O Ngkami Kairake Aika Kam Karineaki
E onimakiningkami te Atua, naati n te berita ae tabu, ni buoka Ana mwakuri n uotiia Natina n okirikaaki Nakoina.
Unimwaane Stevenson, aio te maungatabu ae naaki mwanuokinaki.
A tia ara ataei n rang ni kukurei n te boki ae uarereke ae atunaki Aia Reta ataei nakon te Atua. Aikai tabeua:
“Te Atua ae Tangiraki, irarikin are ko kariaia aomata bwa a na mate ao ni manga bungiaki aika boou, e aera ko aki ti kawakiniia aika maiu ngkai?”
“E kanga ae ti tebwina am tua, ma ara reirei e mirion tuana?”
“E aera ngkai ko karinii nangoan buua ngkana bon bwaai aika ana manga kanakoaki?”
N te bong aei e aki reke te tai ni kaekai titiraki aikai ni kabane, ma iai riki te titiraki ae I aki toki n ongongo mairouia te roronrikirake ae I tangiria ni maroroakinna. Mairoun Ulaanbaatar, Mongolia, nakon Thomas, Idaho, titebo te titiraki: “Bukin tera? Bukin tera a rang ni kaokoro maiuia Aika Itiaki ni Boong aika Kaitira ma aomata?”
I ataia ae e kangaanga bwa ko na kaokoroko—riki ngkai ko kairake ao n rang n tangiria aomata bwa a na tangiriko. A tangiria aomata ni kabane bwa ana ira buakona, ao nanoia anne e na kona n roota maiuiia man kabonganaakin bwaai n reitaki ao mwakuri n aki ako i aon te intanete.
Ngaia ae, ibukin naano aikanne, bukin tera ngkai a rangi ni kaokoro aron maiuia Aika Itiaki ni Boong aika Kaitira? A mwaiti kaeka aika raraoi: Bukina bwa ngkami bon natin te Atua. Bukina bwa ko a tia ni kawakinaki ibukin boong aika kaitira. Bukina bwa ngkoe bon ana reirei Iesu Kristo.
Ma titiraki aikanne aki kaokoroko n tainako. Ngaira ni kabane bon natin te Atua. Ngaira ni kabane aika i aon te aba ngkai ti kanakomaiakaki ni boong aika kaitira. Ma tiaki aomata ni kabane aika a maiuakina Tuan te Mauri ke tuan te itiaki n aron ae ko kataia ni karaoia. A mwaiti ana reirei Kristo aika ninikoria aika tiaki kaain te Ekaretia aei. Ma aki nako ni mitinare ao ni karaoi otenanti n ana auti te Uea ibukiia aia bakatibu n aron ae ko karaoia. E na riai ni mwaiti riki nako iai—ao bon iai.
N te bong aei ao I tangiria ni kabanea au iango i aon bukina are e a tia ni uaana ni maiu. N te 1988, te kairake n Abotoro ae arana Russell M. Nelson e anga ana marooro n te Brigham Young University ae atunaki Ko rabwa ibukin te Berita ae Tabu.” I nanona, ao e kabwarabwara-Unimwaane Nelson bwa ngkana ti kabongana inaomatara n rinerine ni karaoi ao ni kawakin ara berita ma te Atua, ao ti na riki bwa taan bwaibwai n te berita ae e a tia te Atua ni karaoia ma ara bakatibu i nanon boong akanne. E taekina ni manga kaangai, ti riki bwa “naati n te berita ae tabu.” Are e kaokoroira. Are e anganiira te kona ni karekei kakabwaia aika titebo ma ake a tia tibura ni karekei, n raonaki ma te karineaki.
Karineam ni Karimoa! Tao ko a tia n ongo te taeka anne. Ti anenei naba anene ibukina: “O ngkami kairake aika kam karineaki, waaki nako, waaki nako, waaki nako!” Bon te taeka ae kakaongora. Ma tera ae nanonaki iai?
