Te Ang E Aki Toki Ukina
Ti kona ni buokiia tabeman n rikirake iaon mwanangaia ni karekei Ana kakabwaia te Atua.
N 2015, n te tabo ae Pernambuco, Brazil, 62 membwa n te J.Reuben Clark Law Society a ibuobuoki ma aia Aobiti Rooia n te tabo n rinanoni kangaanga ni kaineti ma te tua irouia taan maeka n aua auti n tararua ibukiia kaara. Inanon nimaua te aoa n te Kaonobong teuana, rooia aikai a marooro ma ae riaon 200 taan maeka temanna imwiin temanna, are n tatabemaniia nako a tia n katinanikuaki irouia te botannaomata.
Inanon aia marooro, a kunea bwa e mwaiti te mwakuri n iowawa are ea tia n karaoaki nakoia kaara aikai n aron te kationakoaki, te bwainikirinaki, ao kabonganakin buaka te mwane n buoka ibukiia. Teuana ana boto n iango te bootaki n tua bon tabeakinaia aomata aika rarikin ao ni kainano. Tao uoua te namwakaina imwina e a nakoraoi karinan tangin te rooia n kaitaraia bwatei ake a bukinaki.
Aia ibuobuoki bon te katooto ae tamaroa n ana reirei te Uea ae Beniamina ae “ngkana kam beku ibukiia raomi ao kam bon beku naba iroun Atuami.”
Temanna te tia maeka ae I marooro ma ngaia n tain te mwakuri n anganano aio bon te akoi n aine ae 93 ana ririki ao arana Lucia. E kakaitau ibukin ara mwakuri n ibuobuoki, ao e manikangare n taku, “Mareai!”
I kubanako, ao I kaeka: “Taraa te aine are e botonaine arei! Kainnabau arei ao te rooia n te kaawa.”
E baiti n manga kaekaai: “Ma eaera? E ataei, man botonaine, ao e kai manga reke riki buuna. Ai bon ti ngkoe rekeu!”
Kaain te tabo aio aki bane n reke buokan aia kangaanga n te bong arei. A reitinako n rinanon te kangaanga n te tai teuana ma teuana n ai aroia Iaretaite iaon aia kaibuke n mwanangaia ae kangaanga ni kaea te aba n berita, “taunaki i kabin marawa, ibukin naao aika a maunga ake a roko i aoia.”
Ma n te Kaonobong arei, taan maeka n auti n tararua ibukiia kaara ataia bwa e ngae ngke aki kinaaki iaon te aba, ma a kinaaki raoi iroun Tamaia are i Karawa ae tatangira, Bon ngaia te tia kaekai ara tataro.
Te Uea ae te mataniwi e karekea te “ang ae korakora” n ukiia Iaretaite nakon taian kakabwaia ake a beritanaki. N ai aron naba anne, ti kona n rineia n beku ma te nanorinano inanon bain te Uea. N ai aron “te ang e aki toki ukina” ao n ukiia Iaretaite nakon te aba ni berita, ti kona n buokiia aomata ni kekeiaki inanon kawaia n karekei ana kakabwaia te Atua.
Tabeua te ririki n nako, ngke Chris, kainnabau ae bati n tangiraki, ao ngai ti intawiu ibukin weteau bwa te bitiobi, ara beretitenti n te titeiki e tuangai bwa nna tataroakinii araia naake a na beku bwa au kauntira. Imwiin ongorana n au ara ake I anga, e taku bwa nna riai n atai bwaai tabeua ibukin temanna mai ibuakoia taari aikai.
Te moan, tarira aio e kabi n wareware. Kauoua, akea ana kaa are ena kona n kabonganaa n kakawariia membwa. Kateniua, n taainako—n taainako—e aki toki n mamatanna n te taromauri. Ma e ngae ngke iai tabeaingan au beretitenti, e matoa namakinana irou bwa nna tabekarake arana bwa au kauntira ao e boutokaai au beretitenti n te titeiki.
N te Tabati are ngai ma au kauntira ti kamatoaaki n te bootaki n toa, a bati n tounako kain te taromauri. Tarira ae tangiraki aio e karaurau n waerake nako moa, ike a raneanea iai ootan taura iaon ana kiraati ni mata.
Ngke e a tekateka irarikiu, I titirakinna, “Tariu, iai ana kangaanga am taratara?”
“Akea” e taku.
“Ao bukin tera ko mamataniko n te taromauri?” I titiraki. “Raoraou, a tangiria n tarai matam membwa, ao kona riai naba n kona n taraia raoi.”
N te tai anne, e buta matana te kiraati ao e aki manga kabonganai n te taromauri.
Tariu ae tangiraki aio e beku irarikiu ni karokoa are I a kamotirawaaki bwa te bitiobi. N te bong aio, e teimatoa n kakaonimaki n beku n te Ekaretia ao bon te banna n katooto n te nanomatoa ma te motinnano nakon te Uea Iesu Kristo. Ao ngkoa, n ririki aika nako, ngaia temanna ae e aki kinaaki ae mamatanna n te kiraati ae tetekateka ni mwanuokinaki taekana iaon kaintekatekan te umwantabu. I aki toki n titiraki, “Iraman ibuakoia tarira ma mwanera aika kakaonimaki ake a tekateka n mwaningaki taekaia ibuakora n boong aikai?”
