Te Kokoaua: Anuan maiun Kristo
Maiuakinan te kokoaua e bon kainanoa te kakaonimaki nakon te Atua, i marenara n tatabemaniira, ao bon nakon rikira mai karawa.
I mwain maten te Tia Kamaiu, E nakon te maunga are Oriweta n te onaroka i Ketetemane ao n tua nakoia Ana reirei bwa a na tataningaia. E kararoaia ana reirei, ao E tataro nakon te Tama, “Ngkana e riai i Roum, ao Ko na uota nako te mangko aei mai Rou.” Te karawaawata, are e reke irouna, “e ngae ngke ngaia te Atua, te kabanea ni korakora i buakomi ni kabane, e na ruru ibukin te maraki, ao ni wawanako te rara man bwangabwangan kunna, … ao n tangiria bwa [E] na aki nima te mwangko ae e mao, ao ni keerikaaki.” N ana tai n rawawata, e aki keerikaaki te Tia Kamaiu “ma E nimma ao ni katiaa [Ana] katauraoi ibukia natia aomata.”
Bon ngaia ana Rikitemanna te Tama, E kataea ana kai te mate Iesu Kristo, ma te korakai, ao e aki keerikaaki man karawawataakina. E kakoroa nanon ana berita are karaoia ma Tamana ao, ni karaoan aei, anuan maiun Kristo e rikirake ni bongana nakon te aonaaba ae ti maeka iai—te anua ni kokoaua. E teimatoa ni kokoaua nakon te Atua, n nakoira n tatabemaniira, ao rikina mai karawa.
Kokoaua
Iesu Kristo bon ara banna ni katooto. Maiuakinan te kokoaua e bon kainanoa te kakaonimaki nakon te Atua, i marenara n tatabemaniira, ao bon nakon rikira mai karawa. Te kokoaua e roko man te moan tua ae korakora n tangira te Atua. Ibukina ngkai ko tangira te Atua, ko bon riai n onimaki Irouna n taainako. Ko na ataia bwa iai te eti ao te bure ao iai koaua aika—ana koaua te Atua. Te kokoaua e nanonaki bwa ti aki karinanoa teira ke anuara ni kakukureia aomata ke ni butimwaeaki mairouia tabeman. Ko na “karaoa ae raoiroi” ao “ko na kariaia uaana.” Te bitaki ae boou nakon Taetaekina Au Euangkerio ae aia boki mitinare ao e karinaki te kokoaua ae anuan maiun Kristo.
Ririki aika a nako, e mwiokoaki Unimwaane Utchdorf bwa e na manga moan baronga ara titeiki. N ara tai n intawiu, e tuangai te titiraki ae I aki kona ni mwaninga taekana: “Iai te bwai ae ko a tia ni karaoia i nanon maium, ae buaakaka i mataia te botanaomata, are e na uota te kamaemaeaki nakoim ke n nakon te Ekaretia?” I tounako, ao I waekoa ni kauringi bwaai ake I a tia ni karaoi i nanon maiu, I bon titirakinai irou, “ngkana iai arou ae ataaki irouia temwaangina ae I a tia ni karaoia, tera ngkanne ae a na taekinna ibukiu ke te Ekaretia?”
N te tai anne, ngai irou bwa e na ti boboto ana intawiu Unimwaane Utchdorf ma te kororaoi, ma I a ataia bwa ngaia te titiraki ni kaineti nakon te kokoaua. I kokoaua n au mwakuri nako? E na kona te aonaaba n noora koauan au taetae ma au mwakuri? A na kona n noora te Atua aomata n rinanon aroarou?
E reirei Beretitenti Spencer W. Kimball, Te “kokoaua” bon “te nano ae kakaonimaki ao te kantaninga ibukin mauakinan ara koaua ao ara motinnano.”
Kokoua nakon te Atua
Maiuakinan te kokoaua e bon kainanoa moa ao ae rangin kakawaki am kakaonimaki nakon te Atua.
Ngke ti uarereke, ao ti reiakina rongorongon Taniera inanon nneia raian. E kakaonimaki n taainako Taniera nakon te Atua. A bakantang irouna raona “ao a ukoukora rekeni [bukinana]” ao ni bairea kakorakoraakin te tua ibukin te tataro nakon atuaia ni beekan. Ngke e ataia Taniera bwa e a tia ni kanikinaeaki te koroboki arei, ao e nako nanon ana auti ao—“e uki kamaman ana ru”—ao e katenua ana katorobubua n te bong ae koraki ao e tataro nakon Atuaia Iteraera. N tokina, ao e teweaki nako Taniera nakon nneia raian. N te karangaina anne, e kunea te uea bwa e kainaomataaki Taniera iroun Atuana ao ni bairea te tua ae boou bwa a riai aomata ni kabane “ni maaku i matan Atuan Taniera: bwa te Atua ae maiu Ngaia.”
E a tabe ni kinaa te Atua te Uea man ana kokoaua Taniera. Temwaangina a noora te Atua man ara—taetae ao ara mwakuri. Ai aron Taniera, ngkana ti kakaonimaki nakon te Atua ao e na kakorakoraira ao ni kaokoroira man te aonaaba aei.
E kauringiira te Tia Kamaiu bwa, “Ami bwai i aon te aba te rawawata: ma kam na kabebetei nanomi; I a tia ni kataea ana kai te aonaaba.” E reirei Beretitenti Russell M. Nelson bwa: “[kataean ana kai te aonaaba] e nanonaki bwa te tokanikai man te kaririaki n mataiakinan riki bwain te aonaaba aei nakon riki ana bwai te Atua. E nanonaki bwa onimakinan riki ana reirei Kristo nakon aia koaua aomata.” Ai arora naba, ti riai n aki bwaka n taian kariiri ao n nakonako “n [oin] kawaira, ao ni katotonga [oin] atuara, are katotongana ai aron te aonaaba.”
