Kam na Karina te Uea are Iesu Kristo
Man karinean ara berita aika tabu, ti angan te Atua ana tai n kabwaroi kakabwaia aika a tia ni beritanaki ake a irekereke ma berita akanne.
I nanon ikawairakeia natiu au bina aika uoman, I kunei booki aika a kaunga ao man kareke ma a kabonganai naba kanikinaa n aia karaki. N ara tai n wareware n te tairiki, I tatangiria n buokia natiu bwa a na oota ni kanikinaa ake e kaboonganai te tia korokaraki n reiakinii reirei aika nano, riki reirein te euangkerio.
I ataia bwa e a moanna n reke te reirei n te bong teuana ngke natiu te mwaane ai tebwii tabun ana ririki. E boou ana boki are e warekia ao e a bon tii tangiria n wareka te karaki, ma n ana iango e kataia n kakaea nanon te karaki ae nano ni bwaai ni kabane ake e warekii. E rangi n ebu nanona, ma ngai I bon rangi ni kukurei nanou.
E reirei Iesu rinanon karaki ma kanikinaa—uaan te mwakeke e reirei korakoran te onimaki, te tiibu are e bua e reirei kakawakin maiun temanna, te nati are e bakatae n reireiniira anuan te Atua. Ana reirei ni kaikonaki bon man kanikinaa ake E kona n reirei iai n reirei aika a nano nakoia naake iai “taningaia ni kakauongo,” Ma naake a aki ukora nanon te karaki ae nano a na bon aki oota, n ai aron mwaitin booki ake I warekii nakoia natiu ao a aki oota n nanon te karaki ake a nano ao man bati riki ake a konaa n reke riki man karaki akekei.
Ngke e anga Natina Ana Riki Temanna te Atua bwa te karea ibukira, E riki Iesu Kristo bwa te kainikinaa ae moan te rietaata n aron kaotan ana tangira Tamara are I Karawa ae e aki toki ibukira. E riki Iesu Kristo bwa Ana Tiibu te Atua.
E reke iroura te tai ao te kakabwaia n kaoaki nakon te berita ae tabu ma te Atua, ike maiura e a reke bwa te kanikinna n te berita ae tabu anne. Berita aika tabu e karekea te irekereke anne are e anganaki iai te Atua n bitiira i nanon taina ao man tabekiirarake bwa ti na riki n ai aron te Tia Kamaiu, ao n kaaniira riki ma Ngaia ao Tamara ao i nanon taina e katauraoira n rin i rarikiia.
Aomata nako n te aonnaba bon natin te Atua mwaane ao aine. Ngkana ti rineia bwa ti na riki bwa kaain te berita ae tabu, e karikirakea ao man kananoa riki irekerekera ma Ngaia. E reirei Beretitenti Russell M. Nelson bwa ngkana ti rineia bwa ti na karaoa ara berita ae tabu ma te Atua, reitakira ma Ngaia e a kaan riki i mwaain karaoan ara berita ae tabu, ao e anganaki iai te tai bwa E na kona n kakabwaiaira ma Ana nanoanga ao ana tangira, are e aranaki bwa te hesed n te taetae n Ebera. Kawain te berita ae tabu bon i aon raoi ara reitaki ma te Atua—ara tangira n reitakira ma Ngaia.
E tangira te reitaki Tamara ae nano ma Natina mwaane ao aine ni kabane, ma anne bon ara rinerine. Ngkai ti rineia bwa ti na kaniira riki ma Ngaia rinanon te reitaki n te berita ae tabu e anganiira te kariaiakaki bwa ti na kaaniira riki ma Ngaia ao ni kakabwaiaira raoi.
E kawenei tuua te Atua ma baika a kaantaningaki n irekereke ma berita aika tabu. Ngkana ti rineia n rin i nanon te reitaki anne, ti kakoauaa Nakoina, rinanon ara mwakuri aika kanikinaean te berita, bwa ti kukurei ni irii tuana ake E a tia ni kawenei. Man karinean ara berita aika tabu, ti angan te Atua ana tai n kabwaroi kakabwaia aika a tia ni beritanaki ake a irekereke ma berita akanne. n ikotaki ma te korakora ae raka n bitiira ao n riki n Ai aron ara Tia Kamaiu. Iesu Kristo bon boton berita aika tabu ni kabane ake ti karaoi, ao kakabwaia man berita aika a tabu a reke man Ana mwakuri ni Kamaiu.
