Baa Halzhishgo Sodizin Patriarchal Blessing Wolyéhígíí Há’ál’įįh

Elder Kazuhiko Yamashita áyiilaa

Tsosts’idiin dóó

Díí ná bee sohodoozingo, njéí biyi’di nił bééhodoozįįł dóó Nizhé’é Yá’ąąshdi Hólóonii dóó Jesus Christ ayóó’ánó’nínígíí dóó T’áá Áłah nik’idéez’į́įgo níka’análwo’ígíí.

Adą́ą́dą́ą́’ shik’is ayóó’íínishninígíí Elder Randall K. Bennett jílinígíí baa há sodahodizinígí patriarchal blessing yaa yááł’ti’. Ts’idá ayóó átéego yaa hoolne’’ dóó beda’diilníił. Shik’is dóó shilahkéíí ayóó’ííníshníinii, shí ałdó’ jílinígíí baa há sodahodizinígí baa hodeshnih ya? Patriarchs danołinígíí, patriarchal blessing nihídayókeedgo lą’ígo shį́į́ nihi naanish ádadoołííł, Bóhólíihii nihá bich’į’ sodiszingo naanish bá nihik’i hodiinii’ígí naasyit’ihgo bee nihik’ijidlíido.

Stake conferencedi áłah nída’adleehgo, stake patriarchs danlinígíí dóó be’asdzą́ą́ danlinígíí t’áá áko baa náshdaahgo bił ńdahasne’ łeh. Patriarch danlinígíí éíí ba’át’e’ ádaadin, ak’ehdahół’į́, dóó Diyin God ńdabiizláa’go naat’áanii danlį́. Diyin k’ehgo be’iina’ ádeił’į́nígí baadahane’ígí yee shił dahalne’ łeh. Nidabídishkidgo t’áá ííyisíí ánii naagháhígí dóó yéego náás silį́’ígíí lá díkwii béédááhai danlínígí bá biká sodíínílzin. Ákoga’, t’áá ííyisíí ánii naagháhígí éíí ła’ts’áadah lá dóó yéego náás silį́’ígíí éíí náhast’édiin dóó bi’áán táá’ lá.

Díí Sodizin Báhooghanjí atah níyáago patriarchal blessing shá ályaa nishłinígí shá biká sohodoozin, náhast’éíí ts’áadah shinááhaigo, to bee shi’doolzį́į́’ dóó bik’ijį’ naaki nááhaigo. Shi patriarch shá sodoolzinígíí éíí t’áá íyisíí sánígo. 1916 yęędą́ą́’ bí ałtsé Japandi díí Sodizin Báhooghanjí atah níyáálá. Ayóo aláadi yá’át’éehgo baa ntséskees Bóhólníihii yikéé’ sizį éíí shi patriarchal blessing shá áyiilaa. Japandéé’dine’é bizaad shił nantl’ahgo yee yáłti’ ndi, ayóó’át’ao bidziilgo yee haadzíí’.

Patriarch danilinígíí ła’ bił nidahashne’go ádaaníílá ła’ éíí patriarchal blessing bá ádeilne’ k’ad Bóhólníihii yá ch’ídaalnishgo. Ayóó’ánhíínishníinii tséłkéí, dóó ch’ikéí, dóó amá dóó azhé’é, dóó bishop danohłinígí, jílinígíí baa há sodahodizinígí doo t’áá Bóhólníihii bikéé’ dashdiigháahgo t’éiyá bá da. T’áá ałtso heishį́į́h tó bee bi’doolzį́į́’ígíí t’áá áłahjį’ kojí yáh anádahígí bá ahóót’i’ baa halzhishgo patriarchal blessing bá alnéehgo.¹

Ayóó’ánhíínishníinii t’áá hóyáanii danołinígí, ła’ t’ahdoo patriarchal blessing nihá ádaalnéeda. Béé nílniih, honááhaiígí doo bik’ehgo ál’į́įda.

Shimá baa daaní nishłinígí díí Sodizin Báhooghan biyi’doo t’áá íyisíí bidziilgo, Relief Society yá na’nitinii nilíínt’éé’ ádin silį́į́’jį’ náhastédiin binaahaijį’. T’áadoo bá sohodoozinda lá patriarchal blessing bee éíí ayóó bá baa shíni’. Tah hinánéedą́ą́’ lą’ígo bich’į’ nahwiisnáá, Diyin God bibee’adziilii bee dahólónígíí bighan di ádingo biniinaa, t’áadoo bee í’ool’įįł bee bik’ih hojisdli’da. Patriarchal blessing ła’ bee hólǫ́ogo shį́į́ éíí yinahj’ ha’ólníido ńt’éé’.

