Te Korakora, N Okiokiran Tamaroan Ana Reirei Kristo
I kaoingkami bwa kam na kaokioka man kanikoraoa maiuakinan ana reirei Kristo, ao ni buokiia aomata inanon kawaia.
Tabeua te ririki n nako, kainnabau, Ruth, natira te aine, Ashley; ao Ngai, ti raoniia tabeman taan neweaba ni kaiaaki i Hawai i Amerika. Te kaiaaki bon te waa ae rinano, aiaron te waa are e tekateka te tia bwenarina ni katannako mooa ma ana kai ni bwennarina ae uaitera tabona are e na bwenarina iai ni iterana are teuana moa ao imwina te itera are teuana. E baireaki bwa e na waaki te bwenarina nakon uoua atimwakoro ake a uakaan ma biken Oahu ao ni manga oki. I aki maroa kioina bwa ngke te kairake n ataeinimwane ngai, I a tia ni bwenarinaa te kaiaaki inanon nein maunga. E oreaki au kainikatonga,?
Ti anganaki kaetieti iroun te tia kaneweaba ao e kaoti nakoira taian kaiaaki ake ti na kabonganai. A kaokoro ma ake I a tia ni kakabonganai mai mwaina. I taku ngai bwa N na toka iaon te kaiaaki, ma ngaiaI a tekateka inanona. Ngke I tokara te kaiaaki, I namakinna bwa e tabeitera tinebun rabwatau ao I boou iai, ngaia are I a baeranti buaka.
Ngke ti a moana butira, I a bwenako n rimoaia Ruth ao Ashley. E aki maan, ao I a raroa naba ma ngaiia. E ngae ngke I kakatia ni birimwakan waau, ma I a manga tei ao n tataninga kaotiia. Te nao ae bubura—tao 13 te tientemita—e orea iteran waau ao e karanganakoai. Ao ngke I a tia n raira waau ao ni manga toka i aona, I a raroa ma Ruth ao Ashley, ao e a moti ikeu ao I aikoa kona ni bwenarina. Ngke I tabe ni rawerawea ikeu, e manga tei riki te nao—aei e bubura riki, tao 20 te tientemita—e orea waau ao ni karanganakoai kaua. Ngke I a manga raira naba waau, e a bon rangi ni moti ikeu ao e a roko irou are I a maaku bwa I a kan aki konaa n tamwarakea waau.
E noora arou aio, te tia kanebweaba ngaia are e nakoiu ni kabaeranta waau, bwa e aonga ni bebete tokarana irou. Ngke e nooria bwa e a bon moti ikeu n aki kona ni bwenarina, ngaia are e kabaea waau ma waana n te roobu ao e katikai. Ngke e reke ikeikeu ao I a manga bwenarina n ae tau i bon irou. E kabwara te roobu, ao I bon roko n te moan atimwakoro ibon irou. Ngke I roko, ao I bwaka nako aon te bike, ni kua.
Ngke a toki kuaia kaain ara tiim, e taetae nakoiu te tia kaneweaba, “Mr. Renlund, ngkana ko bwenarina, kawakina marurungin rabwatam, N na tuangko ko na bon nakoraoi.” Ngaia are I karaoa nanon are e tuangai ngke ti bwenarina nakon te kauoua n atimwakoro ao ni manga okira ara moan tabo. Tetaina ke uatai e katenaai te tia kaneweaba ao n tuangai bwa I nakoraoi. E ngae ngke e a manga oreaki waau n taian nao aika totoa, I aikoa ranga.
Ibukina bwa I aki katotoka au bwenarina, e teimatoa marurungin rabwatau ao I tabe ni kekerake, ngaia are I koroi naao ake a oreai inanon butiu. E kona ni kauaeaki te reirei aei nakon korakoran maiura n tamnei. Ti kai konaki ngkana ti karaurau ao riki ngkana ti a bon tei. Ngkana ti kateimatoa marurungin tamneira man reitanako ara “bwenarina” nakon te Tia Kamaiu, e raka iai kamanora ibukina bwa ti karekea te maiu ae akea tokina man ara onimaki Irouna.
Marurungin tamneira e bon karikaki “inanon maanin ara tai ni maiu ngkana ti okiokira mwanean ana reirei Kristo.” E reirei, Bereititenti Nelson bwa karaoan aei, e karika “te korakora n okiokiran te tamaroa.” Eang, kanoan Ana euangkerio Iesu Kristo—n aron onimakinan Iesu Kristo, te rairannano, karaoan te berita ae tabu ma te Uea rinanon te bwabetito, karekean ana bwaintituaraoi te Tamnei ae Raoiroi, ao te teimatoa ni karokoa te toki—a bon aki kantaningaaki bwa tetaina karaoakia, ke n taraaki bwa baika a tia aroia. Ao riki, “te teimatoa ni uaa te toki” bon tiaki raoi te mwaneka ae kaokoro n ana reirei Kristo—n ai aron ae ti toui mwaneka ake aua ao imwiina ti a tiku n arora, ni karaoi ara waaki, man tataningaa te mate. Tiaki ngaia anne, te teimatoa ni uaa te toki bon kaokiokan karaoan ao kaokiokan mwakurian kanoan ana reirei Kristo, are ngaia ae karika te “mwakaroiroi, n okiokin te itiaki” are e kabwarabwara Beretitenti Nelson.
