JesuCristo Ta E Fortalesa di Hubentut

Pa Elder Dieter F. Uchtdorf

Di e Quorum di e Diesdos Apòstelnan

Pone bo konfiansa den JesuCristo. E lo hiba bo na e kaminda korekto. E ta bo fortalesa.

Den preparashon pa e mensahe di awe, mi a sinti impreshonnan fuerte pa papia ku e mujeres jovenes i hombres jovenes.

Mi ta papia tambe na esnan ku tabata yòn, asta na esnan ku realmente no ta kòrda mas.

I mi ta papia na tur ku ta stima hende yòn i ke pa nan tin éksito den bida.

Pa e generashon ku ta lantando, mi tin un mensahe spesial pa bo di nos Salbador, JesuCristo.

E Mensahe di E Salbador pa Bo

Mi amigunan hóben stimá, si e Salbador ta aki awor aki, kiko E lo bisa bo?

Mi ta kere ku E lo kuminsá pa ekspresá Su amor profundo pa bo. E por bisa ku palabranan, pero tambe e por flui asina fuerte—solamente di Su presensia—ku e lo ta sin kibokashon, yegando profundo den bo kurason, yenando hinter bo alma!

I sinembargo, pasó nos tur ta debil i imperfekto, algun prekupashon por drenta bo mente. Kisas bo por kòrda fayonan ku bo a hasi, e biahanan ku bo a kai den tentashon, kosnan ku bo ta deseá ku bo no a hasi—òf a deseá bo a hasi mihó.

E Salbador lo sinti esei, i mi ta kere ku E lo a sigurá bo ku palabranan ku El a bisa den skrituranan:

No tene miedu.¹

“No duda.”²

“Sea di bon ánimo.”³

“No laga boso kurason bira intrankil.”⁴

Mi no ta pensa ku E lo duna esküs pa bo fayonan. E lo no menospresiá nan. No, E lo pidi bo pa arepentí—pa laga bo pikánan atras, pa kambia, pa asina E por pordoná bo. E lo kòrda bo ku 2,000 aña pasá El a tuma e pikánan ei riba Su Mes pa asina bo por arepentí. Esei ta parti di e plan di felisidat regalá na nos pa un Tata Selestial amoroso.

Jesus por señalá ku bo konvenionan ku n‘E—hasí tempu bo a boutisá i a renobá kada biaha ku bo partisipá di e Santa Sena—ta duna bo un konekshon spesial ku n‘E. E tipo di konekshon e skrituranan ta deskribí komo mará huntu pa asina, ku Su yudansa, bo por karga kualke peso. ⁵

Mi ta kere ku e Salbador JesuCristo lo ke pa bo mira, sinti, i sa ku E ta bo fortalesa. Ku Su yudansa, no tin límitenan pa loke bo por logra. E potensial aki ta sin límite. E lo ke pa bo mira bo mes manera e ta mira bo. I esei ta masha diferente for di e manera ku e mundu ta mira bo.

E Salbador lo deklará, ku seguridat, ku bo ta un yu muhé òf yu hòmber di e Dios Todopoderoso. Bo Tata Selestial ta e Ser mas glorioso den e universo, yen di amor, goso, puresa, lus, grasia, i bèrdat. I un dia E ke pa bo heredá tur loke E tin.⁶

Ta e motibu di kon bo ta riba e tera—pa siña, krese, i progresá i bira tur loke bo Tata ku ta na Shelu a krea pa bo por ta.

Pa hasi esaki posibel, El a manda JesuCristo pa ta bo Salbador. Ta e propósito tras di Su gran plan di felisidat, Su Iglesia, Su saserdosio, e skrituranan —tur kos.

Esei ta bo destinashon. Esei ta bo futuro. Esei ta bo eskoho!

Bèrdat i Eskohonan

E kos esensial di e plan di Dios pa bo felisidat ta bo poder pa skohe.⁷ Klaro, bo Tata Selestial ke pa bo skohe goso eterno huntu ku n‘E, i E lo yuda bo logré, pero nunka E lo no fòrs‘é riba bo.

P’esei E ta pèrmití bo pa skohe: Klaridat òf skuridat? Bon òf malu? Goso òf miseria? Bida eterno òf morto spiritual?⁸

E ta zona manera un eskoho fásil, no? Pero di algun manera, aki na tera, e ta parse mas kompliká ku mester ta.

