Bo Ta Dispuesto Ainda?

Dor di Elder Kevin W. Pearson

Di e Setenta

Nos boluntat pa sigui JesuCristo ta direktamente proporshonal na e kantidat di tempu ku nos ta komprometé di ta den lugánan santu.

Un djadumingu, miéntras mi tabata preparando pa partisipá di e santa sena despues di varios siman di asignashon di konferensia di estaka, un pensamentu interesante a pasa den mi mente.

Ora ku e saserdosio a kuminsá ofresé e bendishon di e pan, palabranan ku mi a yega di skucha asina tantu bes promé a primi ku forsa den mi mente i kurason. “ testifiká na abo, O Dios, e Tata Eterno, ku nan ta dispuesto pa tuma riba nan e nòmber di bo Yu, i semper kord’é i warda Su mandamentunan ku El a duna nan; pa nan por tin Su Spiritu semper huntu ku nan.”¹ Kuantu biaha nos a yega di testifiká na Dios ku nos ta dispuesto?

Segun mi tabata reflekshoná riba e nifikashon di e palabranan di santa sena aki, e palabra dispuesto a impreshoná mi manera nunka antes. Un avalancha di eksperensia dushi i sagrado a yena mi mente i kurason ku amor i gratitut pa e sakrifisio ekspiatorio di e Salbador i Su ròl krusial den e Tata Su plan di redenshon pa mi famia i ami. Despues mi a skucha i sinti e palabranan penetrante di e orashon di e awa: “Pa nan por testifiká … ku semper nan ta kòrd’é.”² Mi a komprondé klaramente na e momentu ei ku wardando mi konvenionan mester ta mas ku bon intenshonnan.

Partisipá di e santa sena no ta un ritual religioso pasivo ku ta impliká solamente nos konsentimentu. E ta un rekordatorio poderoso di e realidat di Cristo Su Ekspiashon infinito i e nesesidat pa kord’É semper i warda Su mandamentunan. Boluntat pa enfoká riba e Salbador ta asina krusial ku e ta e mensahe sentral di e dos pasashi di e skrituranan mas sitá den Iglesia—e orashonnan di santa sena. Komprondé e bèrdat di loke Tata Selestial ta ofresé kada un di nos boluntariamente pa medio di Su Unigénito mester invoká nos maksimo esfuerso pa ta semper dispuesto a kambio.

Nos propio fundeshi spiritual ta traha sólido riba JesuCristo?

Si nos fundeshi spiritual no ta profundo òf ta superfisial, nos por ta inkliná pa basa nos boluntat riba un analisis di kosto-benefisio òf un indise personal di inkumbiniensia. I si nos akseptá e historia ku Iglesia ta konsistí primordialmente di sistemanan soshal politikamente antikuá òf politikamente inkorekto, restrikshonnan personal inrealístiko i kompromisonan di tempu e ora ei nos konklushon tokante boluntat lo ta mesun fayo. Nos no mester spera ku e prinsipio di boluntat ta bira un tendensia positivo ku personanan di influensia riba retnan soshal òf entusiastanan di TikTok. E persepshonnan di hende masha poko biaha ta aliniá ku e bèrdat divino.

E Iglesia ta un lugá di enkuentro pa individuonan imperfekto ku ta stima Dios i ta dispuesto pa sigui Señor JesuCristo. E disponibildat ei ta ankrá den e realidat ku Jesus ta e Cristo, e Yu di e Dios bibu. E bèrdat divino por wòrdu konosé solamente dor di e Spiritu Santu. Pesei, nos boluntat ta direktamente proporshonal na e kantidat di tempu ku nos ta komprometé pa ta den luganan santu kaminda e influensia di e Spiritu Santu ta presente.

Nos lo hasi bon na pasa nos tempu mas den kombersashonnan ku sintí papiando tokante di nos preokupashonnan ku un kerido Tata den Shelu i menos tempu buskand opinionnan di otronan. Nos por skohe tambe pa kambia nos notisianan diario pa e palabra di Cristo den e santu skrituranan i e palabranan profetiko di su profetanan bibiente.

E importansia ku nos ta pone na nos práktika di dia di Reposo, pagando un diesmo honesto, tin un rekomendashon di tèmpel aktual, bishitá tèmpel i honra nos kombenionnan sagrado di tèmpel, tur ta indikadónan poderoso di nos boluntat i evidensia di nos kompromiso. Nos ta dispuesto pa pone mas ku un esfuerso superfisial pa fortalesé nos fe den Cristo?

Tata Selestial ta stima nos perfektamente, pero e amor ei ta bini ku espektativanan grandi. E ta spera ku boluntariamente nos ta pone e Salbador na e lugá di mas sentral den nos bida. E Salbador ta nos ehèmpel perfekto di boluntat pa someté nos mes na e Tata den tur kos. E ta “e kaminda, e bèrdat, i e bida.”³ Boluntariamente E la ekspiá pa nos pikánan. Boluntariamente El a aliviá nos karganan, kalma nos temor, duna nos fortalesa i trese pas i entendimentu den nos kurasonnan den tempu di angustia i doló.

No opstante fe den JesuCristo ta un eskoho. “Si [nos] no por hasi nada mas ku deseá pa kere”⁴ den Su palabranan, nos tin un punto di salida pa kuminsá òf restablesé nos rekorido di fe. Su palabranan, si nos planta nan den nos kurason manera un simia i nutri’é ku hopi kuido, e lo haña rais i nos fe lo krese ku seguridat i bira un prinsipio di akshon i poder. E buki di Mormon ta nos rekurso mas poderoso pa kresementu ir restorashon di nos fe. Boluntat ta e katalisadó di fe.

