ကြီးမြတ်သောပညတ်တော်နှစ်ခုကို ပေါင်းကူးခြင်း
ယေရှုခရစ်တော်နောက်လိုက်ရန် ကျွန်တော်တို့ရဲ့စွမ်းရည်ဟာ ပထမနဲ့ဒုတိယပညတ်တော်နှစ်ခုလုံးကို ဟန်ချက်ညီညီ တူညီတဲ့ပေးဆပ်မှုဖြင့် အသက်ရှင်နေထိုင်ရန် ကျွန်တော်တို့ရဲ့ခွန်အားအပေါ် မှာမူတည်ပါတယ်။
နိဒါန်း
ကျွန်တော့်ဇနီး၊ လီဆာနဲ့ကျွန်တော် ကမ္ဘာတစ်ဝှမ်းရှိ တာဝန်ကျနေရာတွေမှာ ခရီးသွားတဲ့အခါ၊ အသင်းတော် အသေးတွေ အကြီးတွေမှာ သင်တို့နဲ့တွေ့ဆုံခွင့်ရတာကို ကျွန်တော်တို့နှစ်သက်ပါတယ်။ ကိုယ်တော်ရှင်ရဲ့အမှုတော်အပေါ် သင်ရဲ့ပေးဆပ်မှုဟာ ကျွန်တော်တို့ကို အားတက်စေပြီး ယေရှုခရစ်တော်ရဲ့ဧဝံဂေလိတရားအတွက် သက်သေခံချက်တစ်ခုအဖြစ် ရပ်တည်နေပါတယ်။ ခရီးတစ်ခုစီတိုင်းကနေ အိမ်ပြန်လာတိုင်း သင်တို့ဆီက ရခဲ့သလောက် ကျွန်တော်တို့ပေးခဲ့နိုင်ပါ့မလားလို့ တွေးနေမိပါတယ်။
ခရီးသွားတဲ့အခါ၊ လည်ပတ်ကြည့်ရှုရန် အချိန် အလွန်နည်းပါးပါတယ်။ ဒါပေမယ့်၊ အခွင့်ရရင်တော့၊ ဝါသနာတစ်ခုခုမှာ ကျွန်တော် အချိန် ခဏတာတော့ ကုန်ဆုံးခဲ့ပါတယ်။ ကျွန်တော်ဟာ ဗိသုကာပညာနှင့် ဒီဇိုင်းပိုင်းကို စိတ်ဝင်စားပြီး တံတားများကို အထူးခုံမင်စိတ်ဝင်စားပါတယ်။ ကြိုးတံတားတွေက ကျွန်တော့်ကို အံ့သြစေပါတယ်။ တိုကျိုရှိ သက်တန့်တံတား၊ ဟောင်ကောင်ရှိ တဆင်း မ တံတား၊ လန်ဒန်ရှိ မျှော်စင်တံတား သို့မဟုတ် အခြားမြင်ဖူးသမျှ ဘယ်အရာမဆို၊ ဒီလိုရှုပ်ထွေးတဲ့ အဆောက်အဦးတွေကို တည်ဆောက်ခဲ့တဲ့ ပါရမီရှင်အင်ဂျင်နီယာတွေကို အံ့သြချီးမွမ်းလို့မဆုံးပါဘူးခင်ဗျာ။ ကျွန်တော်တို့ ဘယ်လိုမှသွားလို့မရတဲ့ နေရာတွေကို တံတားတွေက ခေါ်သွားပေးပါတယ်။ (ကျွန်တော်ရှေ့မဆက်ခင်၊ ဒီသတင်းစကားကို ပြင်ဆင်ခဲ့တဲ့အချိန်၊ ဘာလ်တီမိုးမြို့မှာ ဝမ်းနည်းဖွယ်တံတားမတော်တဆမှု ဖြစ်ခဲ့တာကို ကျွန်တော်သတိပြုမိပါတယ်။ အသက်ဆုံးရှုံးမှုအတွက်နဲ့ ကျန်ရစ်သူမိသားစုတွေအတွက် ဝမ်းနည်းကြေကွဲရပါကြောင်း ပေးပို့ပေးခဲ့ပါတယ်။)
ခမ်းနားထည်ဝါသော ကြိုးတံတား
မကြာသေးမီက၊ ညီလာခံတာဝန်က ကျွန်တော်ကို ကယ်လီဖိုးနီးယားကို ခေါ်သွားပြီး၊ ကမ္ဘာရဲ့ အင်ဂျင်နီယာ အံ့ဖွယ်တစ်ခုလို့ မှတ်ယူထားတဲ့ အထင်ကရ ရွှေရောင်ဂိတ်တံတားကို၊ တစ်ဖန်ဖြတ်ကူးခဲ့ပါတယ်။ အဲ့အထိမ်းအမှတ်အဆောက်အအုံဟာ လှပတဲ့ပုံစံ၊ လက်တွေ့ကျတဲ့ရည်ရွယ်ချက်၊ ကျွမ်းကျင်တဲ့အင်ဂျင်နီယာနည်းပညာနဲ့ ရောယှက်ပေါင်းစပ်နေပါတယ်။ ၎င်းဟာ ကြီးမားတဲ့ ဆိပ်ခံတံတားတွေနဲ့ ပံ့ပိုးထားတဲ့ ဘေးနှစ်ဘက်ပိတ်မျှော်စင်တွေပါရှိတဲ့ ဂန္တဝင်ကြိုးတံတားတစ်ခုဖြစ်ပါတယ်။ ထိုဧရာမ၊ သမုဒ္ဒရာအထက်သို့ ပျံတက်နေသယောင် ခမ်းနားထည်ဝါတဲ့ အလေးချိန်ရှိတဲ့ အမြွှာမျှော်စင်ဟာ ပထမဆုံး တည်ဆောက်ရမဲ့ အရာတွေဖြစ်ခဲ့ပါတယ်။ ၎င်းတို့ဟာ အောက်ဘက်လမ်းမကြီးကို ပင့်ပေးထားတဲ့၊ ကြီးမားကျယ်ပြန့်တဲ့အဓိက နဲ့ ဒေါင်လိုက် ဆိုင်းထိန်းကြိုးတွေကို အတူတကွ ထမ်းပိုးပေးထားပါတယ်။ ထူးကဲတည်ငြိမ်မှုစွမ်းရည်—မျှော်စင်ရဲ့အင်အားဟာ—တံတားအင်ဂျင်နီယာနည်းပညာရဲ့နောက်ကွယ်က မှော်ပညာပဲဖြစ်ပါတယ်။
ရွှေရောင်ဂိတ်တံတား ခရိုင်
တံတားရဲ့အစောပိုင်းတည်ဆောက်မှုပုံတွေဟာ ထိုအင်ဂျင်နီယာမူဝါဒကို သက်သေခံနေပါတယ်။ တံတားလိုအပ်ချက်တစ်ခုစီဟာ အချိုးညီတဲ့မျှော်စင်တွေ၊ နှစ်ခုစလုံးဟာ တစ်ခုနဲ့တစ်ခု အပြန်အလှန်ချိတ်ဆက်ထားပြီး အလေးချိန်ခံနိုင်တဲ့ အထောက်အကူအဖြစ် တွေ့ရှိရပါတယ်။
သမိုင်းဝင်ပုံများ/ အန်တာဝုဒ် မှတ်တမ်း
တံတားပြီးစီးသွားတဲ့အခါ၊ မျှော်စင်နှစ်ခုကို ခိုင်ခံ့စွာနေရာချပြီး အုတ်မြစ်ပေါ်တွင် ကျောက်ချရပ်နားထားတဲ့ ဆိပ်ခံတွေဟာ၊ ခွန်အားနှင့် အလှတရားတို့ရဲ့ ပုံရိပ်ပဲဖြစ်ပါတယ်။
ဧဝံဂေလိမှန်ဘီလူးမှတဆင့်—ခိုင်ခံ့တဲ့အုတ်မြစ်ပေါ်တွင် တည်ဆောက်ထားတဲ့ ခံ့ညားထည်ဝါသော ဒီအမြွှာမျှော်စင်နဲ့—တံတားကို ယနေ့ ကြည့်ရှုဖို့ ဖိတ်ခေါ်ပါတယ်။
ယေရှုခရစ်တော်ရဲ့ အမှုတော်ဆောင်ညနေဆည်းဆာတွင်၊ ယခုကျွန်တော်တို့ခေါ်တဲ့ သန့်ရှင်းသောရက်သတ္တပတ်အတွင်း၊ ကျမ်းတတ်တစ်ဦးဖြစ်တဲ့ ဖာရိရှဲတစ်ဦးဟာ ကယ်တင်ရှင်အား ဖြေဖို့မဖြစ်နိုင်ဘူးလို့ သိထားတဲ့မေးခွန်းတစ်ခုကို မေးလျှောက်ခဲ့ပါတယ်၊ “အရှင်ဘုရား၊ ပညတ္တိကျမ်း၌ အဘယ်မည်သော ပညတ်သည်သာ၍ ကြီးသနည်း။” “ကိုယ်တော်ကို စုံစမ်းနှောင့်ရှက်ခြင်းငှါ” ကျမ်းတတ်ဟာ၊ တရားဝင်နည်းလမ်းနဲ့ မနှစ်မြို့ဖွယ်ရည်ရွယ်ချက်နဲ့ အဖြေကိုရှာကာ၊ စစ်မှန်သော၊ မြင့်မြတ်သော၊ သန့်ရှင်းသော၊ အံ့ဖွယ်ကောင်းသော တုံ့ပြန်မှုကို ရရှိခဲ့ပါတယ်။
“ယေရှုက သူ့အားဖြေခဲ့ပါတယ်၊ သင်၏ဘုရားသခင် ထာဝရဘုရားကို စိတ်နှလုံးအကြွင်းမဲ့ဉာဏ်ရှိသမျှနှင့် ချစ်လော့။
“ဤပညတ်သည် ပဌမပညတ်ဖြစ်၏။ ကြီးမြတ်သော ပညတ်လည်းဖြစ်၏။” ကျွန်တော်တို့ တံတားဥပမာနှိုင်းစာချက်ကို နားထောင်ပါ၊ ဒါက ပထမမျှော်စင်ကိုရည်ရွယ်ပါတယ်။
