Te Bitaki ae ai aron te Ai ae Raba i Nanora
E ongo ara tataro te Atua ni kabane ake ti taekin ao e na kaekaira ni kaineti ma ana babaire are E a tia iangoi ibukin kororaoira.
Tariu ao mwaneu, I a tia n karekea te reirei nakoiu man au kabanea n tai n tei n te tabo n taetae aei n Okitobwa 2022. Te reirei anne e kangai: ngkana ko taekin bwaai aika aki kariaiakaki, ao ko kona ni katukaki man maungatabu ake i mwiina. N aron ae kam nooria I a mwiokoaki bwa N na moantaai n taetae n te moan tetere aei. Te bwai ae kam aki nooria bwa I tei i etan te mataroa ae uki nako naano ae kai uki nako. Ngkana e aki nakoraoi au marooro aei, ao N na manga aki noori ngkami inanon tabeua maungatabu.
N namakinan te tamnei man anene aika tamaroa ma te kuaea ae kakateke, I karekea te reirei n te tai ae aki maan, man ana ibuobuoki te Uea, ao I tangiria ni kan tibwaia ma ngkami n te bong aei. E na boboto au marooro bon i aou.
Te bwai ae rang kammaraki irou ibuakon bwaai ni kabane ake I a tia n rinanona bon maten kainabau ae tangiraki irou ae, Pat. Bon te aine ae rianako arona ae I a tia n ataia—te kainaba ao te tina ae kororaoi, bon te aine ae tamaroa, arona ni kakaota bannana, ni maiuna te itiaki. Teuana ana marooro ae atunaki n ae kangai “Kakoroan Nanon te Kaantaninga ni Karikakim.” I nooria bwa e bon kakoroa nanon te kaantaninga ni karikakina ma te tokanikai nakoia ake a kakoroa nanona n te mii. Bon natin te Atua ngaia ae kakaonimaki, ao te aine ae kakaota bannan Kristo. I rang kakabwaiaki ngkai I kona ni kabanea 60 te ririki ni maeka ma ngaia. Ngkana I teimatoa n tau, ao e na bon koro nanon ara kabaebae ao ni maeka ma ngaia n te maiu are akea tokina.
Te taneiai are imwiina e reke 48 te aoa i mwiin taunakin kainabau. Te tai anne, ao I bon karinaki n te onaoraki ao n anganaki bwainaoraki ibukia aoraki aika kakaiaki. I kabanea aua moan wiikin tikuu ae onoua te wiiki maana n aia tabo aoraki aika kakaiaki ao n aki ataa te bwai ae riki.
Te bwai ae e riki bwa au taneiai i nanon te onaoraki ni moan te tai anne a bane ni bua. Au ururing are e aki bua bon mwamwanangara i tinanikun te onaoraki, ai aron ae kanga te mii. N na aki bati n taekina te bwai ae e riki nakoiu ikai, ma I kona n taekinna bwa tabeua mwakorona ake I a karekea bon tuangakiu bwa N na okira au mwakuri n te tai ae waekoa, ma te nano n tituaraoi, ni kaineta au taratara nakon te Tia Kamaiu, ni kakorakora riki te onimaki n Ana taeka.
I namakinna n te bwai ae I rinanona aei bwa I karekea te kaotioti are e kaotaki nakoia Abotoro ake tengaun ma uoman 200 te ririki n nako:
“Ao ko na kaota koauan arau … [ao] ko na kanakoa au taeka nako tabotabon aonaba. …
“… Nii katoa ingabong, ao ni katoa bong e riai bwanaam ni kauring ni waaki; ao ngkana e roko te tairiki a aki riai kaain te aonaba ni matu, ibukin am taetae. …
“Teirake[,] … tabeka rake ami kaibangaki, [ao] rimwiiai.”
Tariu ao mwaneu aika kam tangiraki, man au taneiai aikai, ao I kataia n tabeka rake au kaibangaki, ni kakaea te tabo ae N na kona iai ni kaota te bwanaa ni kauring ni katoa moaningabong, i nanon te ngaina, ao ni karokoa te tairiki.
