Te Kimwareirei ni Kaboakin Maiura
Ana tangira ao mwaakan Iesu Kristo a kona ni kamanoira man ara kaairuara, mamaarara, ao buure ao ni buokiira n tamaroa riki.
Tao 10 te ririki n nako E unga nanou bwa N na korea bannan te Tia Kamaiu. E ngae ngke te tia korotamnei ngai, e bon tara ni kabwaranano. N na kanga Ngai ni korea bannan Iesu Kristo ae taua Tamneina? I moanna mai iaa? Ao e na iai au tai ae tau iai?
Ao ma au titiraki naba, I baireia bwa N na waakinako ao n onimaki bwa e na buokai te Uea. Ma N na riai ni waaki nako ao ni katukui bwaai aika aki kona ni karaoaki Nakoina. I tataro, iangoia raoi, karaoa au kakae, ao ni korei tamnei, ao I kakabwaiaaki ni kunean te ibuobuoki ao buoka. I tataro, iangoia raoi, kakaea, ao ni koreia, ao I a tia ni kakabwaiaaki ni kunean te bwai ni buoka ao te ibuobuoki.
E aki bebete wakinana. N tabetai e aki roko n taraana are I a tia ni kantaningaia. N tabetai iai taai ae a nakoraoi burati ni been ao taian iango. Ao a mwaiti taai, ae N na riai n manga kataia riki ao ni kataia ao n kataia riki.
Ngke I a taku bwa e a tia raoi te been ao ni mwau, I a katokaa te waaneti i aona ni kamanoa man te baereka. Ngke I karaoa anne, I a nooria bwa te ira n te korobanna e a moanna ni bitaki, ai tiaaki arona, ao n maranako. I ataia n te tai ae waekoa bwa I a tia ni moantaai ni waanetiia, ao mwakoron te korobanna anne e bon mwaimwai naba!
I a kaaoanako mwanangin au been ma te waaneti. O, e rangi n uruaki nanou. Kanga I namakinna bwa I a tia n urua te bwai are e a tia n buokai te Atua ni karaoia. I tang ao n rootaki nanou iai. I nanon te korakai, I karaoa are e na bon karaoia naba temanna are e rinanon ae aron aio: I wetea tinau. E taetae raoi man taku, “E naki okira arona are ko a tia ni karaoia, ma kabanea am tamaroa are ko konaa ngkai.”
Ao I Kanna, iroun Kristin Yee
Ngaia are I a tataro ao ni bubuti te buoka, ao ni been n te tairiki anne ni karaoa mwiin are e rootaki. Ao I uringa taraakin te korobanna n te iangabong are i mwiina—e rangin tamaroa riki nakon are mai i mwaaina. E kanga n riki anne? Bon te kaairua are I a tia ni iangoia n akean manga karaoana e na bon aki oti iai te tai ibukin Ana nanoanga ni baina ae na kaotaki. E tuai tia mairouna aron te korobanna, ao E tuai naba bane arona ma ngai. E kaonaki nanou n te kimwareirei ao te oki n nano. I kamoamoa te Uea n Ana nanoanga, ibukin te kakai aei ae e aki ti kamanoa au korobanna ma e reireia riki taekan Ana tangira ao mwaakana n maiura man ara kaairua, kabwaka, ao buure ao ni buokira n rikirake riki.
N ai aron nanon au kakaaitau ibukin te Tia Kamaiu ngke E e buokai Ana nanoanga n kaoka aron te “bwai ae kangaanga kaokan arona” korobanna, ao ai aron naba au tangira ma au kakaaitau ibukin au Tia Kamaiu ae rikirake ngke I rineia ni mwakuri ma Ngaia ao n kabwaraaki au bure n au kaairua nako. N na teimatoa n kakaitau nakon au Tia Kamaiu ngkai I kona ni bitaki ao ni kaitiakaki. E mena nanou irouna, ao I kantaningaia ni karaoi bwaai ake E tuangai bwa N na karaoia ao riki iai.
Te rairannano e karekea nakoira namakinan ana tangira te Atua ao n ataia ao n Tangiria n aanga ae ti aki kona n ataia. Iroun te aine are e kabira waen te Tia Kamaiu, E taku, A bati a na bure, ma a kabwaraaki; bwa e bati te tangira i rouna; ma ane ti teutana ae kabwaraaki nako ina, ao teutana te tangira i rouna.” E bati n tangira Iesu ibukina bwa E a tia ni kabwaraa ana bure.
Iai te buoka ao te kaantaninga n ataakina bwa ti kona ni manga kataia—bwa, n aron ae reireia Unimwaane David A. Bednar, ti kona ni karekea reitinakon kabwaraan ara bure rinanon mwaakan te Tamnei ae Raoiroi ni kaitiakaki ngkana ti rairi nanora nakoia ni koaua.
Mwakan Iesu Kristo ni kabooa maiura bon teuana mai ibuakon kakabwaia aika a korakora n ara berita aika a tabu. Iangoa raoi aio ngkai ko karaoi mwakurian otenanti aika a tabu. N akeana, ti aki kona n okira mwengara iroun Tamara are i Karawa ao ake ti tangiriia.
I ataia bwa e korakora aron ana kamaiu ara Uea ao ara Tia Kamaiu, Iesu Kristo. N aron Natin te Atua are e mate ibukin ana bure te aonaaba ao ni kawenea oin maiuna ao n manga anaia riki, E taua te mwaaka n te kaboaki ao te mangauti. E a tia ni karekea te maiu ae aki totoki ibukia ni kabane ao te maiu ae akea tokina nakoia ake a rineia. I ataia bwa rinanon Ana mwakuri n angakarea ni kamaiu, ti kona n raira nanora ao ni itiaki ni koaua ao ni kabooaki maiura. Bon te kakai E tangiriko ao n tangirai n te aro aei.
E taku, “Kam aki okirai ngkai, ma n rairinanomi man ami bure, ma n rairaki, bwa I aonga ni kamarurung ngkami?” E kona ni kamaiua taian “tabo aika a uruaki” i nanom—taabo aika a mwau takataka, buakaka, ao n aki kakukurei man te bure ao te rawawata— ao “ [am] rereua bwa kaanga Eten.”
N ai aron ae tiaki kona ni kabotaua korakain ao nanon Kristo i Ketetemwane ao i aon te kaibangaki, ti “aki kona n baairei kabaebae ke nanon” [Ana] kabwarabure,” nanoanga, ao tangira.
Ko kona n namakinna tabetai bwa e aki kona ni karaoaki te kamaiu, bwa tao ko katinanikuaki n ana tangira te Atua ao mwaakan ana kamaiu te Tia Kamaiu n te bwai ae ko rootaki iai ke ibukin ake ko a tia ni karaoi. Ma I kakoaua bwa ko aki katinanikuaki iroun te Toka. E “rinanon bwaai ni kabane” te Tia Kamaiu ao e tatauraoi n arona n tabekiko rake ao n anaiko man te rotongtong ae akea tiana ao n uotiko nako nanon “ootana ae kamimi.” Rinanon Korakaina, E a tia ni karaoa te kawai ibukira n tatabemaniira bwa ti na tokanikai i aon mamaarara ao ara bure. “Iai irouna ni kabane te mwaaka bwa e na kamaiuia aomata ni kabane ake a kakoaua arana ma ni kariki uaa aika a riai ibukin te rairannano.”
N aron ae kainnanoa te mwakuri ao te bubuti ibukin te ibuobuoki mai karawa ni manga kaeta te korotamnei, e kainnanoa te mwakuri, te nano ae korakora, ao te nanorinano n uota “rake te uanikai ibukin te rairannano.” Uanikai aikai ni ikotaki ma kammwakuran ara onimaki ao te onimaki iroun Iesu Kristo ao Ana mwakuri n anga karea ni kamaiu, uotarakean te nano ae e uruaki ao te tamnei ae raraoma, kaotii ao ni kabwarai buure , kaoki aron ake a tia n uruaki nakon ara kabanea n tamaroa, ao n kakorakoraira ni maiuakina te raoiroi.
N rairannano ao ni bitaki ni koaua, ti riai moa n riki bwa taan, “kakoauai burera.” E aki riai te aomata bwa e na nima te bwainaoraki ni karokoa ae a mataata bwa a bon aoraki. E na kona n iai taai ae tao ti aki kukurei n tarai nanora ao nooria bwa tera ae ti kainnanoia ni katokia ao n oneia.
N ana koroboki C.S. Lewis, E katokai taeka aikai Aslan nakon te mwaane are e kakabanea ana tai i aon ana bwai n reitaki: “O, [reeti n aomata], ai wanawanara ngkami ni kamanoi ngkami [man] bwaai ni kabane ake a tamaroa ibukimi!.”
Te tabo raa ae ngkoe ma ngai ti na kamanoira man bwaai ake a na tamaroa nakoira?
Ti na aki kamanoira man te raoiroi are e tangiria te Atua ni kakabwaiara iai. Man te tangira ao te nanoanga are E tangiriira bwa ti na namakinna. Man te oota ao te ataibwai are E tangiria ni katokaa i aora. Man te kamaiu are E e ataia bwa ti rangi ni kainnanoia. Man reitakin te berita ae tabu ae nano are E tangiria ibukia ni kabane natina mwaane ao aine.
