Ta Fiel na Dios i Su Obra

Pa Elder Quentin L. Cook

Di e Quorum di e Diesdos Apòstelnan

Nos tur mester buska nos propio testimonio di JesuCristo, frena nos pashonnan, arepentí di nos pikánan, i ta fiel na Dios i Su obra.

Oktober aña pasá, mi a wòrdu asigná huntu ku Presidente M. Russell Ballard i Elder Jeffrey R. Holland, pa bishitá Reino Uní, kaminda nos tur tres a sirbi komo mishonero hóben. Nos tabatin e privilegio di siña i testifiká, i tambe pa rebibá historia di komienso di Iglesia den e islanan Britániko,kaminda mi bisa-bisa-buelo Heber C, Kimball i su koleganan tabata e promé misioneronan.¹

Presidente Russell M. Nelson tentando nos tokante e asignashon aki, a nota ku ta inusual pa asigná tres Apòstel pa bishitá e aria kaminda nan a sirbi komo mishonero durante nan hubentut. El a rekonosé ku tur ta deseá pa wòrdu asigná pa bishitá nan mishon original. Ku un sonrisa grandi riba su kara, el a splika kòrtiku e presente ku si tin un otro grupo di tres Apòstel ku a sirbi na e mesun mishon mas ku 60 aña pasá, e ora ei nan tambe lo por risibí un asignashon similar.

Preparando pa e asignashon ei, mi a bolbe lesa Life of Heber C. Kimball, skirbí pa un su ñetu Orson F. Whitney, kende despues a wòrdu yamá pa e apostolado. E volumen aki ma hañ’é di mi mama presioso tempu ku mi tabatin shete aña. Nos tabata preparando pa asistí na e dedikashon di e monumento This Is the Place riba 24 yüli 1947, pa Presidente George Albert Smith.² E tabata ke pa mi sa mas di mi antepasado Heber C. Kimball.

E buki ta kontené un deklarashon profundo atribuí na Presidente Kimball ku tin signifikado pa nos tempu. Promé ku mi kompartí e deklarashon, laga mi proveé algu di informashon tokante e situashon.

Miéntras e Profeta José Smith tabata den prisòn na Liberty, Apòstelnan Brigham Young i Heber C. Kimball tabatin e responsabilidat, bou di sirkunstansianan teribel i atverso, pa supervisá e evakuashon di e Santunan for di Missouri. E evakuashon tabata nesesario den partinan grandi dor di e e òrdu di eksterminashon emití dor di Gobernadó Lilburn W. Boggs.³

Kasi 30 aña despues Heber C. Kimball, e tempu ei den e Promé Presidensia, reflekshonando riaba e historia aki ku un generashon nobo, a siña, “Laga mi bisa boso, ku hopi di boso lo mira e tempu ku boso lo bai tin tur e problema, prueba i persekushonnan ku boso por soportá, i hopi oportunidat pa mustra ku boso ta fiel na Dios i Su Obra.”⁴

Heber a sigui, “Pa enfrentá e difikultnan benidero, ta nesesario pa boso tin un konosementu di e bèrdat di e obra aki pa boso mes. E difikultatnan lo ta asina grandi ku e hòmber òf muhé ku no ta poseé e konosementu personal òf testimonio lo kai. Si bo no tin e testimonio, biba rekto, i yama na Dios i no para [te ora] bo hañ’é. Si bo no hasié lo bo no ta firme. … E tempu lo bin kaminda niun hòmber òf muhé lo por perseverá ku lus fiá. Kada unu lo mester wòrdu guiá pa e lus den nan mes. … Si bo no tin esaki lo bo no porta firme; p’esei buska e testimonio di Jesus i pega na dje, pa ora e tempu di prueba bin bo no trompeká i kai.”⁵

Kada un di nos mester di un testimonio di Dios Su obra⁶ i e ròl grandi di JesuCristo. E di 76 sekshon di Doctrinas y Convenios ta referí na e tres gradonan di gloria i ta kompará e gloria selestial ku solo. Despues e ta kompará e reino terestre ku esun di luna.⁷

Ta interesante ku e solo tin su propio lus, pero e luna ta reflehá lus òf “ lus fiá,” Papiando di e reino terestre, versíkulo 79 ta deklará, “Esaki ta esnan ku no ta balente den e testimonio di Jesus.” Nos no por optené e reino selestial i biba ku Dios e Tata riba lus fiá; nos mester tin nos propio testimonio di JesuCristoi Su evangelio.

