Koroboki aika Tabu—Aan te Onimaki
Ti riai n aki kamwinibaea kakaawakin koroboki aika tabu n te rairaki ao te teimatoa ni kakaonimaki n te euangkerio.
Kainnabau ae Mary ao Ngai, ti nora te karenano ae mena i moana tamnein te boki ma taekana ae kangai: “Booki: Te Bwai ni Mwakuri ae te Oi ae Tauaki n te Bai.”
I iangoa te mwakoro n taeka aio ao aron kabonganaakin baika ti kona n taua i baira n aekana nako. Inanon au tai n iango, I nooria bwa e bon aki roko bonganan te aeka ni bwai aio ke te aomata ae iai irouna rabakau aika boou ni kakaawakin te kairiri mai karawa are reke ma te kaotioti mai eta.
Ae ti kona n taua i baira ke n ara tareboon, te Baibara ae Tabu ao Ana Boki Moomon: Manga Kakoauan Taekan Iesu Kristo boni ngaai ake a anga te kairiri ae tabu ao te reirei mairoun Iesu Kristo, te Tia Kamaiu n te aonaba aio. A kakaawaki booki aikai iroura bwa a koreaki iai ana kaetieti te Atua nakoia burabeti ake ngkoa ao aomata ao a kakanoa ni kairakin maiura n tatabemanira nako.
Ngkana a ikarekebai ma aia reirei burabeti aika a maiu, ti anganaki koaua ake a na riki bwa kairakin maiura ni bong aikai. A mwakaroiroi koroboki aika tabu ngkana a anga te kaetieti, kaetan aroaro, te rau, ao te karaunano nakon temanna ke utu ake a ukoukora te kairiiri mairoun te Uea.
Ngkana e reitaki koroboki aika tabu ma te kairiri mairoun te Tamnei ae Raoiroi, a teimatoa n riki bwa te moanibwai are e na buoka rairakia naake a “uruaki nanoia ao a raraoma tamneia” ao nanoia ni kan iriira Iesu Kristo. E ibuobuoki koroboki aika tabu ni katea aan te onimaki are e kona n tokanikai iaon ana waaki nako te tia kakaitara ni kamwinibaea te onimaki.
Aomata aika a tibwa rairaki boni ngaai ake a kakabwaiaa mani kamaiua te Ekaretia inanon te roro teuana ma teuana. Iai teuana te katoto ae rangi n onoti irou. Ngke te bitiobi ngai, iai uoman mitinare aika aine ake a reireiniia ana utu William Edward Mussman. Te karo, te rooia ae bwakuaku, bon te rooia n teuana te botaki ni mwakuri ae bubura. Kainnabana ae kakaonimaki, Janet, e buokiia ana utu bwa a na uakina n te riki n “aiaron maiun Kristo.”
Natia te mwane ao te aine, kaka 20 tabun aia ririki, kaain naba te reirei. A reireinaki ao a kakaea te taromauri ataei aika aman aikai. A katuruturua kakaawakin warekan Ana Boki Moomon mitinare ao kakaawakin te tataro ibukin karekean te koaua n te boki ae tabu anne. E kamimi, bwa te utu aei a wareka Ana Boki Moomon inanon te tai ae uarereke.
Mitinaren te uoote, ake a tia ni beku bwa beretitenti n te Botaki n Aine, a raoniia nakon te botaki n toa.
Ngke e a uakaan aia bwabetito, a karekea te koroboki ni kabuakaka ibukin te Ekaretia. E riki aio imwain te intanete, ao e onrake te katibooti n booki aikai.
