Nos Mayordomia Terenal
Bendishonnan spiritual grandi ta primintí na esnan ku ta stima i kuida di e mundu i nan próhimo.
Miéntras nos tabata bishita nos pais natal Fransia, mi kasá i ami resientemente tabatin e plaser di tuma algun di nos nietunan pa bai eksplorá e hardin magnífiko di e pueblo chikitu di Giverny. Nos a disfrutá kanando rònt riba e kamindanan pa atmirá e flornan, e lelinan elegante di awa, i lusnan ilumando e estanke.
E lugá maravioso aki ta e resultado di un pashon kreativo di un hòmber; e gran pintadó Claude Monet, kende, pa 40 aña, ku kariño a atendé i kultivá e hardin aki pa hasié su lugá di trabou pa pinta. Monet a profundisá su mes den e splendor di naturalesa; despues, ku su kuashi, el a ekspresá e impreshonnan ku el a sinti ku liñanan di koló i lus. Durante añanan, el a krea un kolekshon ekstraordinario di sentenares di pintura, direktamente inspirá dor di su hardin.
Lelinan di awa i Brug Hapones, 1899, pa Claude Monet
Rumannan, nos interakshon ku e bunitesa di naturalesa ku ta rondoná nos por produsí algun di e eksperiensianan mas inspirante i plasentero den bida. E emoshonnan ku nos ta sinti ta krea den nos un sensashon profundo di gratitut pa nos Tata Selestial i Su Yu, JesuCristo, kende a krea e mundu magnífiko aki—ku su serunan i riunan, matanan i animalnan—i nos promé mayornan, Adam i Eva.1
E obra di Kreashon no ta un fin riba su mes. E ta un parti integrail di Dios Su plan pa Su yunan. Su propósito ta pa proveé e esena kaminda hòmber i muhé por wòrdu di tèst, ehersé nan albedrio, haña goso, i siña i progresá pa asina un dia nan por regresá den e presensia di nan Kreadó i heredá bida eterno.
E kreashonnan maravioso aki a wòrdu prepará kompletamente pa nos benefisio i ta prueba bibu di e amor di e Kreadó pa Su yunan. Señor a deklará, “Si, tur kos ku ta bin for di e tera … a wòrdu trahá pa e benefisio i e uso di hende, tantu pa komplasé e wowo i alegrá e kurason.”2
Sinembargo, e don divino di Kreashon no ta bin sin deber i responsabilidat. E debernan aki ta mihó deskribí dor di e konsepto di mayordomia. Den terminonan di evangelio, e palabra mayordomia ta designá un responsabilidat spiritual sagrado òf temporal pa kuida di algu ku ta pertenesé na Dios, pa kual nos ta responsabel.3
Manera siñá den e skrituranan sagrado, nos mayordomia terenal ta inkluí e siguiente prinsípionan:
Promé prinsipio: E tera kompletu, inkluyendo tur bida riba dje, ta pertenesé na Dios.
E Kreadó a konfia su rekursonan terenal i tur forma di bida na nos kuido, pero E ta retené poseshon kompletu. E la bisa, “Ami, Señor, a habri e shelunan, i krea e mundu, ku propio kreashon; i tur kos ku ta den dje ta di mi.”4 Tur loke ta riba tera ta pertenesé na Dios, inkluyendo nos famianan, nos kurpa físiko, i hasta nos propio bidanan.5
Segundo prinsipio: Komo mayordómonan di Dios Su kreashon, nos tin e deber di honra i kuida di nan.
Komo Dios Su yunan, nos a risibí e mandato di ta mayordómonan, kuidadónan, i guardiannan di Su kreashon divino. Señor a bisa ku El a hasi “kada hòmber responsabel, manera un mayordomo riba e bendishonnan terenal.”6
Nos Tata Selestial ta pèrmití nos pa usa e rekursonan terenal di akuerdo ku nos propio albedrio. Pero nos albedrio no por wòrdu interpretá komo un pèrmit pa usa òf konsumi e rikesanan di e mundu aki sin sabiduria òf limitashon. Señor a duna e amonestashon aki: “I ta komplasé Dios ku El a duna tur e kosnan aki na hende; pasó pa e fin aki nan a wòrdu trahá pa wòrdu usá, ku huisio, no ku ekseso, ni tampoko ku ekstorshon.”7
Presidente Russell M. Nelson a yega di remarká: “Komo benefisiario di e Kreashon divino, kiko nos lo hasi? Nos mester kuida di e tera, ta mayordomo sabio riba dje, i preservé pa futuro generashonnan.”8
Mas ayá di simplemente un nesesidat sientífiko òf polítiko, e kuido di mundu i nos ambiente natural ta un responsabilidat sagrado konfiá na nos dor di Dios, kual mester yena nos ku un sentido profundo di deber i humildat. E ta tambe un komponente integral di nos disípulado. Kon nos por honra i stima Tata Selestial i JesuCristo sin honra i stima Nan kreashonnan?
Tin hopi kos ku nos por hasi—kolektivamente i individualmente—pa por ta bon mayordomo. Konsiderando e sirkumstansianan individual, kada un di nos por usa e rekursonan pleno di tera mas reverente i mas prudente. Nos por apoyá esfuersonan komunitario pa kuida e mundu. Nos por adoptá sistemanan di bida personal i komportashon ku ta respetá Dios Su kreashon i hasi nos propio lugánan di bida mas limpi, mas bunita, i mas inspiradó.9
Nos mayordomia riba Dios Su kreashon tambe ta inkluí, na su punto mas haltu, e deber sagrado di stima, respetá, i kuida pa tur ser humano ku kua nos ta kompartí e mundu aki. Nan ta yunan di Dios, nos rumannan, i nan felisidat eterno ta e mesun propósito di e obra di Kreashon.
