Kaitaraan Bwaai ni Kabane
Ngkana ti na kamwakura inaomatara n rinerine, ti riai n iangoi karekean rinerine ni kaitaraan bwaai.
N taai aika nako, n ara tai ni buti inanon te kaawa ae boou iroura, ao e a karina naba ni bure kawaiu are I bwakee nako iai, are e a kairai ma kainabau nakon te kawai ae anaanau maairena ao n aki kona n manga rairiira n okiiai. Ti kakioa ana kakao temanna raoraora nakon mwengana ao n raraoma bwa ti a bon rangi rimwii nakon te tai are ti kaantaningaki iai.
I korakai ni kakaea kawaira n otinako man te kawai ae anaanau aei, ao n bukinai n te bwai ae riki aei bwa I aki kabanea au tai n tataraa ana kainiborau te kaa. E reke n au iango i mwiin reken te taneiai aei bwa n tabetai ti karaoi babaire aika kaairua ao ti na kangaa n maiu ma mwiin taian kangaanga i nanon te taotaonakinnano ni karokoa te tai are ti a kona ni manga bita arora.
Te maiu bon te tai ni karaoi rinerine. E anganiira Tamara are I karawa inaomatara n rinerine bwa ti aonga n kona n reiakiniira man ara rinerine—ake a raoiroi ao ake a buakaka. Ti kaeti ara rinerine aika kaairua ngkana ti raira nanora. Aio bon te tai are waaki mai iai rikirakera. Ana babaire Tamara are I karawa ibukira ni kabane bon taekan reiakinan bwaai, te rikirake ao te kekeiaki n uaiakina te maiu are akea tokina.
Man te tai are ngai ma kainabau ti reireinaki iai irouia mitinare ao n kaaina te Ekaretia n ririki aika bwakanako, e teimatoa n tiku i nanou taekan ana reirei Riaai nakon natina te mwaane ae Iakoba are koreaki n ana Boki Moomon. E reirei nakoina bwa “e anga te inaomata te Uea ae te Atua nakon te aomata bwa e na kona ni mwakuri i bon irouna” “e riai ae a na iai kaitaraan bwaai ni kabane.” Ngkana ti na kamwakura inaomata n rinerine, ti riai n iangoi karekean rinerine ni kaitaraan bwaai. Ni karaoan aei, e kauringiira naba ana Boki Moomon bwa “a reireinaki aomata n ae tau” ao “Tamnein Kristo” a bane n anganaki aomata bwa aonga “n ataa te raoiroi ma te buakaka.”
Ni maiura, ao ti kaaitara ma rinerine aika kakawaki. Te katooto:
-
Ti rineia ke n rawa ni kan kawakin ana tua te Atua.
-
Rinean te onimaki ao n kinaa ngkana e kaotii kakai ke n tataningaa moa te bwai ae na riki i mwain ae ti rineia bwa ti na kakoaua.
-
Rinean karikirakean te onimaki iroun te Atua ke n maaku ni kaaitarai kangaanga n te bong are i mwiina.
Ngke I a rinanon te kawai are e kairua ae anaanau, ao n korakai i mwiin ara babaire ae memeere ao n anganiira te rawawata ibukina bwa ti bon kabukintaekaira iai. E ngae n anne, ti kona n rineia bwa ti na karaua nanora man karaoan te rairannano, karaoi bwaai ake a kaairua bwa na eti, ao ni kataia n karekea reireiam man karaoan te bitaki ni maium.
Ti kona n tabetai n noora kaitaraan bwaai ao kataaki man bwaai aika a riaon ara konaa, n aron:
-
Taai ni marurung ao taai n aoraki.
-
Taai n rau ao taai n buaka.
-
Auan te ngaina ma te roo ao tain te kabuebue ma te tain te mwaitorotoro.
-
Taai ni mwakuri ma taai ni motirawa.
E ngae ngke ti bon aki kona n rinea teuana i marenan bwaai aikai ibukina bwa a bon riki irouia, ti teimatoa n kona n rineia bwa tera arora nako iai. Ti kona ni karaoia ma anuara aika a raoiroi ke kantaningaan baika a bubuaka. Ti kona ni karekea reireiara man bwaai ake ti a tia n rinanona ao ni bubuti ana buoka ma ana boutoka te Uea, ke n iangoia bwa bon ti ngaira ni kaaitara ma ana kangaanga ao karawawataaki i nanona. Ti kona n “Ibita maiura” nakon te maiu ae boou, ke ni baireia bwa e na akea te bwai ae ti na ibitia. N rootongitong te bong, ti kona ni kaurai ara taura. N tain te mwaitorotoro, ti rineia bwa ti bwaini onea aika matenten. N taai n aoraki, ti kona n ukori bwain aoraki ao ana ibuobuoki te tamnei ae raoiroi. Ti bon rineia bwa tera arora ni kaeka nakon kangaanga aikai.
Bitaki, Reiakina, Ukoukora, Rineia bon taian weabe ni kabane. Uringnga bwa ngaira aomata ma tiaki taian bwai. Ao ti na aki mwaninga ana berita Iesu nakoira are e “na uota i aona marakiia ao aorakiia ana aomata … bwa e aonga … ni buokiira” ngkana ti rairaki Nakoina. Kam kona n rineia bwa kam na katea aami i aon te bwaa are Iesu Kristo, bwa ngkana e roko te ukeuke n anti “e na bon akea korakorana [i aora].” E a tia n beritanna bwa ane roko n [nakoina] ao e na butimwaia, ao [E] na mwaneia ake a nakoina; ao a na kakabwaiaki akana roko [nakoina].”
