I nanon te Maan Ae E Aki Bati te Ririki
Ngkana ti aki kakaonimaki man ongotaeka, ti kona n onea te kaubwai are e reke mairoun te Atua nakon te maraia are e na bita kawaira man kamwaningaira nako man taian koaua ao te maiu n tamnei.
Tariu ao mwaaneu aika kam tangiraki, ngkai I tekateka mai moa mai ikai, I matakuakina te Tienta ni Maungatabu aei ae onrake te niua te tai mwaitina, mai i mwiin te tai are e roko iai te COVID. Bon ana reirei Iesu Kristo ngkami ae kam kakaonimaki ake kam ingainga n reiakinaki. I kakataitau ibukin ami kakaonimaki. Ao I tangiringkami.
E beku Ezra Taft Benson bwa te Beretitenti n Ana Ekaretia Iesu Kristo ibukiia Aika Itiaki ni Boong aika Kaitira inanon Nobembwa 1985 ni karokoa Meei 1994. Bon 33 au ririki ngke e riki Beretitenti Benson bwa te Beretitenti n te Ekaretia ao 42 au ririki ngke e mate. Ao e rangi n ringaki nanou n ana reirei ao ana koaua.
Teuana boton ana reirei Beretitenti Benson bon oin ao kakaawakin Ana Boki Moomon. E aki toki ni katuruturua bwa “Ana Boki Moomon bon kiingin ara ekaretia — kiingin ara kakoaua, kiingin ara reirei, ao kiingin kakoauan ara Uea ao ara Tia Kamaiu.” E katuruturui naba reirei ao kauring iaon te bure ni kainikatonga are noraki ni kakoauaan taekan Iesu Kristo ni boong aika kaitira.
Teuana ana reirei Beretitenti Benson are I rangi n rootaki iai ao n teimatoa ni kairiira au kamatebwai n Ana Boki Moomon. E taku:
“E koreaki Ana Boki Moomon … ibukin boong aikai. A tuai karekea te boki Nibwaite; ke tao Reimwanaite naba n taai ake ngkoa. E koreaki ibukira. E koroboki Moomon n rabanen aia tai te baronga are Nibwaite. Man ana kairiiri te Atua, are E noori bwaai nako man moan bwaai, , e kakimototoi rekooti aika a bati [Moomon], e rinei karaki, marooro, ao waaki ake a na rangi n ibuobuoki nakoira.”
E reitia Beretitenti Benson “A kaota aia koaua taan koroboki n Ana Boki Moomon bwa e koreia ibukiia roro aika a na roko. … Ngkana a noora ara bong, ao n rinei bwaai aika moan baan te kakawaki nakoira, tiaki anne arona ae ti riai iai ni kamatebwaia ana Boki Moomon? Ti na teimatoa n titirakiniira, ‘Bukin tera e kaungaaki nanon Moomon… bwa e na karina [te rongorongo aei] n ana koroboki? Tera te reirei ae I kona ni karekea man [te kauring aio] are e na buokai inanon maiu ni boong aikai?’”
Ti kauringaaki n ana taeka Beretitenti Benson bwa Ana Boki Moomon bon tiaki te rekooti ae ti taraa te tai are ngkoa. Ma, e tarai naba taai aika a na roko te koroboki ae tabu aei ao kanoana bon koaua aika kakaawaki, kauring, ao reirei ake a katauraoaki ibukin aroaro ao kakaewenako ni boong aikai. Ngaia are, Ana Boki Moomon bon te boki ibukin taai aika a na roko ao taai aika ti maiu inanona ngkai ao aika a na roko.
I tataro ibukin ana ibuobuoki te Tamnei are Raoiroi inanon taraakin reireiara man ana boki Ereman n Ana Boki Moomon n te bong aei.
Nibwaite ao Reimwanaite
Rongorongon Ereman ao natina mmwaane bon karakinaia aomata ake a kariariaa bungiakin Iesu Kristo. Kanoan te itera n tienture are e koreaki bon rongorongon rairakiia ao raoiroia Reimwanaite ao buakakaia, bwakaia, ao aia bure Nibwaite.
Mwaitin taian kabootau ao kaokoro imarenaia Nibwaite ma Reimwanaite man te rekooti ni kawai aei moan te uaana ibukira ni boong aikai.
“Mwaitia Reimwanaite a riki bwa aomata aika a raoiroi, n te aro are raoiroia e rianako riki nakon raoiroia Nibwaite, ibukin aia kanene ma matoatoaia n te onimaki.
“[Ao] a bon mwaiti Nibwaite ake a bon matoatoa ma n rawa n rairananoia ma ni korakora buakakaia, n te aro are a bon aki butimwaea ana taeka te Atua ao taian kabwarabwara ma taetae ni burabeti ni kabane ake a roko i buakoia.”
“Ao ngaia are ti a nooria bwa a moanna ni kekerikaki n aia aki onimaki Nibwaite, ma n rikirake n te buakaka ao mwakuri aika bati n ribaki, ao Reimwanaite a moanna ni korakora rikirakeia n ataakin te Atua; eng, a moanna ni waaki ni kaawakin ana kaetieti ma ana tua, ao ma n nakonako i nanon te koaua ao te eti i matana.