E problema ta ku nos no semper ta mira kosnan kla manera nos lo ke. E Apòstel Pablo a kompar’é ku wak “dor di un glas, skur.”⁹ Tin hopi konfushon den e mundu tokante kiko ta korekto i robes. Bèrdat ta keda trosé pa hasi maldat parse bon i bon parse maldat.¹⁰

Pero ora bo ta buska e bèrdat sinseramente—bèrdat eterno ku no ta kambia—bo eskohonan ta bira mas kla. Sí, ainda bo tin tentashon i pruebanan. Kosnan malu ta sigui sosedé. Kosnan konfuso. Kosnan trágiko. Pero bo por logra ora bo sa ken bo ta, dikon bo ta aki, i ora bo konfia den Dios.

Pues unda anto bo ta haña bèrdat?

E ta den e evangelio di JesuCristo. I e plenitut di e evangelio ta wòrdu siñáde E Iglesia di JesuCristo di e Santunan di e Delaster Dianan.

JesuCristo a bisa, “Mi ta e kaminda, e bèrdat i e bida: niun hende ta bini na e Tata sino pa medio di Mi.”¹¹

Ora bo tin eskohonan importante pa hasi, JesuCristo i Su evangelio restorá ta e mihó eskoho. Ora bo tin preguntanan, JesuCristo i Su evangelio restorá ta e mihó kontesta. Ora bo ta sinti bo debil, JesuCristo ta bo fortalesa.

E ta duna forsa na esun ku ta kansá; i na esnan ku ta debil, E ta oumentá forsa.

Esun ku ta spera riba Señor lo ta renobá pa Su fortalesa.¹²

Pa e Fortalesa di Hubentut

Pa yuda bo haña e Kaminda i yuda bo hasi Cristo Su doktrina e influensia di guia den bo bida, E Iglesia di JesuCristo di e Santunan di e Delaster Dianan a prepará un rekurso nobo, un vershon revisá di Pa e Fortalesa di Hubentut.

Pa mas di 50 aña, Pa e Fortalesa di Hubentut tabata un guia pa generashonnan di hóbennan Santu di Delaster Dianan. Semper mi tin un kopia den mi saku, i mi ta kompartié ku hendenan ku ta kurioso tokante nos normanan. E ta adaptá i refreská pa atendé mihó ku e desafionan i tentashonnan di nos tempu. E vershon nobo di Pa e Fortalesa di Hubentut ta disponibel riba internet den 50 diferente idioma i lo ta disponibel tambe komo libreto. E lo ta un yudansa signifikante den hasi eskohonan den bo bida. Por fabor brasié manera ta di bo mes i kompartié ku bo amigunan.

E vershon nobo aki di Pa e Fortalesa di Hubentut tin suptítulo Un Gioa pa Hasi Eskoho.

Pa tur klaridat, e mihó guia ku posiblemente bo por tin pa hasi eskohonan ta JesuCristo. JesuCristo ta e fortalesa pa hubentut.

Pues e propósito di Pa e Fortalesa di Hubentutd ta pa dirigí bo na DjE. E ta siña bo bèrdatnan eterno di Su evangelio restorá—bèrdatnan tokante ken bo ta, ken E ta, i kiko bo por logra ku Su fortalesa. E ta siña bo kon pa hasi eskohonan rekto basá riba e bèrdatnan eterno ei.¹³

Ta importante tambe pa bo pa sa kiko Pa e Fortalesa di Hubentut no ta hasi. E no ta tuma desishonnan pa bo. E no ta duna bo un “si” òf “no” tokante kada eskoho ku lo bo por yega di enfrentá. Pa e Fortalesa di Hubentut ta enfoká riba e fundeshi pa bo eskohonan. E ta enfoká riba normanan, prinsípionan, i doktrina enbes di kada komportashon spesífiko.

Señor, pa medio di Su profetanan, semper a guia nos den e direkshon ei. E ta pidi nos pa “oumentá [nos] kapasidat spiritual pa risibí revelashon.”¹⁴ E ta invitá nos pa “skuch’É.”¹⁵ E ta yama nos pa siguiÉ den kamindanan mas elevá i sagrado.¹⁶ I nos ta siñando den un manera similar tur siman den Bin, Sigui Mi.

Mi ta suponé e guia por duna bo listanan largu di pañanan ku bo no mester bisti, palabranan ku bo no mester bisa, i pelíkulanan ku bo no mester wak. Pero esei lo yuda realmente den un iglesia global? Tal aserkamentu lo prepará bo realmente pa biba hinter un bida manera di Cristo?

