Kimwareirei n te Bwaintituaraoi are Kiing n te nakoanibonga
Kiing n te nakoanibonga a tararuaa aron kabonganaan Ana nakoanibonga te Atua ni kammwakuria n ana kaantaninga te Uea ao ni kakabwaiaia ni kabane ake a butimwaea Ana euangkerio ae kaokaki.
Tariu ao mwaaneu aika kam tangiraki, te bong aei bon te bong ae kakaawaki irou ao iroun Beretitenti Dallin H. Oaks. Bon 40 te ririki n nako, n Eberi 7, 1984, ngke ti kamatoaaki nakon te Kooram n Abotoro n te Tengaun ma Uoman. Ti kukurei i nanon taian maungatabu ni kabuta man te tai anne, ni ikotaki ma aio. Ti a manga kakabwaiaaki riki ni kabwaroan Tamnei aika a tabu ngkai. Au kaantaninga bwa kam na kaokioka kamatebwaian rongorongo man te maungatabu aei i nanon namwakina aika a na roko.
Ngke I bungiaki, iai onoua tembora aika a mwakuri n te Ekaretia—kakateuana i St. George, Logan, Manti, ao Salt Lake City, Utah; kakateuana naba i Cardston, Alberta, Canada; and Laie, Hawaii. Uoua tembora ake a tia ni mwakuri tabeua te tai i Kirtland, Ohio, ao Nauvoo, Illinois. Ngke e mwainginako te Ekaretia nako maeao, a kairoroaki Aomata aika a Itiaki bwa a na kitanii tembora akanne i mwiia.
E uruaki te Tembora i Nauvoo man te urarake are e bon nanonaki kaurakina. E a manga kateaki ao ni katabuaki rimwi iroun Beretitenti Gordon B. Hinckley. E kamangoraki tabun te Kirtland Tembora irouia ana kairiribai te Ekaretia. I mwina e a manga kabonganaaki te Kirtland Tembora man te Komunite ni Kristo, ike a bwaibwai iai i nanon ririki aika a mwaiti.
N te namwakaina ae e nako ti katanoata bwa e a tia Ana Ekaretia Iesu Kristo ibukiia Aika Itiaki ni Boong aika Kaitira ni kabooa te Kirtland Tembora, ni ikotaki ma tabeua taabo aika a rangi ni kakaawaki n rongorongon kawai i Nauvoo. Ti rangi ni kakaaitau n te marooro n reitaki ao n iraorao are ti karaoia ma taan kairiiri man te Komunite ni Kristo are e a karekea te boraraoi aei.
Te Kirtland Tembora iai kakawakina ae rangi n okoro ni Kaokan ana euangkerio Iesu Kristo. A mwaiti bwaai aika a riki ikekei ake a kaman taetae ni burabetiaki inanon ngaa n ririki ao a rangi ni kakaawaki ibukin kaokan te Ekaretia ni kakoroi nanon ana mition ni boong aika kaitira.
Te bwai ae moan te kakaawaki man baika a riki aikai e bon riki n Tabatin te Itita, Eberi 3, 1836. N te bong anne, Iotebwa Timiti ao Oliver Cowdery a rinanon taai aika kakaokoro ni kawarakiia aika a rangi ni kamiimi. Te moan, e kaoti te Uea ae Iesu Kristo. E koreia te Burabeti bwa matan te Tia Kamaiu “ai aron uran te ai; iran atuuna e mainaina n aekan te tinoo; ao ubuna e oota riki nakon otaan taai; ao bwanaana ai aron tangin butin te ran ae korakora.”
N tain te kaakawari aei, te Uea e kaota raoi aron kinakina. E taku, “Ngai te moan ao te kabanea; Ngai are e maiu, Ngai are e tiringaki; Ngai te tia tei ibukimi iroun te Tama.”
E taekinna i mwiina Iesu Kristo bwa E a tia ni butimwaea te tembora bwa Ana auti ao ni karaoa te berita ae moan te tamaroa aei: “N na kaotai nakoia au aomata n te nanoanga n te auti aei.”
Te berita ae rangi ni kakaawaki aei e kaineti nakon tembora ni kabane ake a tia ni katabuaki ni boong aikai. I kaoi ngkami bwa kam na iangoa nanon ana berita te Uea aio i bon iroum.
I mwiin rokon te Tia Kamaiu, e kaoti Mote. Mote e anga kingiin ikotakiia Iteraera nakon Iotebwa Timiti ao kaokakiia baronga ake tengaun.
Ngke e toki te mi ni burabeti aei, “e kaoti Eriati, ao n anga te mwioko n tararua n te euangkerio are e anganaki Aberaam” nakon Iotebwa.
I mwiina e kaoti Eria. Kaotina e kakoroa nanon ana berita Maraki bwa i mwaain te Kauaoki, e na karokoa Eria te Uea bwa e na “Rairi nanoia taama nakoia natiia, ao nanoia naati nakoia taama.” Eria e katokaa te kiing ni mwaakan te kabaebae iaon Iotebwa Timiti.
