Iriiran Kristo
Ngkai ngaira taaan iriira Kristo, ti reirei man kakoaua iroun Iesu Kristo, ara Banna ni Katoto ae Kororaoi. Ngaia are ti riai n iriiria man katinanikuan te kakauntaeka.
N te ririki aio ao mirion aika a kairaki man bairean kamatebwaian te euangkerio man ana kakao te Tia Kamaiu Nakomai, iriirai.” Iriiran Kristo bon tiaki te kabwarabae ke te taina n tai. Bon te motinnano ae reitinako ao te katei ae na kairiira n taainako ao n taabo nako. Ana reirei ao Ana katooto bon ngaia are e kaota te kawai ibukiia taan iriira Iesu Kristo. Ao a kaoaki aomata ni kabane nakon te kawai aei, bwa E kaoiia aomata ni kabane nakoina, “ae bwatabwata ke ae mainaina, te toro ke ae inaomata, te mwaane ke te aine; … ao titebo aroia ni kabane imatan te Atua.”
I.
Te moan mwaneka n iriiran Kristo bon te ongeaba nakon are kabwarabwara bwa “te tua ae moan te kakannato ibuakon taian tua”:
“Ko na tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea.
“Mooa te tua aei, ao e korakora.
“Ao ai aron naba are te kauoua, are kangai, Ko na tangira raom n ai aron tangiram i bon iroum.
“E bane te tua ma aia taeka burabeti nako n tauraki n tuua aika uoua aikai.”
Ana tua te Atua boni ngaia are bweena ao ni kabaeranta aron maiura. Arora n te maiu aio aiaron te ataeinimwaane ma tamana ngke a kakiba aia utuao n te bong ae angang. Ngke e tabe n keerake rietan te utuao, te ang boni ngaia are e katika roon te utuao are e taua te ataeinimwane ibukin matoan te ang. E tuai mwaatai ni matoan te ang, ngaia are e tuatua bwa e na koreaki bwa e aonga n kibarake riki te utuao. E aki kariaia tamana are wanawana, ao e kabwarabwara bwa te roobu boni ngaia are e kamanoa te utuao man matoan te ang. Ngkana ti kaaki te roobu, ao e na bon aki kibarake riki te utuao. E na uotaki nako n te ang ao e na bwaka nako aontano.
Te roobu are kakawaki anne boni ngaia are e tei ibukin te berita aika a tabu are e reitira ma te Atua, Tamara are i Karawa, ao Natina, Iesu Kristo. Ngkana ti kawakin berita akanne man kawakinakin Aia tua ao iriiran Aia babaire ni kamaiu, Aia berita boni ngaia are e na uotira rake nakon rietan te tiretio.
E aki toki n tataekinaki n Ana Boki Moomon bwa Kristo bon “ootan te aonaba.” Inanon kaotina nakoia Nibwaite, E kabwarabwaraa te Uea ae E a mangauti: “I a tia ni katea te banna ni katoto ibukimi.” “Ngai te oota are kam na taua i eta—are te bwai are kam a tia n noorai bwa I karaoia.” Boni Ngaia te banna ni katoto. Ti reirei are E a tia n taekinna ao ni karaoia man kamatebwaian koroboki aika tabu ao iriiran aia reirei burabeti, n aron are e kaumakira Beretitenti Russell M. Nelson bwa ti na karaoia. N te otenanti n te toa, ti berita ni katoa Tabati bwa ti na “aki toki n ururingnga mani kawakin ana tua nako.”
II.
N Ana Boki Moomon, E anga aan te waaki te Uea n te bwai are e aranna bwa “ana reirei Kristo.” Baikai bon te onimaki iroun Iesu Kristo, te rairannano, te bwabetito, karekean ana bwaintituaraoi te Tamnei ae Raoiroi, te teimatoa ni karokoa te toki, ao te riki n aiaron te ataei, are nanona onimakinan te Uea ao kakoroan nanon are E tangiria mairoura.
