Maungatabu ni Kabuta
Teuare E Taetae ma Iehova
Maungatabu ni Kabuta Okitobwa 2024
11:8

Teuare E Taetae ma Iehova

Iroun Unimwaane Kyle S. McKay

Man te Itingaun

E “kakabwaiaaki ni kauka kabanean koron bongina,” Iotebwa Timiti ao tia kakabwaiaki naba n te bwai ae karaoia.

Oin au kantaninga n te bong aei ao n tainako bon kakoauan Iesu Kristo, bwa Ngaia Natin te Atua, te Tia Karikibwai ao te Tia Kamaiua te aonaaba, te tia Kainaomataira ao te Tia Kabooira. Ibukina bwa “aan taian reirei n ara aro bon aia kakoaua abotoro ao burabeti, ibukin Iesu Kristo,” n te bong aei I tibwaa au atatai ma ngkami ao au koaua iroun te Tia Kamaiu ngkai a tia ni kakorakoraaki ao n nene ni maiuia ao aia reirei man teuana te king n abotoro ao n burabeti.

Moan waakin Tuan te Mauri

N te moaningabong ae tamaroa n te tiburing n 1820, Iotebwa Timiti ae 14 ana ririki e nakon te buakonikai ae uakaan ma mweengaia ana utu bwa e na tataro ibukin ana bure ao ni bubuti bwa te ekaretia raa ae e na kainna. Ana tataro are e nako mai i nanona, ae kanakoaki ma te onimaki ae korakora, e noraki iroun temanna ae korakora mwakana iaon te aonaaba, n ikotaki ma te Tama ao Natina. Ao te riaboro. Mai irouia n tatabemaniia iai nanoia ae korakora n te tataro anne ao iroun te ataeinimwaane anne.

Are ti aranna n taai aikai bwa te Moan Mii ni Burabeti e mwakena moan waakin Kaokan Bwaai ni kabane ni kabanean koron bongina aei. Ma iroun Iotebwa, te taneiai e bon onoti ibukina ao te katauraoi. Te bwai ae e ti tangiria bon kabwaraan ana bure ao te kairi. E anganna te Uea ni kauoua. Te kaetieti bwa “akea teuana [te ekaretia ae e na kainna]” bon te kairiiri. Te taeka, “A kabwaraaki am bure” bon te kamaiuaki.

Man koaua ni kabane aika tamaroa ti kona n reiakinaki man te Moan Mii anne, tao tibwangan Iotebwa are moan karekea e beebete, “I a tia ni kunea bwa ana kakoaua Iakobo bwa e koaua—bwa te aomata are akea te rabakau irouna e na bubutia te Atua, ao e na karekea.”

E taekinna temanna te tia rabakau: “Te rongorongo ae moan te kakaawaki n te Moan Mii ni burabeti ni boong aikai bon ataakin aron te Atua n anga nakoia ake akea aia atatai. … Te Atua are e kaotia nakon Iotebwa Timiti n te buakonikai ae Tabu bon te Atua are e kaeka nakoia kairake i nanon te kangaanga.”

Ana taneiai Iotebwa n te buakonikai e anganna te mweengaraoi ni bubuti ibukin kabwaraakin ana bure ao kairakina ibukin maiuna ni kabane. Ana taneiai e a tia naba n anga nai te mweengaraoi ni bubuti kabwaraakin au bure ao kairakiu ibukin maiu.

Te Rairannano n Tainako

N Tebetembwa 21, 1823, e kabanea nanona n tataro Iotebwa ibukin kabwaraakin ana bure, te nanomatoa ibukin ana taneiai n te buakonikai teniua te ririki mai i mwaina, e na manga kaeka riki karawa. Ao E bon kaeka. E kanakoa te anera te Uea, Moronaai, bwa e na tuanga Iotebwa Timiti ao ni kaongoa taekan rekooti ake ngkoa ake e na rairi i mwiina man ana bwaintangira ao mwaakan te Atua—ana Boki Moomon.

E kaniia 13 te ririki i mwiina, a katorobubua Iotebwa ao Oliver Cowdery ma nanoia, n tataro ni kainabwabu i nanon te Kirtland Tembora are e a tibwa katabuaki. Ti aki ataia bwa tera are a tataroakinna, ma aia tataro bon te bubuti kabwaraan aia bure, bwa, ngke a teirake, e kaoti te Tia Kamaiu ao e taekinna, “Nooria, a kabwaraaki ami bure; kam a itiaki i matau.”

I nanon namwakaina ma ririki i mwiin te taneiai aei, a manga kaairua naba Iotebwa ao Oliver. Ao ni manga kairua riki. Ma n te tai anne, ibukin te tai anne, ni kaekaan aia bubuti ao n te katauraoi ibukin kaokakin kiing aika mimitong ake a nang riki, e kaitiaki naba aia bure Iesu.

Ni maiun Iotebwa n rairannano n tainako e anganai te mweengaraoi n “aki maaku ni kaania te kaintokanuea, bwa [I] aonga ni karekea te akoaki.” I a tia n ataia bwa Iesu Kristo ni koaua e “bon kakabwarabure.” Bon tiaki Ana mwakuri ke Anuana bwa e na motikitaeka. E roko bwa e na kamaiu.