Kakaawakin kaokan kiing aikai nakon te aonaaba irouia taan uarongrongo aika teniman mai karawa i aan ana kairiiri te Uea e aki konaa ni kabwarabwaraaki. Kiing n te nakoanibonga iai inanona te kariaia ao te mwaaka n te moan beretitentii. Kiing n te nakoanibonga a tararuaa aron kabonganaan ana nakoanibonga te Atua ni kammwakuria n ana kaantaninga te Uea ao ni kakabwaiaia ni kabane ake a butimwaea ana euangkerio Iesu Kristo ae kaokaki.
E rangi ni kakaawaki ataakina bwa i mwain katean te Ekaretia, a anga te Nakoanibonga aika te Aaron ao te Merekitereka taan uarongorongo mai karawa nakon te Burabeti Iotebwa ao n anganna kiing ibukin nakoanibonga akanne. Kiing aikai a angan Iotebwa Timiti te kariaiakaki ni baronga te Ekaretia n 1830.
I mwiina n 1836 i nanon te Kirtland Tembora, e kaokaki teniua riki kiing n te nakoanibonga—ae, kiingin ikotakiia Iteraera, kiingin te mwioko n tararua n ana euangkerio Aberaam, ao kiingin te mwaaka ni kabaebae—a bon rangi ni kakaawaki. Kiing aikai a anga te kariaia nakon Iotebwa Timiti—ao ni kabane Beretitenti ake i mwiina n ana Ekaretia te Uea—ni boota Iteraera ni iteran rabuna aika uoua, ni kakabwaiaia ni kabane naati ni berita n ana kakabwaia Aberaam, ni kamatoaa te otenanti n te nakoanibonga ao berita aika a tabu, ao ni kabaeia utu n akea tokina. Mwaakan kiing n te nakoanibonga aikai bon akea tokiia ao ni kamiimi.
Iangoia bwa e na kanga ni kaokoro maium ngke arona bwa a aki kaokaki kiing n te nakoanibonga nako aon te aba. N akean kiing n te nakoanibonga, ko na bon aki kona n entaute ni mwaakan te Atua. N akean kiing n te nakoanibonga, e na kona n ti waaki te Ekaretia bwa te bootaki ae anga reirei aika a kakaawaki ao buoka nakoia aomata ao akea riki. N akean kiing n te nakoanibonga, akea temanna ae kona ni karekei otenanti aika a kakaawaki ao berita aika a tabu ake a kabaeira ma aika a tangiraki iroura n akea tokina ao n kariaia maekara ma te Atua.
Kiing n te nakoanibonga a katerea kaokoron Ana Ekaretia Iesu Kristo ibukiia Aika Itiaki ni Boong aika Kaitira man bootaki ake tabeua i aon te aba. A mwaiti bootaki ake a kona ao ni karaoa maium bwa e na nakoraoi n te maiu ae mamate aei. Ma bon akea te bootaki teuana ae kona ao e na roota maium i mwiin te mate.
A anganiira te kariaiakaki kiing n te nakoanibonga n anga kakabwaia ni kabane ake a beritanaki nakon Aberaam ao n tauraoi nakoia mwaane ao aine ake a kaawakin aia berita aika a tabu. Mwakuri n tembora aikai a katauraoi kakabwaia aika a rang tamaroa nakoia ni kabane natin te Atua, n aki taraia bwa n te tabo ra ke ningai ae a maeka iai, ke a maiu ngkai. Ti na kimwareirei bwa kiing n te nakoanibonga a manga oki nakon te aonaaba!
I kaoi ngkami bwa kam na iangoia raoi ma te karaurau kibuntaeka aika teniua aikai:
-
Bobotakian Iteraera bon te kakoaua bwa te Atua e tangiriia ni kabane natina n taabo nako.
-
Ana euangkerio Aberaam bon te kakoaua riki bwa te Atua e tangiriia ni kabane natina n taabo nako. E kaoiia ni kabane bwa a na Nakoina, “ae bwatabwata ke ae mainaina, te toro ke ae inaomata, te mwaane ke te aine; … ni kabane titebo aroia imatan te Atua.”
-
Te mwaaka ni kabaebae bon te kakoaua mai karawa ni kaotan mwaitin ana tangira te Atua nakoia ni kabane natina ao e tangiriia n tatabemaniia bwa a na rineia bwa a na oki n maeka i Rouna.
Kiing n te nakoanibonga ake a kaokaki nakon te Burabeti Iotebwa Timiti a karekea nakoia aomata n tatabemaniia mwaane ao aine ake a kawakin aia berita te kimwareirei ni koaua irouiia n aaro n tamnei. Ikai riki, a bati bwaai aika ti kona n reiakin man rongorongon ngkoa te Kirtland Tembora ae tabu.
