E Bebete ana Reirei Iesu Kristo
I kaota au koaua n tabun ana mwakuri n reirei Tamara are i Karawa n reireia natina ana reirei Iesu Kristo ae bebete.
Ngaira ni kabane iai ara utu ake ti bane n tangriia ake a kariiriaki ao ni kataaki man ana mwakuri ni kairoro Tatan ae reitinako, te tia urubwai, are e tangiria ni kakiriweei nanoia natin te Atua. Bwa angiina mai buakora, ti tabeaianga ao n aki mamatu iai n te tairiki. Ti kataia n raonia aomata ake a rootaki n te kangaanga ma waaki ni kairoro ibukin te raraoi. Ti bubuti ma te onnon inanon ara tataro ibukiia. Ti tangiriia. Ti katea te banna ni kakairi ae tamaroa n nakon are ti konaa.
Aramwa, te burabeti ae wanawana n taai ake ngkoa, e kaitara naba ma kangaanga aika ti te arona. Aomata ake e kariia ao n tangiriia ao n angiin te tai a buakanaki iroun aia kairiribai ae iowawa, ma a bon teimatoa ni karikirakeia natiia inanon te raoiroi n te aonaaba ae buakaka. E namakinna Aramwa bwa tii oin te kaantaninga n reken te tokanikai bon te kairoro ae ti aki mwannanoia ao n kabongana n tii tabetai. E bubuti ma te onnon ibukin ana ibuobuoki te Atua.
E ataia Aramwa bwa te anga are a na buokaki iai iroun te Atua, bon kainnanoan te rairannano irouia koraki ake e kairiia, n aroia naba taan kaaitara. Ma, iai ana anga ae e baireia ibukin te nako ni buaka.
E kabwarabwaraaki n Ana Boki Moomon n aron aei, “Ao ngkai, ibukina bwa te taeka ae kabwarabwaraki iai ana konabwai ni kairia aomata bwa a na karaoa ae e eti—eng, bon iai korakoran riki korakorana iaon aia iango aomata nakon te kabaang, ke te bwai riki teuana, are e a tia n riki nakoia—ngaia are Aramwa e iangoia bwa e riai bwa a na kata tamaroan ana taeka te Atua.”
“Ana taeka te Atua bon te reirei ae reiakinaki iroun Iesu Kristo ao irouia Ana burabeti. E ataia Aramwa bwa iai korakoran mwaakan taeka n reirei.
N te 18th ni mwakoro n Reirei ao Berita aika Tabu, E kaota aan te reirei te Uea:
“Bwa nooria I tuangiia aomata ni kabane n taabo nako bwa a na raira nanoia. …
“Bwa, nooria, te Uea te Tia Kaboingkami e mate n te rabwata; mangaia ae e rinanon te maraki ibukiia aomata ni kabane, bwa aonga aomata ni kabane n raira nanoia ao n nakoina.
“Ao e a tia ni manga uti mai buakoia mate, bwa e aonga ni kairia aomata ni kabane nakoina, ngkana a raira nanoia.”
Ao kam na bwaka ni bobaraki n neboa te Tama n arau.
“… Kam riai n raira nanomi ao ni bwabetitoaki, n aran Iesu Kristo.”
“Bubutia te Tama n arau ma te onimaki, ni kakoaua bwa e na reke, ao e na reke iroumi te Tamnei ae Raoiroi ”
Ao ngkai, i mwiin … karekean aio iroumi, kam riai ni kawakini au tua ni bwaai ni kabane.”
“Katoka i aomi aran Kristo, ao taetaekina te koaua ma nanomi raoi.
“Ao ni kabane aika raira nanoia ao ni bwabetitoaki n arau, ae Iesu Kristo, ao n teimatoa ni karokoa te toki, a na bon kamaiuaki.”
Inanon karaki akana tabeua akanne, e anganiira te Tia Kamaiu te banna ni kakairi ae kororaoi bwa ti na kanga n reiakina Ana reirei. Te reirei aei bon te onimaki iroun te Uea Iesu Kristo, rairannano, bwabetitoaki, karekean ana bwaintituaraoi te Tamnei ae Raoiroi, ao n teimatoa n ua te toki e na kakabwaiaia natin te Atua ni kabane.
Ngkai ti reirei tua aikai nakoia naake ti tangiriia, e na buokiira te Tamnei ae Raoiroi n ataa te koaua. Ibukina bwa ti kainnanoa ana wirikiriki te Tamnei ae Raoiroi, ti riai n totokoira man ukeran bwaai bwa tera ae riki ke bon oin ara rairairi are e riaon reiakinan te reirei ae koaua.
