E Prinsipio Eterno di Amor

Pa Elder Hugo Montoya

Di e Setenta

Nos Tata Selestial su amor pa kada un di Su yunan ta real. E ta einan pa kada un di nan.

E prinsipio eterno di amor ta manifestá pa medio di biba e dos gran mandamentunan: stima Dios ku henter bo kurason, alma, mente, i forsa i stima bo próhimo manera bo mes.¹

Mi ta kòrda mi promé invierno bibando aki na Utah—sneu tur kaminda. Biniendo for di e Desierto di Sonora, e promé dianan mi tabata disfrutando di dje, pero despues di par di dia, mi a realisá ku mi tabata tin ku lanta mas tempran pa kita e snew for di e espasio di parker outo.

Un mainta, meimei di un tormenta di snew, mi tabata sudando, kitando e sneu, i mi a mira mi bisiña ta habri su garashi otro banda di e kaminda. E ta mas bieu ku ami, pues mi a pensa mi ta kaba lihé mi por yud’é. Alsando mi bos, mi a punt’é, “Ruman, bo tin mester di yudansa?”

El a hari i a bisa mi, “danki, Elder Montoya.” E ora ei e la saka un mashin di supla snew for di su garashi, ranka e motor, i den un par di minüt el a kita tur snew for di dilanti di su kas. Despues e la krusa e kaya ku su mashin i puntra mi, “Elder, bo tin mester di yudansa?”

Ku un sonrisa mi a bisa, “si, danki.”

Nos ta dispuesto pa yuda otro pasobra nos stima otro, i e nesesidatnan di mi prohimo ta bira mi nesesidatnan, i esnan dimi ta bira di dje. No ta importa kua lenga mi ruman ta papia òf for di kua siudat e ta bini, nos ta stima otro pasobra nos ta ruman, yunan di mesun Tata.

Ora a anunsiá ministrashon, Presidente Russell M. Nelson a bisa, “Nos lo implementá un enfoke mas nobo, mas santu pa kuida i ministrá otro.”² Pa ami, mas santu kermen mas personal, mas profundo, mas manera di e Salbador: “Tin amor unu pa e otro,”³ un pa un.

No ta sufisiente pa evitá di ta un piedra di tropieso pa otronan, no ta sufisiente pa buta bista riba e kaminda i laga esun den nesesidat atras. Laga nos probechá kada oportunidat pa yuda nos próhimo, hasta si ta e promé i úniko biaha ku nos topa otro den e bida aki.

Dikon stima Dios ta e promé gran mandamentu?

Mi ta pensa ku ta pa lokual ku E ta nifiká pa nos. Nos ta Su yunan, E ta supervisá nos bienestar, nos ta dependé di DjE, i Su amor ta protehá nos. Su plan ta inkluí albedrio; pesei, probablemente nos lo kometé algun fayo.

E tambe ta pèrmití pa nos wòrdu tentá i probá. Pero ounke nos ta hasi algun fayo òf nos ta kai den tentashon, e plan ta proveé un Salbador asina nos por wòrdu redimí i bai bèk na e presensia di Dios.

Atversidat den nos bida por kousa duda riba e kumplimentu di e promesanan ku a hasi na nos. Por fabor konfia den nos Tata. E semper ta kumpli Su promesanan, i nos por siña kiko E ta deseá di siña nos.

Asta ora nos hasi lokual ku ta bon, e sirkunstansianan den nos bida por kambia di bon pa malu, di alegria pa tristesa. Dios ta kontestá nos orashonan di akuerdo ku Su infinito miserikòrdia i amor i den Su propio tempu.

E riu kaminda Elias a bebe awa a seka.⁴
E arko di heru fini di Nefi a kibra.⁵
Nan a diskriminá un hòmber hóben i a ekspulsé for di skol.
Un yu tan esperá a muri algun dia despues ku le a nase.

E sirkunstansianan ta kambia.

Ora e sirkunstansianan ta kambia di bon i positivo pa malu i negativo, ahinda nos por ta felis pasobra felisidat no ta depende di e sirkunstansianan pero di nos aktitut den e sirkunstansianan. Presidente Nelson a bisa, “E felisidat ku nos ta sinti tin poko di aber ku e sirkunstansianan di nos bida i tur kos di aber ku e enfoke di nos bida.”⁶

Nos por sinta i warda e sirkunstansianan kambia riba nan mes, òf nos por wak pa nos trese sirkunstansianan nobo.