T’áá hóyáanii danołinígí, ła’ shį́į́ tahdoo patriarchal blessing nihá ádaalne’da, t’áá shǫǫdí t’áadoo bąąh danihíni’í! T’áá áníiltso doo nihe’iina’ ahxełt’éida. Ła’ éíí tádiin dóó bi’aan ashdla’ doodai’ tseebídiin dóó bi’aan ashdla’ nihéédááhai dóó nishłínígíí binyé shá sohodidooziił danohsin, nihibishop nilinígí bił dahołne’ áko nihá ádoolnííł.

Ánii idahidookáiígí, sodizin patriarchal blessing wolyéhígí daatst’í baa dahosidisots’ą́ą́’? Shí éíí doo shił beehózinda ńt’éé t’óó kohjí idiiyáhą́ą dą́ą́’, ádkondi shibishop éíí sohodizinígí yee shił holne’ dóó sháyíneedlį́įgo bá hasht’e’ ádiishyaa tó bee si’doolzį́į́’ dóó bik’ijį’. Ayóó’ánhííníshníinii ánii tó bee nihi’doolzį́į́’ígí, sohodizin patriarchal blessing nihá alnéehgo nihá bíígha. Bóhólníihii níká adoolwoł díí dilzingo álínígí bá.

Sodizin patriarchal blessing wolyéhígíí naakigo binyéhígí baa ntsííkees do:

Sodizin patriarchal blessing éí Bóhólníihii táá hójizinígíí yee hach’į’ háłti’.²
Sodizin patriarchal blessing Israel bighaandoo nohłinígí yee nił hodoolni.

Ni patriarchal blessing Nizhé’é Yá’ąąshdi Hólóonii nich’į’ yáłti’ dóó ná iidoolííłígíí dóó nanitingo yee nich’į’ hadoodzih éíí náás níyoołkááłgo nika’analwo doo. Sodizin patriarchal blessing éíí doo ne’iina’ t’áá ałtso ádíílíłii yaa halne’ da doodai’ nina’ídíkid doo t’áá át’é yee nił hodoolnih da. Díí éíí doo yaa halne’go iiná biyi’ aláahgo bóhónį́įhgo ádahodoonííłígí, díí doo shá áhodooníił da t’áadoo íinohsiní. T’áá ákót’ao ałdó’, t’áá át’é biyi’ yisdzohígíí doo t’áá ałtso k’ad hinínanígí biyi’ áhodooníił da. Sodizin patriarchal blessing éíí hool’áago bá, dóó bee has’áanii iiná yá’át’ééhii bee hinínáago, biyi’ daasdzohígí ła’ t’áadoo ná ádzaago t’áá ná naasyit’ih doo.³

Nichóone’ bits’ą́ą́doo yínáłígí bee nił hodoonih, nił bééhodoozįįł Israel bighan haz’ąądoo ánt’inígíí dóó Abraham bik’ǫ́ǫ́’ bits’ą́ądoo ánt’inígíí.⁴ Díí hazhó’ó bik’idi’deeshtį́į́ł ninízingo, Bóhólníihii Israel bighan haz’ąądoo Abraham yich’į’ hahaasdzíí’yęę yiniłta’go nidííłkah.

Éíí díí yee yich’į’ hahaasdzíí’:

“Bí bits’ą́ą́doo oochiłígíí t’áá íyisíí t’óó ahayói doo (dinííłįįłGenesis 17:5–6; Abraham 2:9; 3:14.
“Bik’ǫ́ǫ́’, doodai’ áłchiní bits’ą́ą́doo noot’į́łígíí, Jesus Christ bina’nitin nidaididoolééł dóó Diyin God bibee’adziilii baadadoolyééł (dinííłįįł Abraham 2:9).
“Ba’áłchiní bits’ą́ą́doo noot’į́łígí nida’nitingo, ’nahasdzáán bikáá’ t’áá ałtso hooghan haz’ą́ą́doo [bee] bik’ihozhdoodliił, éíí binahjį’ yisdá iildééh, ííná hool’áágo biyi’doo’ (Abraham 2:11).”⁵

Kojí Sodizin Báhooghanjí atah tó bee nihi’doolzį́’ígíí, ałha’deet’ánígíí ba’áłchíní daniidlį́.⁶ Abrahamic covenant wolyéhígí bee ałha’deet’ánígíí bee nihik’ihojidlí Jesus Christ bina’nitin bibeehaz’áanii dóó bee ó’ool’įįł bik’eh dahoniil’į́įgo.

Sodizin patriarchal blessing wolyéhígí niha’ádoolníłígí biká hast’e’ ádílnéehgo Nihizhé’é Yá’ąąshdi Hólóonii dóó Jesus Christ yiniidlánigíí yéego dínoosééł. Nihi patriarchal blessing bee sodizin nihá ályaa dóó naiinółtah doo dóó yéego baa ntsókees doo, Biyi’ daasdzoohígí t’éiiyá t’áá ahxą́ą́h baa ntsíníkees doo.