Anne ae e a kairai nakon te kateniua n iango are roko irou n namwakaina n namakina te bua, te aoraki, ma te koraki. Bon te kakoaua ae kabouaki ibukin ao te kakaitau ae akea tokina n taian tataro man te Ekaretia aei—ami tataro—are I a karekea uaana. E na aki toki au kakaitau ibukin aia bubuti ngaa n aomata, n ai aron ana bubuti te aine ae mate buuna, ae okioki n ukora te buoka mai karawa ibukiu. I karekea te kakabwaia man te nakoanibonga, ao I nooria raou n reirei ngkoa n te kauarinan bwa aki-mamatam ibukiu, ao ai aroia naba uoote aika mwaiti n Ekaretia ni kabuta. E na bae ni mena naba arau ibuakon ara ake a tataroakinaki n ana tembora nako te Ekaretia.
I nanon au karabwarabwa ibukin mwakuri aikai, I reita G.K Chesterton, ngke e taku “te karabwarabwa bon te bwai ae rietaata iangoana, ao … kakaitau bon te kakukurei are kataboroaki man te miimi.” Ma “kukureiu ae I aki kantaningaia.” I karabwai ngkami ni kabane ao I karabwa naba Tamau are i Karawa, ngkai e kona n ongo ami tataro ao ni kakabwaiaki iai maiu.
Tariu ao mwaneu, I kakoauaa bwa e ongo ara tataro te Atua ni kabane ake ti taekin ao e na kaekaira ni kaineti ma ana babaire are E a tia iangoi ibukin kororaoira. I ataia bwa a mwaiti ake a tataromwaaka ibukin kaokan marurungiu, ao n—raonaki ma ngai—ti tataro naba ibukin kaokan marurungin kainabau. I kakoauaa bwa ara tataro aikai e ongo ao ni kaekaki iroun Tamara are i Karawa, e ngae ngke tataro ibukin Pat a bon aki kaekaki nakon are I tangiria. Bon ti te Atua ae ataa bukina bwa bukin tera a kaokoro kaekan tataro ma ake ti kantaningaia—ma I berita nakoim bwa a bon ongoraeaki, ao a bon kaekaaki nakon bon oin Ana tai ao nanona n tangiriira.
Ngkana ti “bubuti n ae riai,” ao e na akea tokina bwa n ningai, iaa, ke tera ae ti na tataro ibukina. Ni kaineti ma taian kaotioti, ao ti riai “n tataro n taainako.” E taku Amureki, bwa ti riai n tataro, ibukia “ ake a mena i rarikimi,” ma te kakoaua bwa “e bati ni mwaaka ana tataro te [aomata] ae bati ni kakaraoa te raoiroi.” Ti riai n tataro n takarua ngkana bon ti ngaira ao akea ae noorira ke n ongo. Ngkana ko tuai kakaraoa anne, ao ko riai n tataro i nanom. Ti anene bwa tataro bon “baika a raba inanora ae ai aron te ai,” n tataekinaki, ni kaineti nakon te Tia Kamaiu, nakon te Atua are akea Tokina n aran Natina ae ana Rikitemanna.
Raou aika kam tangiraki, ara tataro bon aoa aika tamaroa,” e moanibwai i nanora “tangirana,” bon arora, ni kaota nanora n nebonebo. Ti riai n tataro i bon iroura, n ara utu, ao n taabo ni kabane. E na riki te tataro bwa nangoara man taian kariiri, ao ngkana iai taai aika ti namakinna bwa ti na aki tataro, ti kona n ataia bwa e bon aki roko te kaantaninga anne mai iroun te Atua, bwa e tangiria te Atua ni kan reitaki n taainako ma natina. Ao e koaua, tabeua mwakuri ake a kairiira nakon aki karaoan ara tataro a bon roko mai iroun te tia kakaitara. Ngkana ti aki ata arora n tataro, ti riai ni waaki, ao n reitinako, ni karokoa e na kairiira nakon tataro ake ti riai n atong te Tameni are e Raoiroi. Ti riai ni karaoa aei ngkana ti tataro ibukia ara kairiiribai ao naake a bwainikiriniira.