Titirakinan te Uea

Ni mwakoron te berita ni “kaetani bwaai ni kabane,” te Uea, rinanon Iotebwa Timiti, e karokoa ana Boki Moomon ao kaotioti riki tabeua ake kanoana bwaninin Ana euangkerio. A kaokaki koaua aika a kakaawaki ni kamatataaki ao ni kabwaninaki ngkai Iotebwa e teimatoa n titiraki ibukin kairakina. Iangoi bwaai aikai:

  1. Te Tama ao te Nati iai rabwataia ae a kona n riingaki n aekan te aomata.”

  2. E katoka i aona Iesu tiaki ti ara bure ma aorakira naba, karawawatakiraa, ao mamaarara.

  3. Ana Mwakuri ni Kamaiu e bon rang korakora n te aro are e a wawanako raraana man bwangabwangan kunna.

  4. Rinanon ana akoi are ti kamaiuaki iai i mwiin bwaai ni kabane ake ti kona ni karaoi.”

  5. Iai kainibaire ake a karekea ana nanoanga Kristo.

  6. Ngkai ti nakon Kristo, E na bon aki ti kabwarai ara bure, ma E na bon biti naba nanora, n te aro are akea te nano ni kan karaoa ae buakaka.”

  7. E tuangiia Ana aomata n tainako Kristo bwa a na katei tembora, are e E na kaotia iai nakoia ao n anganiia te mwaaka mai karawa.

I kakoaua bwa a koaua bwaai aikai ao a bon riai. A tei ibukin tii te mwakorona man ae bwanin are e a tia ni kaokaki iroun Iesu Kristo rinanon Iotebwa Timiti ni kaekaan ana bu-bubuti ibukin te kairiiri.

Rikiraken te Abanuea Aei

I nanon 1842, E korei bwaai aika a kamimi Iotebwa ake a na riki n kabanean boong aikai. E taekinna bwa ni boong aikai, “te nakoanibonga mai karawa e na katiteuanaaki ma mwaakan te aonaaba, ni uotii kantaninga aika korakora, ao n anne ti a katiteuanaaki n te mwakuri anne, ni karikirakea abanuean te Atua, Nakoanibongan karawa a bon aki taningaroti.”

E taku Iotebwa nakon raoraona ae Benjamin Johnson, “Benjamin, [ngkana I mate], N [na] aki raroa mairoum, ao ngkana iteran te rabuna are teuana, N [na] teimatoa ni mwakuri ma ngkoe, ma te mwaaka ae korakora ae rikirake, ni karikirakea te abanuea aei.”

N Tuun 27, 1844, a tirikingaki Iotebwa Timiti ma tarina Hyrum. E wene ni motirawa rabwatan Iotebwa, ma e reitinako ana koaua ni kaokiokaki ni katobibia te aonaaba ao i nanou:

“I a tia n noora te kaotioti, I ataia, ao I ataia bwa te Atua e ataia, ao I aki kona ni kakewea.”

“I aki tuangkami bwa I kororaoi; ma akea kairuan te kaotioti are I reireia.”

“Ann koaua n reirein ara aro bon aia kakoaua Abotoro ao Burabeti, ibukin Iesu Kristo, bwa E mate, taunaki, ao e manga uti n te kateniua ni bong, ao e waerake nako karawa; ao bwaai ni kabane ake a irekereke ma ara aro bon ti rongorongona riki tabeua”

Tera te bwai are e taekinaki ibukin Ioane are te Tia Babetito e kona naba n taekinaki ibukin Iotebwa Timiti: “Iai te aomata ae kanakoaki mai Karawa, ae arana [Iotebwa]. … “Tiaki te oota arei teuarei, ma e roko ba te tia kaotioti i bukin te Oota arei,” “bwa a aonga ni bane aomata n onimaki i rouna.”

I kakoauaa. I kakoauaa ma te koaua bwa Iesu bon te Kristo ao Natin te Atua ae maiu. I kakoaua bwa te Atua ae maiu bon Tamara ae tatangira. I ataa aio ibukina bwa bwanaan te Uea e a tia n taekinna nakoiu, ao ai aron naba bwanaan Ana toro, ana abotoro ao burabeti, n raonaki ao ni moan waakinaki iroun Iotebwa Timiti.

I kakoaua bwa Iotebwa Timiti bon ngaia ngkoa ao ngkai ana burabeti te Atua, te tia kakoaua ao ana toro te Uea Iesu Kristo. E “kakabwaiaaki ni kauka kabanean koron bongina,” ao tia kakabwaiaki n te bwai ae karaoia.

E tua te Uea nakon Oliver Cowdery ao ngaira ni kabane, “Boutokaa au tia mwakuri ae Iotebwa, ma te kakaonimaki.” I kakoaua bwa te Uea e tei irarikin Ana toro Iotebwa ao Kaokan Bwaai a kaokaki rinanona.

Ngkai Iotebwa Timiti ai bon mwakoron ngkai te nakoanibonga i karawa are e taekinna. N aron are e berita iai nakon raoraona, e aki raroanako ma ngaira, ao n iteran te rabuna are te iterana, e teimatoa ni mwakuri ma ngaira, ma te mwaaka are korakora e rikirake, ni karabinoa te abanuea aei. Ma te kimwareirei ao te kakaitau, I tabeka bwanaau n neboa teuare e taetae ma Iehova.” Ao i aon aikai ni kabane, e na neboaki Iehova are e taetae ma teuarei! N aran Iesu Kristo, amen.