18:59

Tempelo mpe Moboko na Yo ya Molimo

Na Mokambi Russell M. Nelson

Likita Linene ya Eklezia ya Yesu Klisto ya Bansantu ba Mikolo mya Nsuka

Lolenge moko, ntango nyonso lolenge kani ya mobulungano esalemi na bomoi na yo, esika ya kimia mpenza ya kozala na molimo ezali kofanda kati na tempelo ya mayokani na yo!

Bandeko na ngai, nazali na esengo ya kozala na bino na ntongo mpo na kokabola makanisi ya motema na ngai.

Lokola boyebi, tozali kosala misalaya bozongisi sika minene na Tempelo eyebana ya Salt Lake. Mosala ya mindondo oyo ezali na bolendidi makasi ya ntina ya moboko ya kala, oyo esalisaki malamu koleka ekeke moko. Kasi tempelo esengeli ewumela ntango molai mingi. Na nsuka ya sanza ya mitano, nakendaki kotala botamboli ya mosala ya kafukafu oyo. Naknisiki okotonda kosepela komona maye mwasi na ngai Wendy mpe ngai tomonaki. Nakanisi bokomona mpo na nini loyembo “Quels Fondements Fermes” ¹ ekomi na ndimbola ya sika mpo na ngai.

2:4

Video uta na esika bazali kozongisa tempelo ya Salt Lake sika: “Tozali kotala moboko ya ebandeli ya Tempelo ya Salt Lake. Natelemi na esika moko na nse ya oyo ezalaki Lisuku ya Elanga ya Edene. Ntango nazali kososola etongeli ya etonga oyo mobimba, nasepeli na maye bapionie bakokisaki. Nazali kokamwa ntango nazali kotala ete batongaki tempelo kitoko oyo na bobele bisaleli mpe tekiniki oyo ezwamaki na bango eleki koleka ekeke moko.

“Nzokande, ntango eleki mingi, soki totali moboko na mpembeni, tokoki komona makama ya bobebi, bokeseni na misala ya mabanga ya kala, bitape ya ndenge na ndenge ya bozangi sikisiki na etongeli.

“Sikawa ntango nazali nzeneneke ya maye bainzeniele, akitekte, mpe banganga mayele ya botongi ya ntango ya sika bakoki kosala mpo na koyeisa makasi moboko ya kala wana, nakamwe solo. Mosala na bango ezali kokamwisa!

“Moboko ya etonga kani, mingi mingi moko ya molai lokola moko oyo, esengeli kozala makasi mpe sikisiki ekoka mpo na kotelemela boningani ya mabele, bobebi, mipepe makasi, mpe bozindi ya koboya te oyo etutaka bitonga nyonso. Mosala ya mindondo ya kolendisaka oyo ezali kosalama sikawa ekokomisa makasi tempelo ya bule oyo na moboko oyo ekoki kotelemela momekano ya ntango.”

Tozali komipekisa bokasi moko te mpo na kopesa tempelo oyo ya lokumu, oyo ekomaka mpenza na likama, moboko oyo ekotelemela banguya ya mokili na Nkoto ya Mibu. Lolenge moko, ngonga ekoki ete tokokisa moko na moko meko ya kokamwa—ntango mosusu meko tozwa mokolo moko te liboso—mpo na kolendisa miboko ya molimo ya moto se moko na bango. Mikakatano ya sika to ya mpasi koleka esengaka meko ekeseni.

Bandeko, oyo ezali mikolo ya nsuka. Soki bino mpe ngai totelemeli makama mpe banguya oyo ezali koya liboso, esengeli ete biso moko na moko tozala moboko ya molimo ya sikisiki etongama likolo ya libanga ya Mosikoli, Yesu Klisto. ²

Yango wana, natuni moko na moko na bino, “Boniboni sikisiki ezali ya bino moboko? Mpe bozongisi makasi nini na litatoli mpe bososoli na bino ya nsango malamu esengelami?

Tempelo efandisami na katikati ya kolendisaka bondimi mpe bokasi ya molimo na mpamba te Mobikisi mpe malongi na Ye ezali motema mpenza ya tempelo. Makambo nyonso eteyami na tempelo, na nzela ya malako mpe na nzela ya Molimo, ebutisaka bososoli na biso ya Yesu Klisto. Makuli na Ye ya ntina ekangisaka biso epai na Ye na nzela ya mayokani ya bule ya bonganganzambe. Nsima, ntango tobatelaka mayokani na biso, Apambolaka biso na ya Ye nguya ya kobikisa, ya kolendisa. ³ Mpe, o, lolenge nini tokozala na mposa ya Nguya na Ye na mikolo ekoya.

Tolakelami ete “soki [biso] tolengelami [biso] tokobanga te.” ⁴ Maloba oyo ezali na ndimbola ya mozindo lelo. Nkolo alobi ete atako mikakatano oyo ezala te ya lelo, baoyo batongi miboko na bango likolo ya Yesu Klisto, mpe bayekoli lolenge nini kosalela nguya na Ye, bazali na mposa ya kokweya na bobangi se moko ya eleko oyo.

