Tataro, E Mena Ikekei
I kaoi ngkami bwa kam na tataro n ataia bwa Tamara are i Karawa e mena ikekei, tataro bwa kam na rikirake n riki n ai Arona, ao tataro ni kaota Ana tangira nakoia tabeman.
Tariu ao mwaneu, I namakina te kimwareirei ngkai I kaeka nakon te wirikriki bwa N na taetae nakoia ataei!
Ataeinnaine ao ataeinimwaane, n te tabo are kam mena iai n te aonaaba, I tangiria n tibwaa te bwai teuana ma ngkami.
E tangiri ngkami Tamara are i Karawa! Ngkami bon Natina. E kinai ngkami. E tangiria ni kakabwaiai ngkami. I tataro ma nanou ni kabane bwa kam na namakina Ana tangira.
Kam tatangiria ni karekei bwaintangira? I kan taekinna nakoimi te bwaintangira ae e onoti are e a tia Tamara are i Karawa n angani ngkami bwa e na buoki ngkami. Bon te bwaintangira ae te tataro. Ai tamaroa te kakabwaia n te tataro! Ti kona n taetae nakon Tamara are i Karawa n tainako, n taabo nako.
Ngke e mena Iesu i aon te aba, E reireiniira bwa ti na tataro. E taku, “Bubuti, ao kona anganaki.”
Tera bwaintangira aika ko kona n tataro ibukiia? A mwaiti, ma n te bong aei, I tangiria n tibwai teniua:
-
Tataro bwa kona ataia.
-
Tataro bwa kona rikirake.
-
Tataro bwa e na kaotaki.
Ti a maroroakina teuana i mwin teuana.
Te moan, Tataro bwa kona Ataia
Tera ae ko riai n ataia?
Iai kunan te tataro are a aneneia ataein te Buraimwarii ni kabuta te aonaaba. E waaki ma te titiraki. Kam ataia bwa tera te kuna anne? Ngke arona bwa I rangi n ninikoria, I a bon aneneia naba ibukimi!
“Tamau are i Karawa, ko bon mena ikanne? Ao ko ongo ao ko kaekai aia tataro ataei?”
Kam kanga n ataia bwa Tamara are i Karawa e bon mena ikekei, e ngae ngke ko aki kona n Nooria?
E kaoko Beretitenti Russell M. Nelson bwa kona “bunnra nanom nakon Tamara are i Karawa. … Ao i mwiina kakauongo!” Ongora n am namakinna ao ake a roko n am iango.
Iai rabwatan Tamara are i Karawa ae e mimitonga ae te iriko ao te rii ao bon Taman tamneim. Ibukina bwa Tamara are i Karawa iai mwaakana n atai bwaai ni kabane, E kona n nooria natina ao n ongo ao ni kaekai aia tataro nako. Ko kona n ataia i bon iroum bwa E mena ikekei ao E tangiriko.
Ngkana ko ataia bwa Tamara are i Karawa e maiu ao E tangiriko, ko kona ni maeka ma te ninikoria ao te onimaki! “Tataro, E mena ikekei; taetae, E kakauongo.”
Ko a tia n namakina te maroa? N te bong teuana ngke onoua ana ririki tibura te aine ae Ashley, bon ti ngaia ae akea raraona n takakaro n te tabo n takakaro n te reirei. Ngke e tei ikekei, n namakina te aki boongana ao n akea ae nooria, e roko te iango ae onoti n ana iango: “Taninga! I aki maroa! Raou Kristo!” E katorobubua i nuukan te tabo n takakaro Ashley, e booti baina, ao e tataro nakon Tamara are i Karawa. Te tai are e kaurei iai matana, e tei ikekei ae bon ana roro n titirakinna ngkana e kan takakaro. E koreia Ashley, “Ti kakaawaki iroun te Uea, ao ti bon aki kona n tiku ni maroa.”
N tabetai ko kan ataia bwa bukin tera e riki nakoim te bwai ae kangaanga ke bukin tera e aki reke te kakabwaia are ko tataro ibukina. N angiin te tai te kabanea n tamaroa n titiraki n butiia Tamara are i Karawa bon tiaki bukin tera ma tera?
Ko uringnga ngke a bora ni baki Nibwaai ma ana utu ngke a mwananga n te rereua? Ngke a nako Nibwaai ma tarina ni kaeman ibukin kanaia, e maoto ana kai ni katebe Nibwaai. Ma e aki titiraki bwa bukin tera.
E karaoa ana bwai ni katebe ae boou Nibwaai ao e bubutia Tamana, Riaai, ia te tabo ae e na nako ni karekea iai te amwarake. E tataro Riaai, ao te Uea e kaota te tabo ae e na nako iai Nibwaai. E na kairiko Tamara are i Karawa ngkana ko butiia tera ae ko kona ni karaoia ao tera ae ko kona n reiakinna.
Te kauoua, Tataro bwa Kona Rikirake
E tangiria ni buokiko Tamara are i Karawa bwa kona rikirake! E kororaoi ana tangira nakoim n te aro are e kanakoa Natina, Iesu Kristo, bwa e na kaota arona ni maiu nakoira. E korakai Iesu, e mate, ao e manga uti bwa ti aonga ni kabwaraaki ara bure ao n rikirake n riki n ai Arona.