“ထိုမှတပါး ကိုယ်နှင့်စပ်ဆိုင်သောသူကို ကိုယ်နှင့်အမျှ ချစ်လော့ဟူသော၊ ဒုတိယကပညတ်သည် ပဌမ ပညတ်နှင့် သဘောတူ၏။” အဲ့ဒါက ဒုတိယမျှော်စင်ပဲဖြစ်ပါတယ်။
“ဤပညတ်နှစ်ပါးတို့ကား ပညတ္တိကျမ်းနှင့် အနာဂတ္တိကျမ်း ရှိသမျှတို့၏ အချုပ်အခြာပင်ဖြစ်သတည်းဟု မိန့်တော်မူ၏။” တံတား၏ကျန်ရှိသောအစိတ်အပိုင်းများ။
ယေရှုခရစ်တော်ရဲ့တုံ့ပြန်မှုတွင် ဖော်ပြပြီး ဟောကြားခဲ့တဲ့၊ ကြီးမြတ်သောပညတ်တော်နှစ်ခုမှ တစ်ခုစီကို ကျွန်တော်တို့ ဆန်းစစ်နိုင်ပါတယ်ခင်ဗျာ။ သင် ထိုသို့ဆန်းစစ်လျှင်၊ ၎င်းရဲ့ ခံ့ညားထည်ဝါတဲ့မျှော်စင်တွေနဲ့ ကြိုးတံတားရဲ့ပုံရိပ်ကို၊ သင့်မျက်လုံးထဲတွင် ပဲ့တင်နေပါစေ။
ကိုယ်တော်ရှင်ကို ချစ်ပါ
ပထမအချက်မှာ၊ ကိုယ်တော်ရှင်ကို စိတ်နှလုံးအကြွင်းမဲ့ဉာဏ်ရှိသမျှနှင့် ချစ်ရန်ဖြစ်ပါတယ်။
ဒီဖြေကြားမှုတွင်၊ ယေရှုခရစ်တော်ဟာ ဓမ္မဟောင်းကျမ်းရဲ့မြင့်မြတ်တဲ့သွန်သင်ချက်တွေမှာ ထည့်သွင်းထားတဲ့ ပညတ်တရားရဲ့အနှစ်သာရကို ပေါင်းစပ်ထားပါတယ်။ ကိုယ်တော်ရှင်ကိုချစ်ဖို့က သင့်ရဲ့ပင်ကို—စိတ်နှလုံးကို ဦးစွာဗဟိုပြုထားပါတယ်။ ကိုယ်တော်ရှင်က သင်ရဲ့ဆပ်ကပ်မှုအလုံးစုံ—ဖြစ်တဲ့ သင်ရဲ့စိတ်—နဲ့ နောက်ဆုံးတွင်၊ သင်ရဲ့ဉာဏ်ရည်ဉာဏ်စွမ်းဖြစ်တဲ့ သင်ရဲ့ဉာဏ်ရှိသမျှ—နဲ့ အကြွင်းမဲ့ချစ်ရန် တောင်းလျှောက်ထားပါတယ်။ ဘုရားသခင်အတွက် ချစ်ခြင်းမေတ္တာဟာ အကန့်အသတ်မရှိ သို့မဟုတ် အဆုံးမရှိပါဘူး။ ချစ်ခြင်းမေတ္တာဟာ အနန္တနှင့် ထာဝရဖြစ်ပါတယ်။
ကျွန်တော်အတွက်တော့၊ ပထမကြီးမြတ်သောပညတ်တော်ကို ကျင့်သုံးခြင်းဟာ တစ်ခါတစ်ရံစိတ်ကူးယဉ်ဆန်၊ တုန်လှုပ်စရာတောင်ကောင်းပါတယ်။ ကျေးဇူးတော်ပါပဲ၊ သခင်ယေရှု အခြားပေးခဲ့တဲ့နှုတ်ကပတ်တော်တွေကို ဆင်ခြင်မိတဲ့အခါ၊ ဤပညတ်ကို ပိုပြီးနားလည်သဘောပေါက်လာပါတယ်၊ “ငါ့ကိုချစ်လျှင် ငါ့ပညတ်တို့ကို စောင့်ရှောက်ကြလော့။” အဲ့ဒါကို ကျွန်တော်လုပ်နိုင်ပါတယ်။ ဆုတောင်းခြင်း၊ ကျမ်းစာလေ့လာခြင်းနှင့် ဗိမာန်တော်ဝတ်ပြုခြင်းဆီသို့ ဦးတည်စေတဲ့၊ ကောင်းကင်ဘုံရှင်အဘနဲ့ ယေရှုခရစ်တော်ကို ကျွန်တော်ချစ်နိုင်ပါတယ်။ ဆယ်ဖို့တစ်ဖို့ ပေးခြင်း၊ ဥပုသ်နေ့ကို သန့်ရှင်းအောင်ထားခြင်း၊ သီလနဲ့ပြည့်စုံသော သန့်ရှင်းတဲ့အသက်တာဖြင့် နေထိုင်ခြင်း၊ နာခံမှုရှိခြင်းအားဖြင့် ခမည်းတော်နဲ့ သားတော်ကို ကျွန်တော်တို့ချစ်ကြပါတယ်။
