Kakaonimaki ni Karokoa te Toki

Iroun Titita Andrea Muñoz Spannaus

Kauoman ni Kauntira n te Beretitentii ni Kabuta n te Bootaki n Ataeinnaine

Man baina, ko na kona ni kanakoa ni kabane te Koria ake a kaoti i nanon maium.

Nakoia rao aika kairake, I tangiria n taetae n te bong aei ni kaineti nakoimi—kairake n te Ekaretia.

Ai teuana te ririki man te tai are e weteaki iai ara Beretitentii ni Kabuta n te Bootaki n Ataeinnaine. Mwaitira bwaai aika a tia n riki i nanon te ririki ae nako aei!

Ti a tia ni kaitibo ma aika a mwaiti iroumi ao n tia ni kamatebwaia ana reirei Kristo. Ti a tia n anenei anene, karekeia raoraora aika a boou, ao ni beku ma ngkami n ami komunite nako. Ti a tia ni kakorakoraaki man ongoraean ami kakoaua n tain aia maungatabu kairake ake a waaki n te aonaaba. Ao ti a tia ni ikotaki n nebonebo n ana auti te Uea.

Ni katoaa te tai, ti tibwaa te rongorongo mairoun te Uea ae Iesu Kristo. E na aki kaokoro ma te tairiki aei; Iai au rongorongo ibukimi, kairake n Ana Ekaretia Kristo.

Titiraki aika a Bubura aika a na Iangoaki

Ko a tia ni iangoia bwa ko na kanga ni kakaonimaki nakon te Atua ngkai ko maeka n te aonaaba ni bure? Ko karekea mai iaa te korakora ni waaki rake ao n reitinako ni karaoan ae raoiroi? Ko kangaa n rinanon te kimwareirei ni koaua?

I taku bwa e kona ni ibuobuoki te bwai are a rinanona Tawita ao Koria.

Tawita ao Koria

N te O Tetemanti, a buaka ana taanga ni buaka I-Biritia ma Iteraera, ao ni katoa ingabong ao tairiki, ana toa I-Biritia ae arana Koria e kakawenakoia Iteraera bwa a na un ma ngaia.

Ibuakoia ana botanaomata Iteraera bon Tawita, te tia kawakin tiibu ae te kairake ae e rangi ni uarereke nakon Koria ma e rangi n korakora ana onimaki iroun Iesu Kristo! E anga nanona Tawita bwa e na un. E ngae te uea n tuukia, ma e rineia Tawita ni katuka ana onimaki iroun Iesu Kristo.

Mai i mwaaina, e a tia Tawita n un ma te raian ao te bea. Man baika e a tia n rinanona, e ataia bwa e a tia ni kakawakinna te Atua ao ni katokanikaia. Irioun Tawita, ana mwakuri te Atua bon te kabanea ni mwakuri ae rangi ni kakaawaki. Ma ngaia are, e kabwanina ana onimaki iroun te Atua are e na bon aki kitanna, e rikorikoa nimaua atiibu aika a maran, e anaa ana bana, ao e nako n kaitaraa te toa.

A tuangiira koroboki aika tabu bwa te moan atiibu are e banaia Tawita e rinnako n ramwan Koria, ao ni kabuaa maiuna.

Ukoran te Kaeka

Ngke e kamanena ti teuana te atiibu Tawita ni kamatea iai Koria, e bon tauraoi ma nimaua atiibu. Ma nimaua! E anganai te iango aio bwa N na kanga ni katauraoai ni kaitaraa te aonaaba.

Tera ngke ana atiibu n tatabeua Tawita e tei ibukin te korakora are ti kainnanoia n tokanikai iai ni maiura? Tera ngkanne atibu ake nimaua akanne? I iangoi aika a konaa ni karaoakii aikai:

1. Atiibun au tangira ibukin te Atua.

2. Atiibun au onimaki iroun ara Tia Kamaiu, ae Iesu Kristo.

3. Atiibun te ataibwai ni kinakiu ni koaua.

4. Atiibun au rairannano ni katoabong.

5. Atiibun karekean mwaakan te Atua irou.

Ti na marooroakinna bwa ti na kanga ni kakabwaiaaki man korakora aikai.

Te moan, atiibun au tangira ibukin te Atua. Tangiran te Atua bon te moan tua ae korakora. Te kairi ae Ibukin Kakorakoraia Kairake e reireiniira: “E tangiriko te Atua. Bon Tamam Ngaia. E kona ni kaunga nanom Ana tangira ae kororaoi bwa kona Tangiria. Ngkana am tangira ibukin Tamam are i Karawa bon moan te kakaawaki ni kakairi i nanon maium, a na riki ni bebete am babaire aika a mwaiti.”

E anganiira te korakora are ti kainnanoia ara tangira ibukin te Atua ao ara reitaki ni kaan ma Ngaia ni bitii nanora ao ni kabebetea riki tokanikaira n ara kangaanga.

