Kot Christ yak Edi Anditongo Mbuk Fo
Yak mbuk fo edi enye eke mbuotidem, etienede enye emi itienede, Andinyanga Jesus Christ.
Ami ntongo ke ndino ediwak mme mbume, adade ono eke use idem.
-
Nsuto mbuk eke idem ke afo ewet abanga idem fo?
-
Nte usung emi etingde ke mbuk edi nenen ye mkpafaha?
-
Nte mbuk fo etre ke ebiet emi okotongode, ke ufok eke heaven fo?
-
Odu enye emi edide nte uwutnkpo ke mbuk fo—nko enye edi Andinyanga Jesus Christ?
Ami nting iko ntiense nte ke Andinyanga “edi anditongo ye utit mbuotidem nnyin.” 1 Nte afo eyekot Enye ete edi anditongo ye utit mbuk fo?
Enye ofiok ntongo otode ke utit. Enye ekedi Andibot enyong ye isong. Enye oyom nnyin ifiak inyong ufok itiene Enye ye Ete eke Heaven nnyin. Enye enyene kpukpru nkpo emi onode nnyin ndien oyom nnyin ikut unen.
Nso ikpan fi ke ndimen mbuk nnyin mbine Enye?
Ndusuk ndanwut emi eyenwam ke ndidungode idem mbufo.
Eti andidungo ekpe ikpe ofiok ke ndibup mbume mfiok, afo udusopke ndibup ntiense mbume emi afo mufiokke iboro. Ndibup oruk mbume oro edi ndikot ntiense nte odoho fi—ye obioro ikpe ye ayara iwat—nkpo emi afo mufioke kanga. Afo emekeme ndibo iboro emi edikpade fi idem nko edide se midighe nkpo emi afo akanamde abanga ikpe fo.
Okposuk edi ndibup ntiense mbume emi afo mufiokke iboro ke ofuri ifonke ye ekpe-ikpe emi odomode ese, nsakiso edi akpaniko ono nnyin. Nnyin imikeme ndibup mme mbume eke edima Ete eke Heaven nnyin, ke enying enyene mbom Andinyanga nnyin, ndien ntiense emi oborode mme mbume nnyin edi Edisana Spirit, emi etiede ntiense akpaniko kpukpru ini. 2 Koro Edisana Spirit anamde utom edifon ye edidiana ye Ete Eke Heaven ye Jesus Christ, nnyin imefiok ite ke ndiwut eke Edisana Spirit edi se edotde enyen. Nsidi ntak, ndien, ndusuk ini nte nnyin imisibup ke oruk unwam eke heaven emi, akpaniko oworo ono nnyin otode ke Edisana Spirit? Ntaha nnyin itrede ndibup mbume emi nnyin mifioke iboro kini ntiene midighe ufan ye nnyin kpot edi kpukpru ini eyeting akpaniko?
Ndusuk edi ke ntak emi nnyin minyeneke mbuotidem ndinyime iboro emi idibode. Ndusuk edi ke ntak ata owo eren mme nwan odude ye nnyin edi andibiongo ndifiak men mme nkpo kpukpru nsok Obong ye ndinim Enye kakpan-iko ofuri ofuri. Ekeme ndidi oro edintak emi iyirede ye mbuk emi ekewetde ino idem nnyin, enye emi ofonde ke mbuk nnyin mudukpuhoke otode Andifiok nkan Anditongo. Nnyin iyomke ndibup mbume nnyung mbo iboro emi miduke ofon ke mbuk emi iwetde ino idem nnyin.
Ke akpaniko, ndusuk nnyin iyewet isin ke mme mbuk nnyin idomo emi eyetde nnyin. Edi nte nnyin imaha enyene ubong utit mbuk nnyin ikotde kini enye emi anwanade akande ke mbuba? Idomo edi mme nkpo emi esinede ke ubono-nkpo emi anamde eti mbuk nnyin edi se iduride, anana ini, edimenede mbuotidem, ye ofonde ke nditing. Ediye edinwana ewetde esin ke mbuk mme edi nkpo oduride nnyin osok Andinyanga ye eyetde nnyin isana, anamde nnyin itie nte Enye.