A reitaki nakoiu mitinare n aine aikai, ngaia te bitiobi ae ai tibwa 34 au ririki bwa n na ibuobuoki ni kaekai titiraki ake a tabekaki. Ngke ti maroro n aia katangaina, e mena booki ni kabuakaka ibukin te Ekaretia i nuukan te katangaina aei. I a tia n rangi n tataromwaaka ibukin tibwangau aio. Ngke e waaki te tataro ni kaukuki, E wirikiriki te Tamnei nakoiu, “Teuanne ea tia n ataia ae koaua.” E kakaawaki aei. A kakoauaa mitinare n aine aikai bwa e a tia n reke aia koaua te utu aio n tatabemaniia. Ma a aki raoi koaua iroun te karo.
I tuangnga naba n te tai arei bwa “E tuangai te Tamnei bwa e a tia n reke ana koaua. E eti anne?” E taraai te karo aei man taku bwa E a tia te Tamnei ni kamatoa koauan Ana Boki Moomon ao te Ekaretia nakoina.
Ao ngkanne I a titiraki bwa ti na kainnanoa warekan beba ni kabuakaka akekei, ngkai a tia ni karekea te kakoaua mairoun te Tamnei?
E kaeka te karo aei bwa e a aki kainnanoaki. A tinea naba ana kaeka ana utu ni kabane.
E taekinna bwa iai ana titiraki ae kakaawaki: Teuana bukina ae a karekei koroboki ni kabuakaka ibukin te Ekaretia bwa bon kaain te aro teuana ngaiia. Irarikin anne, e a tia ni berita ana angabwai ibukin katean te umwantabu n ana aro are mena iai. E tuangai bwa e a tia n reireinaki irouia mitinare kakaawakin te kabwianibwai, ao aio are e butimwaeio ma nanona, ma e titiraki bwa tiaki n ae bure ngkana e aki kakoroa nanon ana berita are e karaoia mai mwaina. I tuangnga bwa e kakan ao e bon eti ana bwakamwane.
Te Mussman ma natiia te mwaane, buun natiia te aine, ao natiia te aine.
A bwabetitoaki ni kabane kaain te utu aio. Teuana te ririki imwina ao e kabaeaki aia utu n te Tembora are i California Oakland. I kakatonga bwa I mena ikekei n aia tai. E bane naba ana reirei natia te mmwane man te kuura n rooia, e bwaati ana ukeuke, ao e beku bwa te mitinare i Tiaban. I noora aia utu te roro teuana ma teuana ake a teimatoa ni kakaonimaki n te euangkerio. I kakatonga bwa I karaoa te mwakuri ni kabaebae ibukin temanna tibuia te aine.
Rairaki aike a riki n bong aikai a bon titebo kakawakia. Tuun ae nako Kouti Andy Reid, te Mataniwi ni Kouti n te Kansas City Chiefs, ao Ngai, n reitaki ma tabeman riki ti tei ibukin ara aro ao aro ake tabeua ni maroro n aia bwabwaro aro are karaoaki n te Ekaretia n Riverside n te kaawa ae Nu Ioki. E katuruturua kakaawakin te kauatai ao kaekan kakao ma tibwanga Kouti Reid , are bon oin ana euangkerio Iesu Kristo. N te ingabong are imwina, n reitaki ma kainnabara,Tammy Reid ao Mary, ti kaea ara botaki n toa n te uoote ae Manhattan Uoua. Bon te botaki ae korakora iai te tamnei. E bati aomata aika a tibwa rairaki ake a mena n te taromauri. Niman ake a tibwa bwabetitoaki, aman mmwaane ao temanna te ataeinimwane, iai ibuakoia are raoniia kaain te Nakoanibonga ae te Aaron ni kabuta te toa. I kukurei ni katanoata bwa tearona naba mwaitia aika a boou ake a rinnako n te Ekaretia ni kabutaa te aonaba.
Ti kakaitau ibukin rikiraken mwaitia ake a kaekai kakao aika a tabu, a bita maiuia, ao a butimwaea te tibwanga n iriira Iesu Kristo. A rinnako ni kawain te berita rinanon te onimaki, te rairannano, te bwabetito, ao te kamatoaki n aron are reiakinaki n te Baibara ao Ana Boki Moomon.
