E Dia Aki
Nos profeta bibiente ta hasiendo su parti pa inundá e mundu ku e Buki di Mormon. Nos mester sigui su guia.
Mi kerido rumannan, den e Buki di Mormon ta usa e frase “te dia aki”1 vários biaha pa yama atenshon na konseho, promesanan, i enseñansanan. Rei Benjamin, den su diskurso final, ta amonestá e hendenan, “Skucha mi palabranan ku mi ta bai papia ku boso riba e dia aki; …habri boso orea pa boso por skucha, i boso kurason pa boso por komprondé, i boso mente pa e misterionan di Dios por wòrdu revelá den bo bida.”2 Konferensia general ta un senario similar. Nos ta bin pa skucha e konsehonan pa “e dia aki,” pa nos por ta “fiel na tur momentu”3 na Señor i na Su evangelio. Preshonando riba mi “e dia aki” ta e importansha di renobá nos kompromiso na e Buki di Mormon, ku Jose Smith a yama “e mas korektu di kualke buki na mundu.”4
Mi tin den mi man un kopia di e Buki di Mormon. Esaki ta mi edishon antiguo di 1970, i e ta presioso p’ami. Mirando su apariensia e ta kansá i gastá, pero ningun otro buki ta mesun importante den mi bida i mi testimonio manera esaki. Lesand’é, mi a gana un testimonio dor di e Spiritu ku JesuCristo ta e Yu di Dios,5 ku E ta mi Salbador,6 ku e skrituranan aki ta e palabra di Dios,7 i ku a restorá e evangelio.8 E bèrdatnan ei ta ankrá profundo den mi. Manera e profeta Nefi a bisa, “Mi alma ta deleitá den e kosnan di Señor.”9
Di robes pa drechi: Elder Ronald A. Rasband, hóben mishonero; Presidente Harold Wilkinson, presidente di e Mishon Estado Ost; i Elder Marion D. Hanks, Setenta Outoridat General.
Esaki ta e historia su tras. Komo un mishonero hóben, mi a sigui e konseho di Elder Marion D. Hanks, ku a bishitá e Mishon di Estado Ost. E tabata e eks presidente di e Mishon Britániko, i dos di su mishoneronan ta riba e pulpito awe: mi kerido rumannan Elder Jeffrey R. Holland i Elder Quentin L. Cook.10 Meskos ku e mishoneronan na Inglatera, el a desafiá nos pa lesa un kopia sin anotashon di e Buki di Mormon por lo ménos dos biaha. Mi a akseptá e asignashon. E promé biaha ku mi les’é mi mester a marka òf suprayá tur loke ta indiká òf testifiká di JesuCristo. Mi a usa un pòtlot kòrá, i a suprayá hopi pasahe. E di dos biaha, Elder Hanks a bisa pa suprayá e prinsípionan di doktrina di e evangelio, i e biaha aki mi a usa blou pa marka e skrituranan. Mi a lesa e Buki di Mormon dos biaha, manera sugerí, i despues dos biaha mas, usando hel i pretu pa marka pasahenan ku tabata resaltá p’ami.11 Manera boso por mira, mi a hasi hopi anotashon.
Tabatin hopi mas di mi lesamentu ku djis marka e skrituranan. Ku kada biaha ku mi a lesa e Buki di Mormon, di dilanti bai patras, mi a wòrdu yená ku un amor profundo pa Señor. Mi a sinti un testimonio profundo di e bèrdat di Su enseñansanan i kon nan ta apliká na “e dia aki.” E buki aki ta kuadra ku su título, “Otro Tèstamènt di JesuCristo.”12 Ku e estudio ei i e testimonio spiritual risibí, mi a bira un mishonero di e Buki di Mormon i un disípulo di JesuCristo.13
“E dia aki,” un di e gran mishoneronan di e Buki di Mormon ta Presidente Russell M. Nelson. Ora e tabata un Apòstel resien yamá, e tabata duna un lektura na Accra, Ghana.14 Den esnan ku a asistí tabatin dignatarionan, inkluyendo un rei di tribu afrikano, ku ken el a papia pa medio di un intérprete. E rei tabata un studiante serio di e Beibel i tabata stima Señor. Despues di Presidente Nelson su remarkenan, el a wòrdu puntrá den Ingles perfelto, “Djis ken bo ta?” Presidente Nelson a splika ku e tabata un Apòstel ordená di JesuCristo.15 E rei su siguiente pregunta tabata “Kiko bo por siña mi di JesuCristo?”16
Presidente Nelson a kue e Buki di Mormon i habrié na 3 Nefi 11. Huntu Presidente Nelson i e rei a lesa e Salbador Su sermon na e Nefitanan: “Ata’ki, ami ta JesuCristo, di kua e profetanan a tèstifiká [ku] lo bin na e mundu. … Ami ta e lus i e bida di mundu.”17
Presidente Nelson a presentá na e rei un kopia di e Buki di Mormon, i e rei a responde, “Bo por a duna mi diamente òf rubi, pero nada ta mas presioso p’ami ku e konosementu adishonal aki tokante di Señor JesuCristo.”18
Esaki no ta un ehèmpel isolá di kon nos kerido profeta ta kompartí e Buki di Mormon. E la duna kopianan di e Buki di Mormon na sentenares di hende, semper dunando su testimonio tokante JesuCristo. Ora Presidente Nelson topa ku invitadonan, presidentenan, reinan, hefe di estado, lidernan di komersio i organisashonnan di diferente denominashon, sea ta na ofisinanan di Iglesia òf den nan propio lokalidat, e ta presentá ku reverensia e buki aki di skrituranan revelá. E por duna nan asina tantu kos lorá den sinta ku por pone riba un mesa òf eskritorio òf den kashi komo un rekuerdo di su bishita. Na lugá, e ta duna loke ta mas presioso p’e, mas ayá di rubí i diamante, manera e rei di tribu a deskribí.
