Ukoukoria ma Nanom ni Kabane
Ngkana e karekea ana tai ae rau Iesu Kriston reitaki ma te Atua bwa e na kakorakoraaki Irouna, e riai iroura bwa tina karaoia naba.
Tabeua te ririki n nako, Ngai ma kaainabau ti beku bwa taan kairiiri n te mition i Tokyo, Japan. I nanon kawarakin ara mition iroun Unimwaane Russell M. Nelson, temanna ara mitinare e titirakinna bwa tera aia kaeka ae tamaroa ngkana a tuangaki irouia aomata bwa aki kona n ongora moa irouia bwa a tabetabe. Ma te aki tabwara, e taku Beretitenti Nelson, “N na titiraki ngkana e aki tau aia tai n amwarake n te bong anne ao ngkanne reireiniia bwa iai rabwataia ao tamneia, ao n ai aron rabwataia e na mate ngkana e aki kamwarakeaki, tamneia naba e na mate ngkana e aki kamwarakeaki man raoiroin ana taeka te Atua.”
E kakaongora ataakina bwa te taeka n Tiaban ibukin “tabetabe,” isogashii, bon te man ae karioaki ma uoua kanikinaa (忙). Nanon are n te maing bon te “nano” ke “tamnei,” ane teuana n te atai nanona te “mate”—are n nanona, bwa e reirei Beretitenti Nelson, bwa te tabetabe n kamaiuraoi tamneir e kona n karekea te mate n tamnei.
E ataia te Uea—n te aonaaba ae birimwaaka ae n onrake n katabetabe ao kakamwakuri—bwa karekean te tai ae tau Ibukina e na riki bwa te kangaanga ae bubura i nanon boong aikai. Ngke e taetae rinanon te burabeti are Itaia, E katauraoi taeka n reirei ao n kauring aika kona n katitebooaki nakon boong aika mangaongao ae ti maeka inanoia:
“Kam na kamaiuaki n te rairaki ma te motirawa; a na reke korakorami n te rau ma te onimaki: ao kam rawa naba.
“Ao kam kangai, Tiaki, bwa ti na biri nako i aoia aoti; ma ngaia ae kam na biri nako: ao kam kangai, Ti na tokariia maan aika biri mwaaka; ma ngaia ae a na biri mwaaka akana kaeingkami.”
N taekana riki teuana, e ngae ngkana kamaiuakira e boboto i aon okira Nakoina n taainako ao motirawara man katabetaben te aonaaba, ti na bon aki. Ma ngkana ara onimaki e na reke man te rau ae rikirake korakorana n taai ake ti tekateka ma te Uea n katurua ara iango ao n ururing, ti na bon aki. Bukin tera ngkai ti aki? Bukina bwa ti kangai, “tiaki, ti tabetabe n bwaai riki tabeua”—n birinako i aon ara aoti, n aron te taetae. Ngaia arei, ti na raroa nako man raroa nako mairoun te Atua; n iangoia ae tina birimwaaka man birimwaaka; ao birimwakara n kawaira, ai bon birimwakan riki Tatan n kakioira.
Tao ngaia anne bukina e aki toki n bubutiira Bereitenti Nelson bwa ti na bairea ara tai ibukin te Uea inanon maiura—ni katoabong. E kauringiira bwa “te tai ae aki rau bon te tai ae tabu—te tai are ti na karekei ara kaotioti ao ni kateimatoa te rau.” N te aro bwa ko na ongo te bwana ae maraara aei, e reireiniira bwa “ngkoe naba ko riai n teimatoa.”
Te rau, e ngae ngke, e kainanoa ae riaon ti bairean am tai ibukin te Uea—e kainanoa katukakin am iango n raraoma ao n maaku ao n kabotoi nanora ma ara iango Irouna. N aron are e reireia Unimwaane David A. Bednar, “Bwa ana kaetieti te Uea are ‘tiiku n rau’ e aki nanonaki n ae ti te aki taetae ke te aki kakamwakuri.” “Tiiku n rau,” e baaireia, “bon te anga naba n kauringiira ni kabanei ara iango n aki bwabwaka i aon ara Tia Kamaiu.”
Te tiku n rau bon te mwakuri n onimaki ao e kainanoa te mwakuri. N te Anga Reirei iaon te Onimaki e taekinaki, “Ngkana te aomata e mwakuri ma te onimaki e mwakuri ma korakoran ana iango.” E taekinna Beretitenti Nelson bwa: “Ara iango e riai ni bane iaon te Tia kamaiu ao Ana euangkerio. E bon tangira kammwakurakin te iango ni kakorakora Nakoina n iango ni kabane. Bwa ngkana ti karaoia, ara raraoma ao maakura ana bua.” Taekinan kainanon katuruan ara iango, e taku Beretitenti David O. McKay: “I taku bwa ti aki kakabanei ara tai nakon kakawakin te iango, tuan te kakaonimaki. … Te iango bon teuana te … kabanea n tabu n mataroa are ti rinanona nakon ana tabo te Uea.”
