Ufok emi Asangade Ke Ndaha Ewuho
“Ndaha ewuho” edi mmem-mmem, eke obot, ye eti usung ono Obong ndikpep nnyin, nte ndito Esie, akpan ukpepnkpo.
Ke uwem utom mi ye ke utom eke Ufok Abasi, ami menam emi ke tosin ini—kiso mbon efid emi etiede ke edem mi. Ami mekop mme akam mbufo ye eke mmo.
Ndito eka iren ye iban, Ami ndi amana-isong eyen Obio Tonga ke South Pacific edi nkekori ke North America. Udongo ofuri isong ama onim ediwak ikie, ndusk mme tosin mkpri okworo-iko etode Tongan enamde utom ke ofuri ererimbot ndinyong nka edima isong emana mmo ke ntak ediberi mme adanga mmo. Ubak Elders eke Tonga ema ebighe ke mission mmo ke isua ita nko ndito-eka iban ebede isua iba! Mmo ebet ke ime ye ke mbuotidem emi efiokde mbon nnyin ebanga. Ke misehe, ku-unehede udighe edieke usuk mmo enamde utom ke mme ward mbufo ye mme stake enehede etie nte ami ke ubom—esongde ye iwat. Nnyin imekop inemesit ibanga mme okworo-iko ke ofuri ebiet ke nsinifik utom mmo, okposuk edi nte oniongde mme omuhode akan nte mmo ekekerede otode ke ntak okposong udongo emi.
Ke Sunday ke ini emi nkedide deacon, ami nkodu ke udim ye usan edideme mmong uduia-Obong kini nnwan kiet ekesangade oduk edi ufok oro. Ke ata edinam utom, ami nsanga mkpere nnyung nno enye usan. Enye otop ibuot, asak, onyung osio cup mmong kiet. Enye ekedisim ke idiok ini ndibo bread. Ke ekpri ini ke mbufiok emi ama ekebe, andikpep mi ke ufok, Ned Brimley, ama ekpep mi ete ediwak nkpo ye edidiong eke iko Abasi Jesus Christ eno nnyin ke ndaha ewuho.
Esisit ini ke udua oro, Ned ye ada nsanga esie edi ufok nnyin ye akpan ukpepnkpo kiet. Ned eti nnyin ete ke ewuho ama odu kadanga nte Abasi okobotde isong. Obong ama ada akamba ini ndinam anwanga Moses ewuho emi Enye okobotde ke isong. Akpa, Enye okotongo ke ndibahade unwana nsio ye ekim, ekem abahade mmong osio ye nsat isong. Enye adian odu uwem eto ye mme unam mbemiso ada oduk ke obufa isong ekenamde mkpon-nkan obot Esie: uduot owo, otongode ye Adam ye Eve.
“Ntem ke Abasi obot owo esin ke mbiet esiemo, ke mbiet Abasi ke obot enye; eren ye nnwan ke obot mmo. …
“Ndien Abasi okut kpukpru nkpo emi enye akanamde, ndien, sese, efon eti eti” (Genesis 1:27, 31).
Obong ama okop inemesit. Ndien Enye oduok-odudu ke oyoho usen itiaba.
Ndaha ewuho emi ekebotde isong inoho nnyin kpot ndikut ekedide akpan nkpo ono Abasi, edi nko ntak ye ke mmo emi Enye okobotde isong ono.
Ned Brimley esin enye ifok ukpepnkpo esie ye mmem-mmem iko: “Emen owut, Ufok Abasi edi ufok ewuho. Enye oyom fi odu uwem fo ye ewuho. Ke eti ndaha. Enye oyom fi aka mission mbemiso ɔdɔ ndɔ.” Ke ndaha emi, mme adaibuot Ufok Abasi idahaemi ekpep ete “Obong oyom mkparawa kiet-kiet ebenge idem ndika. … Nkaiferi iban … emi enyenede udong ndika ebenge idem nko” (General Handbook: Ndinam nkpo ke Ufok Abasi Jesus Christ eke mme Latter-day Saints, 24.0, ChurchofJesusChrist.org). Brother Brimley aka iso ete ke: “Abasi oyom nnyin ndidɔ ndɔ mbemiso enyene nditɔ. Nko Enye oyom fi ndika iso nkori mme eno fo nte afo akade ufoknwed okure.” Edieke afo emekde ndidu uwem fo ke unana ndaha, afo eyekut uwem nte osongde ye ndutime.