Ao ngkai, iai riki te reirei teuana ae moan te kakawaki. E taekinna Riaai “bwa e riai ae na iai … kaitaraan bwaai ni Kabane.” E nanonaki n aei bwa e kaoti n taainako te kakaitara. A uaia n airiiri n taainako. Ti aki kona n ata te kimwareirei ni karokoa ti rinanon moa te rawaawata ao te maraki. Namakinan te baki n taai tabetai e bon buokiira n ataa te kakaitau ngkana e a manga rangi n tau kanara ae ti na kanna. Ti bon aki kona n ataa te koaua ni karokoa ti rinanon moa te mwamwanaeaki n taai tabetai.
Kaitaraan bwaai aikai bon titebo raoi ma uaiteran te koin ae ti teuana. A uaia n oti iterana ni kauoua. E kaota katotoon te iango aei Charles Dickens ni kangai “Iai taai n nakoraoi, ao iai naba taai n nakobuaka.”
I kona n anga te katooto man maiura. Ti mare, ti katea ara utu, ngke a reke natira ao e uota te kimwareirei ae moan te korakora are ti tuai man namakinna i nanon maiura, ao bon te tai naba n rawawata, ni korakai, ao n maraki ngkana iai te bwai ae riki nakon temanna mai ibuakora. Te kukurei ma te kimwareirei irouia natira a kona n rimwiiaki naba ma taai n aoraki, n tikuia n te onaoraki, ao n aki mamatu ibukin iango n raraoma, ao man kakaean te rau n nano man karaoan te tataro ao kakabwaia n te nakoanibonga. Ti reireinaki man ara taneiai aikai bwa ti bon aki tiku n ti ngaira n ara tai n rawawata, ao a kaotia naba nakoira bwa ti kona n uoti rawawatara man ana boutoka ao ana ibuobuoki te Uea. Taneiai aikai a buokiira ni katamaroa kawaira, ao man bongana ni kabane. Tiaki ae aio bukin rokora ikai?
Ti kona naba n kunei katooto aika kakaongora i nanon koroboki aika tabu:
-
E reirei Riaai nakon natina ae Iakoba bwa te karawawataaki are rinanona i nanon te rereua e buokia n ataia bwa e korakora te Atua ao bon ti te “[Atua] ae kona n onea [rawawata] aei nakon taian [kakabwaia].”
-
N ana tai Iotebwa Timiti ni korakai n te karabuuti i Liberty, e tua te Uea nakoina ni kangai “Ni kabane bwaai aikai a na [anganiko] te kataneiai, ao bon ibukin [kabwaiam].”
-
Kabaneana, ana kamaiu Iesu Kristo ngke e anga ngaia bwa te karea bon te banna ni katooto ae korakora are e maraki ma te korakai, ao e uota naba te kakabwaia ae tamaroa n Ana Mwakuri ni Kamaiu nakoia natin te Atua ni kabane.
E ngae ngke iai otantaai, e na bon kaoti naba te nuu. E kona n urubwai te ieka, ma e kona naba n uota te maiu. Te ran ni mata ibukin te rawawata e kona ni bitaki nakon te rau n nano ao te kukurei. Namakinan te nanokawaki ni buan raora temanna ae tangiraki e kona n oneaki nakon te kukurei ngkana a manga kaitiboo riki kaua. N tain te uruaki ma te buaka, mwakuri n nanoanga ma te tangira a riki nakoia ake “mata aika na noraba, ma taninga aika na ongoongo.”
E kaonaki te aonaba n te raraoma ma te karawawataki—ti raraoma bwa tera ae na riki nakoira n taai aika a na roko. Ma e taku Iesu Nakoira bwa ti na onimakinna ao “n rairaki [Nakoina] n ara iango n taai nako; ti na aki nanououa, ao n maaku.”
Ti a kekeiaki ni butimwaei ni kabane kakaitara ake ti na kaitibo ma ngaia i nanon maiura. E ngae ngkana e aki rangi ni mataata nakoira iterana are teuana, ma ti ataia ao ni kakoaua bwa e bon mena ikekei.
Ti kona n ataia raoi bwa ara kangaanga, korakaira, karawawatakira, ao marakira a bon aki kabwarabwaraira; ma a bon tuangiira arora ao ni buokiira ni karikirakeira ao ni kaaniira nakon te Atua. Bon anuara ma ara rinerine aika a kaotai arora n ae tamaroa riki nakon ara kangaanga.
I nanon te marurung, ao ni kakaitau ke ni karabwarabwa ibukin taai akanne. I nanon te aoraki, karekea reireiam ma te taotaona n nano mai iai ao n ataia bwa e kona n bitaki ngkana bon nanon te Atua. I nanon te Korakai, onimaki bwa ko maeka ni kaan ma te kukurei; ti kona n aki nooria. Bita am taratara ao n karikirakea te iango ae tamaroa ni kaitarai kangaanga, ibukina bwa bon akea te bwai ae kananououa! Tai mwaninga n karabwarabwa. Rineia bwa ko na kakoaua. Rineia bwa ko na onimakina Iesu Kristo. Rineia bwa ko na onimakina te Atua n taainako. Rineia bwa ko na “iangoa te abanuea ae tiretio,” n aron are e a tia n reireiniira Beretitenti Russel M. Nelson!
Ti riai ni boutoka n taainako n ana babaire Tamara are I karawa ibukira ae moan te tamaroa. E tangiriira n te aro bwa e kanakoa Natina bwa e na buokiira n ara kangaanga ao ni kauka te mataroa ibukira bwa ti na oki n Nakoina. E maiu Iesu Kristo ao n tei irarikira n taainako, ao n tataningaira bwa ti rineia ni wetea Arana bwa e na anganiira te buoka, te korakora, ao te kamaiuaki. I kakoauai bwaai aikai ni kabane n aran Iesu Kristo, amen.