I tataro bwa ti na aki manga kabonganai “ara bwai ni buaka” ake ti taui ma nanora ao tiaki naba taui i nanora n kamanoira man ana tangira ni kakabwaia te Atua. Bwaai ni buaka n te kamoamoa—tabe ti irouna, maaku, kairiribai, riaoan tuua, aki raunnano, motikitaeka ae aki raoiroi, bakantang—te bwai ae na kararoaira man tangiran te Atua ma nanora ni kabane ao kawakinan ara berita ni kabane ma Ngaia.
Ngkai ti maiuakina ara berita aika a tabu, e kona n anganiira te buoka ao te korakora te Uea ake ti riai ni kinai ao n tokanikai man mamaarara, ni ikotaki ma tamnein te mannaoraki ni kamoamoa. E taku ara burabeti:
“Te rairannano bon te kawai nakon te itiaki, ao te itiaki e uota te mwaaka.”
“Ao eng, ti rangi ni kainnanoa mwaakana i nanon boong aika i mwaaira.”
N ai aron au korobanna, e aki kitanira te Uea ngkana ti karaoa te kaairua, E aki naba kitaniira ngkana ti mamaara. Kainnanora ibukin te kamaiuaki ao te buoka bon tiaki te rawawata Nakoina, ma bon oin bukina ngkai E roko. E taku te Tia Kamaiu:
Nooria, I roko nakon te aonaba n uota te kabomwi nakon te aonaba, bwa N na kamaiua te aonaba man te bure.”
“E aroraki baiu ae nanoanga nakoimi, ao ane e roko nakoiu ao N na butimwaia; ao a na kakabwaiaki akana a na roko nakoiu.
Ngaia are nakomai—nakomai ngkami ane kam kua, rootaki, ao n rawaawata, nakomai ao kitana am beku ao kunea te rau irouna are e tangiriko riki. Amoa amona i aomi, bwa E nimamanei ao e nanorinano.
E nooriko Tamara are i Karawa ao te Tia Kamaiu. A ataa nanom. A tabe nanoia n are ko tabe nanom iai, ni ikotaki ma ake ko tangiriia.
E kona ni kabooa maiun are e bua te Tia Kamaiu, ni ikotaki ma taian reitaki ake a uruaki man rootaki korakora. E karaoa te kawai ibukiia ni kabane ake a bwaka bwa a na kamaiuaki—ni maiu i nanon are e namakinna bwa e mate ao e bwarannano.
Tai bwarannano ngkana ko korakai n te aro are ko iangoia bwa ko riai n tokanikai i aona ngkai. Taotaona nanom, kawakin am berita aika a tabu, rairannano n taainako, ukora te buoka mairouia am mataniwii ngkana e kainnanoaki, ao nakon ana auti te Uea n angiin te tai ngkana ko konaa. Kakauongo ao ongora wirikiriki are E kanakoa nakoim. E na bon aki kitana Ana reitaki n Ana berita ae tabu ma ngkoe.
A bati reitaki ni maiu aika a matoatoa are I a korakai iai ma n ukora reken te nakoraoi. N tabetai I namakinna bwa kanga I a kabwaka riki nakon are I aki. I iangoia, I bon aki kanakoraoi bwaai n te tai ae nako? I bon aki tokanikai man mamaarau?” I a tia n reiakinna i nanon te tai bwa I bon aki kabwaka; ma, n taainako a mwaiti riki aika a na mwakuriaki ao kamaiu aika a kainnanoaki.
E reirei Unimwaane D. Todd Christofferson: E bon wiingare te Uea nakon temanna are e tangiria n roko nakon te motikitaeka, are e beku n te bong teuana ma teuana n onea mwiin te mamaara ma te korakora. Te rairannano ni koaua, te bitaki ni koaua e kona n kainnanoa kaokiokan kakatai, ma bon iai te bwai ae katamaroaki ao n tabu n te keiakimwaaka. A raanga te kabwarabure ao te kamaiu mai karawa nakon te aomata.”
Te bong nako bon te bong ae boou ae kaonaki n te kaantaninga ao te nakoraoi ibukin Iesu Kristo. Ni katoabong ti kona ngai ao ngkoe n ataia, n aron are e taekinna Tinara Ewa, “te kimwareirei ni kaboakira,” te kimwareirei ni katiteuanaaki, te kimwareirei n namakinan ana tangira te Atua ibukim ae aki bwabwaka.
I ataia bwa e tangiriko Tamara are i Karawa ao te Tia Kamaiu. Iesu Kristo bon te Tia Kamaiu te Tia Kabooi Maiuia aomata nako. E maiu. Rinanon Ana anga karea ni kamaiu, a uruaki kabaean te bure ao te mate bwa ti aonga n inaomata n rinea te kamaiuaki, kaboakin buure, ao te maiu ae akea tokina ma ake ti tangiriia. I kakoauai bwaai aikai n aran Iesu Kristo ae tabu, amen.