Uaekaki ana tua te Uea: ae akea tokin taina, n aron ana reirei Kristo, ao ae totoki taina. Tuua aika a babane taia boni ngaai ake a kakaawaki ibukin kainnanon ana Ekaretia te Uea ke kainnanoia taan onimaki n taai aika a totoki taia, ma e kona n katukaki ngkana e toki kainnanoana. Teuana te katoto iaon taian tuua aika a totoki taia bon ana kaetieti te Uea nakoia taan kairiri n te Ekaretia rimoa bwa a na kamwaingaki Aika Itiaki mai New York nako Ohio, nako Missouri, nako Illinois, ao te kabanea kairakin mwanangaia bwaeoniia nakon te Intermountain West. E boni ngae ngke e totoki taia, a riai ni kawakinaki ngkai tuua aikai a tuai toki taia.
Tabeua tuua aika aki totoki taiia a kabanea te tai ae abwabwaki kawakinakiia n te aro ae tabwanin. Te katoto, ana reirei ae rangi ni kinaaki Beretitenti Lorenzo Snow iaon te kabwianibwai bon te tua ae e a kaman roko ma e a tibwa kawakinaki irouia kaain te Ekaretia. E kainnanoa manga katuruturuana ni kanoan te tai are e kaitaraa te Ekaretia ao kaaina. Te katoto ae ai tibwa ngkai iaon manga katuruturuan tuua e bon riai ibukin kanoan te tai ngkai are a kaitaraa Aomata Aika Itiaiki ni Boong aika Kaitira ke te Ekaretia. Tuua aikai bon te katanoata ibukin te utu are e uotakirakeaki iroun Beretitenti Gordon B. Hinckley n te roro ae imwain aei, ao ana kakao Beretitenti Russell M. Nelson ibukin aran te Ekaretia are e a tia ni kaokaki, Ana Ekaretia Iesu Kristo ibukiia Aika Itiaki ni Boong aika Kaitira.
III.
Teuana naba ana reirei te Tia Kamaiu ae taraa n kainnanoa manga katuruturuana ni kanoan te tai ni boong aikai.
Aio te tai are e bati iai taeka aika a kakang ao a kammaraki n te reitaki ma aomata ao n tabetai inanon ara utu. Te aki boraoi n iango ae kiraati n tuua aika a onoti nakon te aono boni ngaia ae karika te mwakuri n riribai—ao tao bon te kairiribai—inanon reitakira ma aomata ao ara utu. Te waaki ni kakaitara aio boni ngaia are e kamwauka te waaki ibukin te karaotua iaon bwaai aika a kakawaki ike a noria iai kaain te aba bwa iai te kainnano ae kataweaki kibarana ibukin kainnanon te botanaomata.
Tera ae a riai n reirei ao ni karaoia taan iriira Kristo n te aeka n tai aio ike e bati iai te reitaki ae aki karinerine? Tera Ana reirei ao Ana katoto?
E onoti ae ibuakon moan tuua ake E reirei Iesu ngke E kaoti nakoia Nibwaite bon totokoan te kakauntaeka. Ngke E reirei aio n reitaki ma te kaiangatoa ibukin koaua n taian aro, oin bukina are E anga e bon uaana naba nakon te kakarabakau ao te reitaki n te waaki n tautaeka, tuua aika a onoti nakon te aono, ao te reitaki n te utu. E reirei Iesu:
“Bwa ane iai irouna tamnein te kakauntaeka ao bon tiaki mai irou, ma bon mai iroun te riaboro, are taman te kakauntaeka, ao e kakiriweei nanoia aomata bwa a na itabaraaraa, i marenaia.
“Nooria, bon tiaki au reirei, bwa N na kakiriweei nanoia aomata bwa a na un, i marenaia; ma bon aio au reirei bwa a na riai ni kakeaaki bwaai aikai.”
N rarabanen Ana tai ni mwakuri ibuakoia Nibwaite, E reirei Iesu tuua ake a irekereke ma katabuakan te kakauntaeka. Ti ataia ma te baibara bwa E a tia n reirei tuua aikai mai mwaina n Ana Reirei iaon te Maunga, ao n angiin te tai n te taetae ae titebo ma are E kabongana nakoia Nibwaite. N na taekin aeka n taetae n te Baibara aikai:
“Kam na tangiriia ami kairiribai, ao tataro i bukiia akana bainikiriningkami, karaoa ae raoiroi nakoia akana ribaingkami, ao tataro i bukiia akana a karaoa ae buakaka nakoimi ao ni bwainikiriningkami,.”