“Ao ikai are ti a noora iai Tamnein te Uea bwa e a moanna ni kitania Nibwaite, ibukin buakakaia ao matoatoan nanoia.
“Ao ikai are ti a nooria bwa te Uea e kabwaroa Tamneina i aoia Reimwanaite, ibukin maraun nanoia ao ingaingaia ni kakoaua ana taeka.”
Tao moan kakamatakun ao kakaongoraan bwakaia Nibwaite bwa “aro aika a buakaka aikai a bon reke irouia i nanon te maan ae e aki bati te ririki.”
A Katannako Nibwaite Mairoun te Atua
E kanga ni bitaki te botanaomata ae raoiroi nakon te botanaomata ae matoatoa ma ni korakora buakakaia i nanon te tai ae aki maan? A kanga ni mwaninga aomata taekan te Atua are e bati ana kakabwaia nakoia?
N te aro ae korakora man kakaawaki, buakakaia Nibwaite bon te reirei ae kakaawaki ibukira ni boong aikai.
“Te kainikatonga … are e moanna n rin … inanoia aomata ake a tataekinna bwa a kaaina ana ekaretia te Atua … e riki aio man rianakon korakoran kaubwaia ma nakoraoia i aon te aba.”
“[A] kabanei [nanoia] iaon taian kaubwai ma bwain te aonaba aio ae akea manenaia” “ibukin te kainikatonga are [a] … tia ni kariaia bwa e na [rin] i nanoia, are … e [tabekiia] rake riaon ae raoiroi ibukin korakoraan [aia] kaubwaia aika a korakora!
Ti kaumakaki man bwanaa aika a tia ni mate bwa ti na karekea te reirei aio: te kakabwaia, te kaubwai, ao te aoriori bon te rengarenga ae kamamate are e na kona ni kaira ae raoiroi n nima te boitin are te kainikatonga.
Kariaiakan te kainikatonga bwa e na rin i nanora boni kawain bwainingarean bwaai aika a tabu; aki kakoauan tamnein te taeka ni burabeti ao tamnein te kaotioti, toubekaan i aan waiea ana tua te Atua, kakewei ana taeka te Atua; teweia nako, bwainingareia, ao n taetae ni kaitara te burabeti; ao a mwaninga taekan te Uea ae Atuaia ao “a bon aki tangiria bwa [Atuara], are e [karikira], e na karaoi ma n tautaeka i [aora].”
Ngaia are, ngkana ti aki kakaonimaki man ongotaeka, ti kona n onea te kaubwai are e reke mairoun te Atua nakon te maraia are e na bita kawaira man kamwaningaira nako man taian koaua ao te maiu n tamnei. Ti riai n tarataraira man te anua ni kan kakannato are e reke man te kainikatonga, buren katinean ara konabwai, ao ukoukoran oin nanora ao katinanikuan te ibuobuoki nakoia aomata.
Ngkana ti kabanei nanora ma te kainikatonga, ti rotaki naba n te kamatakiaki n te maiu n tamnei ao n aki noora ae bon tau, ae mwaiti riki, ke tao bon bwaai ni kabane aika i rarikira. Ti aki kona n taraa ke ni kabotoa ara iango iroun Iesu Kristo bwa te “mwaake” ngkana akea te bwai ae ti noria bwa tii ngaira.
Te kamatakiaki n te maiu n tamnei aio bon ngaia ae kona n kairira nako man te raoiroi, bwaka nakon taabo aika taburoroko, ao ni bua. Ngkana ti aki iango ao n “toua oin [kawaira]” ao n toui kawai aika a karuanikai, ti raai nakon onimakinan oin ara ataibwai , ti kamoamoa n oin korakorara, ao ni katan n oin wanawanara.
E koreia ni kakimototoa Tamuera te Reimwanaite tannakoia Nibwaite mairoun te Atua: “Kam kabanei bongin maiumii n ukoukora te bwai ae e aki kona n reke iroumi; ao kam ukoukora te kukurei ma ni karaoan te bure, are bon te bwai ae kaitaraa aron te raoiroi are e mena iroun ara Mataniwi ae kakannato ae Akea Tokina.”
E nooria Moomon, “Angiia aomata a tiku n [teimatoa] n aroia ni kainikatonga ao ni buakaka, ao tabeman a [nakonako] n te aro ae kororaoi i matan te Atua.”
A Rairaki Reimwanaite nakon te Atua
N ana Boki Ereman, korakoran riki raoiroia Reimwanaite bon ngaia are e katerea birimwaakan mamaaraia Nibwaite.
A rairaki Reimwanaite nakon te Atua ao a uotaki nakon ataakin te koaua man kakoauaan reirei man koroboki aika a tabu ao mairouia burabeti, kakorakoraan aia onimaki iroun te Uea are Iesu Kristo, te rairanano man aia bure, ao karekean te bitaki n nano ae korakora.
“Ngaia are, ngkai a mwaiti aika a roko n aei, kam ataia ngkami bwa kam nene ma ni matoatoa i nanon te onimaki, ao n aio are ngaia are kam a kainaomataki iai.”
