Kaaraki nakon te Ekaretia ae Kakimwareirei
Ibukin ana mwkauri ni kamaiu ao ana mition ara Tia Kamaiu, Iesu Kristo, ti konaa—ao n riai—n riki bwa aomata aika rang kimwareirei i aon te aba!
I bwabetitoaki nakon Ana Ekaretia Iesu Kristo ibukiia Aika Itiaki ni Boong aika Kaitira man Tairikin te Bong ni Kiritimati n 1987, e a kaan 37 te ririki ngkai. Anne bon te bong ae rianako i nanon maiu, ao n au mwananga ae akea tokina, ao I rangi ni kakaitau ibukiia rao ake a tia ni katauraoa te kawai ao ni karokoai nakon te ran ni manga bungiaki.
E ngae ngke ko bwabetioaki ngkoananoa ke n ririki aika a nako, ke ko bobootaki i nanon autin te Aro n te uoote ae bubura ke i aan kateitei aika a raunaki, ke tao ko karekea te toa ni kauringaan te Tia Kamaiu n te taetae n Thai ke Swahili, I tangiria n taekina aio nakoim, kaaraki nakon te Ekaretia ae kakimwareirei! Kaaraki nakon te Ekaretia ae kakimwareirei!
Te Ekaretia ae kakimwareirei
Ibukin ana babaire n tangira Tamara are i Karawa ibukiia natina n tatabemaniia, ao ibukin maiuna n kamaiu ao ana mition ara Tia Kamaiu, Iesu Kristo, ti konaa—ao n riai—n riki bwa aomata aika rang kimwareirei i aon te aba! E ngae ngke e taoniira angibuakan te maiu aei n taainako, ti kona ni kanakoraoa te rikirake ao n tiku ma namakinan te kimwareirei ao te rau n nano man ara kaantaninga iroun Kristo ao ootara ni nera i nanon te babaaire ni kakukurei ae tamaroa.
Ana mataniwi n Abotoro te Uea, Beretitenti Russell M. Nelson, e a tia n taekina taekan te kimwareirei are e roko man te maiu ae boboto i aon Iesu Kristo n angiin ana marooro ake e a tia n anga man te tai are e riki iai bwa te Beretitenti n te Ekaretia. E kainna ni katereterea raoi: “E roko te kimwareirei mairouna ao Ibukina. … Ibukiia Aika Itiaki ni Boong Aika Kaitira, Iesu Kristo bon te kimwareirei!”
Ngaira bon kaain Ana Ekaretia Iesu Kristo. Ngaira bon kaain te Ekaretia ae kakimwareirei! Ao e aki reke kimwareireira n taabo riki tabeua n ae rangi n teretere nakon ae ti uaia ni bootaki ni katoa Tabati n ara bootaki n toa n taromauriia are bon boton te kukurei ni kabane! Ti bootaki ikai ma ara utu n te uoote ao mwaanga n bukamarua ana Amwarake n Toa te Uea, ni kainaomatakira man te bure ao te mate, ao mwaakan ana nanoanga te Tia Kamaiu! Ti roko ikai n rinanon te kimwareirei, te kamanoaki, kabwaraan bure, kakaaitau, ao ni kunea kaainakina rinanon Iesu Kristo!
Ae ko kunea aio bon tamnein te kimwareirei i nanon Kiristo? Bon aio ngkai ae ko uotia? Tao ko iangoia bwa akea rekereken aio ma ae ko karaoia, ke tao ko a taneiai bwa aio n taainako aron karaoan bwaai. Ma ti bane ni konaa ni ibuobuoki, n aki taraia bwa rorora ngaira ke tera nakoara, ni karaoa ara bootaki n toa bwa e na kakukurei, e na boboto i aon Kristo, n riki bwa taai ni butimwai, ae kaonaki n tamnein te kimwareirei ni karinerine.
Kimwarerei ni Karinerine
Kimwareirei ni karinerine? Ko na bae n titiraki “E bon riiriki naba anne?. O, eng, e bon ririki! Ti rangi n tangiria, kaota kakanatona , ao n karinea Atuara, ao a kaoti ara karinerine man te nano ae kukurei n ana tangira, nanoanga, ao ana kamaiu Kristo! Te kimwareirei ni karinerine nakon te Uea aei e riai ni kaotaki i nanon ara bootaki n toa aika a tabu.
Ma, irouia aika a mwaiti, nanon te karinerine bon aio: bootan baira ni kamatoa i aon bwabwaara, kabobaraakan atuura, kamakiian matara, ao n aki kakammwakuri—inanon te tai ae maan! E na ibuobuoki te kawai aio n reireiniia ataei aika a uarereke, ma ngkai ti a ikawai ao n reireiaki, ti na taraia bwa te karinerine e riaon riki aio. Ai anne ngkanne arora ngkana e mena i rarikira te Tia Kamaiu? Tiaki, bwa “bon [Ngaia] te kimwareirei ae bati i matam”!