Brother Brimley nko ama ekpep nnyin ete otode ke uwa usio-isop Esie, Andinyanga anwam nnyin ndifiak-mmen ewuho nsok uwem nnyin emi okodude ke ndutime mme unana ndaha eke idem nnyin mme ndioi mbumek eke mbon efen.
Tongode ke ini oro, ami mma nehede nnyene udong ye “ndaha ewuho.” Ami mmanam ido eke ndiyom ye oruk ndaha ke uwem ye ke iko Abasi.
Elder David A. Bednar ekekpep nkpo emi: “Nte nnyin ikotde, ikpepde, inyung inamde iko Abasi Jesus Christ, ndaha esiwak ndidi item. Kere-banga, nte uwutnkpo, mme ukpepnkpo emi nnyin ikpepde kabanga akpan nkpo eke spirit otode ke ewuho eke akamba nkpo ntibe emi odude nte uyɔhɔ iko Abasi Andinyanga emi ekemende efiak edi ke ukpere edem usen emi.”
Elder Bednar akabat Akpa Nkukut ye akpa Moroni edibiongore nno Joseph Smith nte ekpepde prophet eyeneren akpa, uduot ye ido eke Abasi, etiene ye ubiong utom eke Nwed Mormon ye eke Elijah edinamde ke editang Israel ke ikpehe mbiba mbok ke akpatre emana emi.
Elder Bednar etre: “Akpan ndaha emi eting iko abanga nkpo spirit eke nkong-nkan ndaha eke Abasi” (“The Hearts of the Children Shall Turn,” Liahona, Nov. 2011, 24).
Nkpo kiet eke ami nkutde edi ke “ndaha ewuho” edi mmem-mmem, eke obot, ye eti usung ono Obong ndikpep nnyin, nte ndito Esie, akpan ukpepnkpo.
Nnyin ikedi isong ndikpep nkpo nnyung nnyene mbufiok emi nnyin mikpinyeneke. Nkori nnyin edi sanga-sanga ono nnyin kiet kiet nko edi akpan nkpo emi odude ke Uduak Ete eke Heaven. Nkori obukidem ye eke spirit otongo ke ndaha onyung okori sung-sung nte nnyin inyenede mbufiok ke ndaha ke ndaha.
Alma ono apan ukpep kabanga—mbuotidem ke uwutnkpo eke mkpasip, emi, edieke ekpemede enyung enehede ebɔk, otongo ke ekpri eto ekesim andikpon, akamba eto emi onwumde inem mfri (se Alma 32:28–43). Ukpepnkpo edi ke mbuotidem eyekori nte afo onode itie onyug ɔbɔk-de mkpasip—mme iko Abasi—ke esit mbufo. Mbuotidem mbufo eyekori nte iko Abasi otongode “ndikpon ke esit mbuffo”(verse 28). Koro enye “atara, onyung etibe, ndien otongo ndikori” (verse 30) edi mbiba ndikut ye nditeme. Enye nko edi ke ndaha ke ndaha.
Obong ekpep nnyin kiet kiet otode ke ukeme nnyin ndikpep ye adanga nte ikemede ndikpep. Nkori nnyin adiana ofuri ke udong nnyin, udong obot, ndaha mbuotidem, ye mbufiok.
Nephi ama ekpep se Joseph Smith ekekemede ndikpep ke Kirtland, Ohio, ke nkpo nte isua 2,300 ama ekebe: “Ke emi sese, emi ke Obong Abasi odoho: “Ami nyeno ndito owo udim ke udim, item ke item, mi ekpri ndien ko ekpri; nko edi ofofon ono mbon oro ekopde mme item, ndien eno mkpang utong ke item mi, koro mmo eyekpep ifiok” (2 Nephi 28:30).