“Kam na nooria bwa angiia riki [Reimwanaite] a bon nakonako i nanon kawain tabeia, ao a bon nakonako n te aro ni karaurau i matan te Atua, ao a bon kawakina ana tua ma ana kaetieti ao ana motikitaeka. …
“… A bon kataia ma te botumwaaka ae aki bwarannano bwa a na uotiia tariia nakon ataakin te koaua.”
Mwiin aei, bwa “raoiroia [Reimwanaite] a rianako riki nakon raoiroia Nibwaite, ibukin aia kanene ma matoatoaia n te onimaki.”
Te Kauring ao te Berita
E katanoata Moronaai: “Nooria, e a tia te Uea ni kaoti nakoiu bwaai aika a korakora ma ni kamiimi ni kaineti ma te bwai ae e na roko n te tai ae e aki rangi ni maan, n te bong are a na roko iai bwaai aikai i buakomi.
“Nooria, I taetae nakoimi n aron ae aongkoa iai ngkami, ma bon akea ngkami. Ma nooria, Iesu Kristo e a tia ni kaoti ngkami nakoiu, ao I atai ami mwakuri.”
Taiaoka uringnga bwa e na tarai taai aika a na roko Ana Boki Moomon ao kanoana koaua aika a kakaawaki, kauring, ao reirei ake a katauaki ibukiu ao ibukimi i nanon waaki ao kakaewenako n boong aikai.
E kona n riki te Bwaka n uoua karinanna—irouia ae mwaiti ao iroun temanna. N te karinan are e mwaiti aomata, e na bon aki bua rinanon te bwaka ke n anaaki man te aonaba Ana Ekaretia Iesu Kristo ibukiia Aika Itiaki ni Boong aika Kaitira.
E taekinna te Burabeti Iotebwa Timiti: “A tia ni katekeaki Aron te Koaua; akea te bai ae kona ni katoka wakin te mwakuri; … koauan te Atua e na waakirake ni matoatoa, n rine, ao n inaomata, ni karokoa e tokanikai n waakina ni kabanei aaba, ni kawari ni kabane taabo, kaitiaki aaba ni kabane, ao tang inanon taninga ni kabane, ni karokoa ana mwakuri te Atua e na katiaaki, ao Iehova ae korakora e na kangai e a tia te mwakuri.”
Irouia aomata n tatabemaniia, ti riai n “tarataraira man te kamoamoa, bwa [ti] kaawa n riki n aroia Nibwaite ake ngkoa.”
N na katerea bwa ngkana ngkami ke ngai ti korakora man kakaonimaki n totokoa te kainikatonga, tao ti a tia n ewekaki n aorakin te tamnei ae kamamate aio. Ae kananonaaki bwa, ngkana ngkami ke ngai ti aki kakoauaa bwa ti kona n rotaki ke ni karekea te kainikatonga, ao ngkanne ti kai rotaki riki ao e mena n te kanganga tamneira. Inanon te maan ae aki bati te bong, wiiki, namwakaina, ke te ririki, ti na kona ni karekea kabuakin karineakin rikira mai ieta ibukin bwaai aika bon akea riki uaaia nakon te amwarake.
Ma, ngkana, ngkami ke ngai ti kakoauaa bwa e kona n reke iroura te kainikatonga, ti na botumwaaka ni karaoi bwaai aika a uarereke man aki kaangaanga are e na kamanoira man buokiira bwa ti na riki “n aiaron te ataei, n ongeaba, n nimamannei, n nanorinano, n taotaonakinnano, n onrake n te tangira, ao n tauraoi ni butimwaei bwaai ni kabane ake e tangiria te Uea bwa e na karaoi [nakoira].” “A na kakabwaiaki ake a kananorinanoia ma n aki kairoroaki bwa a na nanorinano.”
Ngkana ti ira ana reirei Beretitenti Benson ao n titiraki i bon iroura bwa bukin tera e kairaki Moomon iroun te Uea bwa e na korei kanoan ana boki Ereman, reirei, ao kauring, I berita bwa ti na noora uaan reirei aikai nakon aroaro inanon maiura ao n ara utu n te bong aio. Ngkai ti kamatebwai ao n iangoa te koroboki aio, ti kakabwaiaki n te mata n noraaba, taningami bwa kam aonga n ongo, iango ao kam na oota, nanomi bwa kam aonga n ataia ao reirei aika ti riai n atai n “tarataraira man te kamoamoa, bwa mwiina [ti na] rin n te kaririaki.”
I kakoaua ma te kimwareirei bwa te Atua te Tama ae Akea Tokina bon Tamara. Iesu Kristo bon tii Ana Riki Temanna ao Natin te Atua ae Tangiraki. Ngaia bon ara Tia Kamaiu. Ao I kakoaua bwa ngana ti nakonako ma te nimamannei inanon tamnein te Uea, ti na totokoa ao man tokanikai i aon te kainikatonga ao ni karekea te rau irouna. I kakoaua n aran te Uea Iesu Kristo ae tabu, amen.