Te Bwabetito e bon tei bwa te kanikinaa ike ti a rin iai i nanon te berita ae tabu ma te Atua. Man kateboakira i nanon te ran ao manga otirakera ngaia naba te kanikinaa i aon maten te Tia Kamaiu ao manga utina nakon te maiu ae boou. Ngkai ti bwabetitoaki, kanga ai aron ae ti mate ao ni manga bungiaki nakon Ana utu te Atua ao ti kaota nanora bwa ti kukurei n katokaa Arana i aora. Ti tei n rabwatana te berita ae tabu rinanon te kanikinaa. N te Nu Tetemanti ti wareka ae kangai, “Bwa ngkami ni kabaneingkami akana kam bwabetitoaki nako nanoni Kristo, kam a karina Kristo.” Man bwabetitoakira ai aron ae ti katokaa i aora Kristo.
Te otenanti ae te toa e kaeineti naba nakon Te Tia Kamaiu. Te kariki ao te ran a tei ibukin irikon ao raraan Kristo are e a tia n anga ibukira. Ana bwai n tangira are man Ana mwakuri ni kamaiu e tei nakoira ni katoa wiiki ngkana temanna ae iai irouna te nakoanibonga, are e tei ibukin Kristo, anganiira te kariki ao te ran. Ngkai ti karaoa te mwakuri man kanakin ao nimakin kanikinaan irikona ma raraana, Kristo e a rin naba i nanora. Ti a bon kaakatokaa naba i aora Kristo ngkai ti karaoa te berita ae tabu ae boou ni katoaa wiiki.
Ngkai ti karaoi berita aika tabu ma te Atua i nanon Ana auti te Uea, ti karaka nanon ara reitaki ma Ngaia. Bwaai ni kabane ake ti karaoi i nanon te tembora e kaeineti nakon ana babaire Tamara ibukira, are e bon kaeineti ni koaua nakon Te Tia Kamaiu ao Ana mwakuri ni kamaiu. E na reireiniira te Uea teutana i mwiin teutana rinanon kanikinaean tenaan otenanti ao berita aika tabu ngkai ti kaukii nanora ao n nanomwaaka n tataro n ukorii nanona aika a nano.
Mwakoron te entaumente n te tembora, ti kariaiakaki ni bwaina te kaamenti man te nakoanibong ae tabu. Bon te mwioko ae tabu ao te kakabwaia ae tabu naba.
N aia waaki aaro aika a mwaiti, e bwainaki kunikai bwa kanikinaean ana koaua ao ana kakaonimaki te aomata nakon te Atua, ao kunnikai aika a tabu a bwainaki irouia ake a kaira te botaki n nebonebo. Kunnikai ake a bwainii a uota te rongorongo ae nano ibukiia nake a bwainna. Ti warekia ni boki aika tabu bwa n taai ake ngkoa, kunnikai ni karao taromauri a bwainaki naba ngkoa ni kaeineti ma mwakuri i nanon te tembora.
Ngaira aika membwa n Ana Ekaretia Iesu Kristo ibukiia Aika a Itiaki ni Boong aika Kaitira, naake a tia n rineia n karaoi aia berita aika tabu ma te Atua i nanon te tembora a bwainii kunnikai aika tabu i nanon tain te neboneno i nanon te tembora, kanga ai aroia naake ngkoa. Ti bwainii naba kamente n te nakoanibonga ae tabu, n tain naba te nebonebo n te tembora ao inanon maiura ni katoabong.
Te kaamenti n te nakoanibong ae tabu bon iai nanona ae tabu ao e kainetiira naba nakon Te Tia Kamaiu. Ngke a kana uaan te kai Atam ao Ewa ao a tuangaki bwa a nang riai n kiitana te Nne n Aroka are Eten, a bon anganaki kunnikaia ae kunin te man bwa nangoaia. E bon bae n ae te man are ngaia ae e tiringaki bwa e na karaoaki iai kunnikai akekei—nanona bwa ai bon ana anganano naba Te Tia Kamaiu ibukira. Kaphar bon te taetae n Ebera ibukin te mwakuri ni kamaiu, ao teuana naba nanona ae “ni karaba.” Ara kaamente e kauringiira ae Te Tia Kamaiu ao kakabwaia man Ana mwakuri ni Kamaiu e na kamauiira i nanon maiura. Ngkai ti katokai i aora te kamante n te nakoanibong ae tabu ni katoa bong, te kanikinaa ae tamaroa anne e riki bwa mwakoron maiura teuana.
