idinyeneke ufaŋ ndibup mbɔ ibɔrɔ ke ŋkpɔ utiŋ ikɔ, edi emekeme ndibup edima Ete mbufo ke Heaven ke akam.
Ami mmɔfiɔk nte ke mme ibɔrɔ eyedi emi edikemde ye mme mfina mbufo ye mbeŋeidem spirit mbufo. Edieke eyomde ibɔrɔ emi edide akpan ɔnɔ nsinsi ufɔn mbufo ye eke mbon efen, ibɔrɔ oro eyedi. Edi kpa ke oro, mbufo eyebɔ—nte Joseph Smith—ibɔrɔ ndinyene ime. 5
Edieke mbuɔtidem mbufo ke Jesus Christ anamde esit emem mbufo oto ke Mkpa Usio-isop Esie, mbufo eyetim ekop mme odu Spirit ke ibɔrɔ akam mbufo. Ifiɔk mi edi ke suŋ-suŋ, ekpri uyo—emi edide akpaniko—aŋwaŋa nnyuŋ nkop ke ibuot mi ke ini mkpaŋde utɔŋ nnyuŋ nyakde idem nnɔ uduak Abasi. Ekeme ndikot ntuk nsuhɔre idem oro nte “edi yak ukudi uduak mi, edi edi okwo ke enam.” 6
Usuŋ eriyarare emi edi ntak emi edikopde nte mme etiŋ-ikɔ ke mbono emi edikpepde se ekotde ukpep-ŋkpɔ Christ. 7 Nnyin ibɔ eriyarare itiene usuŋ nte nnyin iyomde ndida ukpep-ŋkpɔ Christ nsin ke esit nnyin nyuŋ nam enye ke uwem nnyin.
Mbufo emeti ke Ŋwed Mormon ete ke Nephi ama ekpep nnyin ete ke mbuɔtidem ke Jesus Christ edi ukpɔhɔde ɔnɔ eriyarare akpanikɔ ye ukpɔhɔde ndinyene idorenyin ete ke nnyin itiene usuŋ Andiyaŋa. Nephi ekewet mme ikɔ emi ke ediwak isua mbemiso emana Jesus Christ ke uwem emi;
“Mme angel etiŋ ikɔ ke odudu Edisana Spirit; ke ntre, mmɔ mme ikɔ Christ. Ke ntre, ami ndɔhɔ mbufo nte etabi mme ikɔ Christ; koro esese, mme ikɔ Christ eyeteme mbufo kpukpru ŋkpɔ emi edinamde.
“Ke ntre, idahaemi ke ini mma nketiŋ mme ikɔ emi, edieke mmɔ miŋwaŋake mbufo edi ke ntak emi mbufo mibupke, mbufo ikɔŋke nko; ke ntre, mbufo idukke uŋwana, edi ana etak ke ekim.
“Koro esese, mfiak ndɔhɔ mbufo nte ke edieke mbufo edidukde ke usuŋ, enyuŋ ebɔ Edisana Spirit, enye eyewut mbufo kpukpru ŋkpɔ emi mbufo edinamde.