Te kauoua, atiibun au onimaki iroun ara Tia Kamaiu, ae Iesu Kristo. Ngke e roko Iesu Kristo nakon te aonaaba, E maraki ibukin ara bure, ao E katokaa i aona rawaawatara, marakira, ao mamaarara, ao aorakira n rabwatara ao n ara iango. Anne bukina ae E ataa aron buokakira. Karekean te onimaki iroun Iesu Kristo nanona onimakinana ni koaua ni Wanawananana, Ana tai, Ana tangira, ao Mwaakana ni kamaiu ibukin ara bure. Atiibun te onimaki iroun Iesu Kristo e na konai “kataaki aika a bubura” i nanon maiura. Ti kona n tokanikai n te aonaaba ae bubure aei ibukina bwa E a tia moa Ngaia n tokanikai iai.

Nambwa teniua, atiibun te ataibwai ni kinaakiu ni koaua. E reireiniira ara burabeti ae tangiraki, Beretitenti Russell M. Nelson, bwa kinaakira aika a rangi ni kakaawaki bwa bon ngaira natin te Atua, naati n te berita ae tabu, ao ana reirei Iesu Kristo.

A bitaki bwaai ni kabane ngkana I ataia bwa antai raoi ngai. Ngkana I nanououa n au konabwai, I aki toki ni kaokiokia nakoiu n au iango ke ni kabaibati, “Ngai natin te Atua te aine,” ni kamwaita taekinana are I kainnanoia ni karokoa e a manga matoa nanou ni waaki nako.

Te kaaua, atiibun au rairannano ni katoabong. I nanon te boki ni kairi ae Ibukin kakorakoraia Kairake ti warekia: “Te rairannano bon tiaki te katuaa ibukin te bure; bon te kawai are e kainaomataira iai te Tia Kamaiu man te bure. Te rairannano nanona te bitaki—kitanan te bure ao ni waaki nakon te Atua. E nanonaki iai bwa te katamaroa ao karekean te kabwarabure. Te aeka ni bitaki aei bon tiaki teuana taina n riki; bon te waaki ae reitinako.”

Akea te bwai ae kainaomataira riki nakon namakinan ana kabwarabure te Atua ao ataakina bwa ti itiaki ao n raoiakiniira ma Ngaia. E kona n reke te kabwarabure ibukia aomata ni kabaneia.

Te kanimaua n atiibu bon atiibun karekean mwaakan te Atua irou. Berita aika a tabu ake ti karaoi ma te Atua, n aron ake ti karaoi n te otenanti ni bwabetito, e karekea nakoira mwaakan te aro n atua. Mwaakan te Atua bon te mwaaka ni koaua are e buokira ni kaitarai kangaanga nako, karaoi rinerine aika a raraoi, ao e karikirakea ara konaa n teimatoa i nanon waaki aika a matoatoa aroia. Bon te mwaaka are ti kona n rikirake iai ni konabwai aika a onoti aika ti kainnanoi.

Te boki ni kairi ae Ibukin Kakorakoraia Kairake e kabwarabwaraa: “Berita aika a tabu a reitiko nakon Tamara are i Karawa ao te Tia Kamaiu. A karikirakea mwaakan te Atua i nanon maium.”

Ti a Marooroakina aron te reitaki anne. Kam uringnga ngke e reirei Iesu te kaokoro i marenan te auti are e kateaki i aon te bwaa ao teuana i aon te bike? E kabwarabwara Unimwaane Dieter F. Uchtdorf: E aki bwaka te auti n te buaka ae korakora ibukina bwa e matoatoa te auti. E aki naba bwaka ibukina bwa e matoatoa te bwaa. E aki bwaka te auti n te angbuaka ibukina bwa e nim nakon te bwaa ae matoatoa. Bon matoan te reitaki/toma nakon te bwa ae e kakaawaki.”

Reitakira iroura nakon Iesu Kristo e na anganiira te ninikoria ao te nanomatoa ni waaki nako ibuakoia aomata ake a aki karinea ara koaua ke ake a iowaawa nakoira. E kaoira Kristo bwa ti na Kawakinna n ara iango n taainako; E tuangiira, “Tanimai nakoiu n ami iango nako.” E anganiira te ota raoi n te iango iangoan te Tia Kamaiu ni karaoi babaaire, ni mwakuri n akea te maaku, ao n taekina tiaki ngkana e kaitaraa ana reirei te Atua. Ngkana e nakobuaka au bong ao I namakinna bwa kanga I a aki konai uotau, e uota te rau iangoan Kristo ao n anganai te kaantaninga.

Ti na kanga ni kabonganaa mwaakan Iesu Kristo? Taian kiing bon te ongotaeka nakon ara berita aika a tabu ao karikirakean ara onimaki iroun Iesu Kristo.