E ngae ngkana ti kinaaki ke e mwanunuokiinaki taekara, kangaanga ana bon aki toki n kaoti nakoira n tatabemaniira nako. Ngkana ti katan nakon te Tia Kamaiu, E kona n “onea [ara] rawawata nakon [ara] kakabwaia” ao n buokiira n kaitarai kataakira n te anga ae ena karekea rikiraken tamneira. Tao ibukiia taan maeka n auti n tararua ibukiia kaara, te membwa n te Ekaretia ae motikibuakaaki taekana, ke antai riki, ti kona n riki bwa “te ang [are] e aki toki ukina,” n uota te kaantaninga ao ni kairiia aomata nakon kawain te berita.
Ara burabeti ae bati n tangiraki, Beretitenti Russell M. Nelson, e kanakoa te kakao ae kakukurei man kaunganano nakoia kairake ae kangai: “I kamatoa n taekinna bwa e a tia n tua te Uea bwa a riai ataeinimwane ni kabane aika tau n tauraoi ni mwananga ao ni beku ni mitinare. Ataeinimwaane aika kaain te Ekaretia, bon tabeia n te nakoanibonga te mwakuri ni mitinarei. … Ngkami ataeinaine ake kam tau man konamaki, e tamaroa te mwakuri ni mitinare, ma e bon nakoimi, baireana.”
Ni katoa bong, e ngaa mwaitiia ataeinimwaane ao ataeinnaine ake a kaeka ana wewete ana burabeti te Uea ni beku bwa mitinare. Kam wanawana, ai aron are e tia n taekinna Beretitenti Nelson, e kona n “korakora riki ami kairoro iaon te aonaaba nakoia rooro ake mai mwaina!” Eng, e aki nanonaki n ae kona riki bwa te kabanea n tamaroa n te tai are ko toua nanon aia tabo ni kataneiai mitinare.
Ma, kona namakinna n ai aron Nibwaai, “kairaki iroun te Tamnei, n aki atai moa baika [ko] riai ni karaoi. E ngae n anne [ko] waaki nako.”
Tao kona namakina te aki tauraoi n ai aron Ieremia ao n tangiria ni kangai, “I babanga taetae: bwa te tei ngai.”
Ko na kona n norii kabwakam ao n tangiria n tang n takarua n ai aron Moote: “Te Uea, I aki rabakau taetae n rimoa…: bwa I wiremwe, ao e iremwe naba neweu.”
Ngkana antai ibuakomi ataeinimwaane ao ataeinnaine aika tangiraki man korakora e karekei iango n aron aikai n te tai aio, uringa bwa te Uea e a tia n kaeka, “Tai kangai, Te tei ngai: bwa ane I kanakoko nako ina ao ko na kawaria.” Ao E berita, “Ma ngaiia ae ko na nako ngkai, ao N na mena i wim, ma n rereiniko am taeka.”
Bitakin maium man te aro n aomata nakon maium n tamnei e na anganiko “teutana i mwin teutana, te reirei teuana i mwin teuana” ngkana ko teimatoa n kekeiaki n beku ibukin Iesu Kristo n am tabo n mitinare rinanon te rairannano n te bong koraki, onimaki, ao te ongeaba, ao te mwakuri korakora n “teimatoa n kakae, reiakina te rairannano, ao n bwabetitoia aika tia n rairaki.”
Ko na kona n kabongana n am taeki, ao n tabetai kona namakinna ae koaki kinaaki ke n mwanuokinaki taekam. E ngae n anne, ko riai n ataia bwa iai Tamam i Karawa ae kororaoi, ae kinako, ao te Tia Kamaiu ae tangiriko. E na iai am taan kairiri n am mition aika, e ngae ngke a kabwaka, ana beku ibukim n ai aron “te ang [are] e aki toki ukina” ni kaiririko inanon mwanangam n karekea iroum te bitaki.
N te “aba ae e ranga iai te rannimamma ma aia karewe maniberu” kona beku n am mition, kona karekea manga bungiakin tamneim ao n riki bwa ana reirei Iesu Kristo inanon bongin maium ngkana ko kaniiko Nakoina. Ko na ataia bwa e na aki manga mwaningaki taekam.
E na iai aika ana tataninga “n te tai ae maan” ibukin te kamaiuaki, bwa “ake raoia” ae kona n buokiia, te Uea Iesu Kristo e a tia n reireiniira bwa akea ae katukaki taekana Irouna. N kaitaraan raoi, Ngaia te banna ni katooto ae tamaroa n ukoran te rao n mwakoron nako Ana mwakuri iaon te aba.
Ngaira n tatabemaniira—ao ake irarikira,—ti kaitaraaki n angibuaka ni kakaitara ao naon katakira ake a na kainakoira n te bong koraki. Ma “te ang [e na aki ] toki ukina nakon te aba ni berita …; ao ngaia [ti na] kairaki n te ang.”
Ngaira n tatabemaniira ti kona n riki bwa mwakoron te ang aio—te ang are e kakabwaiaia Iaretaite inanon kawaia ao te ang naba are, man ara ibuobuoki, ena kakabwaiaia ake aki kinaaki man katukaki taekaia n karokoira n oin nako abara ni berita.
I kakoauaa bwa Iesu Kristo bon te tia Tei Ibukira nakon te Tama. Ngaia te Atua ae maiu ao n mwakuri bwa te ang ae korakora are ena kairiira iaon kawain te berita. N aran Iesu Kristo, amen.