“Sese, emi edi ukpep-ŋkpɔ Christ, ndien ukpep-ŋkpɔ efen ididuhe emi edinɔde tutu enye owut mbufo idem ke obukidem. Ndien ke ini enye ediwutde mbufo idem ke obukidem, mme ŋkpɔ emi enye ediwutde mbufo ke mbufo edinam.” 8
Abasi eyetiŋ ikɔ ɔnɔ nnyin mfin ye ke mme usen ke iso oto ke mme isuŋ-utom esie. Enye eyedɔhɔ nnyin mme ŋkpɔ emi anade nnyin inam. 9 Andinyanga idibɔŋke inɔ mbufo ye ami. Enye ekekpeb Elijah ete:
“Ndien enye ɔdɔhɔ ete, Wɔrɔ, kada ke obot ke iso Jehovah. Ndien, sese,Jehovah ke ebe, ndien akamba ye ɔkpɔsɔŋ oyobio asiak ikpɔ obot, onyuŋ anuak mme itiat ke iso Jehovah; edi Jehovah iduhe ke oyobio: ndien ke oyobio ama ekebe isɔŋ enyek; edi Jehovah iduhe ke unyek-isɔŋ:
“Ndien ke unyek-isɔŋ ama ekebe ikaŋ edi; edi Jehovah iduhe ke ikaŋ oro: ndien ke ikaŋ ama ekebe suŋ-suŋ ekpri uyoe.” 10
Ndikop uyo oro edito ke mbuɔtidem nnyin ke Enye. Ye mbuɔtidem emi ekemde, nnyin iyiyom nda-usuŋ ye uduak ndika nyuŋ nnam se ededi emi Enye ɔdɔhɔde. 11 Nnyin iyinyene mbuɔtidem ndifiɔk ite ke se ededi emi Enye ɔdɔhɔde eyediɔŋ mbon efen, ndien nnyin iyisana ito do ke ntak ima Esie ye nnyin.
Nte mbuɔtidem nnyin ke Jesus Christ edidade nnyin ete ibup Ete iyom mme ibɔrɔ, mbuɔtidem oro nko ayada suŋ-suŋ edituk Andinyaŋa edi emi ekemde ndinam nnyin ikop nda-usuŋ Esie ndien inyime inyuŋ ima ndinam. Ndien nnyin iyikwɔ mme ikɔ ikwɔ ye inemesit, kpa ke ini utom oro ɔsɔŋde: “Utom enem, Abasi mi, Edidem mi.” 12
Kpa nte nnyin inyenede ukpep-ŋkpɔ Christ ke uwem ye esit nnyin, ntre ke nnyin idinyene akamba ima ye mbɔm inɔ mbon emi akananam minyeneke edidiɔŋ mbuɔtidem ke Jesus Christ mme emi eŋwanade ndikpeme enye. Ɔsɔŋ ndinim ibet Jehovah ke ini mbuɔtidem ye idorenyin ke Enye miduhe. Nte usuk enanade mbuɔtidem mmɔ ke Andinyaŋa, mmɔ ekeme ndiŋwana ye item Esie, ekot eti idiɔk ye idiɔk eti. 13 Man ekan ndudue emi, edi akpan ete eriyarare nnɔ idem kabaŋa ekikere ye mme edinam nnyin esaŋa ye mme ukpep-ŋkpɔ Obong ye mme prophet Esie.
Ndima ndito-eka iren ye iban, eda mbuɔtidem enim ibet Jehovah. Eda mbuɔtidem ke Jesus Christ enam ŋkpɔ enɔ mbon efen ke ntak Esie. Eda mbuɔtidem ewɔrɔ eka ekekpep gospel Esie enɔ mme owo emi mikopke uyo Spirit ye mme owo emi ekemede ndikaŋ akpanikɔ etop esie. Edi nte nnyin inamde mbuɔtidem nnyin ke Christ—inyuŋ itienede odu uwem prophet Esie—mbuɔtidem ɔkɔri ke ofuri ererimbot. Ke ntak nkpo ukwa, kakpan iko ediwak nditɔ Abasi eyekop enyuŋ efiɔk ikɔ Abasi ke utit urua emi ekan usen iba efen ke uwem.
Ye mbuɔtidem emi ɔkɔride ete ke emi edi Ufɔk Abasi eke Jehovah ye obio ubɔŋ mi ke isɔŋ, ediwak owo ekpe tithe enyuŋ enɔ enɔ man ewam mbon unana, kpa edide ke mbon oro enyene mfina idem mmɔ. Ye mbuɔtidem ete ke ekot mmɔ edian Jesus Christ, mme missionary ke ofuri ererimbot enyene mme usuŋ ndikan mme mfina emi udɔŋɔ adade edi, enam emi ke uko ye inemesit. Ndien ke nsin-ifik mmɔ; mbuɔidem mmɔ ɔkɔri.