Mortalidat, pa diseño divino, no ta fásil i tin bes e por ta abrumadó. Sinembargo “[nos] tei, pa [nos] por tin goso”!⁵ Enfokando riba e Salbador i nos kombenionan sagrado ta trese goso duradero! E propósito di mortalidat ta e prueba di nos boluntat. “E gran tarea di bida [i e kosto di disípulado] ta pa siña e boluntat di Señor i despues hasié.”⁶ Disípulado berdadero ta hiba na plenitut di goso. Nos ta dispuesto pa paga e preis di disípulado?

E kaminda di kombenio no ta un simpel lista, e ta un proseso di kresimentu spiritual i kompromiso profundo na Señor JesuCristo. E propósito sentral di kada mandamentu, prinsipio, kombenio i ordenansa ta pa konstruí fe i konfiansa den Cristo. Nos determinashon pa sentralisá nos bida den Cristo, pesei, mester ta konsistente—no kondishonal, segun situashon o superfisial. Nos no por permití di tuma dianan di fakansi òf tempu personal for di nos boluntat pa “para komo testigu di Dios na tur momentu i den tur kos i na tur lugá.”⁷ Disípulado no ta barata, paso e kompania di e Spiritu Santu ta impagabel.

Sigur Señor tabata pensa sigur riba nos dianan ora ku el a siña e parábola di e dies viudanan. Di e sinkunan ku tabata sabí El a bisa: nan “a tuma e Spiritu Santu komo nan guia i no a wòrdu engañá”⁸ mientras e lampi di e bobo nan “a paga” pa falta di zeta⁹ Kisas e palabranan di Nefi aki ta deskribí mas mihó e miembronan di Iglesia aki ku un tempu tabata fiel: “I otronan e lo pasifiká i kalma nan ku seguridat karnal, ku nan lo bisa: Tur kos ta bon den Sion.”¹⁰

E seguridat karnal ta, buska i konfia den kosnan mundano na lugá di Cirsto—den otro palabra, mirando dor di un lèns sekular na lugá di un lèns spiritual. E Spiritu Santu ta duna nos e kapasidat pa mira “kosnan manera nan ta, i … manera nan lo ta realmente.”¹¹ Solamente “dor di e poder di e Spiritu Santu [nos por] sa e bèrdat di tur kos”¹² i no wòrdu engañá. Nos ta pone Cristo na e lugá sentral den nos bida i ta primintí nos boluntat pa obedesé Su mandamentunan no pasobra nos ta siegu pero paso nos por mira.¹³

Kiko awor di e virgennan kèns? Dikon nan tabata indispuesto pa karga un resipiente ku zeta spiritual? Nan a simpelmente demorá? Kisas nan tabata demasiado kasual paso e tabata inkombiniente of tabata parse innesesario. Kual sea e rason, nan a wòrdu engañá tokante e ròl krusial di Cristo. Esaki ta Satanas su engaño fundamental i e pakiko nan lampinan di testimonio finalmente a paga dor di falta di zeta spiritual. E parábola aki ta un metáfora pa nos tempu. Hopi ta bandoná e Salbador i nan kombenionan hopi promé ku nan bandoná Su Iglesia.

Nos ta biba den tempunan impresedente anunsia for di antiguedat dor di profetanan antiguo, un dia kaminda Satanas lo rasa “den e kurason di e yunan di hende i insitá nan ku rabia kontra di loke ta bon.”¹⁴ Muchu hopi di nos hóbennan i muchu hopi di nos, ta biba den un mundu virtual online yená ku entretenimentu i mensahenan hostil kontra di e identidat i kerensia den Cristo.

E influensia spiritual mas poderoso den e bida di un mucha ta e ehèmpel rekto di mayornan amoroso i abuelonan ku fielmente ta warda nan propio kombenionan sagrado. Mayornan konsiente ta siña nan yunan fe den JesuCristo pa nan tambe por “sa na kua fuente nan mester akudí pa remishon di nan pikánan”¹⁵ Wardando kombenio na un manera kasual i inkonsistente ta hiba nos na pèrdida spiritual. E daño spiritual mayoria bes ta mas grandi riba nos yunan i ñetunan. Mayornan i abuelonan, nos ta dispuesto ainda?

Presidente Russell M. Nelson a atvertí, “den e dianan benidero, lo no ta posibel pa sobrebibí espiritualmente sin e guia, direkshon, konsuelo, i influensia konstante di e Espiritu Santu.”¹⁶ Esaki ta un atvertensia kla i inekibokabel pa drecha nos lampinan i oumentá nos zetanan di reserva spiritual. Nos ta dispuesto pa sigui e profetanan bibu? Kua ta e nivel di zeta spiritual den bo lampi? Ki kambionan den bo bida personal lo abilitá bo di tin e influensha di e Spiritu Santu mas konstante?

Awendia, manera den tempu di Jesus, lo tin esnan ku lo bira bèk, indispuesto pa aseptá e preis di disípulado. Segun mas kritikanan kruel i odioso wòrdu lansá riba e Salbador Su Iglesia i esnan ku ta siguiE, nos disípulado lo rekerí un gran disposishon pa drecha i fortalesé nos wesu nan di lomba spiritual i no pone atenshon na nan.¹⁷

Si nos fundeshi spiritual ta solido trahá riba JesuCristo, nos lo no kai i nos no mester teme.

“Ata’ki, Señor ta rekerí e kurason i un mente ku ta dispuesto; i esun dispuesto i obediente lo kome for di e abundansia di e tera di Sion den e delaster dianan aki.”¹⁸

Ku nos por ta semper dispuesto. Den e sagrado nòmber di e Señor JesuCristu, amèn.