Elias a kana te na Zarefat, kaminda un viuda a dun’é di kome i di bebe. ⁷
Nefi a traha un arko di palu i a yag bestianan pa e kome.⁸
E hòmber hóben a sinta skucha i tuma nota banda di e bentana, i awe e ta maestro di skol básiko.
E pareha e desaroyá un gran fe den e Salbador JesuCristo i konfiansa den e plan di salbashon. Nan amor pa e yu tan esperá ku a muri diripente ta mas grandi ku nan tristesa.

Ora mi tende e preguntanan “Tata Selestial, realmente Bo tei? I bo ta skucha i kontestá [kada] orashon di e mucha?”⁹ Mi ke kontestá, “E tabata, E ta, i E lo tei semper p’abo i p’ami. Mi ta Su yu, E ta mi Tata, i mi ta siñando pa bira un bon tata, manera E ta.”

Mi kasa i ami sember ta purba di tei pa nos yunan na tur momentu, bou di kualk’e kondishon, i pa kualk’e medio. Kada yu ta úniko; nan balor pa Dios ta grandi, i no ta importá kua prueba, piká, i debilidatnan nan tin, Dios stima nan, i nos tambe.

Ora mi a risibi e yamamentu aki komo Outoridat General, riba e lastu dia promé ku nos bai na Salt Lake, tur mi yunan i nan famianan tabata huntu na nos kas pa un nochi di hogar, kaminda nos a ekspresá nos amor i gratitut. Despues di e lès, mi a duna un bendishon di saserdosio na kada un di mi yunan. Tur hende tabata yora. Despues di e bendishonnan, mi yu mayor a ekspresá palabranan di gratitut na nòmber di nan tur pa e gran amor ku nos a duna nan for di e dia ku nan a nanse te ku e dia ei.

Bendishoná bo yunan, sea nan tin 5 of 50 aña. Ta ku nan, tei pa nan. Ounke proveé ta un responsabilidat establesé pa designio divino, nos no mester lubidá pa komparti momentunan di alegria ku nos yunan.

Nos Tata Selestial su amor pa kada un di Su yunan ta real. E tei pa kada un di nos. Mi no sa kon E ta hasié, pero E ta hasié. E i Su Yu Unigénito ta unu hasiendo e trabou i gloria di e Tata, “hasi posibel e inmortalidat i bida eterno di hende.”¹⁰ Nan a manda nos e Spiritu Santu pa guia nos, pa atvertí nos, i pa konfortá nos si ta nesesario.

El a instruí Su Yu Stimá pa krea e mundu bunita aki. El a instruí Adan i Eva i a duna nan e abilidat pa skohe. El a manda mensaheronan pahopi aña pa nos por risibí Su amor i Su mandamentunan.

E tabata na e Arboleda Sagrado kontestando e pregunta sinsero di e hóben Jose i a yam’é na su nòmber. El a bisa: “Esaki ta mi Yu Stimá. Skuch’E!”¹¹

Mi ta kere ku e demostrashon supremo di e amor di Dios a sosodé na Getsemani, kaminda e Yu di e Dios bibiente a hasi orashon, O“ mi Tata, si ta Bo boluntat, kita e kopa aki for di Mi; sinembargo, no Mi boluntat, ma di Bo wòrdu kumplí.”¹²

Mi a ripará ku e pida chikitu ku mi por komprondé di e ekspiashon di JesuCristo a oumentá mi amor pa e Tata i Su Yu, redusiendo mi deseo pa peka i pa ta desobediente, i ta oumentá mi deseonan di ta mihó i hasi mihó.

Jesus a kana sin miedu i sin duda na Getsemani, konfiando den Su Tata, e tabata sa ku e mester a kana e kaminda su so. El a soportá tur doló i tur humiashon. A akus’É, husg’É, i a krusifik’É. Durante Su propio agonia i sufrimentu na e krus, Jesus a enfoká su mes riba e nesesidatnan di Su mama i Su disípel stimá. El a ofresé Su bida.

Na e di tres dia El a resusitá. E kèlder ta bashí, E ta na e man drechi di Su Tata. Nan ta spera ku nos skohe pa warda nos konvenionan i regresá na nan presensia. E di dos estado aki no ta nos estado final, nos no ta pertenese na e hogar terenal aki, sinembargo nos ta sernan eterno bibando eksperiensianan temporal.

Jesus ta e Cristu, e Yu di e Dios bibu. e ta bibu, i dor ku E ta bibu, tur Dios su yunan lo biba pa semper. Danki na Su sakrifisio ekspiatorio, nos tur por biba huntu ku Nan. Den nòmber di JesuCristo, amèn.