Makuli mpe mayokani ya Tempelo ezali ya kala. Nkolo apesaki mitindo na Adama mpe Ewa basambela, basala mayokani, mpe bapesa mabonza. ⁵ Solo, “ntango nyonso asengi bato moko na mabele oyo bakotosa maloba na ye, batindami kotonga batempelo.” ⁶ Makomi masantu etondi na maloba elobeli mateya, bilamba, lokota, mpe mingi ya tempelo. ⁷ Makambo nyonso tondimelaka mpe bilaka nyonso Nzambe asali na bana na Ye ya liyokani ekutanaka na tempelo. Na mibu nyonso, tempelo ebeti nsete na bosolo ya motuya ete baoyo basalaka mayokani na Nzambe mpe babatelaka yango bazali bana ya liyokani.

Boye, na ndako ya Nkolo, tokoki kosala mayokani wana mpe elongo na Nzambe oyo Abalayama, Yisaka, mpe Yakobo basalaka. Mpe tokoki kozwa mapamboli wana mpe!

Batempelo ezali eteni ya eleko oyo uta na mikolo ya ebandeli. ⁸ Eliya apesaki bafungola ya likoki ya bokangisi epai ya Joseph Smith na Tempelo ya Kirtland. Litondi ya bonganganzambe ezongisamaki na Tempelo ya Nauvoo. ⁹

Kino martiro na ye, Joseph Smith akobaki kozwa mamoniseli oyo esungaki bozongisi ya makuli ya dotasio mpe ya bokangisi. ¹⁰ Nzokande, ayebaki lisusu, ete bopetoli mosusu esengelamaki. Nsima ya kopesa dotasio epai ya Brigham Young na sanza ya mitano 1842, Joseph ayebisaki Brigham, “Oyo ebongisami malamu te, kasi tosali oyo tokoki kosala na ezalela kati na yango totiami mpe nalingi ete ozwa likambo oyo na maboko na yo mpe ete obongisa mpe osembola milulu oyo nyonso.” ¹¹

Kolandisama liwa ya Profeta, Mokambi Young ayangelaki bosilisi ya Tempelo ya Nauvoo ¹² mpe nsima atongaki batempelo na Telitoile ya Utah. Na bobulisi ya bandako ya nse ya Tempelo ya St. George, Brigham Young asakolaki makasi noki ya mosala ya bozwili ya tempelo ntango alobaki, “ntango nakanisaka likolo ya mama ya likambo oyo, nalingaka mingongo ya nkake nsambo elamusa bato.” ¹³

Uta na ngonga wana kino lelo, makuli ya tempelo epetolamaki mokemoke. Mokambi Harold B. Lee alimbolaki mpo na nini banzela ya kosalela, bapolitiki, mpe kutu makuli ya tempelo ezali kokoba kobongwana kati na Eklezia ezongisama ya Mobikisi. Mokambi Lee alobaki: “Mibeko ya nsango malamu ya Yesu Klisto ezali ya bonzambe. Moto moko te abongolaka mibeko mpe [malongi] ya Eklezia longola se Nkolo na nzela ya emoniseli. Kasi ndenge ebongwamaka ntango boyangeli efulama eyelaka baoyo bazali kokamba na ntango moko boye.” ¹⁴

Tala lolenge nini koyangela elambo ebongwani na mibu mileki. Na mikolo ya ebandeli, mai ya elambo ezalaki kopesama na lingomba na kopo moko monene. Moto nyonso azalaki komela uta na yango. Sikawa tosalelaka bakopo ya moto na moto mpe ya kobwaka. Lolenge ebongwanaki, kasi mayokani etikali yango kaka moko.

Manyola babosolo misato oyo:

Bozongisi eyaka moke moke, ezali likambo ya mbala moko te, mpe ekokoba kino Nkolo akoya lisusu.
Mibale: Ntina ya nsuka ya bosangani ya Yisalaele ¹⁵ ezali komema mapamboli ya tempelo epayi ya bana ya bosembo ya Nzambe.
Mpe misato: Ntango tozali koluka lolenge nini kokokisa ntina wana malamu mingi, Nkolo azali komonisa makanisi mingi. Bozongisi oyo ezali kokoba esengeli na emoniseli ya kokoba.

Bakambi ya Yambo mpe Lisanga ya Bapostolo Zomi na Babale batuni mbala mingi Nkolo soki ezali na ndenge malamu ya komemela bana na Ye ya bosembo. Tolukaka bokambi ntango nyonso oyo etali lolenge nini ya kosala bosolo mpe bokokani ya malako, mayokani, mpe makuli ya tempelo na mokili mobimba atako bokeseni na lokota mpe bonkoko.