Ti riai n aki kamwinibaea kakaawakin koroboki aika tabu n te rairaki ao te teimatoa ni kakaonimaki n te euangkerio. A ataa taekan ana mition Iesu Kristo burabeti ake ngkoa n Ana Boki Moomon ao a taetaekina Ana Euangkerio. E buokiira Ana Boki Moomon ni kaaniia te Atua inanon reiakinan, kamatebwaian ao mwakurian reirei ake iai. E reirei te Burabeti ae Iotebwa Timiti “te mwaane [ke te aine] e na kaaniaki riki nakon te Atua man maiuakinan baike a taekinaki n [te boki] nakon taian boki riki tabeua”
Karekean te atatai bwa Ana Boki Moomon bon ana taeka te Atua, ti riai n warekia, n iangoa, ao n tataroakinna ao ni maiuakinii reirei ake iai. E berita te burabeti n Ana Boki Moomon bwa E na kaota koauan te boki te Atua nakoira ngkana ti tataro ma te nano ae koaua, ma nanora raoi, ao te onimaki iroun Kristo. E kakaawaki kamatebwaian Ana Boki Moomon ibukin te rairaki ae teimatoa.
Ngkana ti karaua n iangoa te reitaki imarenan te Baibara ao Ana Boki Moomon n aiaron bwaai aika ti kona n taui i baira, ti kona n titiraki. N am iango ao bonganara man waaki raoira boki aika uoua aikai ngkana e tua te Uea bwa ana “bootaki” ao “n riki bwa teuana inanon baim”? Aio are E tua te Uea ibukin “kain Iuta,” te Baibara, ao “kain Iotebwa,” Ana Boki Moomon.
E bati oiniango aika kakaawaki, ike e kawenei raoi koaua Ana Boki Moomon ake a kamatoa ao n reita ake n te Baibara. Te koaua iaon Ana Mwakuri ni Kamaiu Iesu Kristo bon te katooto ae onoti.
E kaota rongorongon ana mwakuri iaon te aba Iesu Kristo te Baibara, n aron Matena ao Mangautina. E teretere riki Ana Mwakuri ni Kamaiu Iesu Kristo n Ana Boki Moomon, te bwai are a katereterea burabeti imwain Matena.
Kabwarabwaran Aramwa mwakoro 42 bon ngaia are e kabwarabwara kakaawakin Ana Mwakuri ni Kamaiu Iesu Kristo.
E warekaki “Te maiu aei bon te tai ni kakatai bwa e aonga te aomata n rairananona man toro iroun te Atua—Te Bwaka e uota te mate n rabwata ao n tamnei i aoia aomata ni kabane—Te Kaboaki e roko rinanon te rairannano—Te Atua n ti Ngaia E karaoa te mwakuri ni kamaiu ibukin buren te aonaba—Te nanoanga bon ibukiia ake a rairinanoia—Ni kabane ake nikiraia a mena i aan ana momotiraoi te Atua—E reke te nanoanga man te Mwakuri ni Kamaiu—Ti ake a bon raraoma ni koaua aika a na kamaiuaki.”
E a tia n taekinna Beretitenti Russell M. Nelson, “Ngkana ko tataromwaaka n kamatebwaia ana Boki Moomon ni katoabong, ko na karaoi babaire aika a tamaroa riki—ni katoabong.” E a tia naba ni berita bwa ngkana “kam kamatebwaia ana Boki Moomon n te bong koraki, kam na kamanoaki man buakakan kanoan te bong.”