Ma, angiina mai ibuakora te bitaki aio ni waakin te bootaki n toa e na riki.
Irakina ni kabootauaki ma te Nebonebo
Tiaki bootaki n te Tabati bwa ti na ti kaea te bootaki n toa ao e a tia naba. Ti roko ni bootaki n nebonebo. Bon iai te kaokoro ae korakora i marenan akana uoua. Ni iria nanona n roko iai. Ma n nebonebo bon kamoamoaan ao karinean Atuara n te aro ae e bitiira!
I aon te Tabo n Taetae ao irarikiia taan Taromauri
Ngkana ti bootaki ni kauringa te Tia Kamaiu ao te mwakuri ni kamaiu are E a tia ni karaoia, a riai moara ni kaota kimwareireira ao ara kakaaitau! E taekina te karaki n te taina Unimwaane F. Enzio Busche ngke te beretitenti ngaia n te mwaanga ao te ataeinimwaane temanna mai ibuakoia kain te taromauri e tataia ngke e tei i moa ao n titiraki ni kabaibati, “Tera ae karaoia i eta ikanne te mwaane ae ubu n un?” Koraki ake a tekateka mai moa—taan taetae, taan kairiiri, taan kuaea—ao ni kabane kain te taromauri a reitaki i marenaia te “butimwaai nakon te ekaretia aei ae kakukurei” rinanon kaotakina ni moaia!
Anenen Taromauri
N ara tai n anene, ti bootaki n reitaki ni kamoamoa Atuara ao ara Uea, n aki taraia bwa aekakira bwanaara, ke ti tii anenea taekana ni karaurau ke ni bon aki anene? A koreaki n koroboki aika tabu bwa “aia anene naaka a raoiroi bon te tataro nakon te [Atua]” are e kakimwareireia Tamneina. Ngaia are ti na anene! Ao n neboia!
Marooro ao Kakoaua
Ti kabotoa ara marooro ao kakoaua i aon Tamara are i Karawa ao Iesu Kristo ao uaan te nanorinano ni maiuakinan Aia euangkerio, uaana aika a “karewerewe riki nakon bwaai aika a karewerewe.” Ngkanne ti bon “amwarake …ni karokoa [kam] a nuai, bwa [ti] aonga n aki baki, man aki … taka,” ao a bebete uotara, i nanon kimwareirein te Nati.
Te Toa
Oin raoi mimitongin ara bootaki n taromauri bon te kakabwaia ao karekean te toa, te kariki ao te ran ae a tei n onea mwiin ana bwai n tituaraoi ni kamaiu ara Uea ao bon anne oin te bootaki. Aio bon “te tai ae tabu ni kabouan te maiu n tamnei” ngkai ti kakoaua ae boou bwa ti tauraoi ni katoka iaora aran Iesu Kristo ao ni manga kaboua ara berita n ururinga te Tia Kamaiu n tainako ao ni kawakin Ana tua.
N taai i nanon maiura, ti kona n roko n te toa ma rawawatan nanora ao tabeaianga i aora. N tabetai, ti roko n akea karawawatakira man tabeaianga ao kangaanga. Ngke ti kakaauongo ma nanora nakon kakabwaiaan te kariki ao te ran ao n kana ao n nima kanikinaa aika a tabu, ti kona ni katamneia ana anga karea te tia Kamaiu, rawawatana i Ketetemwane, korakaina i aon te kaibangaki, ao taian rawawata ao maraki are e tokanikai iai ibukira. Aio are ngaia ae kabebetei nanora ngkai ti reita rawawatara ma Rawawatana. N tabetai, ti namakinna bwa ti na miimi ma te kaaitau n te kimwareirei ae “tikiraoi man tamaroan” ana bwai n tituaraoi Iesu ae raka are e tia ni karekea i nanon maiura aio ao ae akea tokina! Tina kimwareirei n te bwai are e na manga roko—manga ikotakira ma Tamara ae tangiraki ao Ara Tia Kamaiu ae mangauti.
Tao ti a tia n taneiai bwa waakin te toa bon ti te tekateka n kaintekateka n tii iangoi waaki aika aki riai ake ti karaoi i nanon te wiiki are mai mwaaina. Ti a ibita tein te taneiai anne. N tain te rau, ti kona n iangoi kawai aika a mwaiti ake ti a tia n nooria mairoun te Uea nakoira ma Ana tangira ae kamiimi n te wiiki anne! Ti kona n iangoia bwa tera ae nanonaki n “kunean te kimwareirei n ara rairannano ni katoabong.” Ti konaa ni karabwarabwa ibukin taai are e roko iai te Tia Kamaiu i nanon kainnanora nako ao ara tokanikai ao ngke ti namakina iai Ana nanoanga, kabwarabure, ao te korakora are e anganiira te konaa n tokanikai man karawawatakira ao n uota ara kangaanga ma te taotaonakinnano ao riki te kukurei ae bati.