Ke David ndikan Goliath, akana nte enye anwana ye akwa owo. Eti mbuk etingde ebanga David ekpekedi ndise nkpo mbanga mme erong. Edi utu ke oro, enye esede abanga mme mbufiok esie ndinyanga eyen erong mbo ekpe ye usim ekpe. Ndidian ke mme enyene uko edikan oro, enye eting sung sung ye mbuotidem ye uko ke ndiyak Abasi ewet mbuk esie, ofiori, “Obong emi okosioride mi ke mbara ekpe ikot, ye ke mbara eke usim ekpe, enye eyesiori mi ke ubok Philistine.” 3 Ye udong ke ndiyak Abasi ada ukara, ye utong onode Edisana Spirit, ye udong ono Andinyanga yak edi anditongo ye utit mbuk fo, eyen-eren David ama akan Goliath onyung anyanga mbon esie.
Ono-udong ubono nkpo eke unen ndimek anam, kakpan, ayak nnyin iwet mbuk eke nnyin—David ekeme ndikpiyong ufok, aka ndise erong. Edi Jesus Christ ada ke mbengeidem ndimen nnyin nte nti nkpo utom, edisoi pencil ke ubok Esie, ke ndiwet Akpan-mbuk! Enye ye mbom ke aduak ndimen mi nam nkpo, ata ekpri pencil, nte nkpo utom ke ubok Esie, adieke edide ami nyeyak Enye edi anditongo mbuk mi.
Esther edi ediye uwut-nkpo efen ke ndiyak Abasi akara. Utu-ke ndiyire ye ukpeme mbuk eke ukpeme idem, enye anam mbuotidem, emen idem esie osok Obong kpukpru. Haman akanam uduak abanga ndisobo kpukpru mme Jew ke Persia. Mordecai, eyen eka Esther, enyene ifiok abanga uduak oro ndien ewet nwed ono enye, odohode enye ete eting iko ye edidem ke ibuot kpukpru mme owo. Enye eti enye abanga enye emi ebine edidem ke miboho ikot ndidi esidi owo mkpa. Edi ke akamba nam-nwut eke mbuotidem, enye obup Mordecai ete obok mme Jew otokiet onyung etre udia ono enye. “Ami nko ye mme ndito ufok mi iyetre udia ukem ukem,” enye okodoho, “Ndien ntem ke ndiduk ke oto edidem, eke misangake ke ewuho: ndien mma ntak, yak ntak.” 4
Esther ama enyene udong ndiyak Andinyanga ewet mbuk esie okposuk edi, otode ke enyin obukidem, utit okpoko-odiok akaha. Ke mfoniso, edidem ama obo Esther, ndien mme Jew ke Persia emaebo unyanga.
Kakpan, ndaha uko eke Esther owo isopke iyom ito nnyin. Edi ndiyak Abasi akara, ndiyak Enye edi anditongo ye utit mbuk nnyin, oyom nnyin inim mme mbet Esie ye ediomi emi nnyin ikanamde. Edi ke ndinim mbet ye ediomi nnyin ke edibere oruk uting-iko ino nnyin ndibo eriyarade otode ke Edisana Spirit. Nko otoke mmenwut eke Spirit ke nnyin idikop ubok Obong nte ewetde mbuk nnyin ye nnyin.