Kaokiokan karaoana nanona bwa ti maiuakina kanoan ana reirei Kristo n te tai teuana ma teuana inanon maiura. Kaokiokan mwakuriana nanona bwa ti karekea te rikirake ma te tamaroa inanon kaokiokan karaoana. E boni ngae ngke e okioki karaon kanoana, ti aki tiku ni nnera ae ti teuana n akea te rikirake. Ma, ti karaurau ni kaniira riki nakon Iesu Kristo n okioki inanon te kawai aei.
Te marurung bon uoua kanoana bwa birina ao kawaina. Ngke arona bwa I kakorakai ni bwenarina ma kawaiu ae e bure, N na kona ni karika te marurung ae kakawaki, ma N na bon aki roko n au tabo are I kantaningaia. N ti te arona, inanon maiura, ti riai ni “bwenarina” ni kaineta te Tia Kamaiu bwa ti aonga ni kaania.
E riai n ribanaki ara onimaki iroun Iesu Kristo n te bong koraki. E bon wantongaaki man te tataro ni katoa bong, kamatebwaian koroboki aika a tabu ni katoa bong, te kakaitau ibukin ana akoi te Atua ni katoa bong, te rairannano ni katoa bong, ao iriiran ana wirikiriki te Tamnei ae Raoiroi ni katoa bong. N ai aron are ti aki amwarake bwa ti tataninga te Tabati ao ti a kataia naba ni karekei nuaira are ti bon riai ni karekea inanon teuana ni wiki, e aki marurung iai tamneira ngkana arona bwa ti tetaina kamwarakeana inanon te wiki.
Ngkana ti katabeira ibukin ara koaua, ti karekea marurungin tamneira ao man karekea te onimaki ae korakora iroun Iesu Kristo, ao ana reirei Kristo, e riki bwa boton mauira. E marurung naba tamneira ngkana ti ongeaba nakon ana tua nako te Atua man rairannano. E kakukurei te rairannano ao e anganiira te reirei man ara kaairua, ao anne aron te waaki rake n te maiu n tamnei. E na bon iai taai are e na ranga iai waara ao ni kunea bwa ti a mena inanon te marawa ae nano. Rinanon te rairannano, ti kona n raira waara ao ni manga reita kawaira, n aki tarai mwaitin ara tai ni bobaraki. Te bwai ae kakawaki bwa ti na aki bwarannano.
Te kanoa are imwina n ana reirei Kristo bon te bwabetito, are e raonaki ma te bwabetito n te ran ao, rinanon te kamatoaaki, are bon te bwabetito n te Tamnei ae Raoiroi. E ngae ngke ti te taina te bwabetito, ma ti kakaboua ara berita n te bwabetito ni kanakin te toa. Te toa bon tiaki oneam mwin te bwabetito, ma e toma te moan ao te kauoua ni kanoa n ana reirei Kristo—te onimaki ao te rairannano—ma karekean te Tamnei ae Raoiroi. Ngkana ti kana te toa ma nanora ni koaua, ti kaoa te Tamnei ae e Raoiroi nakon maiura, n aiaron are ngke ti bwabetitoaki ma ni kamatoaki. Ngkae ti kawakin berita ake a taekinaki n te tataro n toa, e raonira te Tamnei ae Raoiroi.
Ngkai e bati korakoran te Tamnei ae Raoiroi inanon maiura, ti karekea iroura anuan te Tia Kamaiu ma te rikirake ao te nikoraoi. A bitaki nanora. E memeere nanora ni kan karaoa ae buakaka. E a korakora riki nanora ni kan karaoa ae e raoiroi ni karokoa are ai ti teuana nanora bwa “karaoan ae raoiroi n aki toki.” Ao ikanne are ti a karekea iai mwaakan karawa are ti kainnanoia ibukin te teimatoa ni uaa te toki. E rikirake ara onimaki, ao ti a tauraoi ni manga toua te kawai ae mwakaroiroi man itiaki.