José Smith a bisa, “Mi ta siña nan prinsipionan korekto, i nan ta goberná nan mes.”¹⁷

I Rei Benjamin a bisa su pueblo den e Buki di Mormon, “I mi no por bisa boso tur e kosnan pa medio di kua boso por kometé piká; pasobra tin diferente kaminda i manera te asta asina hopi ku mi no por numerá nan.”¹⁸

Rei Benjamin a sigui bisa, “Pero esaki mi por bisa boso, … wak boso mes i boso pensamentunan, i boso palabranan, i boso echonan, i warda e mandamentunan di Dios, i sigui den e fe di … nos Señor, asta te na fin di boso bida.”¹⁹

Ta robes di tin regla? Naturalmente ku no. Nos tur mester di nan tur dia. Pero ta robes pa enfoká solamente riba e reglanan enbes di enfoká riba e Salbador. Bo tin ku sa e pakiko i e dikonnan i despues konsiderá e konsekuensianan di bo eskohonan. Bo mester pone bo konfiansa den JesuCristo. E lo hiba bo na e kaminda korekto. E ta bo fortalesa.²⁰

E Poder di Doktrina Bèrdadero

Pa e Fortalesa di Hubentut ta fuerte den deklará doktrina di JesuCristo. E ta fuerte den invitá bo pa hasi eskohonan basá riba e doktrina di Cristo. I e ta fuerte den deskribí e bendishonnan ku JesuCristo ta primintí esnan ku sigui Su Kaminda.²¹

Presidente Russell M. Nelson a instruí: “Ora bo deseo di mas grandi ta pa laga Dios triunfá [den bo bida], … di ta parti di Israel, asina tantu desishon lo bira mas fásil. … Asina tantu problema ta stòp di ta problema! Bo sa mihó kon pa komplasé bo mes. Bo sa kiko pa wak i lesa, unda pa pasa bo tempu, i ku ken pa asosiá ku ne. Bo sa kiko bo ke logra. Bo konosé e tipo di persona … ku bo ke bira realmente.”²²

Un Norma mas Haltu

JesuCristo tin normanan masha haltu pa Su siguidónan. I e invitashon pa buska sinseramente Su boluntat i biba pa Su bèrdatnan ta e norma di mas haltu posibel!

Eskohonan temporal i spiritual no mester ta basá solamente riba preferensia personal, òf lokual ta kumbiniente òf popular.²³ Señor no ta bisando, “Hasi loke sea ku bo ke.”

E ta bisando, “Laga Dios triunfá.”

E ta bisando, “Bin, sigui Mi.”²⁴

E ta bisando, “Biba den un manera mas sagrado, mas madurá.”

E ta bisando, “Warda mi mandamentunan.”

JesuCristo ta nos ehèmpel perfekto, i nos ta hasi esfuerso ku tur e energia di nos kurason pa sigui‘E.

Mi amigunan, laga mi ripití, si e Salbador lo ta pará aki awe, E lo a ekspresá Su amor infinito pa bo, Su konfiansa kompletu den bo. E lo a bisa bo ku bo por hasi esaki. Bo por edifiká un bida di goso, felis pasó JesuCristo ta bo fortalesa. Bo por haña konfiansa, pas, seguridat, felisidat, i di pertenesé awor i eternamente, pasó lo bo haña tur esaki den JesuCristo, den Su evangelio, i den Su Iglesia.

Mi ta duna mi testimonio solèm komo un Apòstel di Señor JesuCristo i ta laga bo mi bendishon sinsero den gratitut profundo i amor pa bo, den e nòmber di JesuCristo, amèn.

Notanan

1. Lukas 5:10; 8:50; 12:7; Doctrina y Convenios 38:15; 50:41; 98:1.

2. Doctrina y Convenios 6:36.

3. Mateo 14:27; Juan 16:33; Doctrina y Convenios 61:36; 68:6; 78:18.

4. Juan 14:1, 27.

5. Wak Mateo 11:28-30.

6. Wak Doctrina y Convenios 84:38.

7. Bo por bisa ku e Tata Su plan ta diseñá pa pèrmití bo ekspresá bo deseonan mediante bo eskohonan pa asina bo por risibí e resultadonan kompletu di lokual bo ta deseá. Manera Elder Dale G. Renlund a instruí, “Nos Tata Selestial su ophetivo den kria, no ta pa Su yunan hasiloke ta bon; ta pa Su yunan skohe pa hasi loke ta bon i últimamente bira manera E.” (“Choose You This Day,” Liahona, Nov. 2018, 104).

8. Wak 2 Nefi 2:26–27.

9. 1 Korintionan 13:12.

10. Wak Isaías 5:20.

11. Juan 14:6.

12. Wak Isaías 40:29–31.

13. Komo Santunan di Delaster Dianan, hopi biaha nos ta konosí pa loke nos ta hasi i no ta hasi—nos komportashonnan. Esaki por ta bon, pero ta mihó ainda pa ta konosí pa loke nos sa (e bèrdatnan ku ta guia nos komportashonnan) i pa ken nos konosé (e Salbador—i kon nos amor pa E ta inspirá nos komportashonnan).