လူငယ်များအတွက်၊ သရော်မဲ့အစား တိုးတက်ရန် ဆိုရှယ်မီဒီယာကို အသုံးပြုခြင်း၊မိမိတို့ရဲ့ စံနှုန်းများကို စိန်ခေါ်စေမယ့်ပါတီ၊ ရုပ်ရှင် သို့မဟုတ် ပွဲမှ ထွက်ခွာခြင်း၊ မြင့်မြတ်သောအရာတို့ကို ရိုသေမှုပြုခြင်းကဲ့သို့သော သေးငယ်သောနေ့စဥ်လုပ်ဆောင်မှုတွေပြုလုပ်ပြီး၊ ပဋိညာဉ်လမ်းကြောင်းပေါ်ရှိ ခြေရာတွေဖြင့်ကိုယ်တော်ရှင်အား ချစ်ခြင်းကိုတိုင်းတာနိုင်ပါတယ်။
ဒီဥပမာကို စဉ်းစားသုံးသပ်ကြည့်ပါ။ အဲ့နေ့က အစာရှောင်တနင်္ဂနွေနေ့ဖြစ်ပါတယ် ဗန့်စ် နဲ့ ကျွန်တော် သေးငယ်ပြီး အညတရ အိမ်လေးရဲ့ တံခါးကို ခေါက်လိုက်ပါတယ်။ ကျွန်တော်တို့နဲ့ အသင်းလူကြီးအဖွဲ့မှ သင်းထောက်လူငယ်တွေက၊ တံခါးပေါက်ကနေ ကြားနိုင်တဲ့ ထူထဲတဲ့ ဂျာမန်လေသံနဲ့ လှိုက်လှိုက်လှဲလှဲ အော်ဟစ်ပြီးခေါ်တဲ့ “ကျေးဇူးပြု၍ ဝင်လာပါ” ဆိုတဲ့ စကားတွေကို မျှော်လင့်ရင်းလာခဲ့ကြပါတယ်။ ညီအစ်မ မြူလာဟာ အသင်းတော်စုထဲက ပြောင်းရွှေ့လာတဲ့ မုဆိုးမတွေထဲက တစ်ယောက်ဖြစ်ပါတယ်။ သူမဟာ ကံကောင်းစွာပဲမျက်မမြင်ဖြစ်နေတဲ့အတွက်၊ တံခါးကို အလွယ်တကူ မဖြေနိုင်ခဲ့ဘူး။ အလင်းရောင်မှိန်ပျပျ အိမ်ထဲကို လှမ်းဝင်လာတဲ့အခါ၊ သူမက ကျွန်တော်တို့ကို ကြင်နာတဲ့မေးခွန်းတွေနဲ့ နှုတ်ဆက်ခဲ့ပါတယ်၊ မင်းတို့နာမည်ဘယ်လိုခေါ်လဲ။ နေကောင်းကြရဲ့လား။ မင်းတို့ ကိုယ်တော်ရှင်ကို ချစ်သလား။ သူမရဲ့ အစာရှောင်အလှူငွေကို လက်ခံရန် လာခဲ့ကြတာပါလို့ ကျွန်တော်တို့ ပြန်ဖြေကြားခဲ့ပါတယ်။ ကျွန်တော်တို့ ငယ်ငယ်ကတည်းက၊ သူမရဲ့ဝင်ငွေနည်းပါးတဲ့အခြေအနေတွေဟာ အလွယ်တကူမြင်သာလာခဲ့ပြီး၊ သူမရဲ့ယုံကြည်ခြင်း အပြည့်နဲ့တုံ့ပြန်မှုက အလွန်ထိမိခဲ့ပါတယ်၊ “ကျွန်မ ဒီမနက်အစောပိုင်းကပဲ ကောင်တာပေါ်မှာ ဆယ်ဖို့တစ်ဖို့ကို တင်ထားခဲ့ပါတယ်။ ကျွန်မရဲ့ အစာရှောင်အလှူငွေကို လှူဒါန်းရခြင်းအတွက် အလွန်ကျေးဇူးတင်မိပါတယ်။ အဲ့ဒါကို စာအိတ်ထဲမှာထည့်ပြီး ကျွန်မရဲ့ အစာရှောင်အလှူငွေပြေစာကို ဖြည့်ပေးဖို့ မင်းတို့ လုပ်ပေးလို့ရမလား။” သူမရဲ့ကိုယ်တော်ကိုချစ်တဲ့ အချစ် သူမအိမ်ကထွက်သွားတိုင်း ကျွန်တော်တို့ရဲ့ယုံကြည်ခြင်းကို မြှင့်တင်ပေးပါတယ်။