Eŋwan ye mme idomo enɔ mbuɔtidem ndikɔri. Emi esidi akpanikɔ, akpan akpan tɔŋɔ ke Edifiak mmen-ndi ye edisiak Ufɔk Abasi Ɔbɔŋ. 14
Se President George Q. Cannon eketiŋde ke ayan ini edi akpanikɔ mfin ndien eyedi tutu Andinyaŋa edi ke idem esie ndida Ufɔk Abasi Esie ye ikɔt Esie usuŋ: “Ndikop item nnɔ Ikɔ Abasi anam [mme owo] esik ekpere enyuŋ enyene ebuana ye Abasi. Anam ebuana odu ke ufɔt mme owo ye Akwa Andibot nnyin ke mme heaven. Ada eti ekikere ɔsɔk owo kabaŋa idorenyin ke Abasi ye udɔŋ Esie ndikpaŋ utɔŋ nnɔ nyuŋ mbɔrɔ mme akam mbon emi edoride enyin ke Enye. Ke mme ini idomo ye afanikɔŋ akwa mbono emi enyene ufɔn eti eti. Mfina ekeme ndisim owo mme idut, nsobo ekeme ndidi ndien idorenyin kpukpru owo ekure, edi, ke ini mme owo enyenede edidiɔŋ emi nkop-item Ikɔ Abasi ɔnɔde, mmɔ enyene nsɔŋɔ-nda; ikpat mmɔ odoro ke itiat emi mikemeke ndisik.” 15
Edi ikɔ ntiense mi ete ke itiat emi nnyin idade edi ntiense nnyin ete ke Jesus edi Christ; ndien ke emi edi Ufɔk Abasi Esie, emi Enye adade usuŋ ke idem Esie; ndien ke President Russell M. Nelson edi odu uwem prophet Esie mfin emi.
President Nelson oyom onyuŋ ɔbɔ nda-usuŋ oto Abasi. Enye edi uwut-ŋkpɔ ɔnɔ mi ke ndiyom nda-usuŋ oro ye nsin-ifik nditiene enye. Kpa nsin-ifik oro nditiene nda-usuŋ Abasi odu ke esit kpukpru mbon emi etiŋde ikɔ mme emi editiŋde ikɔ, ibɔŋ akam, mme ikwɔ ikwɔ ke akwa mbono Ufɔk Abasi Esie.
Ami mbɔŋ akam nte yak mbon emi esede mme ekopde akwa mbono emi ke ererimbot ekop ima Abasi enyenede ɔnɔ mmɔ. Ete ke Heaven ɔbɔrɔ akam mi man ami nkop ekpri ubak ima Andinyaŋa enyenede ɔnɔ mbufo ye ima emi Enye enyenede ɔnɔ Ete Esie ke Heaven, emi edide Ete nnyin ke Heaven.
Ami mmetie ntiense nte ke Christ odu uwem. Enye edi Andinyaŋa nnyin ye Andifak nnyin. Emi edi Ufɔk Abasi Esie. Enye odu ke ibuot esie. Enye, ye Ete Esie ke Heaven, ema ewut Joseph Smith idem mmɔ ke ikɔt ke New York. Ema efiak emen ikɔ Abasi Jesus Christ ye itie oku Esie edi eto ke mme isuŋ utom heaven. 16 Oto ke odudu Edisana Spirit, ami mefiɔk ke edi akpanikɔ.
Ami mbeŋe nte yak mbufo enyene kpa ukem ntiense oro. Ami mbeŋe nte yak ebup Ete ke Heaven eyom mbuɔtidem ke Jesus Christ man enam enyuŋ enim mme ediomi emi ediyakde Edisana Spirit edi ada-nsaŋa mbufo kpukpru ini. Ami nyak ima mi ye ntiense mi nnɔ mbufo ke edisana enyiŋ Jesus Christ, amen.