Na nse ya boyangeli ya Nkolo mpe na eyano na nsambo na biso, mbongwana ya lolenge ya kala te esalamaki. Ye azali Moko oyo alingi bino bososola na polele makasi solo maye bozali kosalela mayokani mpo na kosala. Ye azali Moko oyo alingi bino bosala na mobimba ya Ye makuli ya bule. Ye alingi bino bososola mabaku, bilaka, mpe mikumba na bino. Ye alingi bino bozala na makanisi ya molimo mpe boyebi bozwa mokolo moko te liboso. Oyo nde azali na mposa na Ye mpo na banso bakuli ya tempelo, etali te bisika bafandi.

Mbongwana ya mikolo oyo na esaleli ya tempelo, mpe misusu oyo ekolanda, ezali elembo emonani na miso oyo ezali kokoba ete Nkolo azali mpenza koyangela Eklezia na Ye. Azali kopesa mabaku mpo na moko na moko na biso ya kolendisa miboko na biso ya molimo malamu mingi na kotiaka bomoi na biso likolo na Ye mpe likolo ya makuli mpe mayokani ya tempelo na Ye. Ntango bomemaka mokanda ya ndingisa ya tempelo, motema mitutana, mpe molimo ya koluka epayi ya ndako ya boyekoli ya Nkolo, Ye akoteya bino.

Soki ntaka, mikakatano ya bokolongonu, to bipekiseli mosusu epekisi bokende na tempelo na eleko moko, nasengi bino botia ngonga ya ntango nyonso mpo na kozongela na motema na bino mayokani bosalaki.

Soki olingaka naino kokende na tempelo te, kendaka mbala mingi koleka—kasi moke te. Tika Nkolo, na nzela ya Molimo na Ye, ateya mpe afula yo kuna. Nalaki yo ete nsima ya ntango, tempelo ekokoma esika ya kimia, ya kolendisa, mpe ya emoniseli.

Soki ekokaki kosalama mpo ete ngai naloba na mbunzu na mbunzu na elenge monzemba moko moko, nakobondela yo oluka moninga moko na oyo okoki kokangisama na ye na tempelo. Okoki kokamwa bokeseni nini ekosala na bomoi na yo. Nalaki ekosala bokeseni nyonso! Ntango obali na tempelo mpe ozongi mbala na mbala, okolendisama mpe okokambama na mikano na yo.

Soki nakokaki koloba na mobali abala mpe mwasi abala moko na moko oyo naino akangisami na tempelo te, nakobondela bino bozwa meko esengeli mpo na kozwa bokuli wana elatisaka motole mpe ebongolaka bomoi. ¹⁶ Yango ekosala bokeseni? Bobele soki olingi kokola libela mpe kozala elongo libela. Kolinga kozala elongo libela ekosala yango esalama te. Molulu to boyokani mosusu moko te ekosala esalama. ¹⁷

Soki nakokaki kolobela mobali to mwasi moko na moko oyo azali koluka libala kasi naino amoni baninga na bango ya seko te, nateyi bino bozela te kino libala mpo na kozwa dotasio na ndako ya Nkolo. Banda sikawa koyekola mpe koyeba nini elingi koloba kolatisama na nguya ya bonganganzambe.

Mpe na moko na moko na bino oyo asali mayokani ya tempelo, nabondeli bino boluka—na losambo mpe ntango nyonso—bososola mayokani mpe makuli ya tempelo. ¹⁸ Bikuke ya molimo ekofungwana. Bokoyekola lolenge nini kofungola elamba katikati ya lola mpe mabele, lolenge nini kosenga banzelu basunga bino, mpe lolenge nini kozwa malamu boyangeli uta na lola. Makasi na bino ya molende mpo na kosala bongo ekolendisa moboko na bino ya molimo.

Bandeko balingami bandeko mibali mpe basi, ntango babozongisi sika na tempelo ya Salt Lake ekosila, ekozala na esika moko te ya kimia na ntango ya boningani ya mabele na Lobwaku ya Salt Lake koleka na kati ya tempelo.

Lolenge moko, ntango nyonso lolenge kani ya mobulungano esalemi na bomoi na yo, esika ya kimia mpenza ya kozala na molimo ezali kofanda kati na mayokani ya yo na tempelo!

Nasengi bondimela ngai ntango nalobi ete moboko na yo ya molimo etongami na makasi likolo ya Yesu Klisto, bino bosengeli kobanga te. Ntango ozali sikisiki na mayokani na yo osalaki na tempelo, okopambolama na nguya na Ye. Nsima, ntango boningani ya mabele ya molimo esalami, okozala na makoki ya kotelema makasi mpamba te moboko na yo ya molimo ezali makasi mpe sikisiki.

Nalingi bino, bandeko babolingo. Nayebi bosolo oyo: Nzambe, Tata na biso ya Lola, alingi bino bopona koya epai na Ye. Mwango na Ye ya bokoli ya seko ezali mindondo te, mpe etosaka nguya na bino ya kopona. Bozali na nsomi ya kopona nani bokozala—mpe elongo na nani bokozala—na mokili ekoya!

Nzambe azali na bomoi! Yesu azali Klisto! Oyo ezali Eklezia na Ye ezongisama mpo na kosunga bino bokokisa lobi na bino ya bonzambe. Natatoli bongo na nkombo ya bule ya Yesu Klisto, amene.