ဗင်္ယာမိန်မင်းကြီးဟာ ပထမကြီးမြတ်သောပညတ်ကို လိုက်နာသူများအတွက် ထူးခြားသောတန်ဖိုးတွေကို ကတိပြုခဲ့ပါတယ်။ “ထိုမှတစ်ဖန်၊ ဘုရားသခင်၏ပညတ်တော်များကို စောင့်ထိန်းသောသူတို့၏ ကောင်းချီးခံစား၍၊ ပျော်ရွှင်သောအခြေအနေကိုလည်း သင်တို့ဆင်ခြင်ကြစေကြောင်း ငါအလိုရှိ၏။ … သူတို့သည် အရာရာ၌ … ကောင်းချီးခံစားရကြ၏၊ ထို့အတူ၊ သူတို့သည် အဆုံးတိုင်အောင် ဆက်၍သစ္စာရှိလျှင်၊ ကောင်းကင်ဘုံထဲသို့ ဝင်ခွင့်ရ၍၊ … အဘယ်တော့မျှအဆုံးမရှိသော ပျော်ရွှင်ခြင်းအခြေအနေ၌ အတူနေထိုင်နိုင်ကြ၏။”
ကိုယ်တော်ရှင်ကိုချစ်ခြင်းက ထာဝရပျော်ရွှင်မှုကို ဖြစ်စေပါတယ်။
ကိုယ်နှင့်စပ်ဆိုင်သောသူတွေကို ချစ်ပါ
ထို့နောက် သခင်ယေရှု ဟောပြောခဲ့ပါတယ်၊ “ထိုမှတပါး ကိုယ်နှင့်စပ်ဆိုင်သောသူကို ကိုယ်နှင့်အမျှ ချစ်လော့ဟူသော ဒုတိယကပညတ်သည် ပဌမ ပညတ်နှင့် သဘောတူ၏။” ဒါက တံတားရဲ့ ဒုတိယမျှော်စင်ပါ။
ဒီနေရာတွင် သခင်ယေရှုက ကိုယ်တော်ရှင်ကိုချစ်ရန်ဆိုတဲ့၊ ကျွန်တော်တို့ရဲ့ကောင်းကင်ဘုံယံကို မျှော်ကြည့်တဲ့အမြင်ကို၊ ကျွန်တော်တို့နားကအမျိုးသား အမျိုးသမီးတွေကို ချစ်ရန်ဆိုတဲ့၊ ကျွန်တော်တို့ရဲ့လောကီရေးရာအပြင်ပန်းအမြင်နဲ့ ပေါင်းကူးထားပါတယ်။ တစ်ခုက အခြားတစ်ခုကို မှီခိုနေပါတယ်။ ကိုယ်နှင့်စပ်ဆိုင်သောသူတွေကို လျစ်လျူရှုထားရင် ကိုယ်တော်ရှင်ရဲ့ ချစ်ခြင်းမေတ္တာက ပြီးပြည့်စုံမှာ မဟုတ်တော့ပါဘူး။ ဤတခြားသူများအပေါ်ချစ်ခြင်းမှာ ကျား၊ မ၊ လူမှုရေး၊ လူမျိုး၊ လိင်၊ ဝင်ငွေ၊ အသက်၊ သို့မဟုတ် ဓလေ့တို့နဲ့ မသက်ဆိုင်ဘဲ ဘုရားသခင်ရဲ့သားသမီးများအားလုံး ပါဝင်ပါတယ်။ ကျွန်တော်တို့ဟာ “ခပ်သိမ်းသောသူတို့သည် ဘုရားသခင်အဖို့ အတူတူပင်ဖြစ်” တာကြောင့် နာကျင်ကြေကွဲသူတွေ၊ ဖယ်ကျဉ်ခံရသူတွေကို ကျွန်တော်တို့ ရှာဖွေကြပါတယ်။ ကျွန်တော်တို့ဟာ “အားနည်းသောသူတို့ကို မစ ကြ၊ တွဲလွဲနေသောလက်တို့ကို မြှောက်ပေးကြ၊ အားနည်းသောဒူးတို့ကို ခွန်းအားဖြည့်ပေးကြပါတယ်။”
ဒီဥပမာကို စဉ်းစားဆင်ခြင်ကြည့်ပါ၊ ညီအစ်ကို အီဗန်ဟာ သူ့ကားကိုရပ်ဖို့လှုံ့ဆော်ခံရပြီး အမည်မသိမိသားစုရဲ့တံခါးကို ခေါက်ခိုင်းတဲ့အခါ အံ့အားသင့်သွားခဲ့ပါတယ်။ ကလေးဆယ်ယောက်ရဲ့မုဆိုးမမိခင်တစ်ယောက်က တံခါးလာဖွင့်တဲ့အခါ၊ သူတို့ရဲ့ခက်ခဲတဲ့အခြေအနေတွေနဲ့ ကြီးမားတဲ့လိုအပ်ချက်တွေကို သူ့အတွက် အလွယ်တကူမြင်သာလာခဲ့ပါတယ်။ ပထမလိုအပ်ချက်ကတော့ ရိုးရိုးရှင်းရှင်းပါပဲ၊ သူတို့အိမ်ကိုဆေးသုတ်ပေးဖို့ဖြစ်ပါတယ်၊ အဲ့ဒီနောက် နှစ်ပေါင်းများစွာ လောကီရေးရာနဲ့ ဝိညာဉ်ရေးရာ အမှုတော်ဆောင်ပေးခဲ့ပါတယ်။