Oro ke nnyin ikpep “udim ke udim, item ke item, mi ekpri ye ko ekpri,” emi afiak edi ke ndaha ke ndaha.
Kere-banga mme iko emi nnyin ikopde ke ediwak usen-uwem nnyin: “Akpa nkpo edi akpa” mme “Bɔk mmo ye mmong eba mbemiso ɔnɔ obuk-unam.” Didie kabanga “Nnyin ndisanga mbemiso nnyin ifehe itok”? Mme iko ifiok unyime oro eting abanga nkpo emi edide ke ndaha ke ndaha.
Utibe nkpo etibe ke ndaha ewuho. Utibe nkpo etibe akpa kini nnyin ima inam mbuotidem. Mbuotidem ebem utibe nkpo iso.
Mme ndaha Itie-oku Aaron ebo enye ke ndaha ke ndaha, otode ke isua emana enye emi obode ndori ubok: deacon, teacher, ye ndien priest.
Mme edinam erinyanga-ukpong ye edimenede edi ke ndaha ke ndaha ke obot. Nnyin iduok mmong mbemiso ibɔ enɔ Edisana Spirit. Mme edinam temple ukem-ukem edi ke ndaha ke ndaha. Nte ededi, nte ufan mi Ned Brimley ekekpepde mi ye ifiok, udia-Obong edi ke ndaha ke ndaha—enye otongo ye bread, mmong etiene.
“Edi nte mmo ediade, Jesus emen uyo, odiong onyung obung, ono mbet Esie ete, Ebɔ, eta; emi edi ikpɔhidem Mi.
Ndien Enye emen cup, onyung ɔkɔm Abasi, onyung ono mmo ete, Mbufo kpukpru eda enwong;
“Koro emi edi iyip Mi, eke obufa ediomi, emi eduɔkde ebanga ediwak owo, man efen mme idiɔk-nkpɔ mmɔ” (Matthew 26:26–28).
Ke Jerusalem ye ke Americas, Andinyanga okotongo sacrament ke ukem ewuhɔ oro.
“Sese, ufok mi edi ufok ewuhɔ, Obong Abasi okodoho, ndien idighe ufɔk ndutimede” (Doctrine and Covenants 132:8).
Editua mkpofiok edi ke ndaha ke ndaha. Enye otongo ke mbuotidem ke Jesus Christ, okposuk edi edide nte mkpasip. Mbuotidem oyom nsuhore idem, emi edide akpan nkpo ke ndinyene mbungo esit ye edinuaha spirit.” (2 Nephi 2:7).
Ke ntre, akpa ukpepnkpo iko Abasi inang edi ke ndaha ke ndaha. “Nnyin inim ite ke akpa ukpepnkpo ye edinam Iko Abasi edi: akpa, Mbuotidem ke Obong Jesus Christ; udiana, Nkabare esit; oyoho ita, Uduɔk mmong otode ke edinyin nnɔ ke edifen-nnɔ ke idiɔk-nkpɔ; oyoho inang, Ndori-ubɔk man ɔbɔ enɔ Edisana Spirit” (Articles of Faith 1:4).
Edidem Benjamin ekekpep mbon esie akpaniko emi: “Ndien ekut ete ke kpukpru mme nkpo emi ke enam ke ifiok ye ewuhɔ; koro iyomde ete owo efehe osop akan ukeme esie. Ndien nko, odot ete ana enye esin-ifik, man enye ekeme ndibɔ utip; ke ntre, enyene ndinam kpukpru nkpo ke ido emi enende” (Mosiah 4:27).
Yak nnyin idu uwem nnyin ke ewuhɔ inyung iyom editiene ndaha emi Obong ekenimde ɔnɔ nnyin. Eyediong nnyin ke nte nnyin iyomde inyung itienede adanga ye ndaha emi Obong ekpepde emi edide akpan-nkpɔ ɔnɔ Enye. Ke edisana enying Jesus Christ, amen.