N tokina, ti kona n noora ana katooto te Tia Kamaiu are aki toki n tataro, n taainako. Ma I mimi n taainako bwa e aera ngkai Iesu e kainanoa te tataro. Tiaki ae E bon kororaoi maiuna? E aera ngkai E kainanoia n tataro? Eng, I ataia bwa E karaoia naba, ma ngaira, n tangiria ni kan “ukoukora [te Tama]”, ni kakoauai ana taeka, ao ni kaonaki n ana karatia.” N te taina, E kararoaia aomata ao n reitaki ma Tamana are i Karawa n te tataro. N taai tabetai, E bon tataro n ikotaki ma tabeman raona. Imwiina E ukora karawa n tataro ibukiia aomata ake a kaona rarikin te maunga. N tabetai tataro a kamainanina Kunikaina. N tabetai tataro a kaotaa moana. N tabetai ao E tei n tataro, tabetai e katorobubua, ao iai te taina are E a bon bwaka iai nako aontano n tataro.
E kabwarabwara Ruka bwa e karinanoa Iesu ni koraki ibukin ara bure ngaia are E riai n “korakora ana tataro.” E na kanga n riki ae te aomata ngaia ae rangi ni kororaoi maiuna ao e na korakora riki ana tataro? Ti kakoaua bwa a korakora ana tataro ni kabane, ao kakoroan nanon Ana mwakuri n anga karea ao rinanon te maraki are e karekea, E namakinna bwa e na tataromwaaka riki, ma rawawatan are E anga e karekea tinakon te raraa man bwangabwangan kunin rabwatana.
Ni kaitara tokanikain Kristo i aon te mate ao Ana bwaintituaraoi nakoiu ae ngkai nakoiu ae tabeua riki wiiki ke namwakina n te maiu aei,, I kaota au kakoaua bwa bon iai te maiu i mwiin te maiu aei ao ti riai ni babaire raoi ibukin uaiakinan te roko iai.
I kaota koauana bwa ngkana e roko Kristo, E bon tangiria moa ni kinaira—n aki taraia bwa membwa aika ti mamaara ma e na kinaira bwa ti teimatoa, ni kakaonimaki n ara koaua, ao taan iriiria ngaia aika ti kawakin ara berita. Aio bon te bwai ae rang kakawaki ibukira ni kabane, ti na bon uringaaba ngkana ti ongo: “I bon aki atai ngkami ma ngkoa,” ke, n ana rairairi Iotebwa Timiti, “[Ko] bon aki kinaai.”
Ti tekeraoi, bwa iai buokara n tabera—te buoka ae bati. Ti riai ni kakoauaia anera ma kakai ao berita n te nakoanibonga ae tabu. Ti riai ni kakoaua n ana bwai n tituaraoi ae te Tamnei ae Raoiroi, aia ibuobuoki rao ma utu aika raoiroi, ao mwaakan ana tangira ae itiaki Kristo. Ti riai ni kakoauaa te kaotioti ao burabeti, taan mamata, ao taan karekei kaotioti ao Beretitenti Russell M. Nelson. Ti riai ni kakoaua bwa man ara tataro ao bubuti ao maiuakinan te raoiroi ti kona n roko nakon “Maungan Tion, … ana kaawa te Atua ae maiu, kanga ai aron karawa, ao bon te tabo ae rang tabu.”
Tariu ao mwaneu, ngkana ti raira nanora man ara bure ao n roko nakon “te kaintokanuea are e akoaki,” ni katukua i mwaaina ara anga bwai ao ara bubuti ma nanora, ti na karekea ana nanoanga ao mwamwanano ao ni kunea te kabwarabure ni bain Tamara are i karawa ma Ana natina ae ongeaba, kororaoi ao n itiaki. Ngkanne, ma Iobi ao ake e kororaoi aia onimaki, ti na ataia bwa ti na karekea te aonaaba “ae e rangi n tamaroa” atakina. N aran Iesu Kristo, amen.