ကျေးဇူးအပြည့်နဲ့မိခင်ဟာ နောက်ပိုင်းတွင် သူရဲ့ကောင်းကင်ဘုံမှ စေလွှတ်သောသူငယ်ချင်းအကြောင်း ဤသို့ရေးသားခဲ့ပါတယ်၊ “မင်းဟာ ငါတို့လိုအချို့တဲ့ဆုံးသူတွေကိုလက်ကမ်းပေးပြီးမင်းဘဝကိုဖြတ်သန်းခဲ့တယ်။ သင်နဲ့ ကိုယ်တော်ပဲ သိတဲ့သူတွေအတွက် ငွေကြေးနဲ့ ဝိညာဉ်ရေးရာအရ သင်လုပ်ဆောင်ခဲ့တဲ့ ကောင်းမှုတွေအတွက် သင့်ကိုကျေးဇူးတင်ကြောင်း ကိုယ်တော်ဘယ်လိုဖော်ပြမလဲဆိုတာ ကျွန်မကြားချင်လိုက်တာရှင်။ နည်းလမ်းများစွာဖြင့် ကျွန်မတို့ကို ကောင်းချီးပေးတဲ့အတွက်၊ … သင်ဆက်သွယ်ပေးခဲ့တဲ့ သာသနာပြုတွေအတွက် ကျေးဇူးတင်ပါတယ်။ … ကိုယ်တော်ရှင်က သင့်ကို အထူးသီးသန့်ရွေးချယ်ခဲ့တာလား၊ ဒါမှမဟုတ် သင်က နားထောင်သူတစ်ယောက်ပဲလားလို့ ကျွန်မ မကြာခဏ သိချင်မိပါတယ်။”
ကိုယ်နဲ့စပ်ဆိုင်သောသူတွေကို ချစ်ရန်ဆိုတာ ခရစ်တော်ပြုခဲ့သလို ကြင်နာမှုနှင့် ဝန်ဆောင်မှုများ ပါဝင်ပါတယ်။ အာဃာတတွေကို စွန့်လွှတ်၊ ရန်သူတွေကို ခွင့်လွှတ်၊ ကိုယ်နဲ့စပ်ဆိုင်သောသူတွေကို အမှုတော်ဆောင်၍ ကြိုဆိုပြီး၊ သက်ကြီးရွယ်အိုတွေကို သင် ကူညီပေးနိုင်မလားခင်ဗျာ။ ကိုယ်နဲ့စပ်ဆိုင်သောသူတွေအပေါ် ချစ်ခြင်းမေတ္တာမျှော်စင်ကို သင်တည်ဆောက်တဲ့အခါ သင်တို့ တစ်ဦးစီအား စိတ်အားတက်ကြွစေပါလိမ့်မယ်။
ဥက္ကဋ္ဌ ရပ်ဆဲလ် အမ် နယ်လ်ဆင်က အခုလိုသွန်သင်ခဲ့ပါတယ်၊ “အခြားသူများကို အကူအညီပေးခြင်း—မိမိကိုယ်ကို ပို ဂရုစိုက်တာထက် အခြားသူများကို ဂရုစိုက်ရန် တာဝန်သိသိ အားထုတ်ခြင်းဟာ —ကျွန်တော်တို့ရဲ့ပျော်ရွှင်မှုဖြစ်ပါတယ်။ အထူးသဖြင့် … အဲ့လိုလုပ်ပေးဖို့အဆင်မပြေတဲ့အခါတွေနဲ့ ကျွန်တော်တို့လုပ်ပေးနိုင်တဲ့ စက်ဝန်းထဲကကျော်လွန်သွားတဲ့အခါတွေမှာပေါ့။ အဲ့ဒီကြီးမြတ်သောဒုတိယပညတ်နဲ့အတူ အသက်ရှင် နေထိုင်ခြင်းဟာယေရှုခရစ်တော်ရဲ့စစ်မှန်တဲ့တပည့်တော်ဖြစ်လာရန် သော့ချက် ဖြစ်ပါတယ်။”
အပြန်အလှန်မှီခိုမှုတစ်ခု
သခင်ယေရှုက နောက်ထပ်သင်ကြားပေးခဲ့ပါတယ်၊ “ဤပညတ်နှစ်ပါးတို့ကား ပညတ္တိကျမ်းနှင့် အနာဂတ္တိကျမ်း ရှိသမျှတို့၏ အချုပ်အခြာပင်ဖြစ်သတည်းဟု မိန့်တော်မူ၏။” ဒါက အလွန်မှတ်သားစရာကောင်းလှပါတယ်။ ကိုယ်တော်ကိုချစ်ခြင်းနှင့် အချင်းချင်းချစ်ခြင်းကြားတွင် အရေးကြီးသော အပြန်အလှန်မှီခိုမှုတစ်ခုရှိပါတယ်။ ရွှေရောင်ဂိတ်တံတားရဲ့ ဒီဇိုင်းဖန်ရှင်ကို ဆွဲရာတွင်၊ မျှော်စင်နှစ်ခုလုံးဟာ တူညီတဲ့ခိုင်ခံ့မှုရှိပြီး ဆိုင်းထိန်းကြိုးများ၊ လမ်းနဲ့ တံတားဖြတ်ကူးတဲ့ ယာဉ်ကြောတွေရဲ့ အလေးချိန်ကိုလည်း အညီအမျှ ခံနိုင်ရည်ရှိကြရပါတယ်။ ဒီလို အင်ဂျင်နီယာနည်းပညာ အချိုးညီမှုမရှိရင်၊ တံတားဟာ ပြိုကျ၍ ပျက်စီးသွားနိုင်ပါတယ်။ ဘယ် ကြိုးတံတားကိုမဆို တည်ဆောက်ရန် အတွက်၊ ၎င်းမျှော်စင်တွေဟာ ပြီးပြည့်စုံတဲ့ သဟဇာတဖြစ်အောင် လုပ်ဆောင်ရပါတယ်။ အလားတူ၊ ယေရှုခရစ်တော်နောက်လိုက်ရန် ကျွန်တော်တို့ရဲ့စွမ်းရည်ဟာ ပထမနဲ့ဒုတိယပညတ်တော်နှစ်ခုလုံးကို ဟန်ချက်ညီညီ၊ တူညီတဲ့ပေးဆပ်မှုဖြင့် အသက်ရှင်နေထိုင်ရန် ကျွန်တော်တို့ရဲ့ခွန်အားအပေါ် မှာမူတည်ပါတယ်။
ကမ္ဘာပေါ်တွင် တိုးပွားလာသော ငြင်းခုံမှုတွေက၊ ကျွန်တော်တို့ဟာ ဒီအရာကို တစ်ခါတရံ မမြင်နိုင် သို့မဟုတ် မှတ်မိဖို့မေ့သွားတာကို ညွှန်ပြနေပါတယ်။ အချို့သူတွေဟာ ဖြောင့်မတ်မှုနည်းတယ်လို့ သူတို့မြင်ကြသူတွေအပေါ် သည်းခံမှုအနည်းငယ်သာပြပြီး ပညတ်တော်တွေကို စောင့်ထိန်းတာအပေါ်မှာတော့ အလွန်အာရုံစိုက်ကြပါတယ်။ ပဋိညာဉ်အပြင်ဘက်တွင် နေထိုင်ရန်ရွေးချယ်ကြသူများ သို့မဟုတ် ဘယ်ဘာသာရေးတွင်မဆို ပါဝင်ပတ်သက်မှုမှမရှိကြတဲ့ သူတွေကို ချစ်ဖို့က တချို့လူတွေအတွက်ခက်ခဲကြပါတယ်။
တနည်းအားဖြင့်၊ ကျွန်တော်တို့အားလုံးဟာ ဘုရားသခင်ထံမှာ တာဝန်ရှိခြင်းကို အသိအမှတ်မပြုဘဲ အခြားသူတွေကိုချစ်ခြင်းရဲ့အရေးကြီးမှုကို အလေးပေးသူတွေလည်း ရှိပါတယ်။ အချို့က ပကတိသမ္မာတရား ဒါမှမဟုတ် အမှားအမှန် ရှိတယ်ဆိုတဲ့ အယူအဆကို လုံးဝငြင်းဆိုကြပြီး၊ကျွန်တော်တို့အတွက် လိုအပ်တဲ့ တစ်ခုတည်းအရာမှာ အခြားသူများရဲ့ရွေးချယ်မှုများကို အပြည့်အဝ သည်းခံခြင်းနဲ့လက်ခံခြင်းပဲဖြစ်တယ်လို့ ယူဆကြပါတယ်။ ထိုဟန်ချက်မညီမှုတွေဟာ သင်ရဲ့ကိုယ်ပိုင်ဝိညာဉ်ရေးရာတံတားကို ငိုက်ကျပြီး သို့မဟုတ် ပြိုကျတောင်သွားစေနိုင်ပါတယ်။
ဥက္ကဋ္ဌ ဒယ်လင် အိတ်ချ် အုတ်က ဤသို့ဖော်ပြခဲ့ပါတယ်၊ “လူတိုင်းဟာ ကျွန်တော်တို့ရဲ့စပ်ဆိုင်သူတွေဖြစ်ကြောင်း သခင်ယေရှုရဲ့ကောင်းမြတ်တဲ့ရှမာရိပုံဥပမာတွင် သွန်သင်ထားတာကြောင့် လူတိုင်းကိုချစ်ရန် ကျွန်တော်တို့ မိန့်မှာခံထားရပါတယ်။ သို့သော် ဤဒုတိယပညတ်ကို လိုက်နာရန် ကျွန်တော်တို့ရဲ့စိတ်အားထက်သန်မှုတွင်၊ ဘုရားသခင်ကို စိတ်နှလုံးအကြွင်းမဲ့ချစ်ရန်ဆိုတဲ့ ပထမပညတ်ကို မမေ့လျော့သင့်ပါ။”
နိဂုံး