N te Nu Tetemanti n ana boki I-Rom, ti warekia: E a kani bane te bong, ao e a kaan te ngaina. Ma ngaia ae ti na katikui mwakuri nako aika bwain te roo, ao ti na anai bwaai ni buaka aika bwain te oota. … Kam na Karina te Uea are Iesu Kristo.”
I karabwarabwa n te kakabwaia ngkai I kona ni bwaina te kaamente n te nakoanibonga ae tabu ni kauringai ae Te Tia Kamaiu ao kakabwaia man Ana Mwakuri ni Kamaiu ae akea tokina e na rabunai rinanon maiu ae mamate aio. E kauringai naba ae ngkai I kawakin au berita aika tabu ake I a tia ni karaoi ma te Atua n Ana auti te Uea, I katokaa i aou Kristo, are bon Ngaia te otanga n oota. E na bon kamanoai man te buakaka, anganai te korakora ao te konabwai ae raka, ao n riki bwa ootau ao kairau rinanon te roo ao kakangan te aonnaba aio.
Bon iai nanon te kanikinaa ae tamaroa are n te kamenti n te nakoanibonga ae tabu ao reitakina ma Kristo. I kakoauaa bwa kukurein nanou ni bwaina te kaamenti n te nakoanibonga ae tabu e riki bwa au kanikinaa Nakoina. Aio bon oin au kanikina nakon te Atua, tiaki te kanikina ibukiia aomata tabeman.
I kakaitau ibukin au Tia Kamaiu, Iesu Kristo. Ana mwakuri ni kamaiu e riki nakoira bwa te kanikinaa ae te kabanea n rietata ibukin kaotan Ana tangira Tamara are I Karawa ibukira ni kabane, ma kanikinaa n aron te tangira ao te karea—mmwakan bain, waen, ao rarikin Te Tia Kamaiu—are e tiku i mwiin Maungautina.
Ngkai I kawakinan au berita ae tabu ao onimakinau iroun te Atua, n ikotaki ma bwainakin te kaamente n te nakoanibong ae tabu, e na kona n riki maiu bwa kanikinaean au tangira ao au karabwarabwa ae bati ibukin au Tia Kamaiu, Iesu Kristo, ao nanou bwa E na memena irouna n taainako.
Ngkana ko tuai karaoa aio, I kaoko bwa ko na rineia ni karekea te reitaki ae nano ma te Atua man karaoan berita aika tabu ma Ngaia inanon ana auti te Uea. Kamatebwaia ana marooro ara burabeti (ni ikotaki ma reirei aika a tamaroa n baike a na taraaki i nano n ana marooro, ake bon iai n angiin taian marooro). E taetae ni katoa tai i aon berita aika tabu i nanon ririki ao man te tai are e riki bwa te Beretitenti n te Ekaretia. Reirei man ana reirei i aon tamaroan te kakabwaia ao karikirakean te mwaaka ao te konabwai ae kona n riki bwa am bwai rinanon karaoan te berita ae tabu ma te Atua.
Te Aeniboki ni Kabuta e taekinna bwa e aki kantaningaaki bwa e na reke am wewete n nakon te mition ke ni iai am kabae bwa ko na mareaki ni karaoi berita aika tabu n te tembora. E na riai te aomata n tia ni koro 18 aia ririki, e a bane aia kauarinan, ao a tia ni kaaina te Ekaretia i nanon teuana te ririki. Iai naba te kainibaire ibukin te tau ae mimitong ae kainanoaki. Ngkana iai nanom ni kananoa am reitaki ma Tamam are i Karawa ao Iesu Kristo man karaoan berita aika tabu n Ana auti te Uea, I kaoko bwa kona marooro ma am bitiobi ke beretitenti n te mwaanga ao kaota nanom nakoina. E na buokiko n ataa arom ni katauraoi ni karekea ao ni karinei berita aika tabu akanne.
Rinanon te reitaki n te berita ae tabu ma te Atua, e kona n riki maiura bwa te kanikinaa ae maiu man ara kakaonimaki nakon ao ara tangira ae nene ibukin Tamara are i Karawa ara hesed Ibukina, ao nanora ni kan rikirake ao n tokin te tai ti na riki n ai aron ara Tia Kamaiu, n tauraoi n rinnako i Rarikiia n te bong teuana. I kakoauaa bwa a bon manena kakabwaia aika a bati man te reitaki rinanon berita aika tabu. N aran Iesu Kristo, amen.