Anne e na kona ni kangaanga karaoana nakon te aomata ae ko tangiria are ko kataia n anaa nanona. E na kona n aki mwannanoa te reirei ane e reiakinaki anne teuanne ke neienne. Ti na bae ni kaririiaki bwa ti na ingainga nakon karaoan baika a boou. Ma te Tamnei ae Raoiroi e na kaota tamnein te koaua tii ngkana ti taratara raoi ao ni karaurau n aki riaon reiakinan te reirei ae koaua. Teuana te kawai ibukin kararoaan reiakinakin te reirei ae kewe bon te anga reirei n te aro ae bebete man kai matata. E reke te kamanoaki man te maiu ae bebete, ao e karako ae bua.
E kariaaki bwa te anga reirei bon te moantaai n tibwauai reirei ibukin te kamaiuaki, n te tai are a tuai kona iai n rootaki ara ataei n ana kariiri te tia kamwamwane are a na kaitara mangaia imwiina, imwaain ae a na bua koaua ake a riai n reiakin man bwaai ake anainano man bwaai ni kaongora, aia karinan n roro, ao bon oin korakaia. Ti riai ni butimwaai tibwanga n tibwaua ana reirei Iesu Kristo ma ataei. Anga reirei aika a kakaawaki aikai a karako riki ni kabotauaki nakon te aki bwarannano n totokoi waaki ni kakaaitara. Bwa ni katoa aoa ake ti kabongana ni karina te reirei i nanon maiun te ataei, iai naba aoa ni kakaitara aika aki kona ni warekaki ake a onrake n taian rongorongo ao tamnei ake a katai ke n riaon koaua ni kamaiu akanne.
Tabeman mai buakomi kam bae ni iangoia ngkana e na tamaroa riki ngkana kam kaan riki ma ami ataei ma ngkami rinanon karaoan kakukurei, tao kam na titiraki ngkana a moanna ni kai rootaki ami ataei n ami anga reirei. Irarikin anne, ti riai n iangoia, “Ma ara tai ae uarereke ao e bon karako naba te tibwanga, tera taeka n reirei ae I kona n tibwauaia bwa aonga ni kakorakoraaki inanon kataakin aia onimaki?” Taeka ake ko tibwauai n te bong aei a kona n riki bwa bwaai ake a na uoti bwa aia tianaki, ao e aki okioki kanoan te bong aei.
I rangi ni bwakannanoa aron ana onimaki tibutoru te unnaine ae Mary Bommeli n tibwauaan ana reirei Kristo. E reireinaki ana utu irouia mitinare i Switzerland ngke 24 ana ririki.
I mwiin bwabetitoana, e tangiria Mary ni kan raoniia Aika Itiaki i Amerika, ngaia are e karekea mwanangana mai Switzerland nako Berlin ao e a reke ana mwakuri iroun temanna te aine bwa e na ituui kunnikai ibukiia te utu. E maeka Mary n ana ruu te toro ao e barongai ana mitiin n ituutu i nanon te ruu ni katangaina.
N te tai anne, e bon rangi n taburoroko tataekinan reirein Ana Ekaretia iesu Kristo ibukiia Aika Itiaki ni Boong aika Kaitira i Berlin. Ma e kunea Mary bwa e aki kona n tuukaki man tibwauaan bwaai ake e a tia n reiakinaki iai. Ainen te auti anne e roko ma raoraona ao a ikotaki ni katobibia te mitiin n ituutu bwa a na ongora n ana reirei Mary. E taekina aron tein ao taraakin Tamara are i Karawa ao Iesu Kristo nakon Iotebwa Timiti, rorokoia anera, ao ana Boki Moomon. Uringakin rongorongon Aramwa, e reireia taekan te reirei ibukin te mangauti. E kaota ana koaua bwa utu a kona ni manga ikotaki n te abanuea are te tiretio.
Ingaingan nanon Mary n tibwaua reirein te euangkerio ae kaokaki akea bwa e a riki bwa te kangaanga n te tai ae waekoa. N te tai ae aki maan i mwiina ao e a roko te bureitiman ni katika Mary nakon te matawariki. I nanon kawaia, e a titirakina te bureitiman aran te tia moti are e na tei i matana n te iingabong are i mwiina. E titiraki naba taekaia ana utu ao ngkana tao ngaia te karo ao te buu te mwaane ae raoiroi. E kabwarabwaraaki te tia moti iroun te bureitiman bwa te mwaane ae maiuna te aro n aomata ae aki maiuna te etieti.
I nanon te matawariki, e bubuti Mary te bentira ao te beeba. E kabanea te tairiki anne ni kororeta nakon te tia moti, ni kaota ana koaua ibukin Mangautin Iesu Kristo n aron are e kabwarabwaraaki i nanon ana Boki Moomon, ni maroroakina taekan te aonaaba n tamnei, ao ni kabwarabwara te rairannano. N ana iango neiei ao te tia moti e kainnanoa ana tai n ukebwaia maiuna i mwaain ae kaitara ma te kabanea ni motikitaeka. E koreia bwa e ataia bwa e mwaiti te bwai ae riai n raira nanona mai iai teuanne, ae mwaiti are a na kona n nanokawaki iai ana utu, ao n uota te rawawata ae korakora nakoina. N te moaningabong, ngke e a tia ana reta, e angan te bureitiman ao n tuanga bwa e na nikiria iroun te tia moti, ao e kariaia bwa e na karaoia.