Iai te taeka n Tiaban ae, mui, are, irou, e katamneia raoi nanon te waaki n onimaki are te tiku n rau. Bon uoua te man i nanona (無為). Te man are n te maing nanona “akea” ke “te akea,” ao are n te atai nanona “karaoia.” N ikotaki ao nanona “akean mwakuriana” Ngkana e nanonaki raoi, te taeka anne e kona n bure rairana nakon “karaoan te akea” n ai aron are “tiiku n rau” ae kona n bure rairana nakon “te aki taetae ke te aki kakamwakuri.” Ma, n ai aron te kibuntaeka are, “tiiku n rau,” e bubura riki nanona; i bon irou ao te kauring bwa tina karaurau n maiuakina riki te maiu n atatai n tamnei.
Ngke I beku n te Beretitentii n te Asia North Area ma Unimwaane Takashi Wada, I reiakinna bwa kainnabana, Titira Naomi Wada, bon te tia koroboki n Tiaban ae rabakau. I titirakina Titita Wada ngkana e kona n korei manin te taeka ae muiibukiu. I tangiria n katinea te koroboki anne i aon au oo bwa te kauring bwa N na tiiku n rau ao ni kabanea au iango iroun te Tia Kamaiu. I bon rangi n kubanako ngke e aki nang kukurei n butimwaea karaoan nanon au bubuti ae bebete aio.
Te bong are i mwina, ngke I ataia ae e bure ootau n rawana, e kabwarabwara Unimwaane Wada bwa korean taian man akekei e tangira te mwakuri ae korakora. E na kainanoia n iangoia i nanona ao n katuruan ana iango i aon te iango arei ao taian man akekei ni karokoa e rin nnene inanon tamneina ao n kona n anga kabwarabwaraan taian taeka aika a nano aikai n ana kai n koroboki. I rangi ni maama ngke I a tia n butiia n aki iangoa te bwai ae e na nang rawawata karaoana. I butiia bwa e na karokoa au kabwara bure nakoina ibukin au aki iango ao n kaongoa bwa e a kakeaa au bubuti.
Ko bon kona n iangoa kubanakou ma au kakaitau ngke N nang kitana Tiaban, Titita Wada, e anganano, n bwaintangiraai te korobanna ae tamaroa are te man n Tiaban ae mui. Ngkai e tine n ooan au aobiti, n kakauringai bwa N na rau ao n ukora te Uea ni katoa bong ma nanou, marurungiu, iango, ma korakorau. E a tia n rawea, n ana mwakuri n anganano aio, nanon mui, ke te tiku n rau, n ae tamaroa riki nakon ae a kona n karoaia taian taeka. N aki tabe ma aron korean maan aikai, e karaoa ana korobanna ma nanona ni kabane ao te nano n koaua.
N aekan naba aio, e tangiriira te Atua bwa ti na kanoai ara tai ma Ngaia ma te nano n nebonebo ae aekan anne. Ngkan ti karaoa aei, e na riki ara nebonebo bwa bannan ara tangira Ibukina.
E ingainga bwa ti na reitaki Nakoina. N te tai teuana, i mwin au kaukuuki n tataro n teuana te boowi ma te Moan Beretitentii, e rairaki nakoiu Beretitenti Nelson n tuangai, “Ngke ko tataro, I iangoa mwaitin ana kakaitau te Atua ngkai ti karekea ara tai man tabetabera n kakaitaua.” Bon te kauring ae bebete man korakora ni mwaitin ae nanonaki nakon Tamara are i Karawangkana ti ana tai teutana n reitaki ma Ngaia.
E ngae ngkana E tangiriira bwa ti na kakauongo raoi, E na bon aki taumatoaira bwa tina Nakoina. E taku te Uea are tia n mangauti nakoia Nibwaite, “Ai iraua au tai n ikoikotingkami n aron te moaaine ngkana e ikoikotiia natina, ao kam rawa.” E reitinakoa ma te kakao ni kaunganano ae ti kona naba n kammwakuria iroura n boong aikai: “Ai iraua au tai ae N na ikoikotingkami, n aron te moaaine ngkana e ikoikotiia natina i aan baina, ngkana kam rairinanomi man okirai ma nanomi ni koaua.”