N taai n te O Tetemanti ngkana e mate te karo, natina te mwaane ae te karimoa ngaia are e na tabeakina tinana ma mwanena. A karekei aia bwai tarina ao n nako n toua nako kawaia n te aonaaba, ma te nati te mwaane te karimoa e aki nakon taabo tabeua. E na iein ao ni karekea oin ana utu, ma e na tiku ni maeka ni karokoa tokin maiuna n tautaekan ana bwai tamana. Ibukin karakaan riki tabena, ao e a karakaaki riki kaniwangana ni bwaibwai. Te kairiiri ao tabeakinaia tabeman e rang mwaiti te titiraki iai? Tiaki ngkana ko iangoa rakan te bwaibwai are e anganaki.
N te bong aei ti aki taekina taekan aron bungiakim n am utu n te aonaaba ke tabem ni mwaane ke n aine n te O Tetemanti. Ti taekina taekan te bwaibwai ae ko karekea ngke kam uaia n abaaba ma Kristo ibukin te reitaki n te berita ae tabu are ko a tia n rineia bwa ko na rin ma Ngaia ao Tamam are i Karawa. E rang ni mwaiti te bwai ae kantaningaia te Atua bwa ko na maiuakinna ae kaokoro nakoia Natina ake tabeman bwa ko aonga ni kona ni kairiia ao ni beku ibukiia n ae nakoraoi riki? E aki ngkana ko iangoi kakabwaia—ni bwain te rabwata ao te tamnei—ake kamwa tia n anganaki.
E nanonaki karineam ni bungiakim bwa ko nakoraoi riki nakoia ake tabeman? E aki, ma e nanonaki n ae ko kaantaingaaki bwa ko na buokia ni kanakoraoia ake tabeman. E nanonaki karineam ni bungiakim bwa ko rineaki? Eng, ma ko aki rineaki bwa ko na tautaeka i aoia ake tabeman; ko rineaki bwa ko na buokiia. E kakoaua ana tangira te Atua karineam ni bungiakim? Eng, ma ae kakawaki riki, bon kakoauaan Ana onimaki.
Tangrakim bon te bwai teuana ao te bwai riki teuana bwa ko na onimakinaki. I nanon te kairi Ibukin Kakorakoraia Kairake ti wareka: “E onimakinikoTamam are i Karawa. E a tia n anganiko te kakabwaia aika a tamaroa, n ikotaki ma bwaninin te euangkerio ao otenanti aika tabu ao berita are e kabaeko Nakoina ao ni uota Mwaakana nakon maium. Ma kakabwaia akanne ao a na roko riki rakan tabem. E ataia ae ko kona ni karaoa te bitaki n te aonaaba, ao anne are e kainanoa, n arona aika mwaiti, n riki ni kaokoro man te aonaaba.”
Ara taneiai n te maiu ae mamate e kona ni kabotauaki ma te kaibuke ni bwatintia are e a tia te Atua ni kanakoia iai Natina ni kabane ngkai a mwananga man biken te aba teuana nakon teuana. E kaonaki te mwananga ma taai n reirei, n rikirake, ni kukurei, ao ni waaki nako, ma e onrake naba n taian kangaanga. E tangiriia Natina te Atua ao e tabeaianga n aron maiuia. E aki tangiria ni kabua temanna mai ibuakoia, ngaia ae E kaoia naake iai nanoia n riki bwa kaain Ana tiim—ao anne bon ngkoe. Ibukin am rinerine ni karaoi ao ni kawakin berita aika tabu, E anganiko Ana onimaki. E onimakiniko bwa ko na okoro, kamiimi, ao ni kaokoroaki ibukin te mwakuri ae kakawaki are E onimakiniko iai bwa ko na karaoia.
Iangoia! E onimakiniko te Atua—aomata ni kabane n te aonaaba, ataein te berita ae tabu, Kaain ana tiim—n ibuobuoki n Ana mwakuri ni uotiia Natina ni kabane rikaaki Nakoina. E maroaka ae taekinna Beretitenti Brigham Young n te taina, “Anera ni kabane i karawa a bane n taraia aomata aika ti tabeman aikai.”