Nos ta biba den un mundu kaminda inikidat ta den abundansia⁸ i kurasonnan ta kita for di Dios dor di e preseptonan di hòmbernan.⁹ Un di e ehèmpelnan mas konvisente den skritura ku tabata un preokupashon pa Heber Kimball tokante buska testimonio di Dios Su obra i JesuCristo ta bin dilanti den Alma su konseho na su tres yunan—Helaman, Shiblon, i Corianton.¹⁰ Dos di su yunan tabata fiel na Dios i Su obra. Pero un yu a tuma algun mal desishon. Pa ami e importansia mas grandi di Alma su konseho ta ku e tabata duna esaki komo tata pa benefisio di su propio yunan.

Alma su promé preokupashon, meskos ku di Heber C. Kimball, tabata ku kada unu mester tin un testimonio di JesuCristo i ta fiel na Dios i Su obra.

Den Alma su enseñansanan remarkabel na su yu Helaman, el a hasi un promesa profundo ku esnan ku “pone nan konfiansa den Señor lo wòrdu sostené den nan pruebanan, i nan problemanan, i nan aflikshonnan, i nan lo ta eksaltá den e delaster dia.¹¹

Maske ku Alma a risibí un manifestashon kaminda el a wak un angel, esei ta poko biaha ta pasa. Impreshonnan ku ta bin di e Spiritu Santu ta mas típiko. E impreshonnan aki por ta igualmente mes importante ku manefestashon angelikal. Presidente Joseph Fielding Smith a siña: “Impreshonnan riba e alma ku ta bin di e Spiritu Santu ta hopi mas signifikante ku un vishon. Ora e Spiritu ta papia ku spiritu, e impakto riba e kurason ta hopi mas difísil pa kita.”¹²

Esaki ta hiba nos na e konseho di Alma na su di dos yu, Shiblon. Shiblon tabata hustu, meskos ku su ruman Helaman. E konseho ku mi ke enfatisá Alma 38:12, ku parsialmente ta bisa, “Prokurá refrená tur bo pashonnan pa esnakinan ta yená ku amor.”

Briddle ta un palabra interesante. Ora nos ta kore un kabai, nos ta usa e hèrmènt aki pa guia e kabai. Un bon sinónimo por ta dirigí, kontrolá òf kontené. E Antiguo Testament ta bisa nos ku nos a grita di goso ora nos a siña ku nos lo bai tin kurpa físiko.¹³ E kurpa no ta malu—e ta bunita i esensial—pero algun pashon, si no keda usá di forma adekuá i no keda frená di forma apropiá, por separá nos di Dios i Su obra i ta impaktá nos testimonio negativamente.

Laga nos papia di dos pashon den partikular—promé, rabia, i di dos, deseo di bo wowonan.¹⁴ Ta interesante ku tantu keda sin wòrdu frená òf kontrolá por kousá angustia grandi, disminuí e influensia di e Spiritu, i separá nos di Dios i Su obra. E atversario ta usa tur oportunidat pa yena nos bida ku imágennan di violensia i inmoralidat.

Den algun famia, e no ta poko komun pa un esposo òf un esposa rabiá pa dal su kasá òf un mucha. Den yüli, mi a partisipá den un foro di Tur Partido Parlamentario di Reino Uní na Londres.¹⁵ Violensia kontra hende muhé i hubentut tabata tópiko prinsipal komo un problema mundial signifikante. Banda di violensia, algun a partisipá den abusu verbal. E proklamashon di e famia ta bisa nos “ku esnan ku abusá di nan kasá òf nan yunan … un dia lo tin ku bai duna kuenta i rason dilanti Dios.”¹⁶

Presidente Nelson a enfatisá esaki fuertemente ayera mainta.¹⁷ Por fabor tuma desishon sin importá ku bo mayornan a òf no a abusá di bo, ku abo lo no abusá ni físikamente, ni verbalmente, ni emoshonalmente di bo kasá ni di bo yunan.

Den nos tempu un di e desafíonan mas difísil ta kontenshon i abusu verbal relashoná ku asuntunan sosial. Den hopi kaso rabia i lenguahe abusivo a remplasá rasonamentu, diskushon, i gentilesa. Hopi a bandoná e amonestashon di e Salbador Su Apòstel di mas antiguedat, Pedro, pa buska kualidatnan Kristian manera templansa, pasenshi, piedat, afekto fraternal i karidat.¹⁸ Tambe nan a bandoná e kualidat di humildat.

