Patronchinan di Disípulado
Siñando tokante Cristo i Su kamindanan ta dirigá nos pa konosé i pa stim’É.
Patronchi di fe
Awe mainta nos dos yunan i tres ñetunan na Merka [Nort Amerika] i masomenos mitar di mundu a mira e klaridat di e solo saliendo mahestuoso na ost. E otro tres yunan i shete ñetunan na Afrika, i e otro mitar di mundu a mira skuridat baha riba nan gradualmente segun solo tabata baha na horizonte na wèst.
E konstansia di e komienso di dia i anochi ku no ta mara na tempu aki ta un rekordatorio diario di e realidatnan ku ta goberná nos bida ku nos no por kambia. Ora ku nos ta respetá i aliniá loke nos ta hasi ku e realidatnan eterno aki, nos ta eksperensiá pas i harmonia. Ora ku nos no hasie, nos ta sinti inkietut i kosnan no ta funshoná manera nos ta spera.
Di dia i anochi ta un ehèmpel di patronchinan ku Dios a duna tur hende ku a yega di biba na mundu, di kosnan na e manera ku nan ta realmente. E ta un bèrdat apsoluto di nos eksistensia humano ku nos no por kana negoshá di akuerdo ku nos propio deseonan i sali afó mane nos kier. Mi ta wòrdu kòrdá riba esaki kada bes ku mi tuma un buelo for di Afrika pa bin konferensia general, mandando e oloshi di kurpa 10 ora patras den un dia.
Kada bes ku nos preokupá pa tuma nota, nos ta mira ku Tata Selestial a duna nos sufisiente testigu nan di e bèrdat pa goberná nos bida di manera ku nos por konosÉ i tin e bendishonnan di pas i goso.
Pa medio di e profeta José Smith, e Spiritu di Señor ta afirmá: “I atrobe, Ami lo duna na boso un patronchi den tur kos, pa boso no wòrdu engaña; paso Satanas ta riba tera i e ta sali gaña nashonnan.”1
Korihor e anti-Cristo a kai pa tal engaño, dor di no kere den e eksistensia di Dios i e binida di Cristo. E profeta Alma a testifiká na dje: “Tur kos ta indiká ku tin un Dios; si, asta e tera, i tur kos ku ta riba e superfisie di dje, si, i su moveshon, si, i tambe tur e planetanan ku ta move den nan forma regular ta testifiká ku tin un Kreador Supremo.”2
Ora Korihor a insistí pa dune un señal promé ku e kier a kere, Alma a hasi pa lage bira muda. Humiá pa su aflikshon, Korihor a konfesá abiertamente di a wòrdu gaña dor di Diabel.
Nos no mester wòrdu gaña dor di diabel. E milager di e bida inteligente konstantemente ta hasi wega dilanti nos. I un mirada breve i reflekshon riba e maraviyanan di shelu bistí ku streanan inkontabel i galaksianan ta rekordá e alma di e kurason keriente pa proklamá, “Mi Dios, … Grandi Bo ta!”3
Si, Dios nos Tata Selestial ta bibu i E ta manifestá na nos tur ora na diferente manera.
Patronchi di Humildat.
Pero pa konosé, kere, i sigui den Dios, nos kurason mester ta reseptivo na e Spiritu di bèrdat. Alma a siña ku fe ta bin for di humildat.4 Mormon a agregá ku e ta imposibel pa niungun hende ku no ta “mansu i humilde di kurason” tin fe i speransa i risibí e Spiritu di Dios.5 Rei Benjamin a deklara ku kualkier unu ku pone prioridat na e gloria di mundu ta “enemigu di Dios.”6
Dor di batisá pa kumpli ku tur hustisia apesar ku e tabata hustu i santu, JesuCristo a demostrá ku humildat dilanti di Dios ta un atributo fundamental di Su disípulonan.7
Ta rekerí di tur disípulonan nobo pa demostrá humildat na Dios pa medio di e ordenansa di boutismo. Pues, “Tur ku humiyánan mes na Dios i ta deseá pa wordu boutisá i bin bilanti ku kurason kibra i un spiritu kontritu … lo wòrdu risibí dor di boutismo den su iglesia.”8
Humildat ta inkliná e kurason di e disípulo direkshon di arepentimentu i obedensia. E ora ei E Spiritu di Dios por trese bèrdat na e kurason ei i e lo haña entrada.9
Ta falta di humildat ta loke ta kontribuí mas tantu na e kumplimentu di e profesia di Apòstel Pablo den e delaster dianan aki:
“Pasobra hende lo ta stimadó di nan mes, envidioso, bromadó, orguyoso, blasfemadó, desobediente na mayornan, desagradesido, impio,
“Sin afekto natural, kibradó di tregua, akusadonan falsu, sin kontròl propio, feros, despresiado di esnan ku ta bon.”10
E invitashon di e Salbador pa siña di E ta un invitashon pa apartá for di tentashonnan di e mundanalidat i yega na bira manera E ta: mansu i humilde di kurason, humilde. E ora ei nos lo por tuma Su yugo i diskubrí ku e ta fásil— ku disípulado no ta un karga pero un goso, manera Presidente Russell M. Nelson a siña nos asina elokuente i repetidamente.