14. Russell M. Nelson, “Revelation for the Church, Revelation for Our Lives,” Liahona,, Mei 2018, 96.

15. Russell M. Nelson, “Hear Him,” Liahonamei 2020, 88–92.

16. E enfoke basá den prinsipioanan di e guia nobo Pa e Fortalesa di Hubentut ta konsistente ku otro inisiativanan resientemente presentá pa Iglesia di e Salbador, inkluyendo Predicad Mi Evangelio, la ministración, el hogar centradoVen sígueme, el programa para niños y jóvenes, Enseñar a la manera del Salvador i e Manual general nobo. Klaramente, Señor ta edifikando nos kapasidat spiritual. E ta demostrando oumento di konfiansa den Su pueblo di konvenio den e delaster dianan.

17. Teachings of Presidents of the Church: Joseph Smith (2007), 284.

18. Mosía 4:29. Den un manera, esaki ta loke e fariseonan di tempu di Jesus a purba hasi. Den nan selo pa stòp e pueblo di kibra lei, nan a kompilá sentenar di reglanan basá riba nan komprondementu di skrituranan sagrado. Loke e fariseonan a kiboká aden ta ku nan a pensa ku nan reglanan lo salba nan. Despues, ora ku e Salbador a aparesé, nan no a rekonos‘E. .

19. Mosía 4:30énfasis añadí.

20. Un otro motibu ku un aserkamentu basá riba prinsipio ta nesesario awendia ta e oumento di diversidat kultural di Iglesia di Señor. Prinsipionan ta eterno i universal. Reglanan òf aplikashonnan spesífiko di e prinsipionan ei ta funshoná bon den algun lugá pero no den otronan. Loke ta uni nos ta JesuCristo i e bèrdatnan eterno ku E ta siña, asta si aplikashonnan spesífiko ta varia ku tempu i entre kulturanan. Asina ku e problema di traha lista di kada posibel pa hasi òf no hasi no ta simplemente ku esei ta poko práktiko i no ta sostenibel. E problema ta ku e ta distraé nos enfoke for di e Fuente berdadero di nos fortalesa, nos Salbador, JesuCristo.

21. Hopi aña pasá, Presidente Boyd K. Packer a bisa e palabrannan poderoso aki: “Doktrina berdadero, bon komprondé, ta kambia aktitutnan i komportashon. E studio di e doktrina di e evangelio lo mehorá komportashon mas lihé ku un estudio di komportashon por mehorá komportashon” (“Do Not Fear,” Liahona, mei 2004, 79).

    Presidente Ezra Taft Benson a instruí un bèrdat similar: “Señor ta traha di paden bai pafó. Mundu ta traha di pafó bai paden. … E mundu por duna forma na komportashon humano, pero Cristo por kambia naturalesa humano”(“Born of God,” Ensign, Nov. 1985, 6).

    Ora e profeta Alma den e Buki di Mormon a mira maldat den e mundu rònt di dje, el a bira na e palabra di Dios pasó e tabata sa e “tabatin efekto mas poderoso riba e mentenan di e pueblo ku e spada, òf kualke otro kos, ku a sosodé ku nan—p‘esei Alma a pensa ku tabata nesesario [pa] purba e virtut di e palabra di Dios”(Alma 31:5

22. Russell M. Nelson, “Let God Prevail,” Liahona, Nov. 2020, 94. Presidente Nelson a duna ehèmpel di e aserkamentu aki ora el a siña nos tokante honramentu di e dia di Sabat: Den mi añanan mas yòn, mi a studia e obra di otronan ku a kompilá listanan di kos pa hasi i no hasi riba Sabat. Ta hopi despues mi a siña for di skrituranan ku mi komportashon i mi aktitut riba e Sabat tabata un señal entre ami i mi Tata Selestial. Ku e komprondementu ei, no tabata nesesario pa un lista di si ku no. Ora mi tabatin ku tuma un desishon sea ku un aktividat tabata apropiá of no pa e Sabat, mi tabata puntra mi mes, ‘Kua señal mi ke duna Dios?’ E pregunta aki a hasi mi skohensianan tokante e Sabat bon kla,” (“The Sabbath Is a Delight,” Liahona, May 2015, 130).

23. Elder David A. Bednar a siña ku “prinsipionan di rektitut …por yuda nos wak mas ayá di nos preferensianan personal i deseonan egoséntriko pa medio di proveé e perspektiva bunita di bèrdat eterno miéntras nos ta nabegá diferente sirkumstansia, desafio, desishonnan, i eksperiensianan di mortalidat” (“The Principles of My Gospel,” Liahona, mei 2021, 123–24).

24. Lukas 18:22.