President Thomas S. Monson áníílá, “Bóhóníihii Liahona Lehi yá áyiilaago yeini’ánęęgi át’ao Bóhóníihii t’áá bí dijį́įdi nihe’iina’ ádiilnííłgóó nee nanhintin, doo yá’át’éehii yits’ą́ąjį’, dóó bik’ehgo atiinígí nihá ííshjáán áhósin, baa dahadzidii bits’ą́ąjį’—t’áá’áłdįį hahodítéijį’ éíí dooda, t’áá hazhó’ó nihigan yá’ąąshdíigi t’éiyá bich’į’ nihá yá’át’éehgo bich’į’ atiingo nihá áhósin.”⁷

Ayóó’ánhííníshníinii bishop danołíinii, dóó áma dóó azhé’é danołíinii, dóó elders quorum danołíinii dóó Relief Society president danołíinii, dóó ward mission leaders danołíinii, dóó shik’iskei dóó shilahkei nihik’is baa dajiinohba’go baa nidaokahígí, t’ááshǫǫdí díí bee ndeinohkąąh nihitséłkei dóó nihich’ikei, dóó ánii nihidahidiikaigí t’ahdoo sodizin patriarchal blessing bá ádaalnéhígí hwendi Bóhólníihii yich’į sodadilzingo biká adadoolwołgo yá ałch’e’ádadidoolnííłgo sosdizin patriarchal blessing bá ádadoolnííł.

Sodiszingo t’áá ahxą́ą́h shi patriarchal blessing neinishtah; binahjį sihasin yee shíka’análwo. Shił beehózin Bóhóníihii shá íínídzinígí ádeeshłííłgo, éíí shíka’análwo’go bee ajooba’ íinisin dóó ádaana’ooshkąąh łeh. Yíínishta’go dóó ba ntsískeesgo, bee shik’ihojidlíigo shich’į’ ha’oodzíí’ígíí t’áá íyisí shiłnilį́ dóó bik’ehgo hinishnáado nisin łeh.

Diyin God bizaad t’áá néíníiltah bik’eh la’ígóó bik’i’diitįįhígi át’ao, nihipatriarchal blessing t’áá néíníiltah bik’eh ałdó’ bik’i’diitįįhígi t’áá ałaan ádaatéedoo. Shíhígí éíí k’ad yiníshta’go łahgo át’éego bik’i’diishtįįh tádiin shinááhai yęę dą́ą́’ ałdó’ dóó ashdladiin shinááhai yęę dą́ą́’ ałdó’ łahgo át’éego bik’i’diishtįįh nt’éé’. Saad bee bik’e’ashchinígíí doo łahgo áániił da, ndi bik’ida’diitįįhígi t’éiyá łahgo ánáá’niił.

President Dallin H. Oaks áníigo éíí sodizin patriarchal blessing ”éíí Ayi’sizíinii Diyinii bik’ehgo sohodoozingo naháasdzoh dóó t’áá Bí éíí bee binahjį’ yiiníilta’doo dóó t’áá Bí éíí bik’ehgo ííłninígíí bik’idi’diitį́į́ł. Sodizin patriarchal blessing ná alyáago hazhó’ó ałkéé’ daasdzohígíí nanitin doo t’áá ałkéé’ ndahaz’ą́ągo Ayi’sizíinii Diyinii be’adziilígí bik’ehgo bik’idi’díítį́į́ł [éíí] ná alyaago.”⁸

Shik’is dóó shilahkéíí, shił beehózingo ádíshní éíí Nihizhé’é Yá’ąąshdi Hólóonii dóó Biye’ Ayóó’áyó’níinii T’áá Éíí T’éiyá Báyizhchíinii, Bóhólníihii Jesus Christ, t’áá áłah t’áá aníí hiná. Aláahdi ayóó ánihó’ní. Nihá sohodizin patriarchal blessing wolyéhígíí baahasti’go T’áá Bí T’áá Áłah nihainílá. Díí nílinígíí ná bá sohodoozingo, nił bééhodoozįįł dóó T’áá Áłah ayóó’ánó’nínígíí dóó nik’idéez’į́įgo níká anáHi’nilchééhígíí.

Naaltsoos Mormon Wolyéhígíí bidziilgo t’áá aaníigo Jesus Christ yaa halne’. Dóó Diyin God yáhalne’ii President Russell M. Nelson, baa ahéé nisin t’áá áníí hináago nihoo’ishígí.

Nihi Yisdá’iiníiłii, Jesus Christ t’áá iyisíí baa ahééh nisin. Damóo Easter aleehígí Bóhólníihii t’áá ííyisíí Baa ntséskeesdo dóó Náádiidzáhígí, dóó Bich’į’ hodínísin do dóó nihá nina’ádeet’ánígí baa áhééhnisin. T’áá aaníí shił bééhózin t’áá íyisíí ayóó’ánhó’níigo yéego nihá ti’hooznii’. T’áá aaníí shił bééhózin ayóó’ánhó’níníí biniinaa nihá naadiidzá. T’áá aaníí Hiná. T’áá aaníigo shił beehózin Jesus Christ bízhi’ binahjį’ adishní, áámen.