I mwiina, ao e a weteaki te bureitiman iroun te tia moti nakon ana aobiti. Te reta are e koreia Mary bon koaua aika aki kona ni kakeweaki bwa e anga reirei i aon reirein te euangkerio ae kaokaki, ao, ibukin karaoan anne, e urua te tua. E ngae n anne, n te tai ae aki maan i mwiina e a oki te bureitiman nakon ana ruu Mary i nanon te karabuti. E tuanga neiei bwa bukinana ma taian katuuaa a kamaunaaki ao e a inaomata n nako. Ana anga reirei i aon reirein ana euangkerio Iesu Kristo ae kaokaki e a karika katikana ao rinna n te karabuuti. Ao tataekinan te reirei ibukin te rairannano nakon te tia moti e a kainaomata man te karabuuti.
E aki toki ana anga reirei Mary Bommeli n otinakona. Ana taeka n te reirei ae koaua a tauaki mwiia ao ni kawakinaki ibukiia rooro ma rooro ao ake a tuai bungiaki. N ana koaua bwa e ngae ngkana te aomata ngaia ae e a tibwa rairaiki e kona n tataekina ana reirei Iesu Kristo ao ni kakoaua bwa ana kona ni kakorakoraaki kanoana i nanon aia tai ni kataaki.
Ngkai ti karaoa ara kabanea ni kona n reireiniia naake ti tangiriia taekan ana reirei Kristo, tabeman a na teimatoa n aki kaeka. Ana roko iango n nanououa iroum. Ko na bae n titiraki ngkana e bon tau am atatai i aon ana reirei te Tia Kamaiu ibukin tataekinanana n te kawai ae korakora. Ao ngkana ko a tia ni kakataia n anga reirei iai, ko na bae ni mimii bwa e aera akea mwiina ae raoiroi ae kona n nooraki. Tai bwarannano n nanououa akanne. Bubutiia te Atua ibukin ana ibuobuoki.
“Eng, tang nakon te Atua ibukin boutokaam; … taraia bwa ana namakin nanom e mena i aon te Uea n taai nako.”
“Ao ngkai I tangiria bwa kam na nanorinano, ao aantaeka man rau; ni kakai butiaki; n onrake n te taotaonakinnano ma te taonannano i nanon te tai ae maan; n taubaang ni bwaai ni kabane; ma ni botumwaaka ni kaawakin ana tua te Atua n taai nako; ni bubuti ibukin bwaai aika kam kainnanoi, aika bwaai n tamnei ma bwain te rabwata; ma ni karabwarabwa n taai nako nakon te Atua ibukin bwaai ake kam karerekei.”
Ngkana ko tataro, ngkana ko taetae nakon te Atua, ao ngkana ko bubuti ibukin Ana ibuobuoki ibukiia ake ko tangiriia, ao ngkana ko karabwa tiaki tii ibukin buokam ma ibukin te taotaonakinnano ao te nimamannei are e roko man aki karekean baike ko tangiri ni kabane n te tai ae waekoa ke n tao n aki rekena, N na berita nakoim bwa kona kaaniaki riki ma Ngaia. Ko na rikirake n nanomatoa ao n taotaona nanom n te tai ae maan. Ao ngkanne ko na ataia bwa ko a tia ni karaoa am kabanea ni kona ni buokiia naake ko tangiriia ao naake ko tataro ibukiia ni kona ni kaitarai ana kakatai Tatan n kataia n tokanikai iaoia.
“E na manga reke te korakora irouia akana kantaninga Iehova; a na mwemwerake ni baia ni kiba n ai aroia ikare; a na biribiri, ao a na aki kua; a na nakonako, ao a na aki nimamate.”
Ko kona ni kunea te kaantaninga n rongorongoia utu ake a koreaki i nanon koroboki aika tabu. Ti wareka rongorongoia naake a tannako man baike a tia n reiakinaki iai ke koraki ake a korakai ibukin kabwaraan aia bure iroun te Aua, n aron Aramwa te Teei, natin Motiaea mwaane, ao Enoti. N taai ake a mena i nanon te kanganga, a uring aia taeka aia karo, taeka aika a na reirei Iesu Kristo. A kamaiuaki man aia ururing. Am anga reirei i aon te reirei ane e tabu anne e na aki mwanuokinaki.
I kaota au koaua n te mwakuri ae tabu n reireinaia natin Tamara are i Karawa ana reirei ae bebete Iesu Kristo, are e kariaira bwa ti na kaitiakakii n te maiu n tamnei ao n te kabanea ti na butimwaeaki nako matan te Atua, ni maeka ma Ngaia ao Natina n te mimitong ae akea tokina. N aran Iesu Kristo, amen.