Reken karaoan ae raoiroi e kairiira naba nakon karaoan riki ara berita aika tabu ma te Atua n ana auti te Uea. Berita aika tabu aika a bati, a kaanira ma Kristo ao ni kamatoatoa ara reitaki ma Ngaia. Rinanon berita aika a tabu, ti kona ni karekea riki Mwaakana. E na mataata, bwa te bwabetito ao berita aika tabu n te tembora tiaki, bwaai aika ti na kona ni karekea iai te mwaaka. Te mwaaka e nako mai iroun te Uea Iesu Kristo ao Tamara are i Karawa. Karaoan ao kawakinan ara berita aika tabu e karika Mwakaia inanon maiura. Ngkai ti maiu ni kaineti nakon berita aika a tabu aikai, ti riki bwa taan bwaibwai n ana bwai ni kabane Tamara are i karawa. Te korakora are e reke man maiuakinan ana reirei Kristo e aki ti bita arora n onikiira nakon te maiu ae akea tokina ma e kaungaira naba bwa ti na buokiia aomata n ae riai.
Iangoa aron te tia kaneweaba bwa e kanga ni waekoa ni buokai inanon baraakin waau. E aki takarua man te tabo ae raroa n aron aei, “Mr. Renlund, e aera ngkai e baraaki waam?” E aki buti nakoiu man bwauranai, ni kangai, “Mr. Renlund, e na bon aki kona n riki aio nakoim ngke arona bwa e marurung rabwatam.” E aki katika waau ngke I tuai toka raoi iaona. Ao E aki kaetai i mataia aomata. Ma, e tobwaa te kainnano are I kainnaoia n te tai arei. E anganai taeka ni kaunganano ngke I a tauraoi n ongora. E aki maaku ni kaunga nanou.
Ngkai ti buokiia aomata, ti riai n aki tabeki titiraki aika a kamwengabuaka ke aika a na karika te kamaama. Bon angiina aomata ake a rootaki a bon ataia ae a rootaki. Ti riai n aki motiki taeka; e na kona n ibuobuoki ke e aki butimwaeaki ara motiki taeka ao n angiin te tai, e aanaki n te nano ae baereka.
Kabotauan maiura ma aomata, e kona ni karekei kaairua aika a kakamaaku, riki ngkana ti taraira bwa ti raoiroi riki nakoia naake a rootaki. Te kabotau aei aiaron ae ko bwabwa inanon te ran ae teniua te miita, ao ngke ko noora raom bwa e bwabwa inanon te ran ae aua te miita nanona, ko motika taekana bwa e bati riki ana bure, ao ko taku iroum bwa akea bwakam. Imwiina, ti bane ni kekeiaki n oin kawaira. Akea iroura ae e karekea kamaiuakina. Ti bon aki kona. Iakobwa, n Ana Boki Moomon, e reirei “Uringnga, bwa imwin are [ti] raoiakinaki nakon te Atua, bon ti inanon ao rinanon ana akoi te Atua are [ti] kamaiuaki iai.” Ti bane ni kainnanoa Ana Mwakuri ni Kamaiu te Tia Kamaiu, tiaki ti mwakorona.
Ti na kainanoa te nanoanga ni kabane, te atataiaomata, ao te tangira inanon ara reitaki ma raora. Naake a rootaki “a riai n namakinna bwa ti kaota ana tangira Iesu Kristo n [ara] taetae ao ara mwakuri.” Ngkana ti ibuobuoki, ti teimatoa ni kaungaiia aomata ao n anga baira ni ibuobuoki. Ngkana e tuai tauraoi te aomata, ti teimatoa n anga te ibuobuoki are e tauraoi moa ni butimwaia. E taku te Tia Kamaiu bwa “kam na aki toki n ibuobuoki n aekan aei, bwa kam aki ataa te tai are a na rairaki iai man rairananoia, ma ni kawarai ma nanoia ni kabane, ao N na katoka aorakiia; ao kam na riki bwa taan kamaiu nakoia” Taben te Tia Kamaiu bon te kamarurung. Tabera bon tangirakiia aomata—ti na tangiriia man buokiia aomata n te aro are a na kaan iai nakon Iesu Kristo. Aio teuana mai ibuakon uaan te mwaaka are e reke man ara ongeaba nakon ana reirei Kristo.
I kaoingkami bwa kam na kaokioka man kanikoraoa maiuakinan ana reirei Kristo ao ni buokiia aomata inanon kawaia. I kaota au koaua bwa ana reirei Kristo bon boton ana babaire Tamara are i karawa; ao bon Ana reirei naba. Ngkai ti kamwakura ara onimaki iroun Iesu Kristo ao Ana Mwakuri ni Kamaiu, ti waaki rake inanon kawain te berita ao man buokiia aomata bwa a na riki bwa ana reirei Kristo aika a kakaonimaki. Ti kona n riki bwa taan bwaibwai n abanuean Tamara are i karawa, are bon tokin te kakaonimaki inanon maiuakinan ana reirei Kristo. N aran Iesu Kristo, amen.