Ko tangiria n rikirake i nanon te taotaonannano ao te kokoaua? Ko tangiria n rikirake n te konabwai? Tao ko mama ao ko tangiria n rikirake n ninikoria. “Tataro, E bon mena ikekei”! Iroun Tamneina, e kona ni bitaki nanom, ao ko kona ni karekea te korakora.
Raraou ae boou Jonah e koreia, “I aki toki n raraoma i aon kawaiu nakon te reirei n te moaningabong. I raraoma ni bwaai n aron te rimwi, ni mwaninga te bwai teuana, ao karaoan te ukeuke. Ngke 10 au ririki, I waakina kakaraoan au tataro n au tai ni buti nakon te reirei ma tinau. I bubuti te ibuobuoki are I kainnanoia, ao I tataro ibukin au utu naba. I iangoi naba bwaai aika I kakaitau ibukiia. [Te tataro nakon Tamau are i Karawa] e buokai. N tabetai I aki namakina te kabebeteaki n te tai are I otinako iai man te kaa, ma n te tai are I roko iai n au umwanreirei, I namakina te rau.”
Ana onimaki Jonah e rikirake ngke e tataro ni katoa bong ao i mwiina e waaki nako.
Te kateniua, Tataro ni Kaotia
Ko kona n tataro ibukin te ibuobuoki bwa kona kaota ana tangira Tamara are i Karawa nakoia aomata. Rinanon Tamneina, e na buokiko Tamara are i Karawa ni kina temanna ae e nanokawaki bwa ko aonga ni kona ni karaua nanoiia. E kona ni buokiko ni kaota Ana tangira man kabwaraan aia bure tabeman. E kona n anganiko te ninikoria ni beku ibukin temanna ao n tibwaia nakoia bwa ngaiia natin te Atua. Ko kona ni buokiia aomata n ata Iesu ao Tamara are i Karawa ao n tangira n ai arom.
I nanon maiu I tataro bwa tamau e na riki bwa kain ana Ekaretia Iesu Kristo ibukiia Aika Itiaki ni Boong aika Kaitira. E ngae ngke I bon rang uarereke, I ataia bwa e na mwaiti ana kakabwaia ake e kona ni karekei. Ara utu e kona ni karekea te kakabwaia ni kabaeaki n akea tokina. Au utu, raraou, ao ngai ti tataro n tainako ibukina, ma e aki roko n te kaaina te Ekaretia. E aki kairoroa temanna Tamara are i Karawa bwa e na karaoa te rinerine. E kona n anganiira kaekaan ara tataro ni kawai riki tabeua.
Ngke I a bon ikawai, I karekea au kakabwaia n te tamanuea. N te kakabwaia e tuangai te tamanuea bwaai aika tamaroa ake I kona ni buoka iai au utu bwa e na ikotaki i karawa bwa N na riki bwa te banna ni katoto n ana euangkerio Iesu Kristo. Anne te bwai ae I kona ni karaoia!
E maiu Tamau ni karokoa 86 ana ririki. Nimaua te bong i mwiin matena, I karekea te kimwareirei n te namakin ae tabu. E tuangai Tamara are i Karawa rinanon te Tamnei bwa e tangiria tamau ni karekea te kakabwaia n ana euangkerio Iesu Kristo! I aki kona ni mwaninga te bong are I katorobubua iai ni katobibia te bao ni karea i nanon te tembora ma tariu ao mwaneu ni kabaeaki ma au karo. I a tia ni waaki n tataro ibukin te kakabwaia aei ngke I Buraimwari, ao I karekea ngke I a riki bwa te tibu te unaine.
Tao ko tataro ibukin kakabwaiakin am utu ao tabeman ake ko tangiriia. Tai kabwara nanom! Tamara are i Karawa e na kaota nakoim te bwai ae ko kona ni karaoia.
Tibwaa te bwai are ko tangiria ma Tamara are i Karawa. Ngkai ko bubuti ma nanom ibukin Ana ibuobuoki, kona karekea Tamneina bwa e na kairiko. Te tataro ni katoabong e na kaona nanom n ana tangira Tamara are i Karawa ao Iesu Kristo. Aio are na buokiko bwa kona tangiria n Iririia ni kabanea bongin maium!
Iangoia bwa tera ae e na riki ngkana ataei ni kabane i Aberika, Atia, Eurobe, Amerika Maiaki, Amerika Meang, ao Aotiteria a tataro ni katoa bong. Te aonaaba ae bwanin e na kakabwaiaki n ana tangira ae bati te Atua!
I kaoi ngkami bwa kam na tataro n ataia bwa Tamara are i Karawa e mena ikekei, tataro bwa kam na rikirake n riki n ai Arona, ao tataro ni kaota Ana tangira nakoia tabeman. I ataia bwa E maiu ao e tangiri ngkami. “Tataro, e mena ikekei.” N aran Iesu Kristo ae tabu, amen.