Ana euangkerio Iesu Kristo e anganiira tibwangara n Okiria n taainako. Tibwangara aikai bon te tataro n katoa bong, kamatebwaian koroboki aika tabu, kanakin te toa, te Tabati, ao te nebonebo n te tembora. Tera ngkana ti kanakoi tibwanga aika tabu aikai man ara riiti ibukin “bwaai aika tina karaoia” ao ni korei iaon ara riti ibukin “aki kakammwakuri” are e nanonaki bwa tina karaoia ma te iango raoi ao katuruan ara iango iai n aron are e karaoia Titita Wada ma ana korobanna?
Ko na bae n iangoa ae “E aki tau au tai ibukin anne.” I a tia naba nanamakina te aekaki anne. Ma kariaia bwa N na tuangko bwa bwaai aika a kainanoaki aki nanonaki n ae a na kainanoa te tai ae rawata ma te atatai ae bati ao katuruan te iango iaon te Atua n taai ake ti a tia n katannakoa Ibukina.
Te katooto, ngkana ti tataro, tera ngke arona bwa ti kauarerekea te tai n taetae ma tia kabatiia te tai n mena ma te Atua; ao ngkana ti na taetae, n taekinii bwaai ma nanora aika kaota ara kakaitau ma ara tangira?
E reireiniira Beretitenti Nelson bwa tina aki ti wareki koroboki aika tabu ma tina kawakin raoi. Tera te kaokoro ngkana ti kauarerekea te wareware ao ni kabatiaa kawakinana?
Tera ngke arona bwa ti kona n katauraoi ara iangoa nakon kanakin te toa ao n kimwareirei n iangoi raoi taian kakabwaia man Ana Mwakuri ni Kamaiu Iesu Kristo i nanon tain karaoa te otenati ae tabu aio?
N te Tabati, are n te taetae n Ebera e nanonaki bwa “motirawa” tera ngke arona bwa ti motirawa man katabetabeara ake tabeua ao n anaa ara tai n tekateka n rau ma te Uea ao n anga nanora ae bwanin Nakoina?
I nanon ara nebonebo n te tembora, tera ngke ti kakauongora riki ke n tiku riki teutana n te ruu ae te tiretio mwakuri n iango inanon te rau?
Ngkana e memeere ara iango ni karaoana ao e bati riki i aon kakorakoraan reitakin ara berita aika a tabu ma Tamara are i Karawa ao Iesu Kristo, kakoaua bwa taai aika tabu aikai a na kakorakoraaki, ao ti na karekea te kairiiri are ti kainanoia i nanon maiura. Ngaira, n ai aron Mareta n ana boki Ruka, ti “tabetabe man rawawata n baika mwaiti.” Ma, n reitakira ma te Uea ni katoa bong, E na buokiira n atai bwaai aika kakawaki riki.
Iai naba ana tai te Tia Kamaiu n rau man Ana mwakuri. A kaonaki koroboki aika tabu ni katooton bannan te Uea ngkana e oki nakon te tabo ae rau—te maunga, te buakonikai, te rereua ke ni “kararoaa”—n tataro nakon Tamana. Ngkana e karekea ana tai ae rau Iesu Kriston reitaki ma te Atua bwa ena kakorakoraaki Irouna, e riai iroura bwa tina karaoia naba.
Ngkana ti katikui nanora ma ara iango iroun Tamara are i Karawa ao Iesu Kristo ao ni kakauongo nakon bwanaan te Tamnei ae Raoiroi ae maraara, ti na kona n karekea te oota i aon bwaai aika kakawaki, kakorakora te nanoanga, ao ni karekea te rau ao te korakora Irouna. Te kamiimi bwa, buokan te Atua ni kawaekoa Ana mwakuri ni kamaiu ao te karietataaki e na kainanoa ae tina karaurau. Te teimatoa ni kakammwakuri e kamwaita te kamangaongao inanon maiura are e a anaa te rau mairoura are ti ukoukoria.
I kakoaua bwa ngkana ti okiokira te Uea n taainako ma nanora ni koaua, i nanon te rau ao te nanomatoa n Kinaa ao n namakina Ana tangira ae akea tiana ibukira.
E berita te Uea:
“Kaaniai ao N na kaaningkami; botumwaaka n ukoukorai ao kam na kuneai.”
“Ao ane kam na ukoukorai, ao N na bon reke iroumi, ngkana kam bon ukoukorai n nanomi ni kabane.”
I kakoaua bwa e koaua te berita aio. N aran Iesu Kristo, amen.