Ngkana ko taratara nako iaon te kaibuke ni bwatintia aei, ao ko na kona n noriia aomata n tekateka iaon kaintekateka ni mooi, takakaro inanon katiino, bwaini kunikai aika a kantara iai, mamataku iaon te tareboon n akea tokina, ao ni kabanebuaka aia tai n takakaro ni bwaai aika maiu man te iti. Ma irarikin mimiiu bwa, “Bukin tera I aki kona Ngai ni karaoa anne?” ko kona n uringnga ae tiaki ngkoe te bwatintia. Ngkami bon kaain te tiim. Iai tabemi ae akea irouia bwatintia. N aron are e taekinna Titita Ardeth Kapp n te taina, “Ko aki kona n riki bwa te tia taraa te [maiu] ngkana titebo taraakim ma taan uaua ni kabane ake iaon te bike.”
Ao imwain ae e a roko iroum te bwaranano man taian mwakuri riki ake tabeua, taiaoka n uringnga ae a karekea kaimoa te bwai teuana ae aki karekea bwatintia ake tabeman: te mwane ni kabomwi. N aron ae taku Unimwaane Neil L. Andersen, “Ana manga karekeaki nakoia aika raraoi mwaakan tamneia,” n raonaki ma “kakorakoraan aia koaua, ma kamatoaan nanoia, ao aia onimaki ae korakora riki.” N aron Aberaam n taai ake ngkoa, ko karekea te kukurei ao te rau, karaoiroakiia, ao te atatai ae korakora riki. Kaniwangam tiaki ti te nne ni maeka i karawa ma kawai aika kabwaroaki n te koora. E na rang ni bebete iroun Tamara are i Karawa bwa e na anganiko Ana bwai ni kabane. Nanona bwa e na buokiko n riki ai Arona. Ngai are, e kainnanoa ae mwaiti riki am motinnano anne n aron te bwai ae karaoia te Atua ibukim.
E bon “rang mwaiti tuangan temanna, ma tiaki ti ngkoe temanna”! Ngkami kairake aika kam karineaki. Am reitaki n te berita ae tabu ma te Atua ao Iesu Kristo bon te reitaki iaon te onimaki are ko kona iai ni karekea Aia nanoanga ae moan te korakora—Aia ibuobuoki mai karawa, te entaunmente n te korakora, ao te mwaaka ae korakora. Te mwaaka anne tiaki ti te iango ae karioaki, iango aika nakoraoi, ke taeka ni burabeti aika a na koro bukiia. E bon koaua.
Ngkana ko kakoroi nanon tabem ni karimoa, ko aki kona n tiku n ti ngkoe. Uean te onaroka ni kurebe e mwakuri ma ngkoe. Ko ibuobuoki ni mwakuri ma Iesu Kristo. Ma berita aika tabu n tatabeua nako aika boou—ao ngkana e a rikirake am reitaki ma Ngaia—kam uaia n irabwati ni karokoa ae kama matoa ni konii ngkami. N te kanikina ae tabu n Ana nanoanga anne, ko na kunea te nano ao te korakora ni maiu n aron raoi maiun te Uea—ae kaokoro man te aonaaba. Ko karekea aei bukina bwa e kairiko Iesu Kristo!
Te wareware n te 2 Nibwaai 2:6 e kangai, “Mangaia ae e na reke te kaboaki iroun ao rinanon te Mesia ae Tabu; bwa e onrake n te akoi ao te koaua.” Bukina bwa E onrake n te koaua, E noriko ni bon arom—kabwakam, mamaaram, nanokawaki, ao ni kabane. Bukina bwa e onrake n te akoi, E nooriko n arom are ko kona ni kinaaki iai. E kaitibo ma ngkoe n te tabo are ko mena iai ao e buokiko n rairananom ao ni kanakoraoiko riki, n tokanikai ni kinaaki iai.
“O kairake aika karineaki ni bungiakiia ni karimoa, waaki nako, waaki nako, waaki nako!” I kakoaua bwa kam tangiraki—ao kam onimakinaki—n te bong aei, inanon 20 te ririki, ao n akea tokina. Tai kaboanako karineam ni karimoa ibukin bwaai aika bon akea riki uaaia nakon te amwarake. Tai kabonakoi bwaai ni kabane ibukin bwaai aika akea bonganaia. Tai kariaia te aonaaba bwa e na bitiko ngkai ko bungiaki bwa ko na bita te aonaaba. N aran Iesu Kristo, amen.