ဒါကြောင့် ကျွန်တော်တို့တစ်ဦးစီအတွက် မေးခွန်းမှာ၊ ဘုရားသခင်နဲ့ ကျွန်တော်တို့နဲ့စပ်ဆိုင်သူတွေကိုချစ်မြတ်နိုးတဲ့ မြင့်မားတဲ့တံတားမျှော်စင်တွေကိုဆောက်လုပ်ခြင်းဆိုတဲ့—ကျွန်တော်တို့ရဲ့ကိုယ်ပိုင်ယုံကြည်ခြင်းနှင့် ပေးဆပ်မှုတံတားကို ဘယ်လိုတည်ဆောက်ကြမလဲခင်ဗျာ။ ဟုတ်ပါပြီ၊ ကျွန်တော်တို့ အစပဲရှိပါသေးတယ်။ ကျွန်တော်တို့ရဲ့ ကနဦးကြိုးပမ်းအားထုတ်မှုတွေဟာ လက်သုတ်ပဝါနောက်ဘက်ရှိ ဆွဲချက်တစ်ခု သို့မဟုတ် ကျွန်တော်တို့တည်ဆောက်ရန်မျှော်လင့်ထားတဲ့ တံတားရဲ့အစပိုင်းအဆင့်အသေးစိတ်ပုံစံတစ်ခုပဲ ရှိပါသေးတယ်။ ၎င်းတွင် ကိုယ်တော်ရဲ့ဧဝံဂေလိတရားကို ပိုမိုနားလည်ဖို့ ရှာဖွေရန် သို့မဟုတ် အခြားသူတွေကို ဝေဖန်ခြင်းလျော့နည်းဖို့ ကတိပြုရန်ဆိုတဲ့ လက်တွေ့ကျသော ပန်းတိုင်အနည်းငယ် ပါဝင်နေနိုင်ပါတယ်။ စတင်ရန် ဘယ်သူမျှ အသက်ငယ်လွန်းသူ သို့မဟုတ် အသက်ကြီးလွန်းသူရယ်လို့ မရှိပါဘူး။
အချိန်ကြာလာတာနဲ့အမျှ၊ ဆုတောင်းမှုနဲ့ အတွေးအခေါ်အပြည့်ရှိတဲ့ အစီအစဥ်တွေနဲ့ မချောမွေ့သေးတဲ့ အကြံဉာဏ်တွေဟာ ပုံပေါ်လာပါမယ်။ လုပ်ဆောင်ချက်အသစ်တွေက အလေ့အကျင့်ဖြစ်လာပါတယ်။ အစပိုင်းမူကြမ်းတွေဟာ မွမ်းမံထားတဲ့ အသေးစိတ်ပုံစံတွေ ဖြစ်လာပါတယ်။ ကျွန်တော်တို့ဟာ ကောင်းကင်ဘုံရှင်အဘနဲ့ သူရဲ့တစ်ပါးတည်းသောသားတော်အတွက် ဒါ့အပြင် ကျွန်တော်တို့နဲ့အတူ အလုပ်လုပ်တဲ့၊ ကစားတဲ့၊ နေထိုင်ကြတဲ့ ညီအစ်ကိုညီအစ်မတွေအတွက်ပါ ပေးဆပ်ထားတဲ့ စိတ်နှလုံးသားတွေနဲ့ ကျွန်တော်တို့ရဲ့ကိုယ်ပိုင်ဝိညာဉ်ရေးရာတံတားကို တည်ဆောက်ကြပါတယ်။
ရှေ့ရက်တွေမှာ၊ သင်ဟာ ကြီးကျယ်ခမ်းနားတဲ့ ကြိုးတံတားကို ဖြတ်ကျော်တဲ့အခါ သို့မဟုတ် မျှော်စင်တွေ မြင့်မားလွန်းတဲ့ပုံကို မြင်တဲ့အခါ၊ ဓမ္မသစ်ကျမ်းတွင် ယေရှုခရစ်တော် ဖော်ပြခဲ့တဲ့၊ ကြီးမြတ်သော ပညတ်တော်နှစ်ခုကို သတိရရန် သင့်ကို ကျွန်တော်ဖိတ်ခေါ်ပါတယ်။ ကိုယ်တော်ရဲ့ လမ်းညွှန်ချက်တွေက ကျွန်တော်တို့အား လှုံ့ဆော်ပေးပါစေ။ ကျွန်တော်တို့ရဲ့စိတ်နှလုံးဟာ ကိုယ်တော်ရှင်ကိုချစ်ရန်၊ နဲ့ အပြင်ဘက်သို့လှည့်၍၊ ကျွန်တော်တို့ရဲ့စပ်ဆိုင်သူတွေကိုချစ်ရန်၊ အမြင့်ဆုံးထားတတ်ပါစေ၊။
ဤအရာက ယေရှုခရစ်တော်၏ နာမတော်အားဖြင့်၊ ကျွန်တော်သက်သေခံသော ကျွန်တော်တို့ရဲ့ယေရှုခရစ်တော်၌ ယုံကြည်ခြင်းနဲ့ သူ၏အပြစ်ဖြေခြင်းကို၊ ခိုင်ခံ့အားဖြည့်ပါစေ၊ အာမင်။