Wak mas di JesuCristo den nos bida

Pa Hermana Tracy Y. Browning

Segundo Konsehero den e Presidensia General di Primaria

E Salbador ta invitá nos pa wak nos bida pa medio di DjE i asina wak mas di DjE den nos bida.

Rumannan tur, kon humilde mi tá pa para dilanti di boso e mainta aki. Mi ta uni mi kurason ku boso den gratitut pa ta reuní, na unda ku boso por ta rònt mundu, pa skucha mensahenan di profetanan, apostèlnan, videntenan, reveladornan, i lidernan den e reino di Dios. Nos figurativamente a bira manera e hendenan di e tempu di e Rei Benjamin, harmando nos tèntnan i nos portanan habri i dirigí na e profeta di Dios na tera,¹ Presidente Russell M. Nelson.

Mi tin bista malu te kaminda ku mi por kòrda i semper mi tabatin mester di brel ku preskripshon pa korreguí mi vishon. Ora mi habri mi wowonan tur mainta, e mundu parse hopi desorientá. Tur kos ta for di enfoke, granulá, i desformá. Asta mi kasa stimá ta mas un potrèt apstrat ku e figura stimá i konfortante ku realmente e ta! Mi nesesidat reflektivo, prome ku mi hasi kualke otro kos komo e kuminsamentu di mi dia, tá alkansá mi brel pa yudami duna sentido na mi ambiente i disfruta di un eksperiensia mas intenso ora nan yudami nabegá durante mi dia.

Durante e añanan, mi a rekonosé ku e komportashon aki ta ilustrá mi dependensia diario riba dos kos: promé, un hèrmènt ku ta yudami hasi mas kla, enfoká, i buta riba tera e mundu rònt di mi; i di dos, e nesesidat di un guia konkreto ku ta marka pami kontinuamente e direkshon korekto. E práktika simpel i rutinario aki ta reflehá pami un opserbashon signifikativo riba nos relashon ku nos Salbador, JesuCristo.

Den nos bida ku ta frekuentemente yená ku pregunta, preokupashon, preshon, i oportunidat, e amor di nos Salbador pa nos individualmente i komo Su yunan di konvenio i tambe Su enseñansanan i leinan, tá rekursonan diario disponibel ku nos por konfia riba nan pa ta un “us ku ta bria, … ombra[ndo] [nos] wowonan [i] anima[ndo] [nos] entendimentu.”² Ora nos buska e bendishonnan di e Spiritu den nos bida, nos lo por ta kapas di, manera Jakobo a siña, wak “kosnan manera nan ta realmente, i … manera nan realmente lo bira.”³

Komo yunan den konvenio di Dios, nos a haña un bendishon eksepshonal ku un probishon riku di hèrmènt divinamente designá pa mehorá nos vishon espiritual. E palabranan i enseñansanan di JesuCristo manera ta registrá den e eskritura i mensahenan di Su profetanan skohí i Su spiritu risibí pa medio di orashon diario, bishita regulas na tempel, i pa medio di e ordenansa tur siman di e sakramento por yuda restorá pas i proveé e regalo nesesario di konosementu ku ta trese e lus di Cristo i Su entendimentu na e hukinan di nos bida i den un mundu ku por ta nublá. E Salbador por ta nos kompas i nos piloto ora nos ta navegá den e awanan trankil i tormentoso di bida. E por hasi mas klá e kaminda korekto ku por hiba nos na nos destinashon eterno. Pues kiko E ker pa nos wak, i na unda E ker pa nos bai?

Nos profeta stimá a siña ku “nos enfoke mester ta dirigí riba e Salbador i Su evangelio” i ku nos mester “lucha pa wak na DjE den tur pensamentu.”⁴ Presidente Nelson a primiti tambe ku “nada ta invitá e Spiritu mas ku drecha bo enfoke riba JesuCristo. … E lo guia bo den bo bida personal si bo ke traha tempu pa E den bo bida—kada i tur dia.”⁵ Amigunan, JesuCristo ta tur dos, e propósito di nos enfoke i e intento di nos destinashon. Pa yuda nos keda drechá i ku kabes den e direkshon korekto, e Salbador ta invitá nos pa wak nos bida pa medio di DjE pa nos por wak mas di DjE den nos bida. Mi a siña mas tokante e invitashon spesifiko aki pa medio di mi estudio di e Testament Bieu.

A duna e lei di Moises na e Israelitanan komo un evangelio preparatorio, designá pa prepara e hendenan pa un relashon di konvenio mas haltu pa medio di JesuCristo.⁶ E lei, riku na simbolismo a guia e kreyentenan pa “wak lo kual ku ta bini” i Ekspiashon di JesuCristo,⁷ a yuda e hendenan di Israel enfoká riba e Salbador pa medio di praktiká fe den DjE, Su sakrifisio, i Su leinan i mandamentunan den nan bida⁸—ku e intenshon di hiba nan na un komprenshon mas amplio di nan Redentor.

Djis manera nos ta awe, a invita e pueblo antiguo di Dios pa wak nan bida pa medio di Djepa por wak mas di DjE den nan bida. Pero na e tempu di e ministerio di e Salbador, e Israelitanan a pèrdè e vishon di Cristo den nan opservashonnan, butando E un banda i butando aserka di e lei práktikanan no outorisá ku no tin un simbolismo instruktivo señalá na e úniko fuente berdadero di nan salbashon i redenshon— JesuCristo.⁹

E mundu diario di e Israelitanan a bira desorientá i sukú. E yunan di Israel, den e estado aki, a kere ku e práktikanan i ritualnan di e lei kaminda e senda pa salbashon personal i den un parti ta redusí e lei di Moises na un set di protokòlnan atministrá pa dirigí e bida sibil.¹⁰ Esaki ta rekerí pa e Salbador restora e enfoke i klaridat na Su evangelio.