N aron are I taekinna, e bwaka nanou n te iango are te moani bwai ae tauaki n te bai—te boki. Ma, I kakoauaa kakaawakin te intanete n te aonaba ni boong aikai. E kona teuana te bwai ae kona n tauaki n te bai n kawakina te rongorongo are n taai ake rimoa ao e kona n kaona te auti n tangoboki. Ti kakaitau ngkai ti maiu inanon te tai aei. I kakaitau naba ngkai a kona n reke booki aika tabu ao bokin te Ekaretia n te tareboon. Te intanete bon te bwai ni mwakuri ae mwakaraoiroi ibukin kamatebwaian te euangkerio. Ni bong aikai, e bati aomata ake a kamatebwaia koroboki aika tabu rinanon te tareboon. Te katoto Book of Mormon app, bon te kawai ae tamaroa are ko kona iai n anga Ana Boki Moomon nakoia raoraom ao e kona n tibwatibwaki n te kawai ae bwainaki ngkai man te tabo are ko mena iai.
E boni ngae ngke e bati te kakabwaia man te intanete; e kananokawaki bwa n aiaron booki ni kabuakaka ibukin te Ekaretia are I kabwarabwarai mai mwaina, e a tia naba ni kabonganaki ni kauekea te nanokokoraki ao ni kamwinibaea te onimaki n reirein te euangkerio. E kona n riki bwa kanoan “buakakan boong aikai” are mwaneweia Beretitenti Nelson.
Te tia kakaitara ao naake a buokia, a ataia ke aki ataia, ae a katoka iaon te intanete bwaai ake titebo ma te bwaoki are e onrake ni koroboki ni kabuakaka ibukin te Ekaretia n aron are I kabwarabwara mai mwaina, are oina bwa ena kamwawako man ana koaua te Atua.
Bwaai ake a tabekaki ni kauekea te nanokokoraki inanon te ririki teuana ma teuana titebo aroia. E teretere aio ngkana ko kabotaua boong aikai ma 1960 tabun, ngke 20 tabun au ririki ni maiu.
Ti reireinaki ni koroboki aika tabu bwa ti na kabonganaa te iango ao te wanawana ni bwaai nako. E kona n riki te intanete n arona ae tamaroa ao ae e urubwai naba.
A riai membwa ake a maan ao ake a boou ake a kamatebwaia te euangkerio n tarai raoi baike a noori. Tai reiti baika a buakaka, akea koauaia, ao baika a aki raoiroi. Ngkana ko reiti taboia, e kona n urua te onimaki ao n tuuka kamaiuakim ana rabakau te tareboon. Ko kona ni rootaki n te aro ae tamaroa ke ae buakaka. Ukoukora te raoiroi ao kararoako man te mamataku ao te kinono ae rotongitong n te intanete. Kaonrakea maium ni baika a raoiroi, iango aika tamaroa, kimwareirei, ao kukurei ma totokoa te nanobaba. Bon iai te okoro. Te katebwi ma teniua n taekan te onimaki bon te bwai ni kairi ae tamaroa. Te bwai ae kakaawaki, kabanea am tai n Ana Boki Moomon, are e karuoa te Tamnei nakon maium ao ni buokiko ni kinaa te koaua ao te kairua.
Au reirei nakoia naake a tia ni kitana kawain te berita n anga aika bati bwa a na okira koroboki aika tabu, kairiri mairouia burabeti, te tataro n utu, ao anenen te aro. A kakaawaki aomata nako imatan te Uea. Ti kainnanoingkami! E kainnanoingkami te Uea, ao kam kainnanoia! Kam butimwaeaki n taainako. Inanon au beku n te Ekaretia inano ririki aika a bati ao I kakaitau ibukiia aomata ake a okira kawain te berita ao a manga beku ao a kakabwaiaia aomata nako n aia utu ke ake a tangiriia ke naake a reitaki ma ngaai.
Koroboki aika tabu ao burabeti aika maiu bon te kawai ike e kawenea iai Ana babaire ni kakukurei Tamara are i Karawa nakoia natina ni kabane.
I kaota au koaua n tabun Iesu Kristo ao koauan Ana Mwakuri ni Kamaiu, n aran Iesu Kristo, amen.