Laga Hasi Bon Ta Nos Normal

Pa Elder Rafael E. Pino

Di e Setenta

Si nos ta duru i stret den hasi bon, nos kustumbernan lo por yuda nos keda den e kaminda di konvenio.

Semper lo mi ta gradesí na mi tareanan den Iglesia ku a hiba mi na biba na diferente pais. Nos a haña den kada unu di e paisnan aki un gran diversidat i hendenan ekstraordinario ku diferente kustumber i tradishon.

Nos tur tin kustumbernan i tradishonnan ku ta personal, for di nos famia, òf for di e komunidat den kual nos ta biba, i nos ta spera na keda ku tur esnan ku ta aliniá ku e prinsipionan di e evangelio. Kustumbernan i tradishonnan edifikante ta fundamental den nos esfuersonan pa keda riba e kaminda di kombenio, i esnan ku ta obstakulo, nos mester rechasá.

Un kustumber ta e práktika òf e frekuensia i manera habitual di pensa di un persona, kultura òf tradishon. Frekuentemente, e kosnan ku nos ta pensa i hasi di un manera habitual nos ta rekonosé komo normal.

Pèrmiti mi ilustrá esaki: Patricia, mi kerido kasá, ta stima bebe awa di koko i despues e ta kome e koko. Durante nos bishita na Puebla, Mexico, nos a bai na un lugá kaminda nos a kumpra koko. Despues di a bebe e awa, mi a kasá a puntra nan pa habri e koko i trese e leplá p’e kome. Ora ku el a bini e tabatin manera un koló kòrá. Nan a stroi e ku chili! Koko dushi ku chili! Esaki tabata asina straño pa nos. Pero despues nos a siña ku esnan straño tabata mi kasa ku mi, ku no a kome koko ku chili. Na Mexico, sinembargo, e no ta straño; e ta hopi normal.

Na un otro okashon nos tabata komiendo na Brazil ku algun amigunan i nan a sirbi nos awakati. Net ora ku nos tabata bai stroi salu riba dje nos amigu a bisa nos, “Kiko boso ta hasi? Ya nos a pone suku riba e awakati!” Awakati ku suku! Esei a parse asina straño pa nos. Pero despues nos a siña ku esnan straño tabata mi kasa ku mi, ku no a kome awakati ku suku. Pero na Brazil, awakati ku suku di stroi ta normal.

Loke ta normal pa un por ta straño pa otronan, dependiendo di nan kustumbernan i tradishonnan.

Kua kustumber i tradishonnan ta normal den nos bida?

Presidente Russell M. Nelson a bisa: “Awendia nos ta skucha hopi bes tokante un ‘normal nobo.’ Si di bèrdat bo ke brasa un normal nobo, mi ta invitá boso pa dirigí boso kurason, mente, i alma mas ainda na nos Tata Selestial i Su Yu, JesuCristo. Laga esei ta bo normal nobo” (““Un Normal Nobo,” Liahona, Nov. 2020, 118).

E invitashon aki ta pa tur. E no ta importá ku bo ta pober of riku, ku edukashon of sin edukashon, bieu of yòn, malu of salú. E ta invitá nos pa laga e kosnan normal den nos bida sea esnan ku ta yuda tene nos riba e kaminda di kombenio.

Niun pais no ta kontené e totalidat di loke ta bon of atmirabel. Pesei, manera Pablo i e Profeta Jose Smith a siña:

“Si tin algu virtuoso, bunita, òf di bon reputashon òf digno di alabansa, nos ta buska esakinan.” (Artikulonan di Fe 1:13).

“Si tin kualke alabansa, pensa riba esakinan” Filipénsenan 4:8.

Tuma nota ku esaki ta un eksòrtashon, no un simpel komentario.

Lo mi kier pa nos tur tuma un momentu pa meditá riba nos kustumbernan i e manera ku nan ta influenshando nos famia.

Entre e habitonan maravioso ku mester ta normal pa miembronan di Iglesia tin e kuater nan aki:

1. Estudio personal i ku famia di e skrituranan. Pa kombertí na Señor JesuCristo, kada persona ta responsabel pa siña e evangelio. Mayornan ta responsabel pa siña e evangelio na nan yunan (wak Doctrina y Covenios 68:25; 93:40).

2. Orashon personal i familiar. E Salbador ta manda nos hasi orashon semper (wak Doctrina y Convenios 19:38). Orashon ta pèrmití nos komuniká personalmente ku nos Tata Selestial den e nòmber di Su Yu, JesuCristo.

3. Partisipando tur siman na e reunion sakramental (wak 3 Nefi 18:1–12; Moroni 6:5–6). Nos ta hasi esei pa rekordá JesuCristo ora ku nos ta tuma e Santa Sena. Den e ordenansa aki e miembronan di e Iglesia ta renobá nan kombenio di a tuma riba nan e nòmber di e Salbador, di kòrd’É semper i di warda Su mandamentunan (wak Doctrina y Convenios 20:77, 79).

4. Partisipashon frekuente den obra di tèmpel i historia familiar. E trabou aki ta e medio pa reuní i seya famianan pa eternidat (wak Doctrina y Convenios 128:15).

Kon nos ta sinti ora ku nos tende e kuater kos nan aki? Nan ta parti di nos bida normal?

Tin hopi otro tradishonnan ku por ta parti di e normalidat ku nos a adoptá, lagando Dios prevalesé den nos bida,

Kon nos por determiná kiko lo bira e kosnan normal den nos bida i den nos famia? Den e skrituranan nos ta haña un gran modèl; den Mosia 5:15 e ta bisa: “Lo Mi kier pa bo ta konstante i firme, abundando semper den bon obra.”

Mi stima e palabranan aki pasó nos sa ku e kosnan ku ta bira normal den nos bida ta esnan ku nos ta ripití kada bes. Si nos ta konstante i firme den hasi bon, nos kustumbernan lo ta di akuerdo ku e prinsipionan di e evangelio i nan lo yuda nos pa keda riba e kaminda di kombenio.

Presidente Nelson a konsehá tambe: “Brasa bo normal nobo dor di arepentí diariamente. Buska pa bira kada bes mas puru den pensamentu, palabra i akshon. Ministrá na otronan. Keda ku un perspektiva eterno. Magnifiká bo yamamentunan. I kiko ku bo desafionan por ta, mi kerido rumannan, biba kada dia di forma ku bo ta mas prepará pa topa bo Kreadó. (“Un Normal Nobo,” 118).

Awor e no ta straño ni pa mi kasá Patricia òf p’ami pa kome koko ku chili i awakati ku suku—defakto, nos gust’é. Sinembargo, eksaltashon ta algu muchu mas transendental ku un sentido di sabor; e ta un tópiko relashoná ku eternidat.

Ta mi orashon ku nos normalidat por pèrmití nos eksperensiá e estado di “felisidat sin-fin” (Mosia 2:41 ku a wòrdu primintí na esnan ku warda e mandamentunan di Dios i ku segun nos hasi asina nos lo por bisa, “I a sosodé ku nos a biba na un manera felis” (2 Nephi 5:27).

Mi rumannan, mi ta testifiká di e 15 hòmbernan ku nos ta sostené komo profeta, vidente i reveladónan, inkluyendo nos kerido profeta, Presidente Russell M. Nelson Mi ta testifiká ku E Iglesia di JesuCristo di e Santunan di Delaster Dianan ta bèrdat. Mi ta testifiká spesialmente di JesuCristo, nos Salbador i Redentor, den e nòmber di JesuCristo, amèn.