E outor Antoine de Saint-Exupéry a relatá lo siguiente: Un dia, miéntras biahando den un trein, el a haña su mes sintá meimei di un grupo di refugiado. Profundamente konmové pa e desesperashon ku el a mira den e kara di un mucha hóben, el a sklama: “Ora dor di mutashon un rosa nobo ta krese den un hardin, tur e hardineronan ta bira kontentu. Nan ta isolá e rosa, kuid’é, trat’é ku kariño. Pero no tin hardinero pa hende.”10
Mi rumannan, nos no mester ta e hardineronan pa nos próhimo? Nos no ta e kuidadó di nos ruman? Jesus a manda nos pa stima nos próhimo manera nos mes.11 For di Su boka, e palabra próhimo no ta nifiká simplemente un serkania geográfiko; e ta impliká un serkania di kurason. E ta trata di tur habitante di e planeta aki—siea si nan ta biba serka òf den pais leu, sin importá nan orígen, eksperiensia personal, òf sirkumstansia.
Komo disípulo di Cristo, nos tin e deber solemne pa traha sin kansa pa pas i harmonia den tur nashon di mundu. Nos mester hasi nos máksimo esfuerso pa trese solas i alivio na esnan debil, esnan ku nesesidat, i na tur ku ta sufri òf ku ta oprimí. Mas ku tur, e don di mas grandi di amor ku nos por ofresé nos próhimo ta di kompartí ku nan e goso di e evangelio i invitá nan pa bin na nan Salbador dor di kombenio i ordenansanan sagrado.
Di tres prinsipio: Nos ta invitá pa partisipá na e obra di kreashon.
E proseso divinio di kreashon ainda no ta kompletu. Kada dia, Dios Su kreashon ta sigui krese, ekspandé i multipliká. Algu masha maravioso ta ku nos Tata Selestial a ekstendé na nos un invitashon pa partisipá den Su obra di kreashon.
Nos ta partisipá den e obra di Kreashon kada biaha ku nos kultivá e tera òf agregá nos propio konstrukshon na e mundu aki—basta nos demonstrá respèt pa Dios Su kreashon. Nos kontribushon por wòrdu ekspresá pa medio di e kreashon di obra di arte, arkitektura, músika, literatura, i kultura, kual ta hasi nos planeta bunita, aliviá nos sentidonan, i iluminá nos bida. Tambe nos ta kontribuí pa medio di diskubrimentunan sientífiko i médiko pa preservá e mundu i bida riba dje. Presidente Thomas S. Monson a resumí e konsepto aki ku e palabranan bunita aki: “Dios a laga e mundu mitar kabá pa hende por traha nan abilidatnan riba dje … pa hende por konosé e goso i gloria di kreashon.”12
Den Jesus su parábola di talento, ora e maestro a regresá for di su biahe, el a elogia i premia e dos siervonan ku a krese i magnifiká nan talentonan. Den kontraste, el a yama e siervo ku a skonde su úniko talento den tera “improduktivo,” i a kita hasta e loke ku el a risibí.13
Similarmente, nos ròl komo mayordomo di e kreashonnan terenal no ta solamente tokante konservá i preservá nan. Señor ta spera ku nos ta traha diligentemente, manera indiká dor di e Spiritu Santu, pa krese, engrandesé, i mehorá e rekursonan ku E a konfia na nos—no pa nos benefisio solamente pero pa bendishoná otronan.
Entre tur e logronan di hende, ningun por igualá e eksperiensia di bira ko kreadó ku Dios den duna bida i yuda un mucha siña, krese, i prosperá—siendo ku e ta komo mayornan, maestronan, lidernan, òf den kualke otro ròl. No tin ningun mayordomia mas sagrado, mas satisfecho, pero mas eksigente ku ta un partner ku nos Kreadó den proveé kurpa físiko pa Su yunan spiritual i despues yuda nan logra nan potenshal divino.
E responsabilidat di ko-kreashon ta sirbi komo un rekordatorio konstante ku bida i kada persona su kurpa ta sagrado, i ku nan ta pertenesé na ningun otro ku ta Dios, i ku E a hasi nos guardiannan pa respetá, protehé, i kuida di nan. E mandamentunan di Dios, ta goberná e podernan di prokreashon i di establesimentu di famianan eterno, guia nos den e mayordomia sagrado, kua ta krusial den Su plan.
Mi rumannan, nos mester rekonosé ku tur kos ta spiritual pa Señor—inkluyendo e aspekto mas temporal di nos bida. Mi ta tèstifiká ku bendishonnan spiritual grandi ta primintí na esnan ku ta stima i kuida di e mundu i nan próhimo. Miéntras bo ta keda fiel na e mayordomia sagrado i honra bo konvenionan eterno, lo bo krese den e konosimentu di Dios i di Su Yu JesuCristo, i lo bo sinti Nan amor i Nan influensia mas abundante den bo bida. Tur esaki lo prepará bo pa biba ku Nan i risibí poder di kreashon adishonal14den e bida benidero.
Na final di e eksistensia mortal aki, e Maestro lo puntra nos pa duna un rekuento di nos mayordomia sagrado, inkluyendo kon nos a kuida di Su kreashon. Ta mi orashon ku nos lo skucha su palabranan amoroso susurá den nos kurason: “Bon hasí, abo mi siervo fiel i bon; bo tabata fiel riba algun kos, ami lo hasi bo gobernante riba hopi kos: drenta den e goso di bo señor.”15 Den e nòmber di JesuCristo, amèn.