Patronchi di Amor.
Siñando tokante Cristo i Su kamindanan ta dirigá nos pa konosé i pa stim’É.
El a mustra ku ehèmpel ku tin un aktitut di humildat, enbèrdat, e ta posibel konosé i stima Dios e Tata ku tur nos ser i pa stima otronan manera nos ta stima nos mes, sin reservá nada. Su ministerio na mundu, durante kual El a pone tantu Su boluntat komo Su kurpa riba altar, tabata un patronchi di e aplikashon di e prinsipionan aki, riba kual Su evangelio ta funda. Ambos prinsipio ta wak e parti eksterior i ta tokante kon nos ta relashoná nos mes ku otronan, no tokante buska gratifikashon o gloria personal.
E ironia milagroso di esaki ta ku ora nos enfoká nos miho esfuerso nan riba stima Dios i otronan, nos por deskubrí nos propio berdadero balor dibino, komo yunan hòmber i muhé di Dios, ku e pas i goso kompletu ku e eksperensia aki ta trese.
Nos ta bira un ku Dios i un ku otro pa medio di amor i servisio. E ora ei nos por risibí e testimonio di e Spiritu Santu, di e amor puru, e fruta di kual Lehi a papia di dje komo “mas dushi, riba tur loke Mi a purba nunka.”11
E korona ku Cristo a risibí dor di duna i hasi tur kos na Su alkanse pa establesé e patronchi di stima e Tata i stima nos tabata pa risibí tur poder, asta tur esnan ku e Tata tin, kual ta eksaltashon.12
Nos oportunidat pa nutri den nos alma un amor duradero pa Dios i nos bisiña ta kuminsá na kas ku e hábito nan santu di konektá ku Dios diariamente den orashon personal i famia den e nòmber di Su Uniko Yu, siñando huntu di Nan pa medio di estudio di skritura individual i familiar, teniendo e dia di Reposo huntu, i individualmente tin un rekomendashon di tèmpel, i usando e huntu mas tantu ku nos por.
Ora kada un di nos krese individualmente den nos konosementu i stimashon di e Tata i su Yu, nos ta krese ku apresio i amor un pa otro. Nos abilidat pa stima i sirbi otronan pafó di kas ta mehorá grandemente.
Loke nos ta hasi na kas ta e berdadero tèst severo di disípulado konstante i gososo. E bendishonnan mas dushi di e evangelio restorá ku mi kasa, Gladys i ami a gosa di dje den nos kas a bin for di siña pa konosé i di honra Dios na kas i di kompartí su Amor ku nos posteridat.
Patronchi di Servisio.
Amor pa Dios i servisio un na otro ku a keda nutrí den hogar i servisio na otronan pafó di kas ku tempu ta krese bira atributonan di karidat.
Esaki ta resoná ku e patronchi di servisio dediká den e reino di Dios ku ta wòrdu pone dilanti nos dor di Señor su profeta i apòstelnan bibu. Nos ta bira unu kune.
Nos tin e abilidat pa wak, dor di nan, na Señor “den tur pensamentu,” di manera ku “nos no ta duda” tampoko “tin miedu.”13
Manera Señor su profeta i apòstelnan bibiente, nos por avansá ku “entraña … yen di karidat pa ku tur hende, i … na e famia di fe, [ku] birtut [dekorando nos] pensamentunan insesantemente; … [i nos] konfiansa [fortalesiendo] den e presensia di Dios; i e doktrina di e saserdosio … [distilando] riba [nos almanan] manera e serena nan di shelu.”
Ku Dios su profeta i apòstelnan bibu nos por djòin tambe un sirkulo di fe birtuoso fortalesé pa servisio dediká den kual “e Spiritu Santu [ta nos] kompania konstante, [nos] septer [ta] un septer di hustisia i bèrdat ku no por kambia; i [nos] dominio [ta] un dominio eterno, i sin nesesidat di medionan e ta [kuri] bin na [nos] pa semper i semper.”14 Paso esaki ta e promesa di e plan di e Tata Selestial. Den e nòmber di JesuCristo, amèn.