Banda di kontrolá rabia i frena otro pashonnan, nos mester hiba bida moralmente puru dor di kontrolá nos pensamentunan, lenguahe, i akshonnan. Nos mester evitá pornografia, evaluá ku loke nos ta kompartí ta apropiá, i ku loke nos ta pasa den nos hogarnan, i evitá tur tipo di kondukta malu.

Esaki ta hiba nos na e konseho di Alma na su yu Corianton. Kontrali na su rumannan, Helaman i Shiblon, Corianton tabata enbolukrá den transgreshon moral.

Pasó Corianton tabata enbolbí den inmoralidat, tabata nesesario pa Alma siñ’é tokante arepentimentu. E mester a siñ’é e seriedat di piká i despues kon pa arepentí.¹⁹

Pues Alma su konseho preventivo tabata pa frena pashon, pero su konseho pa esnan ku a transgredí ta pa arepentí. Presidente Nelson a duna miembronan konseho profundo riba arepentimentu den e konferensia general di aprel 2019. El a hasié kla ku arepentimentu diario ta integral den nos bida. “Arepentimentu no ta un suseso; e ta un proseso. E ta e yabi pa felisidat i pas mental,” el a siña, “Arepentimentu diario ta e kaminda pa puresa, i puresa ta trese poder.”²⁰ Si Corianton lo a hasi loke Presidente Nelson a konsehá, e lo a arepentí asina el a kuminsá haña pensamentunan impuro. Transgreshonnan grandi lo no a sosodé.

E konseho komo konklushon ku Alma a duna na su yunan ta un di e doktrinanan as importante den henter e skritura. E ta relashoná ku e Ekspiashon realisá dor di JesuCristo.

Alma ta testifiká ku Cristo lo kita piká.²¹ Sin e Salbador Su Ekspiashon, e prinsipio eterno di hustisia lo rekerí kastigu.²² Pa motibu di e Salbador Su Ekspiashon, miserikòrdia por vense pa esnan ku a arepentí, i e lo pèrmití nan pa regresá den presensia di Dios. Nos lo hasi bon pa skrudiñá e doktrina maravioso aki.

Niun hende no por regresá serka Dios riba su propio bon obra so, nos tur mester e benefisio di e Salbador Su sakrifisio. Tur a kometé piká, i ta solamente pa medio di e Ekspiashon di JesuCristo ku nos por optené miserikòrdia i biba ku Dios.²³

Alma ta duna tambe konseho maravioso na Corianton pa nos tur ku a òf lo bai pasa den e proseso di arepentimentu, sin tene kuenta ku si e pikánan ta chikí òf mes severo ku esnan kometé dor di Corianton. Versíkulo 29 di Alma 42ta bisa “I awor, mi yu, mi ta deseá pa bo no laga e kosnan aki molostiá bo mas, i únikamente laga bo pikánan molestiá bo, ku e molèster ku lo trese bo atrobe na arepentimentu.”

Corianton a sigui Alma su konseho i a arepentí i sirbi honorabelmente. Dor di e Salbador Su Ekspiashon, sanamentu ta disponibel pa tur.

Den Alma su tempu, den tempu di Heber, i sigur den nos tempu, nos tur mester buska un testimonio di JesuCristo, frena nos pashonnan, arepentí di nos pikánan, i haña pas dor di e Ekspiashon di JesuCristo i ta fiel na Dios i Su obra.

Den un diskurso resien i atrobe awe mainta, Presidente Russell M. Nelson a bisa di e siguiente manera: “Mi ta roga boso pa asumí kontròl di bo testimonio di JesuCristo. Traha p’e. Hasié di bo. Kuid’é. Nutrié pa asina e krese. Despues waka pa e milagernan ku ta pasa den bo bida.”²⁴

Mi ta gradisí ku awor nos lo tende di Presidente Nelson. Mi ta testifiká ku Presidente Nelson ta Señor Su profeta pa nos tempu. Mi stima i ta atesorá e inspirashon maravioso i guia ku nos ta risibí pa medio di dje.

Komo un Apòstel di Señor JesuCristo mi ta duna mi testimonio sigur di e Salbador Su dibinidat i e realidat di Su Ekspiashon den e nòmber di JesuCristo, amèn.