Ke April 2021, prophet nnyin, President Russel M. Nelson, ama obup nnyin ete ise se nnyin ikemede ndinam adieke inyenede ediwak mbuotidem ke Jesus Christ. Ye ediwak mbuotidem ke Jesus Christ, nnyin imekeme ndibup mbume emi nnyin mifioke iboro—bup Ete nnyin ke Heaven, ke enying Jesus Christ, ndino iboro otode ke Edisana Spirit, emi etiede ntiense akpaniko. Edieke inyenede ediwak mbuotidem, nnyin iyebup mbume ndien inyene uduak ndinyime iboro emi idibode, okposuk edi nte mifonke ke mbuk nnyin. Nko edidiong emi ekenwongode ke eyedi ke ndinam nkpo ke mbuotidem ke Jesus Christ edi enye emi okoride ye mbuotidem ke Enye nte anditongo ye utit nnyin. President Nelson eting anwa anwa ete nnyin “ibo ediwak mbuotidem ke ndinam se iyomde mbuotidem.” 5
Ntre, mme ebe ye nnwan emi minyeneke ndito otode ke unana mfri eyen ekeme ndibup ke mbuotidem mme mmo ekeme ndida eyen eke midighe eke mmo nnyene nnyung nnyene udong ndibo iboro, okposuk edi nte mbuk emi mmo ekewetde eno idem mmo odongode utibe emana.
Ikpo ebe ye nnwan ekeme ndibup mme mmo ekeme ndinam utom mission nnyung nnyene udong ndika, okposuk edi nte mbuk emi mmo ekewetde eno idem mmo odongode ediwak ini ke itie utom. Nko iboro ekeme “nditre ndidi kanga,” ndien mmo eyekpep ke mme ibuot nwed emi edidide ke iso mbuk mmo ntak ekeyomde mmo kini oro ke ufokemana esesit ini oniong.
Akparawa mme nkaifere ekeme ndibup ke mbuotidem mme ndiyom ndinam nkpo eke mbre mme ndika nwed mme ndikwo ikwo enehede enyene ufon ye ndinyene udong nditiene sung sung uyo ata edisana, eke Edisana Spirit.
Ntak emi nnyin iyomde Andinyanga ite edi anditongo ye utit mbuk nnyin? Koro Enye ofiok ukeme nnyin ofon, Enye eyeda nnyin aka mme ebiet emi nnyin miki ikereke ke idem nnyin. Enye ekeme ndinam nnyin idi David mme Esther. Enye eye oduri nnyin onyung anam nnyin isana ikabade itie nte Enye. Mme nkpo emi nnyin idinyenede nte nnyin inamde utom ye akamba mbuotidem eyenam mbuotidem nnyin okori ke Jesus Christ.
Ndito eka irenowo ye iban, mkpasip isua kiet emi ekebede edima prophet nnyin ama obup ete, “Ndi afo omoyom ndiyak Abasi akara ke uwem fo? … Ndi afo omoyom ndiyak se ededi emi Enye odongde fi okpon akan utom efen?” 6 Ami ye nsuhode idem ndian ke mme mbume prophet oro: “Nte afo eyeyak Abasi edi anditongo ye utit mbuk fo?”
Ke eriyarade nnyin ikpep ite ke nnyin iyeda kiso Abasi enyung ekpe ikpe otode ke nwed uwem, nte mme utom nnyin edide. 7
Eyekpe ikpe eno nnyin otode ke nwed uwem nnyin. Nnyin imikeme ndimek ndiwet eti mbuk nno uwem nnyin. Nko imikeme ndiyak Akamba Anditongo ye Anditre ndiwet mbuk uwem nnyin ono nnyin, ke ndiyak ubono nkpo emi Enye oyomde nnyin ibre okpon akan mme uduak nnyin.
Yak Christ edi anditongo ye anditre mbuk fo!
Yak Edisana Spirit edi ntiense mbufo!
Wet mbuk emi ke usung emi asangade edi nenen, ke isang adade fi onyong ufok eke heaven ndidung ke iso Abasi.
Yak andidiok ye ndutuho emi abahade kpukpru eti mbuk edi usung emi oduride fi ekpere ke, ndien kabade tie nte, Jesus Christ.
Ting mbuk emi afo ofiokde ke heaven eberede. Bup mme mbume emi afo mufioke iboro, ndifiok ke Abasi enyime ndinam fi ofiok uduak Esie otode ke Edisana Spirit.
Yak mbuk fo edi enye eke mbuotidem, etienede enye emi itienede, Andinyanga Jesus Christ. Ke enying Jesus Chrst, amen.