“E bèrdatnan di e Buki di Mormon,” Presidente Nelson a bisa, “tin e poder pa kura, akomodá, restorá, sokoré, fortalesé, konsolá, i alegrá nos alma.”19 Mi a mira ora e kopianan di e Buki di Mormon a wòrdu gará duru den e mannan di esnan ku a risibí nan for di nos profeta di Dios. No por tin un regalo mas grandi.
Djis resientemente el a topa ku e primera dama di Gambia den su ofisina i ku humildat a dun‘é un Buki di Mormon. E no a para einan. El a habri e páginanan pa lesa kun’e, pa siña i tèstifiká di JesuCristo, Su Ekspiashon, i Su amor pa tur Su yunan—tur kaminda.
Nos profeta bibiente ta hasiendo su parti pa inundá e mundu ku e Buki di Mormon.20 Pero e no por habri e portanan di e kanal su so. Nos mester sigui su guia.
Inspirá pa medio di su ehèmpel, mi a bin ta purba na kompartí ku mas humildat i mas fervor e Buki di Mormon.
Resien mi tabata riba un asignashon na Mozambique. E siudadanonan di e pais bunita aki ta luchando ku pobresa, problema ku salú, desempleo, tormenta, i inkietut polítiko. Mi ta tin e honor di topa ku e presidente di e pais, Filipe Nyusi. Bou di su petishon, mi a hasi orashon p’e i su nashon; mi a bisé ku nos ta konstruyendo un tèmpel di JesuCristo21 den su pais. Na final di nos bishita, mi a present’é un kopia di e Buki di Mormon na Portugues, su idioma natal. Ku gratitut el a akseptá e buki, mi a tèstifiká di e speransa i promesa pa su pueblo, hañá den e palabranan di Señor den su páginanan.22
Na un otro okashon, mi kasá, Melanie, i ami a topa ku Rei Letsie III di Lesotho i su kasa den nan hogar.23 Pa nos, e loke a destaká di nos bishita ta presentá nan ku un kopia di e Buki di Mormon i despues kompartí mi testimonio. Ora mi wak atras riba e eksperiensia ei i otronan, un versíkulo di skritura di delater dianan ta bin na [m] mente: “E plenitut di Mi evangelio lo por wòrdu proklamá pa medio di e debil i e simpel na henter mundu, i dilanti reinan i gobernantenan.”24
Mi a kompartí e Buki di Mormon ku e embahador di India na Nashonnan Uní na Geneva Indra Mani Pandey26; ku Su Santidat Patriarka Bartolomeo26 di e Iglesia Ortodòks di Ost; i [ku] hopi otronan. Mi a sinti e Spiritu di Señor ku nos ora mi a duna nan personalmente e “piedra angular di nos religion”27 i kompartí mi testimonio di JesuCristo, e piedra angular di nos fe.28
Awó, mi kerido rumannan, Bo no tin nodi di bai Mozambique òf India pa topa ku reinan i gobernantenan pa duna un hende e buki aki di enseñansanan i promesanan sagrado. Mi ta invitá boso, e dia aki, pa duna e Buki di Mormon na boso amigunan i famianan, koleganan na trabou, boso entrenadó di futbòl, òf e bendedó di bèrdura na boso merkado. Nan mester di e palabranan di Señor hañá den e buki. Nan mester di e kontestanan na preguntanan di kada dia i di bida eterno ku ta bin. Nan mester sa di e kaminda di konvenio poné nan dilanti i Señor Su amor permanente pa nan. Tur esei tei den e Buki di Mormon.
Ora bo duna nan e Buki di Mormon, bo lo habri nan mente i kurason na e palabranan di Dios. Bo no mester kana ku kopianan imprimí di e buki huntu ku bo. Fasilmente bo por kompartí for di bo selular for di e sitio nobo di e aplikashon di Libreria di Evangelio.29
Pensa riba tur esnan ku por wòrdu bendishoná pa e evangelio den nan bida, i despues manda nan un kopia di e Buki di Mormon for di bo telefon. Kòrda pa inkluí bo testimonio i kon e buki aki a bendishoná bo bida.
Mi kerido amigunan, komo un Apòstel di Señor, mi ta invitá boso pa sigui nos kerido profeta, Presidente Nelson, den inunda e mundu ku e Buki di Mormon. E nesesidat ta grandi; i nos mester aktua awor. Mi ta primintí ku boso lo partisipá den “e obra mas grandi na mundu,” e rekogimentu di Israel,30 ora boso ta inspirá pa aserká esnan ku a wòrdu “tené for di e bèrdat pasobra nan no sa unda pa hañ’é.”31 Nan mester di boso testimonio di kon e buki aki a kambia boso bida i trese boso mas serka di Dios, Su pas,33 i Su “mensahe di gran goso.”33
Mi ta tèstifiká pa medio di designio divino ku e Buki di Mormon a wòrdu prepará den Antiguo Amérika pa bin na lus pa deklará Dios Su palabra, i trese almanan na JesuCristo i Su evangelio restorá “e dia aki.” Den e nòmber di JesuCristo, amèn.