Finalmente un gran parti di e Israelitanan a rechasá Su mensahe, a yega asina leu di akusá e Salbador— Esun ku a duna e lei i a deklará ku E tabata “e lei, i e lus”¹¹—ku a kibr’é. Sinembargo Jesus den Su Sermon di Seru, papiando riba e lei di Moises, a deklará,“No pensa ku Mi a bini pa destruí e lei, of e profetanan: Mi no a bini pa destruí, pero pa kumpli.” ¹² Despues e Salbador, pa medio di Su Ekspiashon eterno, a kaba ku e kodigonan, regulashonan, i práktikanan seremonial opservá pa e hendenan di Israel den e tempu ei. Su sakrifisio final a kondusí na e kambio di e ofrendanan di sakrifisio kimá na nos ofresé di “un kurason kibrá i un spiritu kontrito,”¹³ di e ordenansa di sakrifiso na e ordenansa di sakramento.

Presidente M. Russell Ballard, siñando riba e tópiko aki, a bisa, “Den un sentido, e sakrifisio a kambia di ofrenda na e hasidó di ofrenda.”¹⁴ Ora nos trese nos ofrenda na e Salbador, nos ta invitá pa wak mas di JesuCristo den nos bida, ora nos humildemente someté nos deseo na DjE pa rekonosé i kompronde Su sumishon perfekto na e deseo di e Tata. Ora nos figa nos vishon riba JesuCristo, nos ta rekonosé ku nos ta kompronde ku E ta e úniko fuente i kaminda pa risibi pordon i redenshon, asta bida eterno i eksaltashon.

Komo un di e prome siguidónan di e evangelio, mi a topa hopi ku a opservá i persibí kambionan den mi komportashonnan, práktikanan, i desishonnan despues ku mi a uni na Iglesia. Nan tabata kurioso riba e “dikon” di kiko nan tabata wak— dikon mi a skohe pa boutisá i uni na e kongregashon di kreyentenan aki, esta E Iglesia di JesuCristo di e Santunan di e Delaster Dianan, dikon mi ta apstené di sierto práktikanan riba e dia di reposo, dikon ku fe mi ta warda e Palabra di Sabiduria; dikon mi ta lesa e Buki di Mormon; dikon mi ta kere den inkorporá den enseñansanan di e profetanan i apòstelnan moderno den mi bida; dikon mi ta asistí semanalmente na e reunionnan di Iglesia, dikon mi ta invita otronan pa “bini i wak, bini i yuda, … bini i keda,”¹⁵ i “bini i pertenesé.”¹⁶

Na e momentu ei, mi a sinti e preguntanan hopi abrumadó i, di un manera kla, tin biaha akusadó. Pero segun mi tabata deal ku e huisio di hendenan, mi a realisá ku su prueba tabata, en efekto, mi promáé invitashon pa kue i bisti un par di brel espiritual pa klarifika, enfoka, i solidifika kiko a motiva mi union na e prktikanan i e normanan di evangelio. Kiko tabata e fuente di mi testimonio? Mi tabata hibando solamente “aktonan eksterno” sin laga e praktikanan konektá ku e leinan di Dios “fortalese [mi] fe den Cristo,”¹⁷ of demostrá komprendementu ku JesuCristo ta e úniko fuente di poder den mi praktikanan?

Pa medio di un fuerte esfuerso pa wak pa i na JesuCristo den kada un di mi pensamentunan i echonan, mi wowonan a wòrdu iluminá, i mi komprenshon a rekonose lihé ku JesuCristo tabata yama mi pa “bini na” DjE.¹⁸ For die promé ora di disipulado den mi hubentut, mi por kèrda un invitashon ku e mishoneronan a duna mi pa uni na nan ora nan tabata siña e evangelio na un grupo di mucha muhé hóben di mi edat. Un anochi, sinta den un kas di famia di un di e mucha muhé hóben aki, nan pregunta tierno “dikon mi ta kere” a prek mi kurason i a permití mi testifiká na nan ku un komprenshon mas profundo di e vishon di Señor riba e motibashonan di mi disipulado, i a refiná mi testimonio bayendo pa dilanti.

Mi a siña, komo mi sa awor, ku nos Salbador, JesuCristo, ta dirigí nos pianan na e kasnan di reunion kada siman pa partisipá di Su sakramento, na e kas di Señor pa hasi konvenionan ku n’E, na e skrituranan i éenseñansanan di e profetanan ta siña di Su palabranan. E ta dirigi nos bokanan pa testifika di DjE, nos mannan pa eleva i sirbi manera E lo eleva i sirbi, nos wowonan pa wak e mundu i otronan manera E ta wak’é—“manera nan realmente ta, i … manera nan realmente lo bira.”¹⁹ I manera nos permitiÉ pa dirigi nos den tur kos, nos lo risibi testimonio ku “tur kos ta indiká ku tin un Dios,”²⁰pasobra kaminda nos busk’É nos lo hañ’É²¹—kada dia di nobo. Esaki mi ta testifiká den e nòmber sagrado di JesuCristo, amèn.