Eng, ti iangoa te korakai ao te mwakuri ni babakanikawai are e katokaaki i aon ara Tia Kabooi Maiura ibukin ara bure, ao anne ae karika iangoana ae nano. Ma n tabetai ti bae ikekei—n te onaroka, n te kaibangaki, i nanon te ruanimate. Ti kabwaka ni waakirake nakon kimwareirein te ruanimate ae ukinako, te tokanikai i aon te mate, ana tokanikai Kristo i aon bwaai ake a kona n totokoira man karekean te rau ao okiran mwengara i karawa. Tao ti tang n nanokawaki ke rannimatara ni kakaaitau n tain te toa, ke e riki n te kamiimi ae tamaroa n te rongorongo ae raoiroi n ana bwaintituaraoi te Tama ae Natina
Kaaro ma Ataei Aika a Uarereke ke Iai Toaraan Rabwataia
Ngkai, ibukiia kaaro ao ataei aika a uarereke ke iai toaraan rabwataia, bon akea n taainako te bwai ae te tai n rau ao n aki kakarongoa i nanon te toa. Ma n te tai ae uarereke i nanon te wiiki, ko kona n reirei man katooton te tangira, kakaaitau, ao te kimwareirei are ko namakinna ibukin ao mairoun te Tia Kamaiu n am tai n tararuaia Ana tiibu aika a uarereke. E aki matebuaka korakoram ni karaoan aei. E ata arom te Atua.
Utu, Uoote, ao Kauntira n te Mwaanga
Ai uaana naba ma te mweenga, ti kona ni moana karikirakean ara kaantaninga nako ibukin ara tai n te taromauri. N tain te marooro n te utu, ti kona n marorooia bwa a na kanga kaain te utu n tatabemaniia ni ibuobuoki n anga aika a riai ni butimwaeia aomata ni kabane nakon te ekaretia ae kakimwareirei! Ti kona n baairea ao n kantaningaia bwa e na reke te kimwareirei n tain te taromauri.
A konaa kauntira n te uoote ao n te mwaanga n taraia ao ni karaoa te aro ni kimareirei ae rau ibukin tain ara toa, kunei kawai ni katamaroa ao n noori aro ni ibuobuoki.
Kimwareirei
E taraa ni kaokoro taraan te kimwareirei irouia aomata aika a kakaokoro. Irouia tabeman, e taraa ni kakukurei riki te butimwaai n te mataroa. Tabeman, e ibuobuoki nakoia aomata bwa a na namakina te rau man te moangare ao n tekateka i rarikiia ma te akoi ao te nano ae tatauraoi. Ibukiia naake a namakina ae a katinanikuaki ke a toka rengerenge, tamaroan te butimwai aei e na rangi ni kakawaki. Kabaneana, ti kona n titirakiniira bwa tera ae tangiria te Tia Kamaiu nakon aron ara waaki n toa. E kangaa aron ae E tangiria ni butimwaeaia natina nako, tararuakiia, tabeakinaki, ao tangirakiia? E kanga aron ae E tangiriira bwa ti na namakinna ngkana ti roko bwa ti na kaboouaki rinanon ururingakina ao taromauriakina?
Kabaneana
N moanan au waaki n onimaki, te kimwareirei iroun Iesu Kristo bon te moan kukune ae korakora, ao e a tia ni bita au aonaaba. Ngkana ko tuai kunea te kimwareirei aei, waakinako iai. Aio bon te kakao ni karekean ana bwaintituaraoi te Tia Kamaiu ae te rau, oota, ao te kimwareirei—n kaotia iai, ni miimi iai, ao ni kukurei iai, ni katoa Tabati.
E kaota ana namakin nanou Amon n Ana Boki Moomon ngke e kangai:
“Ao ngkanne tiaki bwa iai bukina bwa ti riai ni kukurei? Eng, I taku nakoimi, bon akea riki [te botanaomata] ae a riai riki ni kukurei n ai arora, ma ngke e karikaki te aonaba; eng, ao e uotaki nako kimwareireiu, n te aro are I a kamoamoa iroun Atuau; bwa iai irouna te mwaaka ni kabane, te wanawana, ma te atatai ni kabane; e atai bwaai ni kabane, ao bon te aomata ae nanoanga, nakon te kamaiuaki, nakoia ake a rairinanoia ma ni kakoaua arana.
Ao ngkanne ngkana aio te kamoamoa, ao Nna bon kamoamoa; bwa aio maiu ao ootau, … kimwareireiu ao au kaitau n aki toki.”
Kaaraki nakon te Ekaretia ae kakimwareirei! N aran Iesu Kristo, amen.