Kakaitara n te maiu aei bon mwakoron Ana babaire ni kamaiu te Atua. Arora ni kaeka nakon taian katikitiki e bon kaotiira bwa antai ngaira—ao mwaitira ara tai ni kokoaua. Ana katikitiki te aonaaba e bon kairiira bwa ti na kamaenakoa te kabaebae n te mare ke ni kabuakaka katein ao ana reirei te Ekaretia. Kamwakuran ara kokoaua n ara rinerine bon kaotan te nano ae kakaonimaki n iriira te Tia Kamaiu Iesu Kristo.
Kokoaua nakoia Temwaangina
Ai aron te kokoaua e roko man te moan tua ae korakora n tangira te Atua, ara kakaonimaki i marenara e roko man te kauoua ni korakora n tua, ko na tangira raom n ai aron tangiram i bon iroum. Mauiakinan te kokoaua bon tiaki te maiu ni kororaoi, ma bon te maiu ni kekeiaki ni katoa bong ni kakaonimaki nakon te Atua ao nakoia temwaangina. E kauringiira Beretitenti Dallin H. Oaks: “Ma ara nanomatoa ni kawakina [te] kauoua n tua aio e na aki karikiira bwa ti na mwaninga are te moan.”
E rikirake ni mangaongao te aonaaba ma bwainakin te kokoaua n irekereke ma te tua are e a tautaekana aia reitaki aomata ma bootaki tabeua. Raoiroina, bwa tuua aikai a bon aki boto i aon te koaua ma e rikirake te taratara i aoia aomata ni bon aroia. Te titiraki ae titebo ma are tabekia Unimwaane Utchdorf, bootaki tabeua a kataneiaia aia taan mwakuri bwa a na iangoia bwa tera aia babaire ni katamaroa te rongorongo bwa e aonga n tangiraki ngkana arona bwa e a katokaaki i aonrain ke i moan iteranibaan te nuutibeeba. Ngke e a moanna n otinako te Ekaretia mai nanon te roo ma te rootongitong, ti na, n ai aron Taniera, n tokanikai man kariiri n te aonaaba ao n riki bwa taan tei ibukin ana koaua te Atua ae maiu n taai nako, ao n taabo ni kabane.
E na bon aki tau te kokoaua are iroura ngkana e aki boraoi ara mwakuri ma ara taetae. Ai aron, aia akoi Kiritian e bon aki tau ibukin ara kokoaua. Ngkai ngaira aomatan te berita, ao ngkai taan kairiiri n Ana Ekaretia, ti riai ni karaoa ae raka riki i aon aei ao n teimatoa i nanon ana kainibaire te Uea are e a tia ni kawenei.
Te mwakuri ae airi ma te kokoaua e bon unika te onimaki are e na anganiia aomata te koaua bwa ti ukoukori man karaoi mwakuri ake nanon te Uea. N ara kauntira, ti katinanikui ake bon oin wanawanara ao n iriira are ana kaantaninga te Uea, n ukori iango mai irouia mwaane ao aine n tatabemaniia ao ni mwakuri ni kaineti ma te reirei are ti karekea.
E na boboto te marooro i aon te Tia Kamaiu, ao ti riai ni katinanikui mwakuri ake a kaineti ma bon oin kainanora, kabwaiaia ara utu, ke tatangirakin temanna bwa ko na kabanemwane irouna. Ti riai n totokoi iango n ukoukora aia karinerine aomata, ni karekea iai atongakira, tangirakira, uringakira, ke tao katanoataakira.
Kakaonimaki nakon Kinaakira mai Karawa
N tokin te tai, maiuakinan te kokoaua e kainanoa ara kakaonimaki nakon kinaakira mai karawa.
Ti ataia bwa iai ma ibuakora aika aki. Ao te tia kakewea Kristo are arana Kirioa, are kairanako nanoia aika mwaiti, ao ni katangiraoia nakon “te iango n rabwata.” E ngae n anne, ao e taekinna, “I a kaman ataia bwa bon iai te Atua.” E taekinna Beretitenti Henry B. Eyring bwa te kewe “bon kaitaraan arora ni maiu n tamnei,” kinaakira mai karawa. E kakoaua Korioa, bwa e aki mena irouna te koaua.
Ni kamatataan aei, ao e katanoata Iotebwa Timiti ma nanona ni koaua ni kangai, “I ataia, ao I ataia bwa te Atua e ataia, ao I aki kona ni kakewea.”
E tatangiraki tarin Iotebwa ae Hyrum iroun te Uea “ibukin raoiroin nanona.” A teimatoa ngaia ma Iotebwa ni kakaonimaki ni karokoa te toki—kakaonimaki nakon kinaakiia mai karawa, n te ota ma te ataibwai are a karekea, ao n kakaonimaki nakoia aomata.
Kainiin
Raoiakiningkami nakon “nanon te Atua” ao ni karikirakea te kokoaua are bon anuan maiun Kristo. Ti riai n iriira ara banna ni katooto, te Tia Kamaiua te aonaaba, ao n aki keerikaaki ma ti na maiuakina te kakaonimaki nakon te Atua, ao bon nakon rikira mai karawa.
N aron are taekinna Iobi, “Ke e tauaki mwin rawawatau n tauan te rawawata ae eti, bwa e aonga n ata raoiroiu te Atua.” N aran Iesu Kristo ae tabu, amen.