I bon iangoia irou bwa tera ngke iai riki teuana ana atiibu Tawita; ae e na riki bwa atiibun au kakoaua. A kateaki ara kakoaua i bon iroura man waaki n tamnei ake ti rinanona are tina kinaa iai mwiina ae mairoun te Atua i nanon maiura. Akea temanna ae e kona n anaa te atatai anne mai iroura. Ataakina bwa tera ae ti ataia man maiuakinan te maiu n tamnei bon akea boona. Te kokoaua nakon te atatai anne e anganiira te inaomata. E anganiira te kimwareirei! Ngkana ti tangira te koaua, ti na ukoria, ao n te tai are ti karekea iai, ti na kamanoa.

Te Kakao

N aron ae I rinea te kaonoua n atiibu,, I kaoko bwa ko na bootaki ma am kiraati, kooram, ke am utu ao ni iangoia bwa tera kakorakora tabeua ae ko kainnanoia ni karekea bwa ko aonga n teimatoa ni kakaonimaki nakon te Atua ao, ngkanne, ko na tokanikai n te aonaaba.

Te Berita

Nakoia raoraora, e ingainga Kristo n raoniira n ara borau ni maiura. I berita nakoimi, bwa ngkai kam taua ni kamatoa te kai te biti, kam na nakonako ni ikarekebai ma Iesu Kristo. E na kairiko, ao E na reireiniko Ngaia Man baina, ko na kona ni kanakoa te Koria ni kabane ake a kaoti i nanon maium.

Kakoaua

I kakoaua bwa iai te kimwareirei i nanon te tataro ni katoabong, ni warekan Ana Boki Moomon ni katoabong, ni kanakin te toa ni katoa Tabati, ao n iriiran te Tieminari—are n te moaningabong! Iai te kimwareirei ni karaoan ae raoiroi.

Iai te kimwareirei ni maiuakinan te kakaonimaki nakon Atuan te aonaaba, ana Tia Kamaiu te aonaaba, aia Uea ueea. Iai te kimwareirei n te riki bwa ana reirei Iesu Kristo.

Te Atua bon Tamara. E ataa are e tangiria nanom ao am konabwai, ao E onimakiniko.

Nakoia kairake, E na buoki ngkami Iesu Kristo bwa kam na kakaonimaki ni karokoa te toki. Man koaua aikai I kaota au kakoaua, n aran Iesu Kristo, amen.

Bwaai aika a na taraaki

1. Taraa 1 Tamuera 17.

2. Taraa 1 Tamuera 17:40, 45–49.

3. Taraa Mataio 22:36–38.

4. Ibukin Kakorakoraia Kairake: Te Kairi ibukin Karaoan Rinerine (2022), 11.

5. Taraa Aramwa 7:11–14.

6. Taraa 1 Nibwaai 7:12.

7. Taraa Russell M. Nelson, “Tokanikai man te Aonaaba ao Kunean te Rau,” Riaona, Nobembwa 2022, 95–98.

8. Taraa Russell M. Nelson, “Choices for Eternity” (worldwide devotional for young adults, May 15, 2022), Gospel Library.

9. Taraa “Young Women Theme” ao “Aaronic Priesthood Quorum Theme,” Gospel Library.

10. Ibukin Kakorakoraia Kairake, 7.

11. Taraa Russell M. Nelson, “Mwaakan Karaoan ae Raoiroi,” Riaona, Meei 2022, 97–100; taraa naba Reirei ao Berita aika Tabu 84:19–21.

12. Taraa Te Aeniboki ni Kabuta: Te Beku n Ana Ekaretia Iesu Kristo Ibukiia AikaItiaki ni Boong aika Kaitira, 3.5, Gospel Library.

13. Ibukin Kakorakoraia Kairake, 34; kaairaki kamatataana.

14. Taraa 3 Nibwaai 14:24–27.

15. Dieter F. Uchtdorf, “For the Strength of Youth: The Savior’s Message to You,” For the Strength of Youth, Maati 2024, 38.

16. Reirei ao Berita aika Tabu 6:36; e kairaki ma katuruturuana.

17. Taraa Reirei ao Berita aika Tabu 6:33–34.

18. Taraa Dallin H. Oaks, “Testimony,” Riaona, Meei 2008, 26–29; taraa naba Aramwa 5:46.

19. Taraa Ibukin Kakorakoraia Kairake, 32: “Love the truth so much that you would never want to steal, lie, cheat, or deceive in any way—at school, at work, online, everywhere. Riiki n aron te tia ririmwia Iesu Kristo ae kakaonimaki i mataia aomata ao ngkana ti ngkoe iai.”

20. Taraa 1 Nibwaai 8:19, 30; 15:24–25; Ereman 3:29–30.

21. Taraa 3 Nibwaai 22:13.