Aio teuana ana tua Kristo ae rangi n ataaki—e boou man korakora ao e matoatoa iriirana. Ma bon mwakoron aan Ana kakao ae kakawaki nakoia aomata nako bwa a na iriiria. N aron are e reirei Beretitenti David O. McKay, “Akea te kawai ae tamaroa riki ibukin kaotan tangiran te Atua nakon kaotan te tangira ae itiaki nakon are kaain rarikim.”
Aio naba teuana ana reirei Teuare ara banna ni katoto: “A kabwaia taan raoi: bwa a na atongaki bwa natin te Atua.”
Taan raoi! Tera te bitaki nakon reitakim ma am utu ngkana arona bwa taan iriira Kristo a aki kabonganai taeka aika kakang man kammaraki n aia kakarabakau.
Beretitenti Russell M. Nelson n te maungatabu ni kabuta n te ririki ae nako e anganiira kakaewenako aikai:
“Teuana te kawai ae moan te bebete ni kina te tia irira raoi Iesu Kristo bon aron te aomata anne n tabeakiniia aomata ake tabeman. …
“… Ana reirei ni koaua Iesu Kristo bon taan karekea te raoi.
“… Teuana te kawai ae moan te tamaroa ae ti kona iai ni karinea te Tia Kamaiu bon te riki bwa te tia karaoa te raoi. ”
Ni kainan ana reirei: “Te itabaraaraa bon te rinerine. Karekean te rau bon te rinerine. Iai inaomatam n rinea te kakauntaeka ke te raoi. I kaumaki ngkami n rineia n riki bwa te tia karika te raoi, ngkai ao n taainako.”
Koraki ake aki boraoi ni iango a riai ni waaki ni marooro man katebenakoan iango aika a boraoi iai.
Iriiran Ara Banna ni Katoto ae Kororaoi ao Ana burabeti, ti riai n maiuakina te bwai ae aranaki bwa te Tua ni Koora: “Bwaai ni kabane ake ko tangiria aomata bwa a na karaoia nakoimi, ao karaoia naba nakoia, bwa aio te tua ao aia taeka burabeti.” Ti riai n tangiriia ao ni karaoa ae raoiroi nakoia aomata ni kabane. Ti riai n totokoa te kakauntaeka ao n riki bwa taan raoi n ara reitaki. Tiaki nanona bwa ti nang kaaki kateira ao baika a moanibwai iroura ma ti na katoka te wikakang n buakaniia aomata ibukin aroia. Anne ae karaoia Ara Banna ni Katoto ae Kororaoi n Ana mwakuri iaon te aba. Anne te banna ae E kateia ibukira ao E kaoira bwa ti na Iriiria.
N te maungatabu aio aua te ririki n nako, E anganira te kakaewenako Beretitenti Nelson ibukin ara bong:
“Ko bon tauraoi ni kariaia te Atua bwa boton am iango inanon maium? Ko bon tauraoi ni kariaia te Atua bwa te kabanea n anainano ae moan te kakawaki inanon maium? Ko kariaia Ana taeka, Ana tua, ao Ana berita bwa e na anainanomi ni baike kam karaoi ni katoa bong? Ko kona ni kariaia bwanaana bwa te moanibwai iaon bwaai riki tabeua?”
Ngkai ngaira taaan iriira Kristo, ti reirei man kakoaua iroun Iesu Kristo, ara Banna ni Katoto ae Kororaoi. Ngaia are ti riai n iriiria man katinanikuan te kakauntaeka. Ngkai ti waaki n boutoka kainibaire ibukin te botanaomata, ke ti karekei Ana kakabwaia man kabonganaan ana taetae ao ana kawai te tia raoi. N ara utu ao reitakira ma aomata, ti riai n totokoi baika a kakang man riribai. Ti a ukoukora ae tabu, n aron ara Tia Kamaiu, n arana are I kakoaua ao n taboa Ana kakabwaia bwa e na buokiira n riki bwa Aika Itiaki. N aran Iesu Kristo, amen.