Ana tataro Iotebwa Timiti ni katabua te Tembora i Kirtland e reireiniira aron tembora ni kakorakoraira n tamnei ni kaitarai kangaangan te maiu ni boong aika a kaitira. I kaungaingkami bwa kam na kamatebwaia te tataro are e koreaki n Reirei ao Berita aika Tabu mwakoro 109. Te tataro ni katabu, are e karekeaki man te kaotioti, e reirei bwa te tembora bon “te auti n tataro, te auti n aki mamatam, te auti n onimaki, te auti n reirei, te auti ni mimitong, te auti ae baireaki raoi, ana auti te Atua.”
Rinan aika a taekinaki a bon kabwarabwara riki te tembora. Bon te berita bwa tera ae e kona n riki nakoia ake a beku ao n nebonebo n ana auti te Uea. A kona ni kantaningaia bwa a na karekei kaeka nakon aia tataro, oin aia kaotioti, aia onimaki ae korakora, kakorakora, te rau, rikiraken ataibwai, ao karikirakean korakora.
Kabanean te tai n te tembora e na buokiko n iango n Tiretio ao ni karekea te mi ni burabeti bwa antai raoi ngkoe, antai ae ko kan riki n arona, ao te aeka ni maiu are ko kan maiuakinna n akea tokina. Kakaraoan te nebonebo n te tembora ni katoaa te tai e na karekea te kawai nakoim n noora arom ao aroni maium i nanon ana babaire te Atua ae moan te nakoraoi. I berita nakoim anne.
Te berita naba nakoira bwa i nanon te tembora ti kona ni “karekea bwaninin te Tamnei ae Raoiroi”. Iangoia bwa tera nanon te berita anne ni kona ni karekei kaotioti mai karawa iroun are e ukora mwaakan te koaua ae akea tokina.
Ti tuangaki bwa ni kabane ake a nebonebo n te tembora a na karekea mwaakan te Atua ao anera ana “tararua i aoia.” Mwaitira matoan nanom n ataia bwa, ngkai te aine ao te mwaane ae entaute ae e otanganaki ni mwaakan te Atua, ae ko na bon aki kaitaraa te maiu aei n ti ngkoe? Tera aron ataakina bwa a bon buokiko ni koaua anera n anganiko te ninikoria?
Kabaneana, te berita nakoira bwa “akea botaki aika buakaka” ae na tokanikai i aoia ake a nebonebo n ana auti te Uea.
Te mataata n mwakuri aika tabu ake a kona ni karaoaki n te tembora bon te kakaawaki nakoira n tatabemaniira n te bong aei.
Tariu ao mwaneu aika kam tangiraki, aio au berita. Akea te bwai ae na buokiko riki n taua ni kamatoa te kai ae te biti irarikin te nebonebo i nanon te tembora ni katoatai nakon are ko bon kona. Akea te bwai ae na kamanoko riki n am tai ni kaitibooaki ma taian bubu n nang aika roo man te aonaaba. Akea te bwai ae na kakorakora am kakoaua iroun te Uea Iesu Kristo ao Ana Mwakuri ni Kamaiu ke ni buokiko ni kamataata riki ana babaire te Atua ae tamaroa. Akea te bwai ae na kabebetea riki tamneim i nanon taai ni maraki. Akea te bwai ae na kauka riki karawa. Akea!
Te tembora bon te moan mataroa nakon kakabwaia aika a korakora ake katauraoi te Atua ibukira n tatabemaniira, bwa te tembora bon ti te tabo n te aonaaba are ti kona ni karekei iai ni kabane kakabwaia ake a beritanaki nakon Aberaam. Anne bukina ae ngaira taan kairiiri ti karaoi bwaai ni kabane nakon ara kabanea ni konaa, i aan ana kairiiri te Uea, ni kangaraoi kakabwaia n tembora bwa a na kai reke nakoia membwa n te Ekaretia. Ngaia are, ti kukurei ni katanoataa bwa ti baireia ni katei tembora aika boou n taabo aika 15 aikai:
-
Uturoa, French Polynesia
-
Chihuahua, Mexico
-
Florianópolis, Brazil
-
Rosario, Argentina
-
Edinburgh, Scotland
-
Brisbane, Australia south area
-
Victoria, British Columbia
-
Yuma, Arizona
-
Houston, Texas south area
-
Des Moines, Iowa
-
Cincinnati, Ohio
-
Honolulu, Hawaii
-
West Jordan, Utah
-
Lehi, Utah
-
Maracaibo, Venezuela
Tariu ao mwaneu aika kam tangiraki, I kakoaua bwa aio bon Ana Ekaretia Iesu Kristo Ibukiia Aika Itiaki ni Boong aika Kaitira. E tei bwa te tia kairia. Ngaira bon Ana reirei.
Ti na kimwareirei ni kaokan kiing n te nakoanibonga are e karekea nakoim ao nakoiu te kimwareirei i nanon kakabwaia n tamnei n tatabeua nako are ti kukurei ao n tau ni karekei. I kakoaua n aran Iesu Kristo ae tabu, amen.